Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 1 , 2016

 MUTU WA MULONG WA PA CHIBUR | MULONG WAK KWIKAL MWIN KASHINSH?

Mulong Wak Chidi Cha Usey Kwikal Mwin Kashinsh

Mulong Wak Chidi Cha Usey Kwikal Mwin Kashinsh

“Twij kal anch tukwet kom katokila, tukat kusot kushakam ni kashinsh mu yom yawonsu.”—Hebereu 13:18, TMK.

Mu Bibil, dizu dia Grek dikarumwinau yisu yimwing anch “win kashinsh” dirumburikin “yom yimwing yidia yiwamp kamu.” Dikutwish kand kurumburik chom chimwing chiwamp nakash chimekena mu mashakamin ma muntu.

In Kristu akwatin nich usey mazu mapepilau mafundau kudi kambuy Paul malondina anch: “tukat kusot kushakam ni kashinsh mu yom yawonsu.” Chinech chirumburikin ik?

KURISH NJIT

Antu avud akat kwitalang mu dikalash pamanch pin pawonsu kurutu kwa kuya ndond yidia antu avud. Mulong wak? Akatin antu ayimana anch awapin. Chad kudi chom chimwing chikweta usey kusutamu mutapu wa kukil nswich ni mutapu wa kudjal. Pakwez, wuntu wetu wa mukach ukutwish ap bwat kuwejinaku usey ku mutapu tumekena.

Dizu dia Nzamb ditulejin patok anch tukwet ching yitongijok ya kusal uyimp. Disambishil 8:21 ulondin anch: “yitongijok ya muchim wa muntu yayipa kal kwau kudiok ku kukul kwend.” Mwamu, mulong wa kwikal mwin kashinsh, tufanyidin kurish njit ni yitongijok yetu ya chivadik yiyimp. Kambuy Paul warumburila mutapu warishay amwinend njit ni chitil, walonda anch: “Mu muchim wam nikat kusangar mulong wa yijil ya Nzamb. Pakwez mu mujimbu wam mudi yom yikwau yikata kurish nich yom yinikatila nich manangu mam. Ukash wa yom yiney ya yitil yidia mu mujimbu wam yikat kwinkas mudi muntu wa rukan.”—Rom 7:22, 23.

Chilakej, anch muchim wetu watubachik kusal yom yiyimp ni anch tukwet chibachikin chikash cha kwikal aburedina win kashinsh, tufanyidinap kwikal asuk a yibachikin ya muchim wetu. Tufanyidin kutond chom cha kusal pa mulong winou. Anch twatond kulik kulondul yitongijok yiyimp, tukutwish kushal in kashinsh ap anch in kuburen kashinsh atunyingumukin.

KUWIN NJIT

Mulong wa kwikal in kashinsh, tufanyidin kwikal ni yijil ya piur nakash. Cha ushon, antu avud akat kusutish chisu chivud ku kukwat mipak yimedina pa yom yikatinau ap yitonginau ayinau. Mudi chibudikin, akat kulond uvud wa yom wa makasu mulong wa kutaninamu kukwatijan nich mashakamin mau. Buku The (Honest) Truth About Dishonesty urumburil anch: “Chisu chawonsu, tukat kwiy djat ni kusal usu chakwel antu itiyija anch tudi in kashinsh.” Pakwez, kuding mutapu uwamp ukutwisha kutukwash kukwat mupak—anch ndond kanang—itiyin kuburen win kashinsh? Mwaning, udiaku.

Ma miliyon ma antu mu mangand amen kal anch Bibil ukat kupan ukwash uswiridinau. Bibil ukwet yijil ya piur nakash yakad kutwish kwilikej. (Kuseng 19:7) Upanin umutakel uwamp mu milong mudi mwom wa dijuku, mudimu, mikadil, ni yom ya mu spiritu. Wapanin kal ukwash mu mivu yivud. Yijil ni yany yend yikat kuyikwash antu a michid yawonsu, ulombu wa chikit, ni ngand yawonsu. Kusutil ku kushinshikin Bibil, kutongijokin pa yom yilondinay, kusadin yiyul  yend, tukutwish kufumb muchim wetu kwikal nich win kashinsh ni utentamina.

Chikwau kand, chidi cha usey kuwin njit turishina nich kuburen win kashinsh kulik ching kwikal ni ronganyin rakin ra Bibil. Kupwa, tushich mu mangand maburedina mikadil yiwamp matubachikina kwitiy yany yakad kuwanyin. Chawiy lel, tufanyidin kumulembil Nzamb chakwel atukwasha. (Filip 4:6, 7, 13) Mu kusal mwamu, tukutwish kwikal ni kutakaman mulong wa kusal yom yitentamina ni kwikal in kashinsh mu yom yawonsu.

DIFUT DIDIOKILA KU WIN KASHINSH

Hitoshi, twajimbulang mu mutu wa mulong wa kusambish, wataninamu mu mwikadil wend wa kwikal mwin kusal mudimu ukweta win kashinsh. Usadin katat mudimu ni mukurump wend usangaredina win kashinsh wend. Hitoshi ulondin anch “Nikwet musangar nakash, mulong katat nikwet mudimu winkwashina kwikal ni kom kadia zwang.”

Antu akwau niyawiy ading ni chitongijok mudi chinech. Shinshikin yilakej yimwing ya antu ataninamu mu kusadil chany cha Bibil cha “kushakam ni kashinsh mu yom yawonsu.”

  • Kom Kadia Zwang

    “Nalika shikol ni mivu 13 mulong wa kusambish kusal mudimu nau ij. Mudi chibudikin, yom 95 pa chitot yinading nikweta nayitambula ku kuburen win kashinsh. Kupwa angata, am ni nfumwam twasambisha kwilej Bibil nau Atuman a Yehova. Twileja anch Yehova * Nzamb ukisin mwikadil wa kuburen win kashinsh, chawiy twakwata mupak wa kuswimp mashakamin metu. Mu muvu wa 1990 twipana kudiay Yehova ni twatambula dibatish mudi Atuman a Yehova.”—Jinswir 6:16-19.

    “Pakuru, chikumbu cham chading chizwil too ni yom ya wij, pakwez katat mwikil kand yom yiney; ni chinech chinkwashin kwikal ni kom kadia zwang. Anch natongin piur pa mivu yam yivud ya kuburen win kashinsh, nimujikitishin Yehova mulong wa riy rend rijim. Chisangareshin nakash kulal dichuku diawonsu pa kwijik anch Yehova ukwet musangar mulong wamam.”—Cheryl, Irland.

    “Chisu chajinguninay mukurump wam wa mudimu anch nalika kusend nfalang ja kukatul nich milamu kudi mwin kuland, wanleja anch: ‘Nzamb wey ukusadin kwikal muntu uchingejidinau! Chidi kamu chiyukish chijim nakash kwikal ni yeyey mu sosiete wetu.’ Kwikal mwin kashinsh mu yom yawonsu kwankwasha kwikal ni kom kadia zwang ku mes ma Yehova Nzamb. Kwinkwashin kand kuyikwash in mu dijuku diam ni antu akwau kusal niyau mwamu.”—Sonny, Hong Kong.

  • Chisambu mu Manangu

    “Nisadin mudi nkwash wa mwin kutakel ku bank mujim. Mu mudimu winou, kwikal mpich kudi kwa usey nakash kusutamu kwikal mwin kashinsh. Chitongijok chipalangena nakash chidi anch: ‘Uyimp udi kwisu wa kuburen win kashinsh anch kukukwashin kwikal mpich ap kwikal ni nfalang jivud?’ Pakwez, mu kwikal ni win kashinsh, nikwet chisambu mu manangu. Nisadin usu wa kwikal mwin kashinsh ni kurish nich milong yawonsu yikushikena. Amakurump am a mudimu ij anch nikutwishap kuyidimb ap kudimban mulong wawawiy.”—Tom, États-Unis.

  • Kalimish

    “Ntakel wam wa mudimu wankasikesha chakwel nidimbana piur pa yom yimwing ya mudimu yashadika, pakwez nalika. Chisu chayikwatau ij, mukurump wam wa mudimu wanjikitisha mulong wa win kashinsh wam. Chitin kutakaman mulong wa kwikal mwin kashinsh mu mangand maburedina win kashinsh. Pakwez kwinsudiel, akutwish kutuchingejin nakash ni kutulimish.”—Kaori, Japon.

Kom kadia zwang, chisambu mu manangu, ni kalimish—yawiy yiyukish yimekeshina anch chidi kamu cha usey nakash kwikal mwin kashinsh. Umenap anch chidi chakin?

^ par. 18 Yehova didi dijin dia Nzamb dilejinau mu Bibil.