Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 2 , 2017

Yehova Uyitakedin Antu End

Yehova Uyitakedin Antu End

‘Yehova ukukutakelany yisu yawonsu.’—ISAY 58:11.

MIMINY: 3, 4

1, 2. (a) Mutapu ik ushalijangenau Atuman a Yehova ni ma relijon makwau? (b) Yom ik tukwileja mu mutu wa mulong winou ni ukwambakenap?

ANTU akat kuyipul Atuman a Yehova yisu yawonsu anch: “Nany ntakel wen?” Akat kuyipul piur pa chom chinech mulong mu ma relijon mavud muding muntu ikundj ap mband utakedining. Pakwez, tukat kwibaz pitukata kulond anch Ntakel wetu kadiap muntu wakad kuwanyin. Chawiy, Ntakel wetu ndiy Yesu Kristu! Ni umuziyidin Tatukwend udia Ntakel wend, Yehova.—Mateu 23:10.

2 Kudi kand chisak cha antu amakundj chitazukinau anch “kashalapol ushinshamena ni kubabal,” chiyitakedina antu a Nzamb nlel panap pa divu. (Mateu 24:45,TMK.) Mutapu ik twija anch chidi chakin anch Yehova ndiy ututakedina kusutin Mwanend? Tukuman mayingishin masatu masadina anch twikal ni kashinsh piur pa chom chinech. Ap anch Yehova ukat kusadin antu amwing mulong wa kuyitakel antu end, chimeken patok anch Yehova wading ni udandamedin kwikal Ntakel wakin wa antu end.—Isay 58:11.

SPIRITU UTUMBILA WAYIKASIKESHA

3. Yom ik yamukasikesha Moses mulong ayitakel in Isarel?

3 Spiritu utumbila wayikasikesha antu atonday Nzamb mulong wa kutakel. Nzamb wamutonda Moses mulong wa  kwikal ntakel wa in Isarel. Yom ik yamukwasha kuwanyish chisend chinech cha usey nakash? Yehova wamwinkisha Moses ‘Spiritu wend utumbila.’ (Tang Isay 63:11-14.) Chawiy, Yehova ndiy wading uyitakedina antu end, mulong spiritu wend ndiy wamukwasha Moses.

4. Yom ik yamekesha anch Moses wading ni spiritu wa Nzamb? (Tal chipich cha kwinsambishin.)

4 Ov, antu amana anch Moses wading ni spiritu wa Nzamb? Mwaning! Spiritu utumbila wa Yehova wamwinkisha Moses usu wa kusal yilay, ni kwijikish dijin dia Nzamb kudi Farao, nyikel wa usu nakash mu Idjibit. (Kubudik 7:1-3) Spiritu utumbila wamukwasha kand Moses kwikal ntakel ukweta rukat ni ushimpishina muchim. Wading ushalijadin nakash nau antakel ayimp, a chisum ni ikatina ayinau a jingand jikwau! (Kubudik 5:2, 6-9) Chakin, Yehova wamutonda Moses mulong wa kuyitakel antu end.

5. Yehova wayinkisha kand antu ik akwau spiritu utumbila mulong wa kuyitakel antu end?

5 Yehova wayinkisha kand antu ik akwau spiritu utumbila mulong wa kuyitakel antu end? Bibil ulondin anch: “Yoshua, mwan ikundj wa Nun, wading wizwil nich ronganyin ra [spiritu] wa Nzamb.” (Kuvurik Yijil 34:9) ‘Spiritu wa Yehova wamushirikina Gedeyon.’ (Ankalansambu 6:34) Ni ‘spiritu wa Yehova wasambisha kumukasikesh David.’ (1 Samwel 16:13) Antu inay awonsu achingejina spiritu wa Nzamb chakwel ayikwash kusal yom yakimbau kukangany kusal ku usu wau ayinau. (Joshua 11:16, 17; Ankalansambu 7:7, 22; 1 Samwel 17:37, 50) Chidi chakin anch Yehova ndiy wading uyinkishina usu wa kusal yom yijim, chawiy, ndiy wading uwanyidina kwinkish katumb.

Paziyinau antu a Nzamb kudi Moses, Joshua, Gedeyon, ni David, amulondula kamu Yehova mudi Ntakel wau

6. Mulong wak Nzamb wakata anch antu end ayilimisha antakel a mu Isarel?

6 Yom ik yafanyinau kusal in Isarel pamanau anch spiritu utumbila wa Nzamb wamukasikesha Moses, Joshua, Gedeyon, ni David? Afanyina kuyilimish. Palondau antu nayimp mulong wa Moses, Yehova walonda anch: ‘Ov, chisu ik chikez kulikau antu inay kwimburen kalimish?’ (Kuchind Michid 14:2, 11) Chakin, Yehova wayitonda amakundj inay mulong wa kuyitakel antu end. Paziyinangau antu kudi antakel inay, amulondulang Yehova mudi Ntakel wau.

ANGEL AYIKWASHA

7. Mutapu ik wamukwashau Moses kudi angel?

7 Angel ayikwasha antu atondau kudi Nzamb mulong wa kutakel. (Tang Hebereu 1:7, 14.) Nzamb wasadina angel mulong wa kumutakel Moses. Chakusambish, mwangel “wamekana kudiay ndiy mu chifukis” ni wamwinkisha chisend cha kuyikol an a Isarel ni kuyitakel. (Midimu 7:35, TMK.) Cha kaad, Nzamb wayisadina angel mulong wa kumwinkish Moses Yijil mulong wa kuyifundish in Isarel. (Galatia 3:19) Cha kasatu, Yehova wamuleja anch: “Katat, yang uyitakela antu kwi ndond yinakuleja kal. [Mwangel] wa mwiur wam  ukez kukutakel kurutu.” (Kubudik 32:34) Bibil kalondinap anch in Isarel amana mwangel ukat kusal yom yiney, bwat. Pakwez, mutapu wayitakelau antu kudi Moses ni wayifundishau, wamekesha patok anch angel ading amukwashin.

8. Mutapu ik wamukwashau Joshua ni Ezekias kudi angel?

8 Antu ik akwau akwashau kudi angel? Bibil ulondin anch “kalal wa chisak cha amasalay a [Yehova],” mwangel, wamukwasha Joshua kuwin njit jarishau in Isarel nau in Kanan. (Joshua 5:13-15; 6:2, 21) Kupwa, payitakelau antu a Nzamb kudi Mwant Ezekias, chisak chijim cha amasala a in Asiria ovijana mulong wa kuya kushesh musumb wa Yerusalem. Uchuku winiwa, ‘mwangel wa Yehova wayijipa amasalay a in Asiria 185 000.’—2 Ant 19:35.

9. Ap anch antu atonday Nzamb mulong wa kutakel ading akad kuwanyin, yom ik yafanyinau kusal in Isarel?

9 Angel ading awanyidina. Pakwez, antu ading akwashinau kudi angel ading akad kuwanyin. Chilakej, chisu chimwing Moses kamulimishap Yehova. (Kuchind Michid 20:12) Joshua kamwipulap Nzamb yom yafanyinay kusal chisu chezau in Gabayon mulong wa kusal nau chisambu. (Joshua 9:14, 15) Chisu chimwing, Ezekias wikala ni chibud. (2 Jinsangu 32:25, 26) Ap anch amakundj inay ading akad kuwanyin, in Isarel afanyina kulondul wintakel wau. In Isarel afanyina kwijik anch Yehova ndiy usadidina angel mulong wa kuyikwash amakundj inay. Mu kulond patok, Yehova wading uyitakedin antu end.

DIZU DIA NZAMB DIAYITAKELA

10. Mutapu ik wamutakelau Moses kusutin Yijil?

10 Dizu dia Nzamb diayitakela antu end atonday mulong wa kutakel. Bibil utazukin Yijil yayinkishau in Isarel anch: “Yijil ya Moses.” (1 Ant 2:3) Pakwez Bibil umekeshin patok anch Yehova ndiy wayinka in Isarel Yijil. Moses ni ndiy waziyina ku Yijil yiney. (2 Jinsangu 34:14) Chilakej, kupwa kwa kumulej kudi Yehova mutapu wa kutung dizang, “Moses waziyila, chawiy ndiy wasala yom yawonsu yamulejau kudi [Yehova].”—Kubudik 40:1-16.

11, 12. (a) Chom ik chamwitau Joshua ni ant akwau ayitakelang antu a Nzamb kusal? (b) Dizu dia Nzamb diayitakela antu ading atakedina mutapu ik?

11 Joshua wading ni chikunku cha Dizu dia Nzamb pikalay ntakel, ni Yehova wamuleja anch: “Ukez kutang muten ni uchuku chakwel ey ukutwish kubabal kulam yawonsu yifundilaumu.” (Joshua 1:8) Ant akwau afanyina kuyitakel antu a Nzamb afanyina niyau kutang Yijil dichuku diawonsu, kufund kopi wa Yijil yiney, ni kuziyin “mazu mawonsu ma Yijil yiney ni kuyisadil.”—Tang Kuvurik Yijil 17:18-20.

12 Dizu dia Nzamb diayitakela antu ading atakedina mutapu ik? Tongin pa chilakej cha Mwant Yosias. Kupwa kwa kutan Yijil ya Moses, kalerik wa Yosias wasambisha kumutanginay. * (Tal mazu ma kwinshin.) “Pateshay mwant mazu ma Mukand wa Yijil, wapula yidjal yend.” Dizu dia Nzamb diamubachika kuwupol akish awonsu mwi ngand ni watenchika mulong wa kusal musambu wa Pasak wading wakad kusadikang kand. (2 Ant 22:11; 23:1-23) Mulong Yosias nau antakel akwau ashinshamena alondula Dizu dia Nzamb, chinech chayikwasha kuwapish  wintakel wapanangau kudi antu a Nzamb. Kuswimp kwinoku kwayikwasha antu a Nzamb mulong wa kumuziyin Ndiy.

13. Mutapu ik wading ushalijadinau in kutakel a antu a Nzamb ni in kutakel a michid yikwau?

13 In kutakel a michid yikwau ading ayitakedin kusutin manangu ma antu makweta mimbu. Chilakej, in kutakel a in Kanan ni antu au asala yom yiyimp, mu yom yiney mwading, kwatijan ni mwanamakwey, utun, kulal ni nnam, kupesh an, ni kwifukwil akish. (In Levi 18:6, 21-25) Chikwau kand, antakel a in Babilon nau in Idjibit kadingap ni yijil yishitwila mudi yadingau nich antu a Nzamb. (Kuchind Michid 19:13) Pakwez, antu a Nzamb amana mutapu wayikasikeshau kudi antakel ashinshamena kulam difukwil dishitwila, kwikal ishitwila ku mujimbu, ni kwipuk masandj mulong chidi chom chijondila. Chakin kamu, Yehova wayitakela antu end.

14. Mulong wak Yehova wayipupa antakel amwing a antu end?

14 Kadiap ant awonsu ayiyikela antu Nzamb alondula mbil jend. Ant inay akad kushinshaman alika kulondul wintakel wa spiritu utumbila wa Nzamb, angel end, ni Dizu diend. Yisu yimwing, Yehova wayipupang ap wayidioshang watekap antakel akwau. (1 Samwel 13:13, 14) Kupwa, Yehova watonda muntu ukwikala ntakel uwanyidina.

YEHOVA WATOND KAL NTAKEL UWANYIDINA

15. (a) Mutapu ik wamekeshau aprofet kwez kwa ntakel uwanyidina? (b) Nany wading ntakel uwanyidina?

15 Mu yitot ya mivu, Yehova wakana anch ukutond Ntakel uwanyidina mulong wa antu end. Chilakej, Moses wayileja in Isarel anch: “Yehova Nzamb wen ukez kukubudishinany [muprofet] pakach pen, umwing wa mukach mwa anamakwen udia mudi am. Ndiy winiwa ukeza kuteshany.” (Kuvurik Yijil 18:15) Isay walonda anch muntu winou ukwikal “mwin kutakel ni kalam.” (Isay 55:4) Ni Daniel wafunda piur pa Mesia anch ndiy ukwikala “Mwin kutakel.” (Daniel 9:25) Kupwa, Yesu Kristu wiyijikisha amwinend mudi “Mwin kutakel” wa antu a Nzamb. (Tang Mateu 23:10.) In kwilej a Yesu amulondula kwa kwikatin, ni itiyija anch ndiy watondau kudi Yehova. (Yohan 6:68, 69) Yom ik yayinkisha kashinsh anch Yesu Kristu wading muntu wasadinau kudi Yehova mulong wa kuyitakel antu end?

Yehova wamutonda Yesu kwikal ntakel uwanyidina

16. Yom ik yamekesha anch Yesu Kristu amukasikesha kusutin spiritu utumbila?

16 Spiritu utumbila wamukasikesha Yesu. Pamubatishau Yesu, Yohan wamana “diur dianzurik, chad [Spiritu] Utumbila wadinga mudi iyemb wamushirikina ndiy.” Kupwa kwa yom yiney, “[Spiritu] Utumbila wamutwala mwi mpay.” (Marko 1:10-12) Pasalangay Yesu mudimu panap pansh, spiritu utumbila wa Nzamb wamukasikesha mulong wa kufundish ni kusal yilay. (Midimu 10:38) Chikwau kand, spiritu utumbila wamukwasha Yesu kumekesh mikadil mudi rukat, musangar ni ritiy rikash. (Yohan 15:9; Hebereu 12:2) Kwikil ntakel ap umwing wading umekeshina kwikal ni Spiritu utumbila wa Nzamb mudi winou.  Mu kulond patok, Yehova wamutonda Yesu kwikal Ntakel.

Mutapu ik wamukwashau Yesu kudi angel? (Tal paragraf wa 17)

17. Yom ik yasalau angel mulong wa kumukwash Yesu?

17 Angel amukwasha Yesu. Chisu chikemp kupwa kwa kutambul dibatish, “angel eza amukwash.” (Mateu 4:11, TMK.) Chisu chikemp kurutu kwa rufu rend, “[mwangel] wa mwiur washika kudi ndiy, wamukasikesh.” (Luka 22:43) Yesu wading wij anch Yehova ukutum angel mulong wa kumukwash pakwikalay nich kuswir kwa ukwash.—Mateu 26:53.

18, 19. Dizu dia Nzamb diatakela mashakamin ma Yesu ni mafundish mend mutapu ik?

18 Dizu dia Nzamb diamutakela Yesu. Kudiosh kwinsambishin kwa mudimu wend wa kulejan kushik ni pafay pa mutond wa mar, Yesu witiya anch Mifund yimutakel. Ap padingay piswimp ni kufa, Yesu wajimbula uprofet piur pa Mesia. (Mateu 4:4; 27:46; Luka 23:46) Pakwez antakel a ma relijon a chisu chinicha ading ashalijadin nakash ni Yesu. Alikang Dizu dia Nzamb anch dikwatijadinap ni mafundish mau. Yesu wasadina Dizu dia Nzamb palonday piur pau anch: “Antu inay akat kwinlimish nich mazu mamwamu, pakwez michim yau yidi kulemp ni yamam. Akat kwingifukwil, pakwez kwifukwil kwau kudi kwamwamu, mulong awiy akat kulejan yijil yau antu, mudi yawiy yijil ya Nzamb!” (Mateu 15:7-9) Yehova kafanyinap kutond amakundj alikang kulondul Dizu diend mulong wa kuyitakel antu end.

19 Yesu wasadina kand Dizu dia Nzamb payifundishangay antu akwau. Pamwipulangau kudi antakel a chirelijon, kasadinangap manangu mend ap yom yijay mulong wa kuyakul. Pakwez wayifundishang  antu yom yidiokila mu Mifund. (Mateu 22:33-40) Chikwau kand, Yesu kayibazinap antu mu kuyilej jinsangu ja mwom wend padingay mwiur, ap piur pa mutapu watangau mangand. Pakwez, mulong wading ukatin Dizu dia Nzamb, wasangera kwambamb nau antu akwau, ni “wayiburila manangu mau kwov Mikand ya Nzamb.”—Luka 24:32, 45.

20. (a) Yesu wamutumbisha Yehova mutapu ik? (b) Kushalijan ik kwading pakach pa yisal ya Yesu ni yisal ya Herod Agrip I?

20 Ap anch antu ading amuteshina Yesu ashimoka piur pa mutapu wend wa kulond, chisu chawonsu wapanang katumb kudi Mulej wend, Yehova. (Luka 4:22) Pakimbau kumutumbish Yesu kudi mpich umwing mu kulond anch: “Mulej Muwamp,” Yesu wikepisha ni walonda anch: “Ov, mulong wak wingedina am anch, muwamp? Kwikil muntu muwamp, ching kusu Nzamb amwinend.” (Marko 10:17, 18) Pakwez, Herod Agrip I wikala ntakel wa mu Yudeya kupwa kwa mivu piswimp chinan, wikala ni yisal yishalijangena nakash ni ya Yesu. Dichuku dimwing, ku chikumangan cha pakampwil, Herod wadjala maswun mawamp ma want makweta usey nakash. Pamumanau ni pamuteshau kudi antu, asambisha kutoy anch: ‘Dined kididiap dizu dia muntu didi dizu dia nzamb!’ Herod wakata ntumb nakash. Pakwez yom ik yashikena? “Pawiy kamu pinipa, muruu wa mwiur wamubula kamu Herod, [mulong] ndiy kamutumbishap Nzamb. Chad atupwapu a mwivumu amudia, wafa.” (Midimu 12:21-23) Mu kulond patok, Yehova kamutondap Herod mulong ikala ntakel. Pakwez Yesu wamekesha anch Nzamb wamutonda ni wadandamena kumutumbish Yehova mudi Ntakel Mujim wa antu End.

21. Yom ik tukushinshikina mu mutu wa mulong ulondwilaku ou?

21 Yehova kakatap anch Yesu ikal Ntakel mu mivu yikemp. Pavumbukay, Yesu wayileja in kwilejend anch: “Anginkishin kal ulabu wawonsu wa mwiur ni wa pansh.” Wawejinaku anch: “Chawiy am nikez kwikal ni yenen machuku mawonsu, djat ni kwisudiel kwa mangand.” (Mateu 28:18-20) Pakwez mutapu ik ukutwishay Yesu kuyitakel antu a Nzamb panap pansh padiay mwiur mudi muntu wakad kumekan? Nany wafanyinay kusadin Yehova mulong wa kumumekesh Yesu panap pansh? Mutapu ik wafanyinau in Kristu kujingunin antu atonday Nzamb mulong wa kutakel? Mutu wa mulong ulondwilaku ou ukwakul ku yipul yiney.

^ par. 12 Pamwing ap winou wading mukand wakusambish wafundau kudi Moses .