Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 2 , 2016

Dandamen Kusal Mudimu wa Yehova Nich Musangar

Dandamen Kusal Mudimu wa Yehova Nich Musangar

TONGIN piur pa dichuku dia musangar ujim mu mwom wey. Ov, didi dichuku dia uruw wey ap diavadika mwaney wa kusambish? Ap didi dichuku watambula dibatish? Dichuku dinidia diading dichuku dia usey nakash ni dia musangar mu mwom wey. Ni dichuku dinidia, musangar mud ik wikalau nich akadivar nau anambaz ney pamanau mutapu wamekesha rukat rey kudi Nzamb nich muchim wey wawonsu, mupim, manangu ni usu wey wawonsu!—Marko 12:30.

Chidi chakin anch, wikadil kal ni musangar nakash mu kumusadil Yehova kudiosh watambula dibatish. Pakwez, in kulejan rusangu avud ashadisha kal musangar wau wadingau nich kwinsambishil. Mulong wak ashadisha musangar wau? Mayingishin ik matubachikina kudandamen kumusadin Yehova nich musangar?

CHIYIBACHIKINA ANTU AMWING KUSHADISH MUSANGAR WAU

Uruu wa Want ukat kutuletin musangar nakash. Mulong wak? Mulong Yehova washilamu anch Want ukushesh piswimp ap mangand minam mayimp ni kulet mangand masu ma Nzamb. Sofoniy 1:14 utulejin anch: “Dichuku Dijim dia [Yehova] didi piswimp, didi kamu piswimp, dezil mau!” Pakwez, anch twatong anch twachingedin kal nakash, tukutwish kushadish musangar wetu twadinga nich kwinsambishil. Chinech chikutwish kukepish mushiku wetu mu mudimu wa Yehova.—Jinswir 13:12.

Pitukata kusutish chisu ni akadivar ni anambaz netu, tukat kwiyov akasikeshinau kudandamen kusal mudimu wa Yehova nich musangar. Mwikadil uwamp wa antu a Yehova ukutwish kutupwit ku difukwil diakin ni kutukwash kusambishiril kand kumusadil Nzamb nich musangar. (1 Pita 2:12) Pakwez, chom ik chikutwisha kushiken anch mukadivar ap nambaz amupup mulong kaziyidinap ku yijil ya Nzamb? Chinech chikutwish kuziyish amwing mu chikumangen ni kushadish musangar wau.

Rukat ra yom ya ku mujimb rikutwish kand kutubachik kushadish musangar wetu. Mutapu ik? Mangand ma Satan matubachikin chakwel tulanda yom yitwakad kwikal nich kuswir. Chawiy tufanyidin kuvurik mazu ma Yesu malondina anch: “Kwikil muntu ukutwisha kuyisadil ansalejend aad nawamp. Ukumukis umwing, chad wamukat mukwau, ap ukumulimish umwing, chad wamudiul mukwau. Kiukutwishanyap kusadil kapamp kamwing Nzamb ni mapit ma pa mangand.” (Mateu 6:24) Tukutwishap kumusadil Yehova nich musangar ni oku tusadin usu wa kwikal nich yom yawonsu tusotina mu mangand minam.

MUSANGAR MU MUDIMU WA YEHOVA

Kumusadin Yehova chidiap chisend chilimina kudi antu amukatina. (1 Yohan 5:3) Vurik anch Yesu walonda anch: “Ezany kudi am, en awonsu uziyinanya mulong wa yisend yikasikena ya mitapu ni mitapu, chad am nikez kukwambulany. Itwikany mpand yam, wingiyiyany am, chad mwamu mipim yen yikwiswedish, mulong am nishimpishin muchim ni kwitudish. Mulong mpand yam yiswakel  kwitwik, ni chisend cham chipipel.” (Mateu 11:28-30) Kwikal mwin Kristu wakin kutwinkin usu ni musangar. Tukwet mayingishin mawamp ma kwikal ni musangar mu mudimu wa Yehova. El tushinshikina katat mayingishin masatu pakach pa mayingishin minam.—Abakuk 3:18.

Tumusadidin Nzamb wa musangar, Muntu Watwinka Mwom. (Midimu 17:28; 1 Timote 1:11) Tukwet kashinsh anch tufanyidin kusadin mwom wetu mulong wa Sakatang wetu. Chawiy, el amboku tudandamen kumusadin nich musangar, chikalap nchik uvud wa mivu tukweta kudiosh twatambula dibatish.

Héctor ulamin musangar wend pa kuvurik ruchingej rend ra Want ni kudandamen kulejan

Shinshikin chilakej cha Héctor, wamusadina Yehova mudi kalam wa munyingumuku mu mivu 40. ‘Mu upal wend,’ wadandamena kumusadin Yehova nich musangar. (Kuseng 92:12-14) Mayej ma mukajend mimika mudimu wend, pakwez Héctor kashadishap musangar wend. Ulondin anch: “Ap anch mayej ma mukajam manletina runeng ni milong mulong wa kumulam, nilikidinap chom chinech chishesha musangar wam wa kumusadin Nzamb wakin. Kwijik anch nifanyidin kusadil mwom wam mulong wa Yehova, wamutanga muntu ni rutong, didi diyingishin dia kumukat nakash ni kumusadin nich muchim wetu wawonsu. Nisadin usu wa kusal nakash mudimu wa kulejan, ni nisadin kand usu wa kutek ruchingej ra Want mu manangu mam mulong wa kulik kushadish musangar wam.”

Yehova wapana mulambu wa difut, chakwel twikala ni mwom wa musangar. Chakin kamu, “Nzamb wakata ngand nakash, ndiy wamupana Mwanend kapwokal chakwel muntu mwawonsu ukumwitiyija ndiy kakujiyap, pakwez ukez kwikal nich mwom wa chikupu.” (Yohan 3:16) Mwaning, akutwish kulikishin yitil yetu ni tukutwish kwikal ni mwom wa chikupu anch twamekesh ritiy mu chipan cha rukat cha difut cha Nzamb. Dined didi diyingishin dijim dia kumekesh kujikitish. Ni kujikitish kwetu mulong wa chipan kukutubachik chakwel tumusadina Yehova nich musangar.

Jesús waswapeja mwom wend ni wamusadina Yehova mu mivu yivud nich musangar

Mukadivar Jesús, wading mu Mexique, walonda anch: “Nading muswik mulong wa mudimu wam, yisu yimwing nasalang mudimu tupamp tutan pakad kwinswinkan ap anch chadingap chitina kusal mwamu. Nasalang mwamu mulong wa kwikal ni nfalang yivud. Chad nileja piur pa Yehova ni mutapu wapanay Mwanend mukatish mulong wa antu. Nikala nich rusot rikash ra kumusadin. Chawiy napana mwom wam kudi Yehova, ni kupwa kwa kusal mudimu mu sosiete mu mivu 28, nakwata mupak wa kudiokal ni kusambish kusal mudimu wa chisu chawonsu.” Wawiy mutapu wasambishay Jesús kumusadin Yehova mudimu nich musangar.

Tukwet mwom wishitwila, yikata kutuletin musangar. Ov, uvurikin mutapu wading mwom wey kurutu kwa kumwijik Yehova? Kambuy Paul  wayivurisha in Kristu a ku Rom anch “wadingany aswik a yitil” pakwez wikalany kal “aswik in kusal yom yitentamina.” Mulong ikala ni mwom wishitwila, achingela difut dia mwom wa chikupu. (Rom 6:17-22) Etu niyetu tulondwil yany ya Yehova, chawiy tukwetap ushon udiokila ku mikadil yiyimp ap ya chisum. Chinech chiletin musangar mud ik!

“Mivu yam ya musangar nayisutisha mu kumusadin Yehova.”

Shinshikin chilakej cha Jaime, muntu wading wakad kwitiyij kwikalaku kwa Nzamb ni mwin kwitiyij dikarumuk ni wading kand mwin kubulan yinkany (boxer). Jaime wasambisha kukumangan ku yikumangan ya win Kristu ni washimoka mulong wa rukat ramanay kwinikwa. Mulong wa kulik mwikadil wend wa pakuru, Jaime wamwita Yehova chakwel amukwasha mulong wa kumwitiyij. Jaime ulondin anch: “Pakemp pakemp najingunina kwikalaku kwa Tatuku wa rukat ni Nzamb wa ranaken. Kulam yany yitentamina ya Yehova kwading diking kudi am. Anch naswimpap, pamwing ap afanyina kwinjip, mudi mwafau arund am amwing in kubulijan yinkany. Mivu yam ya musangar nayisutisha mu kumusadin Yehova.”

KANGAL WAZIY!

Mutapu ik tufanyidina kwiyov pituchingedina disudiel dia mangand minam mayimp? Vurik anch tusadil rusot ra Nzamb ni tuchingedin difut dia mwom wa chikupu. “Chawiy kangal twaziy kusal yom yiwamp, mulong pa chirung chiwanyidina tukez kwangul yom yiwamp.” (Galatia 6:8, 9) Nich ukwash wa Yehova, tujijamenany amboku, tusalany usu wa kukudish mikadil yiwanyidina mulong wa kupand ku “mar makash,” ni tudandamenany amboku kumusadin Yehova nich musangar.—Kujingunik 7:9, 13, 14; Jakobu 1:2-4.

Tukutwish kwikal nich kashinsh anch Yehova ukutufut mulong wa kujijaman kwetu, mulong wij mudimu tusadina ni rukat tumekeshina mulong wendendiy ni mulong wa dijin diend. Anch twadandamen kumusadin nich musangar, tukwikal mudi nfund a kuseng David, walonda anch: “Am namutekin kal Yehova kurutu kwam chisu chawonsu. Mulong [ndiy] udi ku chikas cham cha katatuku, am kinikez kashemunikap. Chawiy muchim wam ukwet musangar ni kuzangijal. Ni nishich mu diking.”—Kuseng 16:8, 9, NWT.