Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 2 , 2017

Nany Uyitakedina Antu a Nzamb Nlel?

Nany Uyitakedina Antu a Nzamb Nlel?

“Yivurikany awiy adia in kutakel en.” —HEBEREU 13:7, TMK.

MIMINY: 43, 13

1, 2. Payay Yesu mwiur, yom ik yafanyinau kwiyipul atwimbuy?

ATWIMBUY a Yesu ading iminy pa Mukandu wa Mutond ya Mpach ni akat kutal mwant wau, murund nau, Yesu payilay mwiur ni pamubwikau kudi didj. (Midimu 1:9, 10) Piswimp mivu yaad, Yesu wayifundisha, wayikasikesha, ni wayitakela. Pakwez katat waya kal. Yom ik yafanyinau kusal?

2 Kurutu kwa kuya mwiur, Yesu wayileja in kwilejend anch: “Ukez kwikalany atuman amam mu Yerusalem, ni mu Yudeya mwawonsu, ni mu Samaria, djat ni kusudiedila mangand.” (Midimu 1:8) Mutapu ik wafanyinau kusal mudimu winou? Yesu wayishilamu anch spiritu utumbila wa Nzamb ukuyikwash. (Midimu 1:5) Pakwez nany wafanyina kuyitakel ni kurijek mudimu wa kulejan pa mangand mawonsu? Atwimbuy ading ij anch Yehova wasadina antu mulong wa kuyitakel in Isarel mu chisu cha pakur. Chawiy ading afanyidin kwiyipul chakwel ijika anch Yehova ukutond kand ntakel musu.

3. (a) Kupwa kwa Yesu kuya mwiur, mupak ik wa usey wakwatau atwimbuy ashinshamena? (b) Yipul ik tukwakula mu mutu wa mulong winou?

 3 Chisu chikemp kupwa kwa Yesu kuya mwiur, in kwilejend ashinshikina Mifund, amulembila Nzamb chakwel ayikwasha, ni amutonda Matias chakwel amuswinkana Yudas Isakariot mudi kambuy wa 12. (Midimu 1:15-26) Mulong wak kutond kwinoku kwading kukwet usey kudi awiy ni kudi Yehova? In kwilej ijika anch akwet kuswir kwa kambuy wa 12. * (Tal mazu ma kwinshin.) Yesu wayitonda atwimbuy ni wayifumba mulong wa kusal mudimu wa usey nakash pakach pa antu a Nzamb. Wading mudimu ik, mutapu ik wayifumbau kudi Yehova ni Yesu mulong wa mudimu winou? Ditenchik ik didiaku nlel difanakena ni dined? Mutapu ik tukutwisha ‘kuyivurik awiy adia in kutakel’ pakach petu, pakampwil “kashalapol ushinshamena ni kubabal”?—Hebereu 13:7; Mateu 24:45,TMK.

YESU UTAKEDIN CHISAK CHITAKEDILA

4. Mudimu ik wadingau nich atwimbuy ni amakurump akwau mu Yerusalem?

4 Atwimbuy asambisha kutakel Chikumangen cha in Kristu ku Pentekot wa mu muvu wa 33. Bibil ulondin anch “Pita wading pamwing nau atwimbuy akwau a Yesu dikum ni umwing” ni wafundisha uyakin upandishina mwom ku chisak chijim cha antu. (Midimu 2:14, 15) Antu avud mu chisak chinicha ikala in Kristu. Kupwa kwa yom yiney, in Kristu inay asu “awiy ipana mulong wa kutesh malejan malejanau atwimbuy a Yesu.” (Midimu 2:42) Atwimbuy ading akwet chisend cha kulam nfalang mulong wa chikumangen. (Midimu 4:34, 35) Ayifundishang kand antu a Nzamb ni ayilembilang, palondangau anch: ‘Tukudandamenany kulembil ni kurumburil mazu ma Nzamb yisu yawonsu.’ (Midimu 6:4) Ni atuma in Kristu aswila kal mulong wa kulejan mu ma teritwar masu. (Midimu 8:14, 15) Kupwa, amakurump akwau azizidilau many ibomba pamwing nau atwimbuy mulong wa kutakel chikumangen. Mudi chisak chitakedila, atakela yikumangen yawonsu.—Midimu 15:2.

In Kristu a mu mivu chitot ya kusambish ading ij anch Yehova utakedin chisak chitakedila kusutin Yesu

5, 6. (a) Spiritu utumbila wakasikesha chisak chitakedila mutapu ik? (Tal chipich cha kwinsambishin.) (b) Mutapu ik wakwashau angel chisak chitakedila? (c) Dizu dia Nzamb diatakela mutapu ik chisak chitakedila?

5 In Kristu a mu mivu chitot ya kusambish ading ij anch Yehova utakedin chisak chitakedila kusutin Yesu. Mutapu ik wafanyinau kwikal ni kashinsh? Chakusambish, spiritu utumbila wakasikesha chisak chitakedila. (Yohan 16:13) Akristu awonsu azizidilau many atambula spiritu utumbila, pakwez, spiritu winou wayikasikesha pakampwil atwimbuy nau amakurump mu Yerusalem mulong wa kuwanish chisend chau cha atulam. Chilakej, mu muvu wa 49, spiritu  utumbila watakela chisak chitakedila mulong wa kukwat mipak piur pa kutwalan ku mukand. Yikumangen yalondula wintakel winou. Mudi chibudikin, ‘chawiy yikumangen yadandamena kukasikan mu ritiy, yavulijananga kand pichuku pichuku.’ (Midimu 16:4, 5) Mulong wa mukand watumau piur pa kutwalan ku mukand, tukutwish kuman anch chisak chitakedila chading ni spiritu wa Nzamb ni chamekesha mikadil mudi ritiy ni rukat.—Midimu 15:11, 25-29; Galatia 5:22, 23.

6 Cha kaad, angel akwasha chisak chitakedila. Chilakej, mwangel wamuleja Korney kumukimb mupostol Pita. Pamulejau Korney ni antu a mu dijuku diend rusangu ruwamp kud Pita, spiritu utumbila wayishirikina, ap anch amakundj inay ading akad kutwal ku mukand. Korney wikala muntu wa kusambish wakad kutwalau ku mukand wa Akamichid wikala mwin Kristu. Pateshau atwimbuy nau akadivar akwau piur pa yom yiney, itiya rusot ra Nzamb ni ayaka Akamichid akad kutwalau ku mukand mu chikumangen cha in Kristu. (Midimu 11:13-18) Mulong wa yom yiney, tukutwish kwijik anch angel akwasha nakash mudimu wa kulejan wading utakedinau kudi chisak chitakedila. (Midimu 5:19, 20) Cha kasatu, Dizu dia Nzamb diatakela chisak chitakedila. Amakundj inay asadina Mifund chakwel yiyikwash kukwat mipak ya usey piur pa yitiyij ya in Kristu ni mulong wa kutakel yikumangen.—Midimu 1:20-22; 15:15-20.

7. Mulong wak tukutwish kulond anch Yesu wayitakela in Kristu akusambish?

7 Ap anch chisak chitakedila chading ni usu mulong wa chikumangen, antu a mu chisak chinech ading ij anch Yesu Kristu ndiy Ntakel wau. Mutapu ik twija mwamu? Kambuy Paul walonda anch Kristu ndiy wayitonda ‘amwing kwikal atwimbuy.’ Walonda kand anch Kristu ndiy udia “mutu,” ap Ntakel wa chikumangen. (Efes 4:11, 15) Pa ndond pa kutazukijan ayinau anch kambuy, ‘in kwilej asambisha kuyitazuk anch in Kristu.’ (Midimu 11:26) Paul wading wij anch chading cha usey kulondul malejan ma dishin ma mu Bibil ma atwimbuy nau amakundj akwau ading atakedina. Ap mwamu, Paul walonda anch: “Pakwez nikatil en wijikany nawamp anch, Kristu ndiy Mwant wa [ikundj] mwawonsu.” Mazu minam mayitadin kand antu awonsu adia mu chisak chitakedila. Kupwa Paul wawejaku anch: “Nzamb ndiy Mwant wa Kristu.” (1 Korint 11:2, 3) Chakin, Yehova ndiy wamuteka Mwanend, Kristu Yesu, mulong wa kutakel chikumangen.

“WINOU UDIAP MUDIMU WA MUNTU”

8, 9. Chisend ik cha usey chadingay nich Mukadivar Russell?

8 Kusambish mu muvu wa 1870, Charles Taze Russell nau arund nend amwing asambisha kusal usu wa kumwifukwil Nzamb kukwatijan ni Bibil ni kuyikwash antu akwau kusal mwamu. Ayikwashang kand antu alondang mazu kushalijan. Chawiy mu muvu wa 1884 asala Zion’s Watch Tower Tract Society, ni Mukadivar Russell wikal ntakel. * (Tal mazu ma kwinshin.) Wileja kamu Bibil nich mushiku ni kovangap wom wa kuyilej antu akwau anch mafundish ma mu egliz malondina piur pa Usatu ni mupim wakad kufang madiap mu Bibil. Wijika anch kwez kwa Kristu kukwikal kwakad kumekan ku mes  ni ‘chisu chatekau mulong wa michid’ chapwa mu muvu wa 1914. (Luka 21:24) Mukadivar Russell wasadina chisu chend, usu wend, ni nfalang jend mulong wa kuyifundish antu uyakin winou. Chimeken patok anch Yehova ni Yesu amusadina Mukadivar Russell mulong wa kutakel pa chisu cha usey mu rusangu.

9 Mukadivar Russell kakatap anch antu amutumbish. Mu 1896, wafunda anch ndiy nau akadivar akwau akweta yisend kakatap anch antu ayitumbisha. Kakatap anch ayinkish majin ma ntumb, ni kakatap anch chisak ap chimwing achitazuk pa majin mau. Kupwa walonda anch: “Winou udiap mudimu wa muntu.”

“Kashalapol ushinshamena ni kubabal” kadi ka chisak kakemp ka akadivar azizidilau many asadina chisak chitakedila

10. (a) Chisu ik chamutekau “kashalapol ushinshamena ni kubabal” kudi Yesu? (b) Rumburil mutapu chamekana patok anch Chisak Chitakedila chading chishalijangen ni Sosiete Watch Tower.

10 Mu muvu wa 1919, mivu yisatu kupwa kwa rufu ra Mukadivar Russell, Yesu wamuteka “kashalapol ushinshamena ni kubabal.” Ni chitongijok ik? Mulong wa kuyinkish in kwilejend “yakudia pa chisu chiwanyidina.” (Mateu 24:45) Mu mivu yiniya kand, ka chisak kakemp ka akadivar azizidilau many ku biro mujim wa mangand mawonsu ku Brooklyn, New York, apanang ya kudia ya mu spiritu kudi in kwilej a Yesu. Kupwa kwa muvu wa 1940, dizu “chisak chitakedila” diasambisha kumekan mu mikand yetu. Mu chisu chinicha, chisak chitakedila chading chibombaken nau antakel a Watch Tower Bible and Tract Society. Pakwez, mu 1971, chamekana patok anch Chisak Chitakedila chading chishalijangen ni Watch Tower Society, wading ukweta chisend cha kutal milong ya yijil kusu. Kudiosh pinipa, akadivar azizidilau many akutwish kwikal mu Chisak Chitakedila pakad kwikal antakel a Sosiete. Piswimp ap, akadivar akweta yisend a mu chisak cha “amikoku akwau” asadin mudi antakel a Sosiete ni atakedin yom yikwau yisadidinau antu a Nzamb. Mudi chibudikin Chisak Chitakedila chishinshikidin kupan wintakel ni mbil ja mu Bibil. (Yohan 10:16; Midimu 6:4) Nimero wa Chinong cha Kalam cha 1 ngond wa 7, 2013, warumburila anch “kashalapol ushinshamena ni kubabal” kadi ka chisak kakemp ka akadivar azizidilau many asadina chisak chitakedila.

Chisak chitakedila, mu muvu wa 1950

11. Mutapu ik ukwatining Chisak Chitakedila mipak?

11 Chisak Chitakedila chikwatining mipak ya usey mudi chisak pakumangeningau pamwing rubing ni rubing. Kukumangan kwinoku kuyikwashining kwikal ni mambamb ma piswimp ni kushal mu umwing. (Jinswir 20:18) Kwikil muntu ap umwing wa mu Chisak Chitakedila ukweta usey kusutamu akwau, chawiy muvu ni muvu akadivar kushalijan akat kutakel yikumangan yiney. (1 Pita 5:1) Yiney yawiy kand yikata kusadik ku ma komite musamban ma Chisak Chitakedila. Kwikil muntu ap umwing wa mu Chisak Chitakedila  ukata kwiyov anch udi ntakel wa akadivar nend. Umwing ni umwing wau udi kand kashalapol mukwau ni utambwiling yakudia ya mu spiritu kudi kashalapol ushinshamena ni ulondwil wintakel wend.

Kudiosh kwamutekinau kashalapol ushinshamena mu muvu wa 1919, ukat kurijek yakudia ya mu spiritu ya antu a Nzamb (Tal paragraf wa 10, 11)

‘NANY CHAKIN UDIA KASHALAPOL USHINSHAMENA NI KUBABAL?’

12. Yipul ik tukwakula?

12 Chisak Chitakedila kachipepidilap ni antu adiamu adi akad kuwanyin. Chikutwish niyach kurumbuk pachirumburila Bibil ap pachitakadina dirijek. Chilakej, Index des Publications Watch Tower mudi mutu wa mulong ulondina anch “Compréhensions affinées,” padia ma list mulong wa kurijek mutapu wetu wa kutesh Bibil kudiosh muvu wa 1870. Yesu katulejap anch kashalapol wend ushinshamena ukupan yakudia yiwanyidina ya mu spiritu. Chawiy mutapu ik tukutwisha kwakul ku chipul cha Yesu chilondina anch: ‘Nany chakin udia kashalapol ushinshamena ni kubabal?’ (Mateu 24:45)  Kashinsh ik tukweta kamekeshina anch Chisak Chitakedila ndiy kashalapol ushinshamena? El tushinshikinany yom yisatu ya mutapu umwing yakwasha chisak chitakedila mu chirung cha atwimbuy.

13. Spiritu utumbila wakwasha Chisak Chitakedila mutapu ik?

13 Spiritu utumbila ukwashin Chisak Chitakedila. Spiritu utumbila wakwasha Chisak Chitakedila kutesh uyakin wa mu Bibil wading wakad kuteshau kwinsambishin. Chilakej, shinshikin list udia pa mutu wa mulong ulondina anch, compréhensions affinées twamanang kwiur oku. Kwikil muntu ap umwing wadia ufanyidina kutesh ni kurumburil “yom ya Nzamb yikurikina” ku usu wend amwinend! (Tang 1 Korint 2:10.) Chisak Chitakedila chiyovil mudi mwiyovay kambuy Paul, pafunday anch: “Yawiy kamu yom tukata kulond, kidiap mu mazu makulejanau ku chiyul cha muntu, pakwez spiritu ukat kulejan.” (1 Korint 2:13, TMK.) Kupwa kwa yitot ya mivu ya mafundish ma makasu ni pakad wintakel uwamp, mulong wak kutesh Bibil mudi kwinoku kwadandamena kuya kurutu kudiosh mu muvu wa 1919? Diyingishin didi anch ching kamu Nzamb ndiy wakwasha nich spiritu wend utumbila!

14. Kukwatijan ni Kujingunik 14:6, 7, mutapu ik ukwashinau angel Chisak Chitakedila ni antu a Nzamb nlel?

14 Angel akwashin Chisak Chitakedila. Chisak Chitakedila chikwet chisend chijim cha kutakel ma miliyon chinan ni kusut ma in kulejan asadina mudimu wa kulejan pa mangand mawonsu. Mulong wak mudimu winou uyil kurutu nakash? Diyingishin didi anch mudimu aukwashin kudi angel. (Tang Kujingunik 14:6, 7.) Yisu yivud, angel akat kuyitakel in kulejan chakwel aya amutan muntu wadia ulembila chakwel Nzamb amukwasha! * (Tal mazu ma kwinshin.) Mudimu wa kulejan ni wa kufundish udandamedin kuya kurutu ap anch kudi rupompat rikash. Chinech chiswapel kand mulong wa ukwash wa angel.

15. Mutapu ik ushalijadina Chisak Chitakedila nau antakel a Kristendom? Let chilakej.

15 Dizu dia Nzamb ditakedin Chisak Chitakedila. (Tang Yohan 17:17.) Shinshikin yom yasadika mu muvu wa 1973. Mu nimero wa Chinong cha Kalam cha 1 ngond wa 6 ipulamu mulong wa kwijik anch “muntu wipanina mu kuna ruwand uwanyidin kutambul dibatish.” Chakul chapanau ku chipul chinech chading chimedin pa mbil ja Bibil ni chading anch bwat! Chinong cha Kalam chajimbula mifund yivud ya mu Bibil ni charumburila mulong wak muntu udandamedina kuna ruwand chifanyidin kumwopat mu chikumangen. (1 Korint 5:7; 2 Korint 7:1) Chalonda anch mbil mudi jinej jakad kuswimp jidiokilap kudi antu pakwez ‘jidiokil kudi Nzamb, walonda amwinend kusutin Dizu diend diafunday.’ Kwikil ditenchik ap dimwing dia chirelijon dikutwisha kwipan mu kuchingejin Dizu dia Nzamb ni ap anch asal mwamu chikutwish kuyikasiken antwau amwing. Buku umwing wabudishinau katat mu États-Unis ulondin piur pa relijon anch: “Antekel in Kristu akat kuchirikin yisu yivud mafundish mau mulong wa yitiyij ni yitongijok yitambwilau ku ukwash wa antu adingau nau ni ku ukwash wa ma sosiete majim.” Chisak Chitakedila, kachitakedinap kudi yom yikatinau antu  avud. Pakwez, antu adia mu Chisak chinech ayitakedin kusutin Dizu dia Nzamb, chimeken anch Yehova ndiy amwinend uyitakedina antwend nlel.

“YIVURIKANY AWIY ADIA IN KUTAKEL EN”

16. Wisu mutapu umwing wa kuvurik Chisak Chitakedila?

16 Tang Hebereu 13:7. Bibil ulondin anch “yivurikany awiy adia in kutakel en.” Mutapu umwing wa kusal mwamu udi wa kujimbulang Chisak Chitakedila mu malembil metu. (Efes 6:18) Akwet yisend yivud nakash, mu yisend yiney mudi kubudish yakudia ya mu spiritu, kutakel mudimu wa kulejan pa mangand mawonsu, ni kulam yipan yipaninau mulong wa dirijek. Komb akwet kamu kuswir kwa malembil metu ma chisu chawonsu!

17, 18. (a) Mutapu ik tulondwila wintakel wa Chisak Chitakedila? (b) Mudimu wetu wa kulejan ukwashin mutapu ik Chisak Chitakedila ni Yesu?

17 Tukutwish kand kuvurik Chisak Chitakedila kusutin mu kulondul mbil ni wintakel upaninay. Chisak Chitakedila chitwinkishin wintakel kusutin mu mikand yetu, ku yikumangan, ni ku yitentam. Chikat kutek kand atulam a munyingumuku ni atulam inay akat kutek amakurump a yikumangen. Mu kulondul kamu nawamp wintakel uyinkishinau, atulam a munyingumuku ni amakurump a yikumangen akat kumekesh anch avurikin Chisak Chitakedila. Chawiy, etu awonsu tufanyidin kumekesh kalimish kudi Ntakel wetu, Yesu, mu kuyiziyinang amakundj asadidinay Nlel.—Hebereu 13:17.

18 Mutapu ukwau wa kuvurik Chisak Chitakedila udi wa kusal usu wetu mulong wa kusal mudimu wa kulejan. Hebereu 13:7 uyikasikeshin in Kristu kwimburij ritiy ra antu ayitakedina. Chisak Chitakedila chikat kumekesh ritiy rikash mu kulejan nich mushiku ni mu kupalangesh rusangu ruwamp. Ov, tukat kuyikwash akadivar inay mu mudimu winou wa usey? Anch mwawiy, twovil kamu musangar palondinay Yesu anch: “[Chiwasalanya] kudi umwing wa akadivar nam ang, wachisalanya kal mwamu kudi am.”—Mateu 25:34-40, TMK.

19. Mulong wak ukwatina mupak wa kumulondul Ntakel wetu, Yesu?

19 Pachirikay Yesu mwiur, kayilikap in kwilejend. (Mateu 28:20) Wading wij anch spiritu utumbila, angel, ni Dizu dia Nzamb yamukwasha kutakel chisu chadingay panap pansh. Nlel umwinkishin kashalapol ushinshamena ukwash wawiy umwing. Chisak Chitakedila chidandamedin “kumulondul Mwan a Mukoku,” Yesu, “kwawonsu kuyilay.” (Kujingunik 14:4) Chawiy, anch twalondul wintakel wa Chisak Chitakedila, tumulondwil kamu Ntakel wetu, Yesu. Kurutu oku, ukutushikij ku mwom wa chikupu. (Kujingunik 7:14-17) Ni kwikil ntakel wa ukauntu ukutwisha kushilamu chom chinech!

^ par. 3 Chimeken anch Yehova wakimba anch ikala ni atwimbuy 12 mulong ez asal “mashin makweta mayal dikum ni maad” ma Yerusalem Musu. (Kujingunik 21:14) Chawiy chasala anch kulik kwikal kuswir kwa kumuswinkan kambuy win mwawonsu ushinshamena wafa.

^ par. 8 Kusambish mu muvu wa 1955, in kulejan inay ijikana mudi Watch Tower Bible and Tract Society of Pennsylvania.

^ par. 14 Tal buku “Rends pleinement témoignage” au sujet du Royaume de Dieu, paj wa 57-59.