Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 1 , 2016

Mwiku Uletin Uman ku Mwiku Wetwetu

Mwiku Uletin Uman ku Mwiku Wetwetu

“Mwiku Utumbila ukat kulet uman ku mwiku wetwetu anch, etu tudi an a Nzamb.”—ROM 8:16.

MIMINY: 5, 14

1-3. Yom ik yasala dichuku dia Pentekot kwikal dia pakampwil, ni mutapu ik wawanyisha yinship yiney yom yatakelau kulond mu Mifund? (Tal chipich cha kwinsambishil.)

DIADING Diarubing pamanch mu Yerusalem. Dichuku dined diading dia pakampwil ni dia musangar. Antu asala musambu wa Pentekot, wadinga musambu utumbila wa kwinsambishil kwa kwangul tidiku. Pamanch pinapa ku tempel, mwin kupesh mujim walambula yakupesh ya pichuku pichuku. Chad, pa muten wa chidivu, walambula mabot maad makweta chivish masalau nich tidiku wangulau wa kusambish, ap mabuj ma kusambish. Mwin kupesh mujim wazwiya mabot mutambu ni mutambu kurutu kwa Yehova. Wading Pentekot wa muvu wa 33.—In Levi 23:15-20.

2 Muvu ni muvu, mu tunan twa mivu, mwin kupesh mujim wapanang yakupesh ya mutapu winou. Yakupesh yiney yading yikwatijadin nakash ni chom chimwing cha usey nakash chashikena ku Pentekot wa muvu wa 33. Ni chashikena kudi in kwilej a Yesu 120 padingau akat kulembil pamwing mu kapalakany ka piur mu Yerusalem. (Midimu 1:13-15) Mivu yitot chinan kurutu, muprofet Jowel wafunda piur pa yom yiney. (Jowel 2:28-32; Midimu 2:16-21) Yom yashikena yiney yading ya usey mutapu ik?

 3 Tang Midimu 2:2-4. Pa dichuku dia Pentekot wa muvu wa 33, Nzamb wayinkisha in Kristu inay mwiku wend utumbila, ni ikala azizidilau many. (Midimu 1:8) Chad, yisak ya antu yayikumangena, ni in kwilej asambisha kulond yom yishimokishina yamanau ni yateshau. Kambuy Pita warumburila yom yashikena ni mulong wak yading ya usey. Chawiy, wayileja antu anch: “Chifanyidin muntu ni muntu akarumuk kudiokal ku yitil yend, ni kutambul dibatish mu dijin dia Yesu Kristu chakwel akukulikishinany yitil yen. Chad ukez kutambulany Mwiku Utumbila, ndiy kamu upanyinay Nzamb kwa riy.” Dichuku dinidia, antu piswimp ni 3000 atambula dibatish, ni atambula niyawiy mwiku utumbila.—Midimu 2:37, 38, 41.

4. (a) Mulong wak tufanyidin kushinshikin nakash yom yashikena ku Pentekot? (b) Yom ik yikwau ya usey yashikena pa dichuku dinidia mu mivu yivud pakur? (Tal mazu ma kwinsudiel.)

4 Yasalangay mwin kupesh mujim ni milambu yapanangay ku Pentekot mwawonsu yamekeshang chom ik? Mwin kupesh mujim wamumekeshang Yesu. Mabot mading kuyimekesh in kwilej azizidilau many a Yesu. In kwilej inay ayitonda pakach pa antu akayitil ni ayitazuka anch “mabuj ma kusambish.” (Jakobu 1:18) Nzamb wayitiyija antu inay mudi anend ni wayitonda chakwel ayikela mudi ant pamwing ni Yesu mwiur mudi chikunku cha Want wa Nzamb. (1 Pita 2:9) Yehova ukusadil Want wend mulong wa kuyiyukish antu awonsu aziyidina. Chawiy lel, ap anch tukwet ruchingej ra kwikal mwiur pamwing ni Yesu ap mu paradis panap pansh, Pentekot wa mu muvu wa 33 ukwet usey nakash kudi etu. [1] —Tal mazu ma kwinsudiel.

YOM IK YIKATA KUSHIKEN CHISU CHIKATAU KUMUZIZIL MUNTU MANY?

5. Mutapu ik twija anch antu awonsu azizilau many kayizizilap ching mu mutapu umwing?

5 In kwilej ading mu kapalikany ka piur kafanyinap kuvuramen dichuku dinidia. Muntu ni muntu pakach pau wamana mudi mizwizu ya kasu pa mitu yau. Yehova wayinkisha ukaliweny wa kulond mu mazu makwau. Ading akwet kashinsh anch ayizizila many nich mwiku utumbila. (Midimu 2:6-12) Pakwez, yom yishimokishena yiney yashikenap kudi in Kristu awonsu chisu chayizizilau many. Chilakej, Bibil kalondinap anch chom kanang mudi mizwizu ya kasu yamekana pa mitu ya in kulejan tunan chisu chayizizilau many ku Yerusalem kupwa kwa dichuku dinidia. Ayizizila many chisu chatambulau dibatish. (Midimu 2:38) Chikwau kand, kadiap in Kristu awonsu ikala azizidilau many chisu chatambulau dibatish. In Samaria ikala azizidilau many chisu chikemp kupwa kwa kutambul dibatish. (Midimu 8:14-17) Ni chom chakad kusadikang, Korney ni antu ading mu chikumbu chend ikala azizidilau many kurutu kwa kutambul dibatish.—Midimu 10:44-48.

6. Chom ik chikatau kutambul azizidilau many, ni chom chinech chikat kwikal ni usu ik padiau awiy?

6 Chimeken patok anch in Kristu akat kwijik anch adi azizidilau many mu mitapu kushalijan. Amwing akutwish kwijik kapamp kamwing anch ayizizil kal many kudi Yehova. Akwau akutwish kwijik mu kusut kwa chisu. Pakwez, kambuy Paul warumburila yom yikata kushiken kudi muntu ni muntu pakach pau. Walonda anch: “En wamwitiyijinany kal Kristu, chad Nzamb wakwinkishany Mwiku Utumbila mudi mwashilayimu kwikal chijingidij anch udiany aend. Mulong tukwet Mwiku Utumbila, tukwet chizu cha kushilamu kwa Nzamb.” (Efes 1:13, 14) Chawiy Yehova ukat kusadin mwiku wend utumbila mulong wa kumekesh patok anch wayitond kal in Kristu inay mulong wa kuya mwiur. Mu mutapu winou, mwiku utumbila udi “chizu cha kushilamu,” ap uman kudi awiy umekeshina anch mu machuku ma kurutu akushakam mwiur kulik pansh.—Tang 2 Korint 1:21, 22; 5:5.

7. Chom ik chifanyidinay kusal mwin Kristu mwawonsu uzizidilau many mulong wa kutambul difut mwiur?

7 Anch mwin Kristu udi uzizidilau many, chinech chirumburikin anch ukutambul kapamp kamwing difut? Bwat. Ukwet kashinsh  anch amutondin mulong wa kuya mwiur. Pakwez, ukutambul difut diend ching anch washal ushinshamena kudiay Yehova. Pita warumburila chom chinech anch: “Chawiy anamakwam in Kristu, wejanyaku mushiku wen nakash, chakwel ukushinshikany nawamp kutazuk kwakutazukanyau ni kutond kwakutondanyau kudi Nzamb. Anch wasalany mwamu kiukez kuwanyap mu yitil. Chad akez kukwakany nawamp mu Want wa chikupu wa Nsalejetu, ndiy kamu Mupandish wetu Yesu Kristu.” (2 Pita 1:10, 11) Chawiy lel, mwin Kristu mwawonsu uzizidilau many kafanyidinap kulik chom chawonsu chimukangesha kumusadil Yehova. Ap anch amutazuka chakwel aya mwiur, anch kashadinap ushinshamena, kakutambulap difut.—Hebereu 3:1; Kujingunik 2:10.

MUTAPU IK UKATAU KWIJIK?

8, 9. (a) Mulong wak chikasiken kudi antu avud kwijik chikata kushiken anch muntu amuzizil many? (b) Mutapu ik ukatay muntu kwijik anch amutazukin kal mulong wa kuya mwiur?

8 Chikutwish kukasikan kudi atushalapol avud a Nzamb nlel kwijik yikata kushiken anch Nzamb wamuzizil mwin Kristu many. Chinech chidi chakin, mulong ayinau kandikal ayizizilangap many. Nzamb wayitanga antu chakwel ashakama chikupu pa divu, kulik mwiur. (Disambishil 1:28; Kuseng 37:29) Pakwez, Yehova watonda antu amwing chakwel ikala ant ni in kupesh mwiur. Chawiy, anch wayizizil many, ruchingej rau ni mutapu wau wa kutong ukat kuswimp, mwamu akat kuchingel kwikal ni mwom mwiur.—Tang Efes 1:18.

9 Chad mutapu ik ukutwishay muntu kwijik anch amutondang kal mulong wa kuya mwiur? Shinshikin chayilejay Paul in Kristu azizidilau many a ku Rom, ading ‘atazukinau kwikal atumbila.’ Wayileja anch: “Chawiy Mwiku watambulanya kiwadingap wa kukwikadishany aswik ap wa kukwovishany kand wom, bwat. Pakwez Mwiku Utumbila ukat kukwikadishany an a uswan a Nzamb. Chad ku ukash wa Mwiku Utumbila kwawiy kutukata kumutazukin Nzamb anch: ‘Tatuku! Tatukwam!’ Mwiku Utumbila ukat kulet uman ku mwiku wetwetu anch, etu tudi an a Nzamb.” (Rom 1:7; 8:15, 16) Nich mwiku wend utumbila, Nzamb ukat kumekesh patok anch muntu kampand ap kanang amutazukin kal mulong wa kuyikel mudi mwant mwiur pamwing ni Yesu.—1 Tesalonik 2:12.

10. 1 Yohan 2:27 urumburikin ik palondinay anch mwin Kristu uzizidilau many kakwetap kuswir kwa kumulej kudi muntu mukwau?

10 Antu atambwila kutazuk kwa Nzamb kakwetap kuswir kwa muntu mukwau ufanyidina kuyilej anch adi azizidilau many. Yehova ndiy ukata kuyinkish kashinsh. Kambuy Yohan wayileja in Kristu azizidilau many anch: “En akuzizidilany kal many kudi umwing utumbila, ni yen wijany kal yom yawonsu.” Wayileja kand anch: “Pakwez mudi panizizidilau many en watambulany kal mazu mend, mashakama mu en, kiuswiridilanyip muntu anilej; pakwez mudi iwend uzizidilau many ukat kunilej yom yawonsu yidia yakin, ni yakad makasu, mudi mwanilejanyau, shakamany mwindiy.” (1 Yohan 2:20, 27, TMK) In Kristu azizidilau many akwet kuswir kwa kwikal afundishinau kudi Yehova mudi in Kristu awonsu. Pakwez, kakwetap kuswir kwa muntu mwawonsu mulong wa kuyilej anch adi azizidilau many. Yehova wasadila usu wend upandikena, mwiku wend utumbila, chakwel ijika patok anch adi azizidilau many!

‘AVADIKIN KAPAMP KAKWAU’

11, 12. Chom ik chikutwishay kwiyipul mwin Kristu uzizidilau many, pakwez katadikinap chom ik?

11 Anch in Kristu ikal azizidilau many nich mwiku utumbila, aswimpin nakash. Pakwez, Yesu walonda anch ‘avadikin kapamp kakwau.’ (Yohan 3:3, 5) Chad warumburila anch: “Kangal washimwok mulong nakulejang anch, ufanyidinany en awonsu kuvadik kapamp ka chaad. Rinkind ukat kupepet mudi musotilay. Ey ukat kutesh chonyin chend, pakwez kiwijap kudiokilay ap kuyilay. Chidi kand mwamu kudi muntu mwawonsu uvadikina ku ukash wa Mwiku Utumbila.”  (Yohan 3:7, 8) Chimeken patok anch, chikasiken kamu kurumburil nawamp mutapu ukatau kwiyov azizidilau many kudi antu akad kuzizil many. [2]—Tal mazu ma kwinsudiel.

12 Antu amwing azizidilau kal many akutwisha kwiyipul anch, ‘Mulong wak Yehova wantonda am kulik muntu mukwau?’ Ukutwish kwiyipul anch uwanyidin mulong wa chisend chinech. Pakwez, katadikinap anch Yehova ndiy wamutonda. Chinyim ni chinech, ukat kwov musangar ujim nakash ni ukwet kujikitish kujim mulong wa chipan chinech. Azizidilau many akat kwiyov mudi mwiyovay Pita palonday anch: “Tumujikitishany Nzamb Tatukwend wa Nsalejetu Yesu Kristu! Ku riy rend rijim twavadika kapamp kakwau mulong wa kuvumbuk kwa Yesu Kristu kwikal kand mwom. Mulong wa chom chinech tukwet ruchingej rujim ra kashinsh. Tuchingejin uswan wakad kuvund, ap kuyip, ap kusheshik ulaminau mwiur kudi Nzamb mulong wenen.” (1 Pita 1:3, 4) Patanginau azizidinau many mazu minam, ij chakin kamu anch Tatukwau ukat kwambamb nau pakampwil.

13. Mutapu ik ukata kuswimp mutapu wa kutong wa muntu chisu chikatay kwikal uzizidilau many nich mwiku utumbila, ni kuswimp kwinoku kukat kulet chom ik?

13 Kurutu kwa Yehova kuyitazuk in Kristu inay mulong wa kuya mwiur, ading akwet ruchingej ra kushakam chikupu pa divu. Ading akat kuchingel chisu chikezay Yehova kusal divu kwikal paradis ni kudiosh uyimp wawonsu. Pamwing ap ading akat kutong mutapu ukuyakau anamakwau ap arund nau afa kal. Ni ading akat kuchingel chakwel atunga yikumbu ni kushakamamu ap kukun mitond ni kudia mabuj mau. (Isay 65:21-23) Mulong wak asambisha kutong mutapu windjing? Aswimpa mulong wa uvud wa milong ap mar mavud mamanau? Akwata mupak kapamp kamwing anch chiwapinap kushakam pa divu chikupu ni kakwikalap ni musangar pansh? Ap, asotin kwau kuya mulong wa kwijik mashakamin ma mwiur? Bwat kwau. Chinyim ni chinech, Nzamb ndiy watonda mwamu mulong wawawiy. Payitazukinay, Nzamb ukat kusadil mwiku wend utumbila mulong wa kuswimp mutapu wau wa kutong ni difut dichingedinau.

14. Mutapu ik ukatau kwiyov antu azizidilau many piur pa mwom wau panap pansh?

14 Chinech chirumburikin anch muntu uzizidilau many usotil kwend kufa? Paul urumburil mutapu ukatau kwiyov azizidilau many. Wilikeja mujimbu wau ni mwinkand ni walond anch: “Pituchidia aom mu minkand ya panap pansh, tukat kwinan nakash. kichidiap mudi tusotil kudjol mijimbu yitudia nich, pakwez tusotil kudjal mijimbu yisu ya mwiur, chakwel mijimbu yetu yikata kufa yikwandam mu mwom wa chikupu.” (2 Korint 5:4) In Kristu inay kasotinap kufa. Akat kusanger mwom ni asotin kumusadin Yehova dichuku diawonsu pamwing ni antu a mu dijuku diau ni arund nau. Pakwez, chikalap nchik yom yisadinau, avurikin yom yayikanau kal kudi Nzamb mulong wa machuku ma kurutu.—1 Korint 15:53; 2 Pita 1:4; 1 Yohan 3:2, 3; Kujingunik 20:6.

YEHOVA WAKUTAZUKIN KAL?

15. Chom ik chakad kumekesh anch muntu kamuzizidilap many nich mwiku utumbila?

15 Pamwing ap ukat kwiyipul anch Yehova wakutazukin kal mulong wa kuya mwiur. Anch wiyovil mwamu, tongin piur pa yipul yiney ya usey: Wiyovil anch ukwet mushiku nakash mu mudimu wa kulejan? Ukweting musangar wa kwilej Bibil ni kwilej “yom yijingamina nakash yatenchikay Nzamb”? (1 Korint 2:10) Wiyovil anch Yehova wakwinkishin yibudikin yiwamp mu mudimu wa kulejan? Usotin kusal yom yikatinay Yehova kusutamu yom yawonsu? Ukwet rukat rikurikina mulong wa antu akwau ni wiyovil anch ukwet chisend chijim nakash cha kuyikwash chakwel amusadila Yehova? Ukwet uman umekeshina anch Yehova ukat kukukwash mu mitapu yivud mu mwom wey? Anch wakul anch  mwaning ku yipul yiney, ov, chinech chirumburikin anch akutazukin kal mulong kuya mwiur? Bwat kwau. Mulong wak? Mulong atushalapol awonsu a Nzamb akutwish kwiyov mutapu winou, ikala azizidilau many ap bwat. Ni kusutil mwiku wend utumbila, Yehova ukutwish kuyinkish atushalapol end awonsu usu wa chilik chimwing, chikalap nchik difut diau. Pakwez, anch wiyipwil anch ukuya mwiur, chinech chirumburikin anch kandikal akutazuka. Antu atazukau kal kudi Yehova kakatap kwiyipul pa chom chinech! Ij kwau!

16. Mutapu ik twija anch kadiap antu awonsu atambula mwiku wa Nzamb atazukau mulong wa kuya mwiur?

16 Mu Bibil, mudi yilakej yivud ya antu ashinshamena atambula mwiku utumbila wa Yehova pakwez kayap mwiur. Chilakej chimwing chidi cha Yohan Mubatish. Yesu walonda anch kwadingap muntu mujim kumusutamu Yohan, pakwez walonda kand anch Yohan kafanyinap kuyikel mudi mwant mwiur. (Mateu 11:10, 11) David niyend amutakela kudi mwiku utumbila. (1 Samwel 16:13) Mwiku utumbila wamukwash chakwel atesha yom yikurikina piur pa Yehova ni wamutakela kand mulong wa kufund yikunku ya Bibil. (Marko 12:36) Ap mwamu, kambuy Pita walonda anch David ‘kayap mwiur.’ (Midimu 2:34) Yehova wasadila mwiku wend utumbila mulong wa kuyinkish antu inay usu chakwel asala yom yishimokishena, pakwez kausadinap mulong wa kuyitazuk kuya kushakam mwiur. Ov, chinech chirumburikin anch kadingap antu ashinshamena ap awanyidina mulong wa kuyikel mwiur? Bwat kwau. Chidi kwau anch Yehova ukuyichirish ku mwom mu paradis panap pansh.—Yohan 5:28, 29; Midimu 24:15.

17, 18. (a) Difut ik dichingedinau atushalapol avud a Nzamb nlel? (b) Yipul ik tukushinshikina mu mutu wa mulong ulondwilaku ou?

17 Atushalapol avud a Nzamb nlel kakuyap mwiur. Mudi Aburaham, David, Yohan Mubatish, ni amakundj ni amband avud a pasak, achingedin kushakam pa divu chisu chikuyikela guvernema wa Nzamb padiau awiy. (Hebereu 11:10) Kudi antu 144000 akuyikela pamwing ni Yesu mwiur. Pakwez, Bibil ulondin piur pa ‘atushal’ a azizidilau many achidia panap pansh mu chisu chinech cha nsudiel. (Kujingunik 12:17) Pakwez avud a pakach pa azizidilau many 144000 afil kal ni adi mwiur.

18 Pakwez, anch muntu umwing walond anch udi uzizidilau many, chom ik chifanyidinau kusal antu akweta ruchingej ra kushakam pa divu? Anch muntu umwing wa mu chikumangen chen wasambish kudia mukat ni kuna nviny ku Chivurikish, mutapu ik tufanyidina kumuman? Ni chikwikal nchik anch uvud wa antu alondina anch adi azizidilau many udandamedin kuya kurutu? Ufanyidin kwov wom piur pa chinech? Tukwakul ku yipul yiney mu mutu wa mulong ulondwilaku ou.

^ [1] (paragraf 4) Musambu wa Pentekot ausalang pamwing ap mu machuku mamwing ni mamwinkishau Moses Yijil ku mukandu wa Sinay. (Kubudik 19:1) Pamwing ap Moses wayandjika in Isarel mu manswik ma Chijil dichuku dimwing dia muvu ni diayandjikay Yesu in kwilej azizidilau many mu manswik masu.

^ [2] (paragraf 11) Mulong wa jinsangu piur pa chirumburukina kuvadik kapamp kakwau, tal Chinong cha Kalam cha 1 ngond wa 5, 2009, paj 3-11.