Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 2 , 2016

Mekesh Kushinshaman Kwey Kudi Yehova

Mekesh Kushinshaman Kwey Kudi Yehova

“[Yehova] ikal pakach pamam ni yeyey, ni pa majuku mamam ni meyey chikupu ni chikupu.”—1 SAMWEL 20:42.

MIMINY: 43, 31

1, 2. Mulong wak urund wa Jonatan ni David udi chilakej chiwamp cha kushinshaman?

JONATAN wafanyina kushimok pa kuman kutakaman kwadingay nich nsand David. David wamujipa chitabu Goliat ni wamuletina tatukwend a Jonatan, Saul Mwant wa Isarel “mutu wa mwin Filistin.” (1 Samwel 17:57) Jonatan wading ukwet kashinsh anch Nzamb wading pamwing ni David, ni kudiosh pinapa Jonatan ni David ikala arund a piswimp. Ashilamu anch afanyina kushal kamu ashinshamena umwing ni mukwau. (1 Samwel 18:1-3) Mu machuku mend mawonsu, Jonatan wading ching ushinshamena kudi David.

2 Jonatan washala ushinshamena kudiay David ap anch Yehova wamutonda David mulong wa kwikal mwant wa kaad wa Isarel, kulik ndiy. Ni chisu chakimbay Saul kumujip David, Jonatan wiyakamisha piur pa murund nend. Wading wij anch David udi mwi mpay ya Oresh, chawiy chayay kumukasikesh chakwel amuchingejina Yehova. Jonatan wamuleja David  anch: “Kangal wov kwey wom; mulong chikas cha tatukwam Saul chikukupukunap. Eyey ukuyikela in Isarel, chad am niyam nikwikal ney piswimp [ap kukwambaken].”—1 Samwel 23:16, 17.

3. Chom ik chading cha usey nakash kudiay Jonatan kusutamu kwikal ushinshamena kudi David, ni mutapu ik twija mwamu? (Tal chipich cha kwinsambishil.)

3 Yisu yivud tukat kuyikat antu ashinshamena. Pakwez, ov, tumukatin kusu Jonatan mulong washala ushinshamena kudiay David? Bwat kwau, kwikal ushinshamena kudi Nzamb chawiy chading chom cha usey nakash mu mwom wa Jonatan. Dined diawiy diyingishin diasala anch Jonatan ikala ushinshamena kudi David ni kulik kumwovil mukau, ap anch David wafanyina kwikal mwant pa ndond yendendiy. Jonatan wamukwasha kand David mulong wa kumuchingejin Yehova. Awonsu aad ashala ashinshamena kudi Yehova ni kudi umwing ni mukwau. Alama kushilamu kwau kwasalau anch: “[Yehova] ikal pakach pamam ni yeyey, ni pa majuku mamam ni meyey chikupu ni chikupu.”—1 Samwel 20:42.

4. (a) Chom ik chikutwinkisha musangar wakin? (b) Yom ik tukushinshikina mu mutu wa mulong winou?

4 Etu ni yetu tufanyidin kwikal ashinshamena ku dijuku dietu, kudi arund netu, ni kudi akadivar ni anambaz a mu chikumangen. (1 Tesalonik 2:10, 11) Pakwez, chom cha usey nakash kusutamu yawonsu ey, tufanyidin kwikal ashinshamena kudi Yehova. Ndiy Muntu watwinkisha mwom. (Kujingunik 4:11) Anch tudi ashinshamena kudi ndiy, tukwikal ni musangar. Pakwez, twij anch tufanyidin kwikal ashinshamena kudi Nzamb ap mu yisu yikash. Mu mutu wa mulong winou, tukwisambin mutapu ukutwisha kutukwash chilakej cha Jonatan mulong wa kushal ashinshamena kudi Yehova mu mitapu ap mikadil yinying: (1) anch tutongin anch tufanyidinap kumulimish muntu utakedila, (2) anch tufanyidin kutond nany tukushinshamena, (3) anch mukadivar utakedila katuteshinap nawamp ap utusadidin yom mu mutapu wakad kuwanyin, ni (4) anch tutongin anch chikasiken kuwanyish kushilamu.

ANCH TWATONG ANCH TUFANYIDINAP KUMULIMISH MUNTU UTAKEDILA

5. Mulong wak chayikasikena in Isarel kwikal ashinshamena kudi Nzamb chisu chadingay Saul mwant?

5 Jonatan nau in Isarel ading mu mashakamin makash. Mwant Saul, tatukwend a Jonatan, wamubwambwila Nzamb, ni Yehova wamulika. (1 Samwel 15:17-23) Ap mwamu, Nzamb wamulika chakwel adandamena kuyikel mivu yivud. Chawiy, chayikasikena antu kwikal ashinshamena kudi Nzamb mulong mwant watondau mulong wa kushakam pa ‘ditand dia Yehova’ wading ukat kusal yom yiyimp nakash.—1 Jinsangu 29:23.

6. Yom ik yimekeshina anch Jonatan washala ushinshamena kudiay Yehova?

6 Jonatan washala ushinshamena kudiay Yehova. Tongin pa chom chasalay Jonatan kupwa kwa chisu chasambishay Saul kumubwambwil Nzamb. (1 Samwel 13:13, 14) Chisu chinicha, amasalay avud a in Filistin eza ni matemb ma njit 30 000 mulong wa kurish ni in Isarel. Saul wading ching ni amasalay 600, ni ndiy kusu ni Jonatan awiy ading ni mat. Pakwez, Jonatan kovap wom. Jonatan wavurika mazu ma muprofet Samwel: “[Yehova] kakez kayidjibulap antwend, mulong wa dijin diend dijim.” (1 Samwel 12:22) Jonatan wamuleja isalay mukwau anch: ‘Kwikil  chikumukangesha Yehova mulong wa kupandish ni antu avud ap akemp.’ Chawiy, ndiy ni isalay arisha chisak cha in Filistin ni ajipa antu mudi 20. Jonatan wading ukwet ritiy mudiay Yehova, ni Yehova wamuyukisha. Yehova wazadisha divu, ni in Filistin ova wom. Kupwa, in Filistin asambisha kujipijan ayinau, ni in Isarel awina njit.—1 Samwel 13:5, 15, 22; 14:1, 2, 6, 14, 15, 20.

7. Jonatan wamumanang tatukwend mutapu ik?

7 Ap anch Saul wadandamena kumubwambwil Yehova, Jonatan wamuziyinang ching tatukwend mu yom yiwanyidina. Chilakej, arisha pamwing mulong wa kuchidij antu a Yehova.—1 Samwel 31:1, 2.

8, 9. Mutapu ik tukwikala ashinshamena kudi Nzamb anch twayilimish antu atakedila?

8 Mudi Jonatan, tukutwish kwikal ashinshamena kudiay Yehova pa kuziyil guvernema wa ngand tushicha anch yom yitinau yijipinap yijil ya Nzamb. Yehova ukat kwitiyij anch “in kutakel” inay atutakela, ni utwitin anch tuyilimisha. (Tang Rom 13:1, 2.) Chawiy tufanyidin kuyilimish antakel a guvernema ap anch aburedin win kashinsh ni tutongin anch tufanyidinap kuyilimish. Chikwau kand, tufanyidin kuyilimish antu awonsu atonday Yehova mulong wa kutakel.—1 Korint 11:3; Hebereu 13:17.

Mutapu umwing wa kushal ashinshamena kudi Yehova udi kumulimish nfumwetu ap mukajetu, ap anch kamusadidinap Yehova (Tal paragraf 9)

9 Olga, nambaz wa mu Amérique du Sud, wamekesha kushinshaman kwend kudiay Yehova pa kumulimish nfumwend  ap anch wading umulamin nayimp. [1] (Tal mazu ma kwinsudiel.) Yisu yimwing, nfumwend kamulondishangap ni wamulondang mazu mayimp mulong wading Kaman wa Yehova. Washikena ni kumulej anch ukusend an ni kudiokal ku chikumbu. Pakwez Olga ‘kachirishap uyimp ku uyimp.’ Wasalang ching yom yiwamp mulong wa kwikal mband muwamp. Wamwisukinang yakudia, wamututinang maswin, ni wayibanginang anamakwend a ikundj. (Rom 12:17) Ni yisu yimwing, wamutwalang nfumwend kuyital anamakwend ni arund nend. Chilakej, pakimbay kuya mu musumb ukwau mulong wa chidil cha tatukwend, Olga watenchika yom yawonsu yaswirikenau mulong wa weny. Ku chidil kwinikwa, chisu chadingay nfumwend mu egliz, Olga wamuchingela pol. Kupwa kwa mivu yivud, nfumwend a Olga wasambisha kumulam nawamp, mulong washimpisha muchim ni wamumekeshinang yisu yawonsu kalimish. Katat, umukasikeshin mulong wa kuya ku yikumangan ni ukat kumutwalangaku. Yisu yimwing, ukat kukumanganang nend pamwing.—1 Pita 3:1.

ANCH TUFANYIDIN KUTOND NANY TUKUSHINSHAMENA

10. Mutapu ik wijikay Jonatan nany ufanyidinay kushinshamen?

10 Palonday Saul anch ukimbin kumujip David, Jonatan wafanyina kukwat mupak ukash. Wading ukatin kushinshamen kudiay tatukwend, pakwez, wading ukatin kand kumushinshamen David. Jonatan wading wij anch Nzamb wading pamwing ni David kulik Saul, chawiy watonda kwikal ushinshamena kudiay David. Wamubabesha David chakwel ajingama ni wamuleja Saul mulong wak kafanyinap kumujip David.—Tang 1 Samwel 19:1-6.

11, 12. Rukat retu mulong wa Nzamb, ritukwashin kukwat mupak wa kumushinshamen mutapu ik?

11 Alice, nambaz udia mu Australie, wafanyina kutond nany ufanyidinay kushinshamen. Padingay kwilej Bibil, wayileja in dijuku diend piur pa yom yadingay kwilej. Wayileja kand anch kafanyidinap kusal nau musambu wa Nowel ni wayirumburila mulong wak. Kwinsambishil antu a dijuku diend kasangarap, kupwa amujimena nakash. In dijuku diend atonga anch Alice kayibangidinap ap pakemp. Kupwa, makwend walonda anch kasotinap kand kumuman Alice. Alice walonda anch: “Nanenganana ni nova ujim nakash mulong nading nikatin dijuku diam nakash. Pakwez, nikala nich kashinsh anch Yehova ni Yesu afanyina kwikal akusambish mu muchim wam, ni ku chitentam chalondula natambula dibatish.”—Mateu 10:37.

12 Tufanyidinap kushinshamen chom chin chawonsu, mudi chisak cha masengan, shikol, ap ngand, chikala cha usey nakash kusutamu kushinshaman kwetu kudi Yehova. Chilakej, Henry wading ukatin kusengan masengan matazukinau Jeu d’échecs (madia mudi masengan ma Dames) ni chisak chend cha shikol ni wasota kuwin ku masengan ma nsudiel ma shikol yau. Pakwez, mulong wasenganang Jeu d’échecs rubing rawonsu, kadingap kand ni chisu mulong wa mudimu wa kulejan ni yikumangan. Henry walonda anch chikala cha usey kudi ndiy kushinshamen shikol kusutamu kumushinshamen Nzamb. Kupwa wakwata mupak wa kulik kusengan Jeu d’échecs ku shikol yau.—Mateu 6:33.

13. Mutapu ik ukutwisha kutukwash kushinshaman kudi Nzamb kupwish milong ya mu dijuku?

13 Yisu yimwing chikutwish kukasikan  kwikal ashinshamena kudi antu kushalijan a mu dijuku dietu kapamp kamwing. Chilakej, Ken ulondin anch: “Nading nikatin kuya kumutal makwam wananapina kal chisu chawonsu ni kwez nend ku chikumbu yisu yimwing. Pakwez, makwam ni mukajam kadingap kwovijan nawamp.” Ulondin kand anch: “Natwishap kumusangaresh umwing pakad kumunenganesh mukwau.” Ken watonga piur pa yom yilondinay Bibil ni wajingunina anch pa mulong winou, wafanyina kumusangaresh mukajend ni kushal ushinshamena kudi ndiy. Wakwata mupak mulong wa kumusangaresh mukajend. Kupwa, wamurumburila mukajend mulong wak wafanyina kwikal ni yisal yiwamp kudi makwend. Wamurumburila kand makwend mulong wak ufanyidin kumulimish mukajend.—Tang Disambishil 2:24; 1 Korint 13:4, 5.

ANCH MUKADIVAR KATUTESHINAP NAWAMP AP UTUSADIDIN YOM MU MUTAPU WAKAD KUWANYIN

14. Mutapu ik wamusadilau Jonatan yom yakad kuwanyin kudi Saul?

14 Tukutwish kand kwikal ashinshamena kudiay Yehova anch mukadivar utakedila watusadin yom yakad kuwanyin. Mwant Saul amutonda kudi Nzamb, chad wamusadina mwanend wa kuval yom yiyimp. Kateshap mulong wak Jonatan wading umukatin David. Chawiy, chisu chapakishay Jonatan kumukwash David, Saul wajimana nakash, ni wamukwatisha mwanend usany pakach pa antu avud. Pakwez, Jonatan wadandamena kumulimish  tatukwend. Pa chisu chinicha, washala ushinshamena kudi Yehova ni kudi David, watondau kudi Nzamb mulong wa kwikal mwant wa kaad wa Isarel.—1 Samwel 20:30-41.

15. Anch mukadivar watusadin yom yiyimp, chom ik tufanyidina kusal?

15 Mu yikumangen yetu nlel, akadivar atakedila akat kusal usu wa kwikal awamp kudi muntu mwawonsu. Pakwez, akadivar inay adi antu akad kuwanyin. Mulong wa chinech, chikutwish kuswapal anch alika kutesh mulong wak twasalang chom kanang. (1 Samwel 1:13-17) Chawiy, anch katuteshinap nawamp ap aturumburish nayimp, el amboku tushala ashinshamena kudiay Yehova.

ANCH CHIKASIKEN NAKASH KUWANYISH KUSHILAMU KWETU

16. Mu milong ya mutapu ik tufanyidina kulik kwikal ni mukau ni kwikal ashinshamena kudi Nzamb?

16 Saul wading ukatin anch Jonatan ikala mwant wa kaad pa ndond pa David. (1 Samwel 20:31) Pakwez, Jonatan wading umukatin Yehova ni wading ushinshamen kudi ndiy. Chawiy, pa ndond pa kwikal ni mukau, Jonatan wikala murund wa David ni wawanyisha kushilamu kwend. Pakwez, muntu mwawonsu umukatina Yehova ni ushinshamena kudi ndiy “ukat kuwanyish kushilamu kwend kuwamp machuku mawonsu, ap anch chikalap nchik chikash kudi ndiy.” (Kuseng 15:4) Mulong tushinshamen kudi Nzamb, tukuwanyish kushilamu kwetu. Chilakej, anch twovijan mu milong ya kwisak, tufanyidin kuwanyish yom twovijana kusal, ap anch chikasiken kusal mwamu. Ni anch tukwet milong mu uruw wetu, tukumekesh rukat retu kudi Yehova pa kushal ashinshamena kudi nfumwetu ap mukajetu.—Tang Malakiy 2:13-16.

Anch twovijan mu milong ya kwisak, tufanyidin kusal mudi mutwovijanang mulong tudi ashinshamena kudi Nzamb (Tal paragraf 16)

17. Dilejan dined diakukwash kal ey mutapu ik?

17 Tufanyidin kwikal kudi ashinshamena kudi Nzamb ap mu yisu yikash, mudi Jonatan. El amboku tushala ashinshamena kudi akadivar ni anambaz netu, ap anch aturumbukin. Mwamu, tukusangaresh muchim wa Yehova, ni chinech chikutuletin etu musangar. (Jinswir 27:11) Tukutwish kwikal nich kashinsh anch Nzamb ukusal ching yom yiwamp mulong wetwetu ni ukutubangin. Mu mutu wa mulong ulondwilaku ou, tukuman yom tukutwisha kwilejin kudi antu amwing a pa chisu cha David ading ashinshamena ni akad kushinshaman.

^ [1] (paragraf 9) Majin mamwing amaswimpa.