Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 2 , 2016

 Rusangu Ra Mwom

Yehova Wankwasha Chakwel Nitwisha mu Mudimu Wend

Yehova Wankwasha Chakwel Nitwisha mu Mudimu Wend

Namuleja ntakel wa amasalay anch nading mu rukan mulong nalika kuya kwi njit. Namwipula anch: “Ukimbin kwingandjik kand kapamp kakwau mu rukan?” Kinak kading kapamp ka kaad kanlejau kwandam mu Chisak cha Amasalay cha États-Unis.

NAVADIKA mu muvu wa 1926 mu Crooksville, mu Ohio, mu États-Unis. Tatuku ni maku kadingap kuya mu egliz, pakwez atuleja etu an chinan chakwel tuyangang mu egliz. Nayangang mu Egliz wa in Mishon. Pinawanyisha mivu 14, ntakel wa egliz wanginka disamun mulong natwisha kuya mu egliz diarubing diawonsu mu muvu wa kabuj.

Margaret Walker (nambaz wakusambish ku chikas cha kamaku) wankwasha kwilej uyakin

Chisu chinicha, mutej netu utazukinau anch Margaret Walker, wadinga Kaman wa Yehova, wasambisha kwez kumuman maku ni kwambamb nend piur pa Bibil. Dichuku dimwing, nakwata mupak wa kubombakan nau. Maku watonga anch nafanyina kurumbangesh dilejan diend, chawiy wanleja mulong wa am kubudik mu chikumbu. Pakwez, nasala usu wa kutesh mambamb mau. Kupwa kwa kwez kumuman maku tupamp tuvud, Margaret wangipula anch: “Wijing dijin dia Nzamb?” Nalonda anch: “Antu awonsu ij anch dijin diend—Nzamb.” Walonda anch: “Send Bibil wey ni tal Kuseng 83:18.” Nasala mwamu, ni najingunina anch dijin dia Nzamb didi Yehova. Naya mau kudi arund nam ni nayileja anch, “Piukuchirikanya ku chikumbu uchuku, talany mu Kuseng 83:18 mu Bibil ni wijikany dijin dia Nzamb.” Ukutwish kulond anch nasambisha kulejan pakad kulab.

Nileja Bibil ni natambula dibatish mu muvu wa 1941. Kupwa, antonda mulong wa kutakel dilejan dia buku dia chikumangen. Namukasikesha maku ni anamakwam mulong wa kwez ku chikumangan, ni awonsu asambisha kukumangan ku dilejan dia buku natakelang. Pakwez, tatuku kasangerap.

RUPOMPAT KU CHIKUMBU

Anginkisha yisend yivud mu chikumangen, ni nikala ni mabuku mavud mapalangeshau kudi Atuman a Yehova. Dichuku dimwing, Tatuku wilika muny ku mabuku mam ni walonda anch: “Umen muruzu wa yom yawonsu ey? Nikatin yidiokala mu chikumbu chinech, ni ukutwish kuya nich.” Nadiokala ku chikumbu ni naya kushakam piswimp ni Zanesville, mu Ohio, pakwez, nachirikang mulong wa kuyikasikesh in dijuku diam.

Tatuku wasala usu wa kumukangesh maku kukumangan. Yisu yimwing, maku pakimbangay kuya, tatuku wamopatishang mau ni kumuchirish mu chikumbu. Pakwez, wabudikinang ku chis chikwau ni kuya ku yikumangan. Namuleja Maku anch: “Kangal wiyakamish.  Ukez kuziy kwend ni kukopatish mau.” Kupwa kwa machuku makemp, Tatuku waziya kumukangesh ni maku wakumangana ku yikumangan pakad kumukangesh.

Pasambisha Shikol ya Mudimu wa Uteokras mu muvu wa 1943, nasambisha kusal ma diskur mudi nsand a shikol mu chikumangen chetu. Yiyul natambula kupwa kwa yikunku nasala ku shikol yankwasha kwikal mwin kulond muwamp.

KULIK KWIYANDJIK MU MILONG YA NJIT

Mu muvu wa 1944, pa chisu cha Njit ja kaad ja Mangand Mawonsu, anleja mulong wa kwandam mu usalay. Anleja anch ku Fort Hayes mu Columbus, Ohio, mwawiy nikusala ekzame wa kushinshikin anch nikutwish kwandam mu usalay ni kwizwish kart. Namuleja kand ntakel wa amasalay anch nafanyinap kwandam mu usalay. Anchirisha ku chikumbu. Pakwez kupwa kwa machuku makemp, ntakel wa amasalay weza ku chikumbu cham ni wanleja anch: “Corwin Robison, antum kal mulong wa kukukas.”

Kupwa kwa mbing jaad, nzuj walonda anch: “Anch nading ni mbil ya kukatul mulong winou, nafanyina kukutek mu rukan rawonsu. Ukwet chom kanang cha kulond?” Nakula anch: “Nsalejam, ufanyidinany kwintek ku mulong wa antakel a egliz. Yikumbu yawonsu yidi ndond yam ya kusadin mudimu, ni nikat kulejan rusangu ruwamp ra Want kudi antu avud.” Nzuj winou wayileja anzuj akwau anch: “En udianyap pinap mulong wa kukwat mupak anch nsand winou udi ntakel wa egliz ap bwat. Udiany pinap mulong wa kukwat mupak anch ukwandam mu usalay ap bwat.” Mu chisu chikemp, anzuj akwata mupak anch nifil nich. Nzuj wankatwila mivu yitan mu rukan ra Ashland, mu Kentucky.

YEHOVA WANCHIDIJA MU RUKAN

Mbing jaad ja kusambish nading mu rukan mu Columbus, mu Ohio, ni dichuku dia kusambish nading mu kapalikany kam. Namulembila Yehova anch: “Nikutwishap kushal mu kapalikany mu mivu yitan. Nijap chom chifanyidina kusal.”

Dichuku dialondula, atulam ambudisha pol. Naya kwadingay mwin rukan mukwau mujim mulemp, ni etu awonsu twasambisha kutadin pa dididish. Wangipula anch: “Mwanikanch, ey udi munomu mulong wak?” Nalonda anch: “am nidi Kaman wa Yehova.” Walonda anch: “Udi Kaman? Chad mulong wak udi mwinomu?” Nalonda anch, “Atuman a Yehova kakuyangap kwi njit ni kakujipangap antu.” Ndiy walonda anch: “Akutek kal mu rukan mulong ujipinap antu. Ayitekin antu akwau mu rukan mulong ajipin antu. Ov, chom chinech choviken?” Nalonda anch: “Bwat, chovikenap.”

Kupwa walonda anch: “Mu mivu 15 yinadinga mu rukan rikwau, nading kutang mikand yen.” Pinatesha chinech, namulembila Yehova anch, “Yehova, nkwash chakwel muntu winou ikala ku mutambu wam.” Pa chisu chinicha, mwin rukan umwing, dijin  diend Paul, walonda anch: “Anch muntu ap umwing wakupukun, toy kwey. Nikez kumubabesh.” Chawiy lel, pinashakama mwin mwa, nadingap ni milong ni in rukan 50 ading mu rukan rinira.

Nading pakach pa Atuman akasau mulong wa kulik kwiyandjik mu milong ya njit ku Ashland, mu Kentucky

Pandioshau kudi antakel mu rukan ni kwintwal mu rukan ra Ashland, nasankanijana ni akadivar amwing aswiIa ading mwinimwa. Ankwasha ni ayikwasha kand antu akwau mulong wa kwikal piswimp ni Yehova. Atwinkisha chisend cha kutang Bibil pa rubing, ni twatenchikang yipul ni yakul mulong wa yikumangan twatazukang anch chikumangan cha Bibil. Twading mu kapalikany kajim kakweta ma ulal mutambu ni mutambu. Mwading mukadivar wading kutwinkish teritwar. Wanleja anch: “Robison, ukwet chisend cha ulal ou. Mwawonsu ukwikala pa ulal winou ndiy teritwar wey. Sal usu wa kumulej uman kurutu kwendendiy kubudik mu rukan.” Winou wawiy mutapu twalejana pakad kanvundangesh.

YOM YANSHIKENA PINABUDIKA MU RUKAN

Njit ja Mangand Mawonsu ja Kaad japwa mu muvu wa 1945, pakwez nashala mu rukan machuku makemp kupwa kwa njit. Niyakamisha piur pa dijuku diam mulong Tatuku wanleja anch: “Anch natwish kukopat ey, nikutwish kuyikangesh akwen akwau.” Kupwa kwa kwimbudish, anleja rusangu risangareshina. Antu sambwad a mu dijuku diam ading akat kukumangan ni mpanyam umwing watambula dibatish chikalap nchik rupompat ra Tatuku.

Mu mudimu wa kulejan pamwing ni Demetrius Papageorge, mukadivar uzizidilau many wasambisha kumusadil Yehova mu muvu wa 1913

Pasambisha njit ja Corée mu muvu wa 1950, anleja kapamp kakwau mulong wa kwandam mu usalay. Anleja kuya ku Fort Hayes kapamp kakwau. Kupwa ekzamen wa kushinshikin anch niwanyidin kwandam mu usalay, ntakel umwing wa amasalay wanleja anch, “Ukwet chisend chijim nakash mu chisak chey.” Nalonda anch: “Chiwapin mwan, pakwez am nikwandamap mu usalay.” Najimbula 2 Timote 2:3 ni nalonda anch: “Am nidi isalay wa Kristu.” Kupwa kwa kuninet chisu chilemp, walonda anch: “Ukutwish kuya.”

Kupwa kwa machuku makemp, nakumangana ku chikumangan cha antu akimbina kuya ku Betel ku chitentam chasadika ku Cincinnati, mu Ohio. Mukadivar Milton Henschel watuleja anch kudi maswir ku Betel ma akadivar akatina kusal mudimu nakash mulong wa Want. Nita mulong wa kuya ku Betel ni antazuka. Nasambisha kusal ku Brooklyn mwi ngond wa 8, 1954, ni kudiosh pinipa nikala ku Betel.

Nading ching ni mudimu ujim ku Betel. Mu mivu yivud, nading nilamin ntuk mujim mu biro wa kuchapin ni mu biro wa rutung, nasala mudi mwin kwendish ma motak majim, ni natenchikang atufur. Nasala kand ku Yot ya Yitentam ya mu New York City.

Nilamin ntuk mujim mu biro wa rutung ku Betel wa Brooklyn

Nading nikatin ma program ma ku Betel mudi difukwil dia pamanch ni dilejan dia Chinong cha Kalam mu dijuku, ni kulejan pamwing ni antu a mu chikumangen. Anch watongin pa yom yiney, yidi yom yifanyidina kusadik chisu chawonsu mu majuku ma Atuman a Yehova. Anch anvaj ni an akat kushinshikin  pamwing mufund wa dichuku, akat kusal Difukwil dia mu Dijuku chisu chawonsu, akat kupan yakul ku yikumangan ya chikumangen, ni akat kulejan nich mushiku rusangu ruwamp, awonsu mu dijuku akwikal piswimp ni Yehova.

Nikala ni arund avud ku Betel ni mu chikumangen. Amwing ading in Kristu azizidilau many ni ading akwet ruchingej ra kuya mwiur. Akwau kadingap azizidilau many. Pakwez atushalapol awonsu a Yehova adi akad kuwanyin, kuwejinaku ni yidi ya Betel. Anch nikwet mulong ni mukadivar, nasalang usu mulong wa kwikala mu chisambu. Nikat kushinshikin pa Mateu 5:23, 24 ni kuman mutapu tufanyidina kupwish milong yetu. Chiswapelap kulond anch “Nlikishinaku amboku,” pakwez milong yivud yikat kupwang anch twalond mwamu.

YIBUDIKIN YIWAMP YA MUDIMU WAM

Katat, chinkasikedin kulejan ku chis ni chis mulong wa upal, pakwez niziyinap. Nilejaku dizu ditazukinau anch chinois Mandarin ni nasangera kwambamb ni a Chinois mwi njil. Machuku mamwing pamanch napanang ma gazet 30 ap 40 kudi antu akatishina.

Kupan uman kudi a Chinois ashicha mu Brooklyn, mu New York

Nayichirikina kand antu asangera a mu Chine! Dichuku dimwing, changadim umwing muwamp wading ulandishina mabuj wansipisha. Nasipa niyam ni namwinkisha Chinong cha Kalam ni Réveillez-vous! ya mu dizu dia Chine. Wayisenda ni wanleja anch dijin diend Katie. Kupwa, chisu chawonsu chanmanangay Katie, wezang kwingambambish. Namuleja majin ma mabuj ni yom ya mayij mu Inglish, ni walondang mutapu nalonga am kupwa kwa kumulej. Namuleja kand ma verse ma Bibil, ni witiya kusend buku Chifundishinay Bibil. Pakwez, kupwa kwa jimbing jikemp, changadim winou kamekanap kand.

Kupwa kwa angond, napana ma gazet kudi changadim mukwau wading usutina ni yom, ni witiya kusend. Rubing ralondula, wanginkisha telefon wend ni wanleja anch: “Akutazukin mu Chine.” Nalonda anch: “Nijap muntu ap umwing mu Chine.” Pakwez wankasikesha kusend, chawiy nasenda telefon ni nalonda anch, “Halo, yam Robison.” Dizu didiokila kulemp dialonda anch: “Robby, yam Katie. Nachirikin mu Chine.” Nipula anch: “mu Chine?” Katie wakula anch, “Mwaning. Robby, umwij changadim wakwinkisha kal telefon? Mpanyam. Wanfundisha yom yiwamp yivud. Nilemb amboku, mufundisha mutapu wanfundisha.” Nalonda anch, “Katie, Nikumufundish kamu. Wajikitish amboku pa kwingijikish ndond yiudia.” Kupwa kwa machuku makemp, namuleja mpanyend a Katie mu chisu chikemp. Kwawonsu kudiau ayangadim aad inay, nikwet ruchingej anch ilejin yom yivud nakash piur pa Yehova.

Namusadidin Yehova mu mivu 73, ni nisanger mulong Yehova wankwasha mulong wa kulik kwiyandjik mu milong ya njit ni kushal ushinshamena mu rukan. Chikwau kand, anamakwam anleja anch atambula dikasikesh chisu narisha ni rupompat ra Tatuku pakad kuziy. Kupwa, Maku ni anamakwam musamban (amakundj ni amband) atambula dibatish. Ni Tatuku waswimpa, ni wasambisha kukumangan ku yikumangan yimwing kurutu afa.

Anch rawiy rusot ra Nzamb, anamakwam ni arund nam afa kal akez kavumbuk mu mangand masu. Tongijokin musangar tukweta pa kumwifukwil Yehova chikupu pamwing nau antu tukatina! *— Tal mazu ma kwinsudiel.

^ par. 32 Padingau kutenchik mutu wa mulong winou, Corwin Robison wafa ushinshamena kudi Yehova.