Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 1 , 2016

Kusal Mudimu Pamwing ni Nzamb—Kukat Kulet Musangar

Kusal Mudimu Pamwing ni Nzamb—Kukat Kulet Musangar

“Mulong etu tukat kusal mudimu pamwing nend Nzamb, twakulembijekany chakwel kangal washadishany ranaken ra Nzamb chamwamu.”—2 KORINT 6:1.

MIMINY: 28, 14

1. Ap anch Yehova udi Muntu wa Piur nakash, uyitazukin antu akwau kusal chom ik?

YEHOVA udi Muntu wa Piur nakash. Watanga yom yawonsu, ni ukwet manangu ni usu yakad musul. Kupwa kwa kumukwash Job chakwel atesh chom chinech, Job wamwela anch: “Nij anch, ey ukutwish kusal yawonsu, kwikil chom chikukukasikena kusal.” (Job 42:2) Yehova ukutwish kusal chom chawonsu chisotinay kusal pakad ukwash wa muntu ap umwing. Pakwez, ukat kumekesh rukat pa kuyitazuk antu akwau kusal nend mudimu pamwing chakwel awanyisha rutong rend.

2. Yehova wamwita Yesu chakwel asala mudimu ik wa usey?

2 Nzamb wamutanga Mwanend, Yesu, kurutu kwa kutang muntu mwawonsu ap chom chawonsu. Chad, Yehova witiya chakwel Mwanend amukwasha kutang yom yikwau yawonsu. (Yohan 1:1-3, 18) Kambuy Paul wafunda piur pa Yesu anch: “[Kusutil] ndiy Nzamb watanga yom yawonsu yidia mwiur ni yidia pansh, yom yimekena ku mes, ni yakad kumekan, pamwing ni yishimushimu yikweta  ukash yikata kuyikel nich ulabu ni dikand. Nzamb watangila yom yawonsu mwi ndiy ni mulong wendendiy.” (Kolosay 1:15-17) Chawiy Yehova kamwinkishap ching Mwanend mudimu wa usey, pakwez wayileja antu akwau piur pa chom chinech. Chisend chiwamp mud ik!

3. Yehova wamwita Adam kusal chom ik, ni mulong wak?

3 Yehova wayita kand antu chakwel asal nend mudimu pamwing. Chilakej, witiya anch Adam ayipila annam majin. (Disambishil 2:19, 20) Tongin pa musangar wovay Adam pa kusal mudimu winou! Wileja nawamp mutapu ukatau annam kutal ni yisalijok yau, ni watonda majin mulong wa annam awonsu. Yehova ndiy watanga annam awonsu, chawiy ndiy amwinend wafanyina kuyipil awonsu majin. Pakwez, wamekesha anch umukatin Adam nakash pa kwitiy chakwel apila annam majin. Nzamb wamwinkisha kand Adam chisend cha kusal divu diawonsu kwikal paradis. (Disambishil 1:27, 28) Pakwez, Adam wakwata mupak wa kulik kusal mudimu pamwing ni Nzamb, ni chinech chaleta mar nakash kudi ndiy ni kudi anend awonsu.—Disambishil 3:17-19, 23.

4. Mutapu ik wasalau antu akwau mudimu pamwing ni Nzamb mulong wa kuwanyish rusot rend?

4 Kupwa, Nzamb wayita antu akwau chakwel asala mudimu pamwing nindiy. Nowa watunga waat wapandisha mwom wend ni wa dijuku diend chisu cha Mabeb. Moses wadiosha muchid wa Isarel mu usuk wa Idjibit. Joshua wayitakela in Isarel djat ni mwi Ngand ya Kushilamu. Salomon watunga tempel mu Yerusalem. Mariy wikala makwend a Yesu. Antu inay awonsu ashinshamena ni akwau avud asala mudimu pamwing ni Yehova mulong wa kuwanyish rusot rend.

5. Ku mudimu ik tupanina ukwash, ni Yehova ukatin anch twipana mu mudimu winou? (Tal chipich cha kwinsambishil.)

5 Nlel unou, Yehova utwitin kusal yawonsu tukutwisha kusal mulong wa kupan ukwash ku Want wend. Kudi mitapu yivud tukutwisha kumusadil Nzamb. Ap anch etu awonsu tukutwishap kumusadin mu mutapu umwing, etu awonsu tukutwish kulejan rusangu ruwamp ra Want. Yehova wafanyina kusal mudimu winou amwinend. Wafanyina kuyilej antu pa divu kapamp kamwing kudiokal mwiur. Yesu walonda anch Yehova ukutwish ap kusal anch mayal mayileja antu piur pa Mwant wa Want Wend. (Luka 19:37-40) Pakwez Yehova witiya anch twikala in ‘kusal mudimu pamwing nend.’ (1 Korint 3:9) Kambuy Paul wafunda anch: “Mulong etu tukat kusal mudimu pamwing nend Nzamb, twakulembijekany chakwel kangal washadishany ranaken ra Nzamb chamwamu.” (2 Korint 6:1) Kadi katumb kajim nakash ka kusal mudimu pamwing ni Nzamb. El tushinshikinany mayingishin mamwing masadina anch kusal mudimu pamwing ni Nzamb kutuletidin musangar ujim.

KUSAL MUDIMU PAMWING NI NZAMB KUKAT KUTULETIN MUSANGAR

6. Mutapu ik warumburilay mwan kapokal wa Nzamb piur pa mutapu wiyovangay pa kusal mudimu pamwing ni Tatukwend?

6 Kusal mudimu pamwing ni Nzamb kukat kulet musangar kudi atushalapol a Yehova. Kurutu kwa kwez pa mangand, Mwan kapokal wa Nzamb walonda anch: “Yam manangu kantangau kudi [Yehova] pa kusambish kwa midimu yend. . . . Nadinga nend pamwing mudi mwant wa mudimu. Namusangarishanga pichiku ni pichiku, nasangaranga kand kurutu kwend machuku mawonsu.” (Jinswir 8:22, 30) Pasalay Yesu pamwing ni Tatukwend, wading ni musangar mulong wasala yom yivud ni wading wija anch Yehova umukatin. Pakwez chidi nchik piur petwetu?

Mudimu ik ukwau usangareshina tukutwisha kusal kusutamu kumufundish muntu uyakin? (Tal paragraf 7)

7. Mulong wak mudimu wa kulejan ukat kutuletin musangar?

7 Yesu walonda anch tukwet musangar anch twapan ni anch twatambul. (Midimu  20:35) Chatuletina musangar chisu twatambula uyakin, pakwez mulong wak chikat kutuletin musangar anch twalejan uyakin kudi antu akwau? Mulong tukat kuyiman anch akwet musangar wakin pakatau kutesh yifundishinay Bibil ni kusambish urund ni Nzamb. Tukwet musangar pitukata kuyiman akat kuswimp mutapu wau wa kutong ni mashakamin mau. Mudimu wa kulejan udi wa usey nakash ni udi mudimu usangareshina tufanyidina kusal. Ukat kuyikwash antu kwikal arund a Nzamb chakwel atambula mwom wa chikupu.—2 Korint 5:20.

8. Yom ik yalondau antu amwing piur pa musangar wa kusal mudimu pamwing ni Yehova?

8 Pitukata kuyikwash antu akwau kwilej piur pa Nzamb, twij anch tukat kumusangaresh Yehova ni anch ukwatin nich usey usu tusadina mulong wa kumusadin. Chom chinech chikat kutuletin kand musangar. (Tang 1 Korint 15:58.) Marco, udia mu Italie, ulondin anch: “Nikwet musangar nakash pa kwijik anch nimusadidin Yehova mu mutapu uwanyidina ni nimusadidinap muntu ukutwisha kuvuramen yom nimusadidina.” Franco niyend usadidina mu Italie, ulondin anch: “Kusutil Dizu diend ni yom ya muspiritu, Yehova ukat kutuvurish dichuku diawonsu anch utukatin ni anch yom yawonsu tumusadidina yidi ya usey, ap anch usu tusadina umeken anch udi wa chamwamu kudi etu. Chawiy lel, kusal mudimu pamwing ni Nzamb kwinletidining musangar ni kukat kuwapish mwom wam.”

KUSAL MUDIMU PAMWING NI NZAMB KUKAT KUTUSEJISH PISWIMP NEND NI KUDI ANTU

9. Urund ik wading pakach pa Yehova ni Yesu, ni mulong wak?

9 Chisu tukata kusal mudimu pamwing ni antu tukatina, tukat kusej piswimp nau. Tukat kushiken ku kwijik nawamp wuntu wau ni mikadil yau. Tukat kwijik jintong jau ni mutapu usadinau usu wa kujiwanyish. Yesu wasala mudimu pamwing ni Yehova mu ma miliyar ma mivu. Rukat rau umwing ni mukwau rikala rikash ni kwikil chom chafanyina kushesh urund wau. Yesu warumburila mutapu wading urund winou palonday anch: “Am ni Tatuku tudi mu umwing.” (Yohan 10:30) Ading chakin kamu mu uumwing, ni ading kwovijan nawamp pasalau mudimu pamwing.

10. Mulong wak kulejan kukat kutusejish piswimp ni Nzamb ni kudi antu?

10 Yesu wamwita Yehova kuyiking in Kwilejend. Mulong wak? Walembila anch: “Chakwel awiy [ikala] mu umwing mudi mutudia etu mu umwing.” (Yohan 17:11) Pitushicha kukwatijan ni yany ya Nzamb ni kwipan mu mudimu wa kulejan, tukat kutesh nawamp mikadil yend yishimokishena. Twilejin mulong wak chidi cha manangu kumuchingejin Nzamb ni kulondul umutakel wend. Ni anch twasej piswimp ni Nzamb, niyend ukusej piswimp niyetu. (Tang Jakobu 4:8.) Tusejin kand piswimp ni akadivar ni anambaz netu mulong etu awonsu tukwet nau milong yimwing ni musangar ni jintong jimwing. Tukat kusal mudimu pamwing, kusangar pamwing ni kujijamen yakamish pamwing. Octavia, udia mu Grande-Bretagne, ulondin anch: “Kusal mudimu pamwing ni Yehova kukat kwinsejish kudi akwetu.” Nambaz winou  urumburil anch chidi mwamu mulong urund wend ni akwau wemedin pa kwikal ni “rutong ni umutakel umwing.” Chakin, niyetu twiyovil mwamu. Pitukata kuman usu usadinau akadivar netu mulong wa kumusangaresh Yehova, chikat kutushejish piswimp nau.

11. Mulong wak mwi ngand yisu tukusej piswimp nakash ni Yehova ni akadivar netu?

11 Rukat retu mulong wa Nzamb ni mulong wa akadivar netu ridi rikash katat, pakwez rikwikal rikash nakash mwi ngand yisu. Tongin pa midimu yawonsu yisangareshina tukusala mu machuku ma kurutu! Tukuyaak antu akuvumbulau ni kuyifundish piur pa Yehova. Tukusal kand mudimu wa kusal divu dikala paradis. Chikwikal musangar mujim wa kusal pamwing ni tukwikal pakemp pakemp antu awanyidina mu winyikel wa Kristu. Antu awonsu akwikal piswimp umwing ni mukwau ni piswimp ni Yehova, ukeza “kuwanyish rusot ra chom chawonsu chikweta mwom.”—Kuseng 145:16, TMK.

KUSAL MUDIMU PAMWING NI NZAMB KUKAT KUTUKING

12. Mudimu wa kulejan ukat kutuking mutapu ik?

12 Tufanyidin kulam urund wetu ni Yehova. Tudi mu mangand ma Satan ni tudi kand akad kuwanyin, chawiy lel chiswapel kudi etu kusambish kutong ni kusal mudi antu a mangand minam. Chidi mudi kwisay mu wit ukweta mpwej jikash jikupwitina ku mutambu uwakad ey kukat kuya. Chawiy lel, tufanyidin kusadil usu wetu wawonsu mulong wa kuya ku mutambu tukatina. Chilik chimwing, tufanyidin kusal usu mulong wa kwipuk yibachikin ya mangand ma Satan. Chad, mutapu ik utukingina kulejan? Pitulondina piur pa Yehova ni Bibil, tukat kushinshikin pa yom yidia ya usey ni yiwamp, kulik pa yom yikuziyisha ritiy retu. (Filip 4:8) Kulejan kukat kukasikesh ritiy retu mulong kukat kutuvurish kushilamu kwa Nzamb ni yany yend ya rukat. Kulejan kukat kutukwash kulam mikadil tukweta nich kuswir mulong wa kwichidij kudiay Satan ni mangand mend.—Tang Efes 6:14-17.

13. Mutapu ik wiyovay Kaman umwing udia mu Australie piur pa kulejan?

13 Anch twipan nakash mu mudimu wa kulejan, kwilej Bibil, ni kusal mudimu mulong wa uwamp wa antu mu chikumangen, twichidijin mulong tukwetap chisu cha kwiyakamish piur pa milong yetu. Joel, udia mu Australie, ulondin anch: “Mudimu wa kulejan winkwashin kwijik yom yidia yakin. Ukat kwinvurish yakamish yirishinau nich antu ni ukat kwinvurish kand yom nataninamu mu kusadin yany ya Bibil mu mwom wam. Mudimu wa kulejan winkwashin kusal usu wa kwikal mwin kwikepish; ukat kwinginkish mutapu wa kumuchingejin Yehova ni akadivar nau anambaz.”

14. Mulong wak kudandamen kwetu mu mudimu wa kulejan kumekeshin anch tukwet mwiku wa Nzamb?

14 Kulejan kukat kutwinkish kand kashinsh anch tukwet mwiku wa Nzamb. Chilakej: Tong bil anch ukwet mudimu uyinkishina antu a mu ul wey yakudia. Kakufutinap mulong wa kusal mudimu winou, ni usadidin nfalang jey amwiney mulong wa mudimu winou. Chikwau kand, antu kakatinap yakudia upanina, ni antu akwau akisin ukwash uyinkina. Ukudandamen kusal mudimu winou? Pakad kulab, ukuziy ni ukwimik kusal mudimu winou. Pakwez, avud pakach petu akat kusal mudimu wa kulejan muvu ni muvu, ap anch kusal mwamu kutushadishin chisu ni nfalang ni ap anch antu akat kutusip ni kutujimen. Chinech chimekeshin anch mwiku wa Nzamb utukwashin.

KUSAL MUDIMU PAMWING NI NZAMB KUKAT KUMEKESH ANCH TUMUKATIN NI TUYIKATIN ANTU

15. Mutapu ik wovijadina mudimu wa kulejan rusangu ruwamp ni rutong ra Nzamb piur pa antu?

15 Mutapu ik wovijadina mudimu wa kulejan ni rutong ra Yehova mulong wa antu? Rutong ra Nzamb piur pa antu rading  anch ashakama chikupu pa divu, ni rutong rend raswimpap chisu chasalay Adam chitil. (Isay 55:11) Nzamb watenchika chakwel etu tudiokala mu usuk wa chitil ni rufu. Mutapu ik? Yesu weza pa divu ni wapana mwom wend. Pakwez mulong wa kutaninamu mu difut dined, antu afanyidin kumuziyil Nzamb. Chawiy lel, Yesu wayifundisha antu chiyitinau kusal kudi Nzamb, ni wayileja in kwilejend kusal mwamu. Pitukata kulejan nlel ni kuyikwash antu akwau chakwel ikala arund a Nzamb, tusadin mudimu pamwing ni Nzamb mu ditenchik diend dia rukat dia kuyipandish antu ku chitil ni rufu.

16. Mutapu ik wovijadina mudimu wetu wa kulejan ni yijil ya Nzamb yipandikena kujimb?

16 Pitukata kuyikwash antu mulong wa kwikal ni mwom wa chikupu, tukat kumekesh anch tuyikatin ni tumukatin Yehova. Ndiy ‘usotin anch antu a mitapu yawonsu apanda ni ashikena ku kukwijik uyakin.’ (1 Timote 2:4) Pamwipulau Yesu kudi Mufaris piur pa chijil cha Nzamb chipandakena kujimb, Yesu walonda anch: “‘Mukata [Yehova] Nzamb wey nich muchim wey wawonsu, ni mupim wey wawonsu, ni manangu mey mawonsu.’ Chinech chawiy chijil chijim chipandakenamu yijil yawonsu. Chijil chakaad chipandakenamu kujimb chawiy ech: ‘Ufanyidin kumukat mukwen mudi muwikatila ey amwiney.’” (Mateu 22:37-39, NWT) Kusutil mudimu wa kulejan rusangu ruwamp, tumekeshin anch tuziyidin ku yijil yiney.—Tang Midimu 10:42.

17. Mutapu ik wiyovila piur pa chisend cha kulejan rusangu ruwamp?

17 Tukwet chiyukish mud ik! Yehova watwinka mudimu utuletidina musangar, utusejishina piswimp nend ni akadivar kand, ni ukata kuchidij urund wetu nend. Mudimu wa kulejan utwinkishin kand mutapu wa kumekesh anch tumukatin Nzamb ni antu akwau. Yehova ukwet ma miliyon ma atushalapol pa mangand mawonsu, ni awonsu akwet mashakamin kushalijan. Pakwez, ap anch tudi ansand ap amapal, ampich ap atuzwendj, akash ap aziyina, tusadin yawonsu tukutwisha mulong wa kukasikesh ritiy retu pamwing nau akadivar. Twiyovil mudi mwiyovay Chantel udia mu France, walonda anch: “Muntu wa Piur nakash pa mangand mawonsu, Sakatang wa yom yawonsu, Nzamb wa musangar, wanleja anch: ‘Yang! Lond! Lond piur pam, lond yidiokila mu muchim wey. Nikwinkishin usu wam, Dizu diam Bibil, ukwash wa mwiur, ambay a mudimu a pa divu, kufumb kudandamedina, ni mafundish makin ma pa chisu chiwanyidina.’ Chisend chijim mud ik cha kusal yitwitinay Yehova ni kusal mudimu pamwing ni Nzamb wetu!”