Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 2 , 2016

Yehova Wamutazuka Anch “Murund Nam”

Yehova Wamutazuka Anch “Murund Nam”

“Ey, O Isarel, udi kashalapol wam, ey, O Jakobu, yey kamu natonda, mbut ya Aburaham murund nam.” ISAY 41:8, NWT.

MIMINY: 51, 22

1, 2. (a) Mutapu ik twija anch antu akutwish kwikal arund nend a Nzamb? (b) Chom ik tukushinshikina mu muntu wa mulong winou?

KUDIOSH chisu tukata kuvadik djat chisu cha kufa, tukweting kuswir kwa rukat. Antu akweting kuswir kwa urund wa piswimp ni wa rukat, kulik rukat ra makasu. Pakwez, cha usey nakash, tukwet kuswir kwa rukat rudiokila kudi Yehova. Antu avud kakatap kwitiyij anch antu akutwish kwikal ni urund wa rukat ni wa piswimp ni Nzamb mulong kakatap kumekan ni udi wa dikand diawonsu. Pakwez etu, twij uyakin!

2 Twij kusutil Bibil anch antu ikala arund a Nzamb. Tukutwish kwilejin ku yilakej yau. Mulong wak? Mulong urund ni Nzamb chidi chitongijok cha usey nakash tukutwisha kwikal nich mu mwom. Chawiy, el tushinshikinany amboku chilakej cha Aburaham. (Tang Jakobu 2:23.) Mutapu ik wikalay murund nend a Nzamb? Urund wa piswimp wa  Aburaham ni Nzamb wading wimedin pa ritiy, ni wijiken mudi “ngakau wa in ritiy awonsu.” (Rom 4:11,TMK) Piushinshikidina chilakej chend, iyipula anch: ‘Mutapu ik nikutwisha kwimburij ritiy ra Aburaham ni kukasikesh urund wam ni Yehova?’

MUTAPU IK WIKALAY ABURAHAM MURUND NEND A NZAMB?

3, 4. (a) Rumburil mutapu wading ujimbina kupak kwa ritiy ra Aburaham. (b) Mulong wak Aburaham wasota kumulambul Isak?

3 Tong bil, Aburaham ukweta mivu piswimp ni 125 pakandaminay pakemp pakemp ku mukandu. [1] (Tal mazu ma kwinsudiel.) Pamulondwilau kwi nyim kudi mwanend Isak ukweta pamwing ap mivu 25. Isak usendin nkuny, ni Aburaham ukwet mpak ni yom ya kwakish nich kasu. Weny winou wafanyina kamu kwikal weny uyimp nakash mu mwom wa Aburaham. Chadingap mulong wa uvud wend wa mivu. Wading ukwet usu nakash. Pakwez, weny winou wading ukash mulong Yehova wamwita chakwel amulambula mwanend!—Disambishil 22:1-8.

Aburaham kamuziyinap Nzamb mudi mputames, kwawiy kulond anch kuziyin pakad kutong

4 Chafanyina kwikal kupak kukash mulong wa ritiy ra Aburaham. Antu amwing alondining anch Nzamb wading ukwet chisum pamwitay Aburaham anch amulambula mwanend. Ni akwau akat kulondang anch Aburaham wasota kwend kusal mwamu mulong kadingap umukatin mwanend. Antu akat kulond yom mudi yiney mulong kakwetap ritiy ni kijap chirumburikina ritiy rakin ni mutapu urisadina. (1 Korint 2:14-16) Pakwez Aburaham kamuziyinap Nzamb mudi mputames, kwawiy kulond anch kuziyin pakad kutong. Waziyina mulong wading ukwet ritiy rakin. Wading wij anch Yehova kafanyinap kumwit kusal chom chikutwisha kumumesh mar. Aburaham wading wij anch ang waziyin, Yehova wafanyina kumuyukish ndiy ni mwanend mukatish. Chom ik chafanyinay Aburaham kusal mulong wa kwikal ni ritiy rikash mudi riner? Wading ukwet kuswir kwa ronganyin ni kushinshikin pa yom yamushikena.

5. Mutapu ik watwishay Aburaham kwilej piur pa Yehova, ni ronganyin riner ramukwasha mutapu ik?

 5 Ronganyin. Aburaham wapamina mu musumb utazukinau anch Ur. Mu musumb winou antu ifukwilang anzamb a makasu, ni tatukwend niyend wasalang mwamu. (Joshua 24:2) Chad mutapu ik wilejay Aburaham piur pa Yehova? Bibil umekeshin anch Sem mwanend a Nowa wading ngakiril wa Aburaham. Ni wadingaku kushik ni padingay Aburaham ni mivu 150. Sem wading muntu ukweta ritiy rikash, ni chimeken anch wayileja in mu dijuku diend piur pa Yehova. Tukwetap kashinsh pa mulong winou, pakwez chimeken anch Aburaham wileja piur pa Yehova kusutil Sem. Yom yilejay Aburaham yasala anch amukata Yehova, ni ronganyin ramukwasha kukasikesh ritiy.

6, 7. Yom yamushikena Aburaham, yakasikesha ritiy rend mutapu ik?

6 Yom yamushikena. Mutapu ik washikenay Aburaham kukasikesh ritiy rend mudiay Yehova kusutil yom yamushikena? Antu amwing alondining anch yitongijok yikat kutwalang ku yovil, ni yovil yikat kutwalang ku yisal. Muchim wa Aburaham wikala ubachikinau kudi yom yilejay piur pa Nzamb, ni chinech chamubachika nakash kumulimish “[Yehova] Nzamb Upandakena Piur pa yawonsu watanga diur ni divu.” (Disambishil 14:22) Bibil utazukin kalimish kakurikina mudi kinak anch “wom wa wi-Nzamb.” (Hebereu 5:7, TMK) Mulong wa kwikal ni urund wa piswimp ni Nzamb, tufanyidin kwikal ni wom wa wi-Nzamb. (Kuseng 25:14) Mwikadil winou wawiy wamubachika Aburaham chakwel amuziyina Yehova.

7 Nzamb wamuleja Aburaham ni Sara kudiokal mu musumb wa Ur ni kuya mwi ngand ya wingendj. Ading ananapin kal, ni afanyina kushakam mu antent mivu yau yawonsu. Ap anch Aburaham wading wij anch kwafanyina kwikal ubaj uvud, wakwata mupak wa kumuziyil Yehova. Mulong wa kuziyil kwend, Nzamb wamuyukisha ni kumuking. Chilakej, chisu chamutambulau Sara mukajend wa ufun, ni pakimbau kumujip Aburaham, Yehova wasala chilay mulong wa kuyichidij awonsu aad tupamp tuvud. (Disambishil 12:10-20; 20:2-7, 10-12, 17, 18) Yom yiney yamushikena yakasikesha ritiy ra Aburaham.

8. Kutambul ronganyin ni kushinshikin yom yikata kutushiken, kukutwish kukasikesh urund wetu nend Yehova mutapu ik?

8 Ov, tukutwish kwikal arund a piswimp a Yehova? Mwaning, tukutwish!  Mudi Aburaham, tufanyidin kwilej piur pa Yehova. Niyetu tukutwish kwikal ni ronganyin ni yom yikata kutushiken tukweta nich kuswir. Nlel, tukwet yom yivud kusutamu yadingay nich Aburaham. (Daniel 12:4; Rom 11:33) Bibil wizwil too nich ronganyin piur pa muntu “Watanga diur ni divu.” Yom yitukata kwilej yikat kusal anch tumukata Yehova ni yikat kutukwash kwikal ni kalimish kakurikina mulong wendendiy. Rukat riner ni kalimish kinak yikat kutubachik kumuziyil Nzamb. Pitukata kusal mwamu, tukat kuman mutapu ukatay kutuking ni kutuyukish, ni chinech chikat kumekan mu yom yikata kutushiken yikutwisha kukasikesh ritiy retu. Anch twamusadin Yehova nakash, tukwikal ni chisambu ni musangar. (Kuseng 34:8; Jinswir 10:22) Ronganyin tutambwila ni yom yikata kutushiken, yikat kusal anch urund wetu nend wikala uwamp nakash.

MUTAPU WALAMAY ABURAHAM URUND WEND NI NZAMB

9, 10. (a) Chom ik chifanyidina kusal mulong wa kukasikesh urund? (b) Chom ik chimekeshina anch wakata ni wakasikesha urund wend ni Yehova?

9 Urund wa piswimp, tukutwish kuufanikesh ni dipit dia usey nakash. (Tang Jinswir 17:17.) Udiap mudi nnung ya usey yikatau kusadin kwau mulong wa kuwapish nich mu chikumbu. Udi mudi yisalamb yiwamp yikweta kuswir kwa mem ni kuyilam nawamp. Aburaham wakata ni walama urund wend ni Yehova. Chad mutapu ik wasalay mwamu?

Urund udi mudi yisalamb yiwamp yikweta kuswir kwa mem ni kuyilam nawamp

10 Aburaham wadandamena kukasikesh wom wend wa wi-Nzamb ni kuziyil. Chilakej, chisu chayay mu Kanan pamwing ni dijuku diend ni atushalapol end, wadandamena kwitiy Yehova amutakela kukwat mipak yikemp ap yijim. Muvu umwing kurutu kwa kumuval Isak, padingay Aburaham ni mivu 99, Yehova wamuleja anch ayitwala ku mukand amakundj awonsu a mu chikumbu chend. Ov, Aburaham wamutadika Yehova ap kwidjidjek kusal chom chamwitau kusal? Bwat, pakwez wamuchingejina Yehova ni waziyina “pa dichuku dinidia kamu.”—Disambishil 17:10-14, 23.

11. Mulong wak mulong wa Sodom ni Gomor wading umutadin Aburaham, ni Yehova wamukwasha mutapu ik?

11 Mulong Aburaham wamuziyinang Yehova ap mu yom yikemp, urund wau wikala uwamp nakash. Wiyova anch ukutwish kwambamb ni Yehova piur pa chom chin chawonsu, ap kumwit ukwash chisu chirishinay ni milong yikash. Chilakej, chisu chalonday Yehova anch ufanyidin kushesh musumb wa Sodom ni wa Gomor, mulong winou wading umutadin kand Aburaham. Mulong wak? Wiyakamisha anch antu awamp akufa pamwing nau antu ayimp. Wiyakamisha kand piur pa mwipwend Lot wading ushicha mu Sodom ni dijuku diend. Aburaham wamuchingejina Yehova, “nkalansambu wa mangand mawonsu,” chawiy wambamba nich kwikepish ni Yehova piur pa mulong winou.  Yehova washimpisha muchim padiay murund nend ni wamumekeshina anch Udi mwin ranaken. Yehova wamuleja anch, ap anch walet dirumburish, ukuyikimb antu awamp ni kuyipandish.—Disambishil 18:22-33.

12, 13. (a) Ronganyin ni yom yamushikena Aburaham yamukwasha mutapu ik mu kusut kwa mivu? (b) Chom ik chimekeshina anch Aburaham wading umuchingejidin Yehova?

12 Chimeken patok anch rongonyin rawonsu ratambulay ni yom yawonsu yamushikena Aburaham yamukwasha kulam nawamp urund wend ni Yehova. Chawiy, pamwitau Aburaham kudi Yehova kumulambul mwanend, wijika anch Yehova udi ching mwin kushimpish muchim, mwin ranaken, mwin kuchingejin ni mwin kuchidij. Aburaham wading ni kashinsh kamu anch Yehova kakutwishap kapamp a kamwing kwikal mwin chisum ap wakad riy! Mulong wak tulondina mwamu?

13 Kurutu kwa kuyisha atushalapol end, Aburaham wayileja anch: “En shalany panap ni chimbur. Am ni mwan tuyil kwaa! Tukifukwila, tukwez kand kudi en.” (Disambishil 22:5) Chom ik chakimbay Aburaham kulond? Wading udimben pa kulond anch ndiy ni Isak akuchirik, chad ndiy wij anch ufanyidin kumulambul Isak? Bwat. Bibil ulondin anch Aburaham wading wij anch Yehova wading ukwet usu wa kumuvumbul Isak. (Tang Hebereu 11:19.) Aburaham wading wij kand anch Yehova ndiy wamwinka usu wa kuval mwan ap anch ndiy ni Sara ading ananapin kal. (Hebereu 11:11, 12, 18) Chawiy, wajingunina anch kwikil chom ap chimwing chimukasakedina Yehova. Aburaham kadingap wij chafanyina kusadik dichuku dinidia. Pakwez wading ukwet ritiy anch, ang chasadik mwamu, Yehova ukumuvumbul mwanend, mulong kushilamu kwawonsu kwa Nzamb kudi kwakin. Chawiy chimutazukinau Aburaham anch: “ngakau wa in ritiy awonsu!”

Aburaham wading ukwet ritiy anch, ang chasadik mwamu, Yehova ukumuvumbul mwanend, mulong kushilamu kwawonsu kwa Nzamb kudi kwakin

14. Milong ik turishina nich mu kumusadin Yehova, ni mutapu ik ukutwisha chilakej cha Aburaham kukukwash?

14 Pakwez nlel unou, Yehova katwitinap kulambul anetu, chad utwitin chakwel tuziyina ku yijil yend. Yisu yimwing tukutwishap kutesh kurumburik kwa yijil yiney ap tumen anch yikasiken nakash kuyiziyil. Ov, niyey wiyovilap mwamu? Antu amwing amening anch mudimu wa kulejan uyikasikedining. Pamwing ap, amwing oviling usany ni akat kuman anch chikasiken kwambamb ni antu akadiau kwijik. Akwau akat kwov wom wa kuyijik ku mudimu ap ku shikol anch adi Atuman. (Kubudik 23:2; 1 Tesalonik 2:2) Anch akwitin kusal chom kampand chikasikena, tongin pa chilakej chiwamp nakash cha ritiy ni cha kutakaman cha Aburaham. Anch twatongijokin pa yilakej ya amakundj ni amband ashinshamena, yikutwish kutubachik kuyimburij ni kusej piswimp ni Murund netu, Yehova.—Hebereu 12:1, 2.

 URUND UKATA KULET YIYUKISH

15. Mulong wak tufanyidin kwikal nich kashinsh anch Aburaham kanengananap piur pa kushinshaman ni kuziyil kwend kudiay Yehova?

15 Ov, Aburaham wanenganana mulong wa kuziyil ku yijil ya Yehova? Bibil ulondin anch Aburaham “wafil[a] mu upal uwamp, mulong wading wananap kal nakash.” (Disambishil 25:8) Chisu chawanyishay mivu 175, Aburaham wafanyina kushinshikin mwom wend ni kwikal ni musangar. Mulong wak? Mulong urund wend ni Yehova wading wa usey nakash kudi ndiy. Pakwez, pitutangina anch Aburaham “wading wananap kal nakash,” chinech chirumburikinap anch wading ukisin kwikal ni mwom.

16. Musangar ik ukwikalay nich Aburaham mu Paradis?

16 Bibil ulondin anch Aburaham “wading uchingedil musumb ushichinga chikupu wabolay Nzamb ni kuutung ndiy amwinend.” (Hebereu 11:10) Aburaham wading witiyijin anch dichuku dimwing wafanyina kuman musumb winou, Want wa Nzamb, ukuyikela pa divu diakabuj. Ni yikusadik mwamu! Tong mutapu ukwikalay Aburaham ni musangar pakushakamay mu paradis pa divu ni kudandamen kukasikesh urund wend ni Nzamb. Ukwikal ni musangar pa kwijik anch chilakej chend cha ritiy chayikwasha atushalapol a Nzamb mu tunan twa mivu! Mu Paradis ukwijik anch mulambu wend pa Mukandu wa Moriya wading chijingidij cha chom chimwing chijim nakash. (Hebereu 11:19) Ni ukwijik kand anch ushon wovay pa kumulambul mwanend Isak wakwasha ma miliyon ma antu ashinshamena kwijik ushon wovay Yehova pa kumupan Mwanend, Yesu Kristu mudi difut mulong wa antu awonsu. (Yohan 3:16) Chilakej cha Aburaham chitukwashin etu awonsu kwikal ni kujikitish mulong wa difut, chisal chijim cha rukat!

17. Mupak ik ukwatina, ni chom ik tukwileja mu mutu wa mulong ulondwilaku ou?

17 El amboku etu awonsu tukwata mupak wa kwimburij ritiy ra Aburaham. Mudi ndiy, tukwet kuswir kwa ronganyin ni kushinshikin yom yikata kutushiken. Anch twadandamen kwilej piur pa Yehova ni kumuziyin, tukuman mutapu utuyukishinay ni utukinginay. (Tang Hebereu 6:10-12.) El Yehova ikala Murund netu chikupu! Mu mutu wa mulong ulondwilaku ou, tukushinshikin yilakej ya antu asatu ashinshamena ikala arund a piswimp a Nzamb.

^ [1] (paragraf 3) Aburaham ni Sara ayitazukang kwinsambishil anch Abram ni Sarai. Pakwez mu mutu wa mulong winou, tukusadin majin mayipilau kudi Yehova.