Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 2 , 2016

Tuyimburijany Arund a Yehova

Tuyimburijany Arund a Yehova

“[Yehova] udi murund wa antu akata kumulimish ndiy [ap kumwov wom].”—KUSENG 25:14.

MIMINY: 27, 21

1-3. (a) Mulong wak tufanyidin kwikal nich kashinsh anch tukutwish kwikal arund a Nzamb? (b) Yom ik tukushinshikina mu mutu wa mulong winou?

MU BIBIL, Aburaham amutazukin tupamp tusatu anch murund wa Nzamb. (2 Jinsangu 20:7; Isay 41:8; Jakobu 2:23) Aburaham ndiy muntu umwing utazukinau patok mu Bibil anch murund wa Nzamb. Ov, chinech chirumburikin anch Aburaham ndiy kwend amwinend ufanyidina kwikal murund wa Nzamb? Bwat. Bibil ulejen anch etu awonsu tukutwish kwikal arund nend.

2 Dizu dia Nzamb dizwil too ni jinsangu ja amakundj ni amband ashinshamena amwova Yehova wom, ateka ritiy mudiay ndiy, ni ikala arund nend. (Tang Kuseng 25:14.) Adi pakach pa “chisak chijim cha atuman” ajimbwilau kudi Paul. Antu inay awonsu ading arund a Nzamb.—Hebereu 12:1.

3 El amboku tushinshikinany arund asatu a Yehova isambidinau mu Bibil: (1) Rut, changadim mwadiamufu ushinshamena wadiokala ku Moab, (2) Ezekias, mwant  ushinshamena wa Yuda, ni (3) Mariy, mwin kwikepish makwend a Yesu. Chom ik tukutwisha kwilejin ku mutapu wikalay muntu ni muntu pakach pau murund wa Nzamb?

WAMEKESHA RUKAT RISHINSHAMENA

4, 5. Mupak ik ukash wakwatay Rut, ni mulong wak chading chikasiken kuukwat? (Tal chipich cha kwinsambishil.)

4 Nawom, ni amawenend, Rut ni Oripa, asala weny ulemp kudiokal ku Mowab mulong wa kuya mu Isarel. Mwi njil, Oripa wakwata mupak wa kuchirik kwol kwau ku Mowab. Pakwez Nawom wakwata mupak wa kuya ku Isarel, mwi ngand yau. Chom ik chasalay Rut? Wafanyina kukwat mupak umwing ukash. Ov, wafanyina kuchirik kwol kwau ku Mowab kudia dijuku diend, anch wafanyina kushal ni mawenend Nawom ni kuya nend ku Betlehem?—Rut 1:1-8, 14.

5 Dijuku dia Rut diading ku Mowab. Wafanyina kwend kuchirik kwol kwau, ni dijuku diend diafanyina kamu kumulam nawamp. Wading wij antu, dizu, ni yaku ya antu a ku Mowab. Nawom kafanyinap kumwinkish Rut ruchingej piur pa chom ap chimwing pakach pa yom yiney mu Betlehem. Ni Nawom wiyakamisha anch kafanyinap kuman ikundj ap chikumbu cha kushakam. Chawiy Nawom wamuleja anch achirika ku Mowab. Mudi mutwamana kal, Oripa “wachirik[a] kudi anamakwend ni [ku anzamb end].” (Rut 1:9-15) Pakwez Rut kachirikap kudi anamakwend ni ku anzamb end.

6. (a) Mupak ik wa manangu wakwatay Rut? (b) Mulong wak Bowaz walonda piur pa Rut anch ukimbin diking mu mapur ma Yehova?

6 Chimeken anch Rut wileja piur pa Yehova kusutil nfumwend ap kudi Nawom. Wileja anch Yehova kadiap mudi anzamb a ku Mowab. Wamukata Yehova ni wijika anch uwanyidin kumukat ni kumwifukwil. Chawiy Rut wakwata mupak wa manangu. Wamuleja Nawom anch: “Anamakwey akwikal anamakwam, ni Nzamb wey ukwikal Nzamb wam.” (Rut 1:16) Tukat kusangar anch twatongin piur pa rukat ra Rut mulong wa Nawom. Pakwez chisangareshina nakash ridi rukat radingay nich Rut mulong wa Yehova. Chom chinech chamushimokisha Bowaz, wamubaza mulong ‘wakimba diking mu mapur ma Yehova.’ (Tang Rut 2:12.) Mazu masadinay Bowaz makutwish kutuvurish mutapu ukatau kukimb an a atujil diking mu mapur ma anvajau. (Kuseng 36:7; 91:1-4) Chilik chimwing, Yehova wamwinka Rut diking dia rukat ni wamufuta mulong wa ritiy rend. Rut kadingap ni diyingishin ap dimwing dia kunenganan piur pa mupak wend.

7. Chom ik chikutwisha kuyikwash antu idjidjekina kupan mwom wau kudi Yehova?

7 Antu avud ilejin piur pa Yehova pakwez katondinap kuchinin mu diking diend. Akat kwidjidjek kupan mwom wau kudi ndiy ni kutambul dibatish. Anch chidi mwamu kudi ey, tong mulong wak ukat kwidjidjek. Muntu kakutwishap kuyisadil a nzamb aad. (Joshua 24:15) Mupak wa manang ukutwish kwikal wa kumusadin Nzamb wakin. Anch wipan amwiney kudi Yehova, umekeshin anch ukwet ritiy anch Nzamb ukwikal diking diey. Ni ukukukwash chakwel udandamena kumusadin chikalap nchik milong ukutwisha kwikal nich. Chinech chawiy chamusadilau Rut kudi Nzamb.

“NDIY WALAMATA KUDI [YEHOVA]”

8. Rumburil mutapu wading mashakamin ma Ezekias.

8 Ezekias wapamina mu mashakamin  mashalijadina nakash ni ma Rut. Wading mu muchid wa Isarel wading wipana kal kudi Nzamb. Pakwez, kadiap in Isarel awonsu ashala ashinshamena. Mwant Akaz, Tatukwend a Ezekias, wading muntu muyimp. Waburena kalimish mulong wa tempel wa Nzamb ni wayibachika antu chakwel ifukwila a nzamb akwau. Akaz washikena ni kuyipesh anamakwend a Ezekias amwing mudi milambu kudi a nzamb a makasu. Ezekias wapamina mu mashakamin mayimp!—2 Ant 16:2-4, 10-17; 2 Jinsangu 28:1-3.

9, 10. (a) Mulong wak chafanyina kwikal chiswapela kudi Ezekias kumujimen Nzamb? (b) Mulong wak tufanyidinap kumujimen Nzamb? (c) Mulong wak tufanyidinap kutong anch mashakamin ma dijuku dietu makutubachik kwikal antu awamp ap ayimp?

9 Chilakej chiyimp cha Akaz chafanyina kumubachik mwanend Ezekias chakwel amujimena ap amukisa Yehova. Nlel unou, antu amwing ajijamena yikokujol mudi ya Ezekias akat kutong anch akwet diyingishin diwamp dia “kumujimen [Yehova]” ap kukis dirijek diend. (Jinswir 19:3) Akwau, akat kutong anch mashakamin mayimp ma dijuku diau makutwish kuyibachik kwikal ni mwom uyimp ap kusal yom yiyimp yasalau anvajau. (Ezekiel 18:2, 3) Pakwez, yitongijok yiney yidi yakin?

10 Mashakamin ma Ezekias mamekeshin anch chakul ku chipul chinech chidi bwat! Kwikil diyingishin ap dimwing dia kumujimen Yehova. Kakatap kusal anch yom yiyimp yiyishikena antu. (Job 34:10) Chidi chakin anch anvaj akutwish kuyifundish anau kusal yom yiwamp ap yiyimp. (Jinswir 22:6; Kolosay 3:21) Pakwez, chinech chirumburikinap anch mashakamin ma mu dijuku dietu makutwish kumekesh anch tukwikal antu a mutapu ik. Mulong wak? Mulong Yehova watwinkisha kal chipan cha want ipau, chirumburikin anch tukutwish kutond kusal yom yidia yiwamp ap yiyimp. (Kuvurik Yijil 30:19) Mutapu ik wasadinay Ezekias chipan chinech chiwamp?

Ansand avud akat kwitiy uyakin chikalap nchik mashakamin ma majuku mau (Tal paragraf 9, 10)

11. Chom ik chasala anch Ezekias ikala mwant muwamp wa Yuda?

11 Ap anch tatukwend wading mwant muyimp nakash wa Yuda, Ezekias wikala mwant muwamp nakash. (Tang 2 Ant 18:5, 6.) Katondap kulondul chilakej chiyimp cha tatukwend. Pakwez,  watonda kuyitesh aprofet a Yehova, mudi Isay, Mike, ni Ozey. Watesha nawamp chiyul chau ni kubabesh kwau. Chinech chamubachika kupwish milong yivud yasalay tatukwend. Washitwisha tempel, wamwita Nzamb chakwel alikishina yitil ya antu, ni washesha akish mwi ngand yawonsu. (2 Jinsangu 29:1-11, 18-24; 31:1) Kupwa, chisu chezay Sanakerib mwant wa in Asiria kurishikish Yerusalem, Ezekias wamekesha kutakaman kujim ni ritiy. Wachingejina diking dia Yehova ni wayikasikesha antwend. (2 Jinsangu 32:7, 8) Chisu chimwing Ezekias wikala mwin kwitutul, pakwez chisu chamupupau kudi Yehova, ndiy wikepisha. (2 Jinsangu 32:24-26) Chakin kamu, Ezekias udi chilakej chiwamp tufanyidina kwimburij. Kalikap mashakamin ma dijuku diend mayipisha mwom wend. Pakwez, wamekesha anch wading murund wa Yehova.

12. Mudi Ezekias, mutapu ik umekeshinau antu avud nlel anch adi arund a Yehova?

12 Nlel unou mangand mizwil nich chisum ni makad rukat, ni an avud akat kupam pakad rukat ni diking dia anvajau. (2 Timote 3:1-5) Ap anch in Kristu avud nlel apamidin mu majuku makweta milong yikash, akat kukwat mupak wa kukasikesh urund wau pamwing ni Yehova. Mudi Ezekias, akat kumekesh anch mashakamin ma majuku mau makwetap usu piur pa mutapu ukwikalau mu machuku ma kurutu. Nzamb watwinkisha kal chipan cha want ipau, ni tukutwish kutond kumusadin ni kumushiman ndiy mudi mwasalay Ezekias.

“AM NIDI MWILOMB WA [YEHOVA]!”

13, 14. Mulong wak chisend cha Mariy chamekana chikasikena, chad mutapu ik wakulay ku mazu ma Gaburiel?

13 Mivu yivud kupwa kwa Ezekias, mband mwin kwikepish utazukinau anch Mariy wikala ni urund uwamp nend Yehova ni wikala ni chisend cha pakampwil. Wafanyina kwimish ni kuval ni kumulil Mwan a Nzamb! Yehova wafanyina kumukat ni kumuchingejin Mariy mulong wa kumwinkish chisend chinech chijim. Pakwez mutapu ik wakulay pateshay piur pa chisend chinech?

“Am nidi mwilomb wa [Yehova].” (Tal paragraf 13, 14)

14 Tukat kwisambin yisu yivud piur pa chisend chijim chamwinkau Mariy. Pakwez, yom ik yafanyina kumwakamish? Chilakej, mwangel Gaburiel wamuleja Mariy anch wafanyina kwimish pakad kumanijan ni ikundj. Pakwez, Gaburiel kayilejap in mu dijuku diend ni amutej nend mutapu wafanyinay Mariy kwimish. Chom ik chafanyinau kutong? Mutapu ik wafanyinay kumurumburil Josef anch kaburenap kushinshaman kudi ndiy? Chikwau kand, Mariy wading ukwet chisend chijim cha kumulil Mwan a Nzamb mudi mwan a muntu! Twijap milong yawonsu piur pa Mariy, pakwez,  twij yom yasalay kupwa kwa kwambamb ni Gaburiel. Mariy walonda anch: “Am nidi mwilomb wa [Yehova]. Chifanyidin yom yawonsu yisadika kudi am mudi muwalondanga.”—Luka 1:26-38.

15. Mulong wak ritiy ra Mariy rading ra pakampwil?

15 Ritiy ra Mariy rading kamu ra pakampwil! Mariy wading witenchikin mulong wa kusal yawonsu yamwitau kusal, mudi changadim muswik. Wachingeja anch Yehova wafanyina kumulam ni kumuchidij. Mutapu ik wikalay Mariy ni ritiy rikash mudi riner? Tukatap kuvadik nich ritiy. Pakwez, tukutwish kwikal ni ritiy anch twarikudish ni kumwit Nzamb chakwel ayukisha usu tusadina. (Galatia 5:22; Efes 2:8) Mariy wasala usu nakash mulong wa kukasikesh ritiy rend. Mutapu ik twija mwamu? El amboku tushinshikinany mutapu wend wa kutesh ni yom yalonday.

16. Yom ik yimekeshina anch Mariy wading mwin kutesh muwamp?

16 Mutapu wend wa kutesh. Bibil ulondin anch “[t]ufanyidin kuswakal kutesh, pakwez ashimpish[ina] muchim pa kulond.” (Jakobu 1:19) Mariy wading mwin kutesh muwamp. Bibil umekeshin anch Mariy watesha nawamp yom yamulejau, nakash kamu yom yilejay piur pa Yehova. Witekina chisu mulong wa kutongijokin pa yom ya usey. Chilakej chimwing chidi yom yamulejau Mariy kudi atufung piur pa uruu wayilejau kudi mwangel chisu cha kuvadik kwa Yesu. Kupwa, chisu chawanyishay Yesu mivu 12, walonda chom chimwing chamushimokisha Mariy. Mu yilakej yiney yawonsu yaad, Mariy watesha, wavurika, ni watonga nakash piur pa yom yateshay.—Tang Luka 2:16-19, 49, 51.

17. Yom ik tukutwisha kwilejin kudi Mariy piur pa mutapu wend wa kulond?

17 Yom yalonday Mariy. Bibil katulejinap yivud piur pa yom yalonday Mariy. Yom yivud yalonday yidi mu Luka 1:46-55. Mazu minam mamekeshin anch Mariy wading wij nawamp Mifund ya Hebereu. Mutapu ik mwamu? Mazu ma Mariy mading mafaniken ni mazu ma malembil ma Ana, makwend a Samwel. (1 Samwel 2:1-10) Chimeken anch Mariy wajimbula Mifund tupamp piswimp 20 mu yom yalonday. Chidi chakin anch wakata kulond piur pa uyakin wilejay kudi Murund nend mujim, Yehova.

18. Mu mitapu ik tukutwisha kwimburij ritiy ra Mariy?

18 Mudi Mariy, yisu yimwing Yehova ukutwish kutwinkish yisend tukutwisha kutong anch yikasiken nakash kudi etu. El amboku twimburijany chilakej chend, twitiyany chisend nich kwikepish, ni tumuchingejinany Yehova anch ukutukwash. Tukutwish kand kwimburij ritiy ra Mariy anch twamutesh Yehova nawamp ni kutongijokin pa yom twileja piur pend ni yintongijok yend. Chad tukutwish kwikal ni musangar wa kuyilej antu akwau yom twileja.—Kuseng 77:11, 12; Luka 8:18; Rom 10:15.

19. Anch twimburij yilakej ya ritiy ya pakampwil ya mu Bibil, tufanyidin kwikal ni kashinsh ka chom ik?

19 Chidi chakin anch Rut, Ezekias, ni Mariy ading arund a Yehova, mudi mwadingay Aburaham. Ading pakach pa ‘chisak chijim cha atuman’ ikala kand ni chisend cha kwikal arund a Nzamb. Tudandamenany amboku kwimburij yilakej ya pakampwil mudi yiney ya ritiy. (Hebereu 6:11, 12) Anch twasal mwamu, tukutwish kuchingel difut dia kwikal arund a Yehova chikupu!