Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 2 , 2016

Ilejina Kudi Atushalapol Ashinshamena a Yehova

Ilejina Kudi Atushalapol Ashinshamena a Yehova

“[Chom ik chikwitinay Yehova kusal?, NWT] Ndiy usotil etu tusala yom yitentamina, ni kumekesh rukat rudimukina, ni kushakam ni Nzamb wetu nich kwitudish.”—MIKE 6:8.

MIMINY: 18, 43

1, 2. Mutapu ik wamekeshay David anch wading ushinshamen kudi Nzamb? (Tal chipich cha kwinsambishil.)

SAUL ni amasalay end 3 000 ading amukimbin David mwi mpay ya Yuda mulong wa kumujip. Pakwez, uchuku umwing, David ni antwend ajingunina chibeng chadingay Saul ni amasalay end. Awonsu ading alel, chad David ni Abishay enda pakemp pakemp mukach mwa amasalay ni amutana. Abishay wamunungisha David anch: “Katat ngitiya, amboku, chakwel nimupampila pansh nich murumbu . . . Nikumwasau kapamp kamwing wakad kumwas tupamp twaad!” Pakwez, David wamukangesha chakwel kangal amujipa Saul. Wamuleja Abishay anch: “Kangal wamujip! Mulong mwawonsu ukumujipa wazizilau kal many ma [Yehova] ukufa nich.” Kupwa David walonda anch: “Pakwez [Yehova] wanlikisha kumukwataku wazizilau kal many ma [Yehova]!”—1 Samwel 26:8-12.

2 David wijika chom chafanyinay kusal mulong wa kwikal ushinshamena kudi Yehova. Wading wij anch wafanyina kumulimish  Saul, ni katongap kumusal chom chiyimp. Mulong wak? Mulong Nzamb wamutonda Saul kwikal mwant wa Isarel. Nlel unou, mudi pakur, Yehova usotin anch atushalapol end awonsu ikala ashinshamena kudi ndiy ni ayilimisha antu atonday mulong wa kutakel.—Tang Mike 6:8.

3. Mutapu ik washinshamanay Abishay kudi David?

3 Abishay wamulimisha David mulong wading wij anch Nzamb wamutonda David chakwel ikala mwant. Chad kupwa kwa kwikal mwant, David wasala yitil yijim. Wasala masandj ni mband wa Uria ni wamuleja Jowab chakwel asala usu mulong Uria afa kwi njit. (2 Samwel 11:2-4, 14, 15; 1 Jinsangu 2:16) Jowab wading mwanamakwend wa Abishay, chawiy Abishay wafanyina kutesh piur pa yom yasalay David, pakwez wadandamena kumulimish. Chikwau kand, Abishay wading ntakel wa amasalay ni wafanyina kusadin usu wend mulong wa kwikal mwant, pakwez kasalap mwamu. Chinyim ni chinech, wamusadina David ni wamukinga mulong wa akankuny nend.—2 Samwel 10:10; 20:6; 21:15-17.

4. (a) Mutapu ik wadingay David chilakej cha kushinshaman kudi Nzamb? (b) Yilakej ik yikwau tukushinshikina?

4 David wading ushinshamen kudi Yehova mu mwom wend wawonsu. Padingay nsand, wamujipa chitabu Goliat, wamusaalang Yehova ni in Isarel. (1 Samwel 17:23, 26, 48-51) Pikalay David mwant, Natan muprofet wa Yehova wamupupa mulong wa yitil yasalay. Kapamp kamwing, David witiyina chitil, wanenganana ni wakarumuka. (2 Samwel 12:1-5, 13) Kupwa, chisu chananapay David, wapana yom yivud ya usey mulong wa kukwash kutung tempel wa Yehova. (1 Jinsangu 29:1-5) Chimeken patok anch, ap anch David warumbuka nakash mu mwom wend, kalikap kwikal ushinshamena kudi Nzamb. (Kuseng 51:4, 10; 86:2) Mu mutu wa mulong winou, tukwisambin chilakej cha David ni cha antu akwau a pa chirungu chend ni tukwilej mutapu tukutwisha kwikal ashinshamena kudiay Yehova kusutamu muntu mwin mwawonsu. Ni tukwisambin kand mikadil yimwing yikutwisha kutukwash kusal mwamu.

OV, UKWIKAL USHINSHAMENA KUDI YEHOVA?

5. Chom ik twilejina ku kurumbuk kwa Abishay?

5 Pakimbay Abishay kumujip Saul, wakimba kumekesh kushinshaman kwend kudi David. Pakwez, David wading wij anch chafanyina kwikal chiyimp kumujip muntu “wazizilau kal many ma [Yehova],” wamukangesha Abishay kumujip mwant. (1 Samwel 26:8-11) Chinech chitufundishin dilejan dia usey: Anch tufanyidin kutond nany tukushinshamena wa kusambish, tufanyidin kutongin piur pa yany ya Bibil yikutwisha kutukwash mu milong yetu.

Chidi cha usey nakash kwikal ashinshamena kudi Yehova kusutamu muntu mwin mwawonsu

6. Ap anch chidi chakin kwikal ashinshamena kudi antu a mu dijuku dietu ni arund, mulong wak tufanyidin kubabal?

6 Chidi chakin kwikal ashinshamena kudi muntu tukatina, mudi murund ap muntu wa mu dijuku dietu. Pakwez, mulong tudi antu akad kuwanyin, yitongijok yetu yikutwish kutudimb. (Jeremiy 17:9) Chawiy lel, anch muntu tukatina ukat kusal yom yiyimp ni walik uyakin, tufanyidin kuvurik anch chidi cha usey nakash kwikal ashinshamena kudi Yehova kusutamu  muntu mwin mwawonsu.—Tang Mateu 22:37.

7. Mutapu ik washalay nambaz umwing ushinshamena kudi Nzamb mu mulong ukash?

7 Anch muntu kanang wa mu dijuku diey amwopat mu chikumangen, ukutwish kumumekeshin Yehova anch ushinshamen kudi Ndiy. Chilakej, dichuku dimwing makwend a Anne, wading wopatau kal, wamutazuka ku telefon ni kumulej anch usotin kwez kumutal. [1] (Tal mazu ma kwinsudiel.) Makwend a Anne walonda anch kadingap ni musangar mulong dijuku diend dialika kwambamb nend. Chinech chamwovisha Anne ushon, ni wamukana anch ukumwakul ku mukand. Kurutu kwa kufund mukand, Anne watongijokina pa yany yimwing ya Bibil. (1 Korint 5:11; 2 Yohan 9-11) Kupwa, mu mukand, wamurumburila mu mutapu uwamp anch makwend ndiy washa dijuku pasalay chitil ni palikay kunenganan ni kukarumuk. Anne wamuleja makwend anch mutapu umwing wafanyinay kwikal kand ni musangar wading wa kumuchirikin Yehova.—Jakobu 4:8.

8. Mikadil ik yikutukwasha kwikal ashinshamena kudi Yehova?

8 Atushalapol ashinshamena a Nzamb a pa chisu cha David ading kand ikepishina, awamp, ni atakamena. El amboku tuman mutapu ukutwisha kutukwash mikadil yiney kwikal ashinshamena kudi Yehova.

TUFANYIDIN KWIKAL IKEPISHINA

9. Abiner wakimba kumujip David mulong wak?

9 Jonatan mwan wa Saul ni Abiner ntakel wa chisak cha amasalay cha in Isarel, amumana David pamuletinay Mwant Saul mutu wa Goliat. Jonatan wikala murund nend a David ni washala ushinshamena kudi ndiy. (1 Samwel 17:57–18:3) Abiner ndiy kasalap mwamu. Pakwez, wamukwasha Saul, wakimba kumujip David. (1 Samwel 26:1-5; Kuseng 54:3) Jonatan ni Abiner ading ij anch Nzamb wading ukatin anch David ikala mwant wa kaad wa Isarel. Pakwez, kupwa kwa rufu ra Saul, Abiner kamukwashap David. Chinyim ni chinech, wasala usu mulong wa kumudish Ishiboshet want, mwan a Saul. Kupwa, Abiner wakimba kwikal mwant amwinend, ni pamwing ap chawiy chamubachika kusal masandj ni mband umwing wa mwant Saul. (2 Samwel 2:8-10; 3:6-11) Mulong wak mutapu wa kutong wa Jonatan ni wa Abiner piur pa David wading ushalijadin? Mulong Jonatan wading ushinshamen kudiay  Yehova ni wading wikepishin pakwez Abiner kadingap mwamu.

10. Mulong wak Abisalom kadingap ushinshamena kudi Nzamb?

10 Abisalom, mwan wa Mwant David kadingap ushinshamen kudi Nzamb mulong kadingap wikepishina. Wakimba kwikal mwant, chawiy watambula “ditemb diend dimwing ni atubar, ni antu amakundj makum matan adinga ni kuyang mau pansh kurutu kwend.” (2 Samwel 15:1) Wayibachika kand in Isarel kwikal ashinshamena kudi ndiy. Wasala usu mulong wa kumujip tatukwend, ap anch wading wij anch Yehova wamuteka David mulong kwikal mwant wa Isarel.—2 Samwel 15:13, 14; 17:1-4.

11. Mutapu ik tukutwisha kutaninamu mu jinsangu ja Bibil jilondina piur pa Abiner, Abisalom, ni Baruk?

11 Anch muntu kikepishinap ni anch ukatin kwikal ntakel, chikasiken kudi ndiy kushal ushinshamena kudi Nzamb. Chakin kamu, tumukatin Yehova, ni tukatinap kwikal ni mukau ni kwikal antu ayimp mudi Abiner ni Abisalom. Pakwez, tufanyidin kubabal mulong kangal tusambisha kukat nfalang nakash ap mudimu ukutusala twiyova anch tukwet usey nakash. Chinech chikushesh urund wetu ni Yehova. Chisu chimwing, Baruk, kalerik wa Jeremiy, wakata chom chading chiburedinay ni kikalap ni musangar wa kumusadil Nzamb. Chad, Yehova wamuleja Baruk anch: “Nikat kuumbwol yom yinatunga kal, nikat kubwit yom yinakuna. Nikez kasal mwamu mwi ngand yakabuj. Ov, ey ukat kuchingej yom yiwamp ching kusu kudi ey amwiney? Kangal kusal mwamu, bwat.” (Jeremiy 45:4, 5) Baruk wamutesha Yehova. Niyetu tufanyidin kumutesh, mulong piswimp ap ukushesh mangand minam mayimp.

Anch wamulej mukadivar ney chakwel ita ukwash kudi amakurump, udi muwamp kudi ndiy ni ushinshamen kudi Yehova

12. Rumburil mulong wak tukutwishap kwikal ashinshamena kudi Nzamb anch tukwetap muchim wa kwipan.

12 Daniel, mukadivar udia mu Mexique, wafanyina kutond nany wafanyinay kushinshamen. Wakimba kwat changadim wakad kumwifukwil Yehova. Daniel ulondin anch: “Nadandamena kumufundin ap kupwa kwa kusambish mudimu wa uchibol.” Pakwez, wajingunina anch wasala kwend yom yasotay pakad muchim wa kwipan. Kadingap ushinshamena kudi Yehova, ni wafanyina kwikal wikepishina. Chawiy, wambamba ni mukurump ukweta  ukaliweny piur pa changadim. Daniel urumburil anch: “Wankwasha kuman anch mulong wa kwikal ushinshamena kudi Nzamb, nifanyidin kwimik kumufundin. Kupwa kwa kulembil tupamp tuvud ni kudil, natwisha kusal mwamu. Mu machuku makemp, musangar wam mu mudimu wa kulejan wapandikana.” Katat Daniel ukwet mband umukatina Yehova, ni usadin mudi kalam wa munyingumuku.

KUSHINSHAMAN KUDI NZAMB KUTUKWASHIN KWIKAL ANTU AWAMP

Anch wajingunin anch murund ney wasalang chitil chijim, ov, ukwambamb nend ni kwikal nich kashinsh anch wakimbang kal ukwash kudi amakurump? (Tal paragraf 14)

13. Mutapu ik mwashalay Natan ushinshamena kudi Nzamb ni kudi David chisu chasalay David chitil?

13 Anch tudi ashinshamena kudi Yehova, tukutwish kand kwikal ashinshamena kudi antu akwau ni kuyikwash mu mutapu uwamp. Muprofet Natan washala ushinshamena kudi Yehova, ni washala kand ushinshamena kudi David. Kupwa kwa David kusend mband wa Uria ni kupwa kwa kumujip Uria, Yehova wamutuma Natan mulong wa kumuyul David. Natan wading muntu utakamena ni wamuziyila Yehova. Pakwez, wasala nich manangu ni wambamba ni David mu mutapu uwamp. Wasota kumukwash David chakwel ijika kujimb kwa chitil chasalay. Chawiy, wamurumburila rusangu ra mpich wiya mwan a mukoku umwing kusu wadingay nich kazwendj. Pateshay David rusangu riner, wajimana nakash piur pa yom yasalay mpich winou. Kupwa, Natan walonda anch: “Muntu win, yey kamu!” David wajingunina anch wamusadina Yehova chitil.—2 Samwel 12:1-7, 13.

14. Mutapu ik ukutwisha kwikal ushinshamena kudi Yehova ni kudi arund ap anamakwey?

14 Niyey ukutwish kwikal ushinshamena chakusambish kudi Yehova ni kupwa kudi antu akwau pa kwikal muntu muwamp. Chilakej, ukutwish kwikal ni uman anch mukadivar wasadin chitil chijim. Ukutwish kusot kushal ushinshamena kudi ndiy, nakash kamu anch udi murund wa piswimp ap muntu wa mu dijuku. Pakwez, wij kand anch chidi cha usey nakash kwikal ushinshamena kudi Yehova. Chawiy, mudi Natan, muziyina Yehova pakwez ikal muntu muwamp kudi mukadivar ney. Muleja anch ufanyidin kwit ukwash kudi amakurump ni anch ufanyidin kwambamb nau pakad kulab. Anch kasadinap mwamu, ey ufanyidin kuyilej amakurump. Anch wasal mwamu, ukushal ushinshamena kudi Yehova. Ni pa chisu chimwing, udi muntu muwamp kudi mukadivar ney mulong amakurump akutwish kumukwash chakwel ikala kand mu urund uwamp ni Yehova. Akumupup kwa matul ni mu mutapu uwamp.—Tang In Levi 5:1; Galatia 6:1.

TUSWIRIKEDIN KUTAKAMAN MULONG WA KWIKAL ASHINSHAMENA KUDI NZAMB

15, 16. Mulong wak Hushay waswirikena kutakaman mulong wa kwikal ushinshamena kudi Nzamb?

15 Hushay wading murund ushinshamena wa Mwant David. Pakimbau antu kumutek Abisalom mwant, Hushay wafanyina kutakaman mulong wa kushal ushinshamena kudi David ni kudi Nzamb. Wading  wij anch Abisalom weza ku Yerusalem pamwing ni amasalay end ni anch David wachina. (2 Samwel 15:13; 16:15) Pakwez, chom ik chasalay Hushay? Ov, wamulika David ni kumukwash Abisalom? Bwat kwau. Ap anch David wading wananap kal ni anch antu avud akimba kumujip, Hushay washala ushinshamena kudi ndiy mulong Yehova wamutonda David chakwel ikala mwant. Chawiy, Hushay waya ku mukandu wa mitond mudi ya mpach mulong wa kumusankan David.—2 Samwel 15:30, 32.

16 David wamwita Hushay chakwel achirika ku Yerusalem ni imekesha mudi murund wa Abisalom, mwamu wafanyina kumubachik Abisalom atesha chiyul chend kulik cha Ahitofel. Hushay wading utakamen ni wateka mwom wend mu ubaj mulong wa kumuziyil David ni kushal ushinshamena kudi Yehova. David walembila anch Yehova amukwasha Hushay ni mwawiy muyasadika. Abisalom wamutesha Hushay kulik Ahitofel.—2 Samwel 15:31; 17:14.

17. Mulong wak tukweta kuswir kwa kutakaman mulong wa kwikal ashinshamena?

17 Tuswirikedin kutakaman mulong wa kwikal ashinshamena kudi Yehova ni kumuziyin pa ndond pa kusal yom yisotinau antu a dijuku dietu, ambay netu a mudimu, ap antakel a guvernema anch etu tusala. Chilakej, kudiosh padingay mwan mukemp, Taro, udia mu Japon, wasalang yom yawonsu yafanyinay kusal mulong wa kuyisangaresh anvajend. Wayiziyina ni wayishinshamena, kulik mulong wafanyina kusal mwamu, pakwez mulong wading uyikatin. Pakwez, pasambishay kwilej nau Atuman a Yehova, anvajend akimba kumukangesh. Chinech chamunenganesha, ni chamukasikena nakash kuyilej anch wakwatang kal mupak wa kuya ku yikumangan. Taro ulondin anch: “Ajimana nakash mu mivu yivud ni anlikisha kuya kuyital ku chikumbu. Nalembila mulong wa kwikal ni kutakaman mulong wa kudandamen mupak wam. Katat, mwikadil wau udi uwamp ni nikutwish kuya kuyital yisu yawonsu.”—Tang Jinswir 29:25.

18. Mutapu ik wataninamu kal mu dilejan dined?

18 Mudi David, Jonatan, Natan, ni Hushay, niyetu tukutwish kwikal ni musangar udiokila ku kwikal ashinshamena kudi Yehova. Tufanyidinap kwikal mudi Abiner ni Abisalom antu akad kwikal ashinshamena. Chidi chakin anch tudi antu akad kuwanyin ni tukat kurumbuk. Pakwez, el amboku tumumekeshin Yehova anch kushinshaman kudi ndiy chidi chom cha usey nakash mu mwom wetu.

^ [1] (paragraf 7) Majin mamwing amaswimpa.