Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 1 , 2016

Ikalany Abachikinau Kudi ‘Chipan Chijim’ cha Nzamb

Ikalany Abachikinau Kudi ‘Chipan Chijim’ cha Nzamb

“Kujikitish kwikala kudi Nzamb mulong wa kupan kwend kujim kwakad kutwish kulond.”—2 KORINT 9:15, TMK.

MIMINY: 53, 18

1, 2. (a) ‘Chipan chijim’ cha Nzamb chirumburikin yom ik? (b) Yipul ik tukushinshikina mu mutu wa mulong winou?

YEHOVA watwinkisha chipan chijim cha rukat chisu chamutumay Yesu, mwanend mukatish panap pansh! (Yohan 3:16; 1 Yohan 4:9, 10) Kambuy Paul watazuka chipan chinech anch “kupan . . . kujim kwakad kutwish kulond [chipan chijim].” (2 Korint 9:15, TMK) Mulong wak Paul wasadina mazu minam?

2 Paul wading wij anch yakupesh ya Yesu kadi kashinsh anch kushilamu kwawonsu kuwamp kwa Nzamb kukez kuwanyin. (Tang 2 Korint 1:20.) Chinech chirumburikin anch ‘chipan chijim’ cha Nzamb chirumburikin yakupesh ya Yesu ni ranaken ni rukat rishinshamena ritumekeshidinay Yehova. Chipan chinech cha usey chikasiken nakash kuchirumburil mu mutapu tukutwisha kutesh nawamp. Chipan chinech cha pakampwil chikutwish kusal anch twiyova nchik? Ni mutapu ik ufanyidina chipan chinech kutubachik chakwel twirijeka mulong wa Chivurikish cha rufu ra Kristu chikusadika Diakasatu machuku ma ngond 23 ngond wa 3, 2016?

 CHIPAN CHA NZAMB CHA PAKAMPWIL

3, 4. (a) Mutapu ik ukata kwiyovang anch muntu kampand wakwinkish chipan? (b) Mutapu ik ukutwisha chipan cha pakampwil kuswimp mwom wey?

3 Tukatining chisu chikatau kutwinkish chipan. Pakwez yipan yimwing yikweting kurumburik ap ya pakampwil yikutwisha kuswimp mwom wetu. Chilakej, tongin bil anch wiyandjik mu mulong umwing ukash. Chad dipup diletinau ku mulong winou didi rufu. Pakwez, kukashimuk, muntu umwing wakad kwijik wipan kwa kwisotil kutambul dipup dined pa ndond yeyey. Usotin kufa mulong weyey! Chipan chinech cha pakampwil chifanyidin kusal anch wiyova mutapu ik?

4 Chipan chinech cha rukat ni cha pakampwil chifanyidin kukubachik chakwel uswimpa mu mwom wey. Chakin kamu, ufanyidin kand kwiyov ubachikinau kwikal ni muchim wa kupan nakash ni kuyikat antu akwau ni kumulikishin muntu mwawonsu ukuturumbukina. Machuku mawonsu ma mwom wey, ufanyidin kumekesh kujikitish mulong wa chipan chapanau.

5. Mutapu ik upandikena chipan cha Nzamb cha difut kujimb kusutamu chipan chikwau?

5 Chipan cha Nzamb cha difut chidi chijim nakash kusutamu chipan chitwisambina kal ech. (1 Pita 3:18) Tongin pa chom chinech: Etu awonsu twaswana chitil kudi Adam, ni difut dia chitil didi rufu. (Rom 5:12) Rukat ramubachika Yehova kumutum Yesu pansh mulong wa kuyifil antu awonsu, mulong “wapaka rufu mulong wa muntu wawonsu.” (Hebereu 2:9, TMK) Pakwez, yakupesh ya Yesu yikusal kand yom yivud nakash! Yikujiyish rufu chikupu. (Isay 25:7, 8; 1 Korint 15:22, 26) Antu awonsu amekeshina ritiy mudiay Yesu akushakam mu chisambu ni akwikal ni musangar wa chikupu, amwing mudi ant pamwing ni Kristu mwiur ni akwau akwikal mwishin mwa Want wa Nzamb panap pansh. (Rom 6:23; Kujingunik 5:9, 10) Yiyukish ik yikwau yidia mu chipan cha Yehova?

6. (a) Yiyukish ik ya chipan cha Yehova yiuchingedina? (b) Chipan cha Nzamb chitubachikin kusal yom ik yisatu?

6 Mudi chipan chikwau cha Nzamb, divu dikwikal paradis, mayej makwikalapaku kand, ni afu akuyivumbul. (Isay 33:24; 35:5, 6; Yohan 5:28, 29) Tumukatin Yehova ni Mwanend mukatish mulong watwinkisha ‘chipan chijim.’ Chipan chinech chitubachikin kusal chom ik? Chitubachikin (1) kumwimburij Yesu Kristu nawamp, (2) kuyikat akadivar netu, ni (3) kuyilikishin kamu antu akwau.

“RUKAT RA KRISTU RIKAT KUTUSADISH ETU”

7, 8. Mutapu ik tufanyidina kwiyov piur pa rukat ra Kristu, ni rifanyidin kutubachik kusal chom ik?

7 Cha kusambish, tufanyidin kwiyov abachikinau kusadin mwom wetu mulong wa kumutumbish Yesu. Kambuy Paul walonda anch: “Rukat ra Kristu rikat kutusadish etu.” (Tang 2 Korint 5:14, 15, TMK.) Paul wading wij anch ang twitiy rukat rijim ra Yesu, rikutusadish, ap kutubachik kumukat ni kumutumbish Yesu. Mwaning, anch twatesh nawamp chom chatusadinay Yehova, rukat rend rikutubachik kushakam mu mutapu umekeshina anch tumulimishin Yesu. Mutapu ik tukusala mwamu?

8 Rukat mulong wa Yehova ritubachikin kwimburij chilakej cha Yesu, kulondul kamu mu ruzau rend. (1 Pita 2:21; 1 Yohan 2:6) Anch twamuziyin Nzamb ni Kristu, tumekeshin rukat retu mulong wawawiy. Yesu walonda anch: “Muntu mwawonsu witiyina malejan mam ni kumaziyil, ndiy winkatila am. Tatukwam ukez kumukat muntu mwawonsu  winkatila am. Niyam kand nikez kumukat, nikez kwimekesh amwinam kudi ndiy.”—Yohan 14:21; 1 Yohan 5:3.

9. Yibachikin ik tukweta?

9 Pa chisu cha Chivurikish, chidi cha usey kutongijokin piur pa mutapu tukusadina mwom wetu. Chawiy, iyipula anch: ‘Mu milad ik namwimburijina kal Yesu? Mu milad ik nikutwisha kuwapish?’ Chidi cha usey kwiyipul yipul yiney mulong mangand makatin tushakam mu mutapu usotinau. (Rom 12:2) Anch tubabelap, tukutwish kwiyov abachikinau mulong wa kuyimburij alej a mangand, antu ayila katumb, nau in masengan ijikena nakash. (Kolosay 2:8; 1 Yohan 2:15-17) Mutapu ik tukutwisha kujijamen yibachikin yiney?

10. Yipul ik tukutwisha kwiyipul pa chisu cha Chivurikish, ni yakul yikutwish kutubachik kusal chom ik? (Tal chipich cha kwinsambishil.)

10 Chidi cha usey kwitekin chisu pa chisu cha Chivurikish mulong wa kushinshikin maswin metu, mafilim, ni mizik, ni yom yidia kand mu ordinater wetu, mu telefon ap mu tablet. Iyipula anch: ‘Anch Yesu wading pinap ni waman maswin nidjita, nikutwish kwov usany?’ (Tang 1 Timote 2:9, 10.) ‘Maswin mam mamekeshin anch nidi mwin kwilej wa Kristu? Ov, Yesu ukukatish kutal mafilim nikata kutal? Ukutwish kutesh mizik niteshina? Anch Yesu wasend telefon wam ap tablet, nikutwish kwov usany wa yom yikutwishay kuman? Chikutwish kukasikan kumurumburil Yesu mulong wak nikatina masengan ma video nisengena?’ Rukat retu mulong wa Yehova rifanyidin kutubachik kulik yom yawonsu yakad kuwanyin kudiay mwin Kristu, ap anch yikwet usey nchik. (Midimu 19:19, 20) Chisu tukata kupan mwom wetu kudiay Yehova, tukat kushilamu kusadin mwom wetu mulong wa kumutumbish Kristu. Chawiy, tufanyidinap kulam chom chawonsu chifanyidina kusal anch chikasikana kudi etu kumwimburij Yesu.—Mateu 5:29, 30; Filip 4:8.

11. (a) Mutapu ik utubachikina rukat retu mulong wa Yehova ni Yesu mu mudimu wa kulejan? (b) Mutapu ik ukutwisha rukat retu kutubachik mulong wa kuyikwash antu akwau mu chikumangen?

11 Rukat retu mulong wa Yesu ritubachikin kulejan ni kufundish nich mushiku. (Mateu 28:19, 20; Luka 4:43) Pa chisu cha Chivurikish, ov, ukutwish kutenchik program wey chakwel wikala chibol nkwash ni kusutish a saa 30 ap 50 mu mudimu wa kulejan? Ikundj wafishina kal mband umwing ukweta mivu 84 watongang anch kakutwishap kwikal chibol mulong wa mivu yend ni mayej. Pakwez, ayibol a mu teritwar wend akatisha kumukwash. Amukwasha nich mutapu wa transport ni amutondina teritwar muwamp ufanyidinay kusadin. Mudi chibudikin, mukadivar wawanyisha rutong rend ra a saa 30. Ukutwish kumukwash muntu kanang mu chikumangen chen mulong ikal chibol nkwash mwi ngond wa kasatu ap wa kanying? Chidi chakin anch antu awonsu kakutwishap kwikal ayibol, pakwez, tukutwish kusadin chisu ni usu wetu mulong wa kupandikesh mudimu wetu mulong wa Yehova. Anch twasal mwamu, tukumekesh anch rukat ra Yesu ritubachikin mudi Paul. Rukat ra Nzamb rikutubachik kusal yom ik yikwau?

TUFANYIDIN KUKATIJAN MUNTU NI MUKWAU

12. Rukat ra Nzamb ritubachikin kusal chom ik?

12 Chakaad, rukat ra Nzamb rifanyidin kutubachik kuyikat akadivar netu. Kambuy Yohan wafunda anch: “Akarukat nam, anch mwamu mwatukatay Nzamb, komb niyetu tufanyidin kukatijan muntu  ni mukwau.” (1 Yohan 4:7-11) Chawiy, anch twitiy rukat ra Nzamb, tufanyidin kuyikat akadivar netu. (1 Yohan 3:16) Mutapu ik tukutwisha kuyimekeshin rukat?

13. Chilakej ik chashay Yesu piur pa kuyikat antu akwau?

13 Chilakej cha Yesu chimekeshin mutapu tukutwisha kuyikat antu akwau. Padingay pansh, wayikwasha antu, nakash kamu antu ikepishina. Wayoka antu ading ayedina, ayilim, amputames, atujikamatu ni atumam. (Mateu 11:4, 5) Chinyim ni antakel a marelijon, Yesu wakata kuyifundish antu ading akweta kuswir kwa kwilej piur pa Nzamb. (Yohan 7:49) Wayikata antu ikepishina ni wasala usu mulong wa kuyikwash.—Mateu 20:28.

Ukutwish kumukwash mukadivar ni nambaz wananapina kal mu mudimu wa kulejan?? (Tal paragraf 14)

14. Chom ik ukutwisha kusal mulong wa kuyimekeshin akadivar ney rukat?

14 Chisu cha Chivurikish chidi kand chisu cha usey nakash mulong wa kutongin piur pa mutapu ukutwisha kuyikwash akadivar ni anambaz mu chikumangen chen, nakash kamu antu ananapina kal. Ukutwish kuya kuyital akatish inay? Ukutwish kuyinkish yakudia, kuyikwash ni midimu ya ku chikumbu, kuyitwal ku yikumangan, ap kuyitazuk chakwel asala ney pamwing mudimu wa kulejan? (Tang Luka 14:12-14.) El amboku rukat ra Nzamb rikubachika chakwel uyimekeshina akadivar ney rukat!

KUYOVIL AKADIVAR NI ANAMBAZ NETU RIY

15. Chom ik tufanyidina kwitiyin?

15 Chakasatu, rukat ra Yehova ritubachikin kuyilikishin akadivar ni anambaz netu. Etu awonsu twaswana chitil ni rufu kudiay Adam, chawiy kwikil muntu ukutwisha kulond anch, “Nikwetap kuswir kwa difut.” Ap atushalapol a Nzamb ashinshamena nakash akwet kuswir kwa difut. Muntu mwawonsu pakach petu amulikishina ku dibaz dijim nakash! Mulong wak chidi cha usey kwitiyin chom chinech? Tukutan chakul mu chishimu chimwing chapanay Yesu.

16, 17. (a) Chom ik tufanyidina kwilej ku chishimu cha Yesu cha mwant ni atushalapol? (b) Kupwa kwa kutongijokin pa chishimu cha Yesu, ukwatin mupak wa kusal chom ik?

16 Yesu wapana chishimu cha mwant wamulikishina kashalapol wend wading ukweta dibaz dijim dia nfalang 60000000. Pakwez, kupwa kashalapol winou walika kumulikishin kashalapol nend wading ukweta dibaz diend dia nfalang 100. Riy ra mwant rafanyina kumubachik kashalapol winou chakwel amulikishina kashalapol mukwau. Mwant wajimana nakash pateshay anch kashalapol winou walikang kumulikishin muntu ukweta dibaz diend dikemp. Mwant walonda anch: “Ey udi muswik muyimp! Am nakulikishina ey chikal chawonsu mulong ey wangilembila. Niyey, chad chifanyidin kumwovil mukwen kashalapol riy, mudi nakwovidila ey riy.” (Mateu 18:23-35) Mudi mwant winou, Yehova watulikishina kal dibaz dijim nakash. Chom ik chifanyidina rukat ni riy ra Yehova kutubachik kusal?

 17 Pitwitenchikina mulong wa Chivurikish, tukutwish kwiyipul anch: ‘Anrumbukidin kal kudi mukadivar? Chinkasikedin kumulikishin?’ Anch chidi mwamu, chawiy chisu chiwamp cha kumwimburij Yehova, ndiy ukata “kulikishin.” (Nehemiy 9:17; Kuseng 86:5) Anch tukat kusanger riy rijim ra Yehova, tukuyimekeshin antu akwau riy ni tukuyilikishin kamu. Anch tuyikatinap ni tuyilikishidinap akadivar netu, tufanyidinap kuchingejin anch Yehova atukata ni atulikishina. (Mateu 6:14, 15) Anch twayilikishin antu akwau, uyimp watusadinau ukuswimpap, pakwez chikutukwash kwikal ni machuku ma kurutu ma musangar.

18. Rukat ra Nzamb, ramukwasha nchik nambaz umwing kudiul kuburen kuwanyin kwa nambaz mukwau?

18 Chikutwish kwikal chikasikena kudiul kuburen kuwanyin kwa akadivar ni anambaz netu. (Tang Efes 4:32; Kolosay 3:13, 14.) Nambaz umwing wasala mwamu udi Lily. [1] (Tal mazu ma kwinsudiel.) Wamukwasha mwadiamufu umwing, Carol. Chilakej, wamutwalang Carol kwawonsu kwakimbangay kuya, wamukwashang kuya kuland yom mu sok, ni wamusadina kand yom yikwau yivud. Chikalap nchik yom yawonsu yasalay, Carol wading ching uburedina kujikitish, ni yisu yimwing chading chikasiken kumukwash. Pakwez, Lily washinshikinang pa mikadil yiwamp ya Carol ni wadandamena kumukwash Carol djat ni payelay nakash ni kufa. Ap anch chading chikasiken nakash kumukwash Carol, Lily ulondin anch: “Nichingejin nakash kumuman Carol ku divumbuk. Nisotin kumwijik chisu chikwikalay muntu uwanyidina.” Chakin kamu, rukat ra Nzamb rikutwish kutubachik kushakam nawamp nau akadivar ni anambaz netu ni kuchingel chisu chikezau kudiosh chikupu kuburen kuwanyin kwa antu.

19. ‘Chipan chijim’ cha Nzamb chikukubachik mutapu ik?

19 Yehova watwinkisha chakin kamu ‘chipan chijim.’ Tufanyidin kuchisanger chisu chawonsu! Chisu cha Chivurikish chidi chisu chiwamp cha kutongijokin pa yom yawonsu yatusadinay Yehova ni Yesu. Rukat rau ritubachika kumwimburij Yesu nawamp, kuyimekeshin akadivar netu rukat ni kuyilikishin kamu akadivar netu.

^ [1] (paragraf 18) Majin mamwing mu mutu wa mulong winou amaswimpa.