Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 2 , 2017

Difut—Chidi Chom ‘Chiwanyidina’ Chidiokila Kudi Tatuku

Difut—Chidi Chom ‘Chiwanyidina’ Chidiokila Kudi Tatuku

“Yom yawonsu yiwamp ni yiwanyidina yidiokil . . .kudi Tatuku.” JAKOBU 1:17.

MIMINY: 20, 15

1. Yom ik yiwamp tutambwila kusutin difut?

CHAKUPESH cha difut dia Yesu Kristu chituletidin yiyukish yivud. Chilakej ditenchik dia difut diyinkishin an awonsu a Adam atentamina mutapu wa kwikal a mu dijuku dia Nzamb dichuku dimwing. Chiyukish chikwau chidi anch tukushakam chikupu ni musangar. Chikwau kand, difut dikwatijadin ni yom yikweta usey nakash kudi muntu win mwawonsu udia mwiur ni pansh.—Hebereu 1:8, 9.

2. (a) Yom ik yikweta usey nakash yidia mwiur ni pansh yalonday Yesu mu malembil mend? (Tal chipich cha kwinsambishin.) (b) Yom ik tukwambambina mu mutu wa mulong winou?

2 Piswimp mivu yaad kurutu Yesu afa, wayifundisha in kwilejend kulembil anch: “Tatukwetu udia mwiur, dijin diey aditumbish. Want wey weza. Rusot rey arusala pansh mudi mwiur.” (Mateu 6:9, 10) El tushinshikinany mutapu ukwatijadina difut ni kutumbish kwa dijin dia Yehova, kuyikel kwa Want wa Nzamb, ni kusal rusot ra Nzamb.

 “DIJIN DIEY ADITUMBISH”

3. Dijin dia Yehova dimekeshin ik? Mutapu ik warishikishay Satan dijin dia Yehova?

3 Chakusambish, Yesu walembila mulong dijin dia Yehova aditumbish, ap kudiman mudi ditumbil. Dijin dia Yehova dimekeshin chidiay Yehova amwinend. Ukwet usu nakash ni udi Muntu utentamina wa mangand mawonsu. Yesu wamutazuka kand anch “Tatuku Utumbila.” (Yohan 17:11) Mulong Yehova utumbil, chom chin chawonsu chisadiningay ni yijil yin yawonsu yitekiningay yiding yitumbila. Pakwez mu Eden, Satan watadika kuyikel kwa Nzamb mulong wa mbil yayitekinay an a antu. Wamudimbena Yehova ni warishikisha dijin diend ap mwikadil wend.—Disambishil 3:1-5.

4. Mutapu ik wamanay Yesu dijin dia Nzamb anch ditumbil?

4 Kumutambu ukwau, Yesu, wakata kamu dijin dia Yehova ni wasala yawonsu yafanyinay kusal mulong wa kuditumbish. (Yohan 17:25, 26) Mutapu ik? Kusutin mwikadil wend ni mafundish mend, Yesu wayikwasha antu akwau mulong ijika anch mbil jitekiningay Yehova jidi jitentamina ni chom chin chawonsu chitwitiningay kusal chidi mulong wa uwamp wetu. (Tang Kuseng 40:8-10.) Ap pamumeshau mar kudi Satan ni pafay rufu riyimp risansena, Yesu washala ushinshamena. Wamekesha anch chiswapel kudi muntu uwanyidina kumuziyin kamu Yehova.

5. Mutapu ik tufanyidina kuman dijin dia Yehova mudi ditumbila?

5 Mutapu ik tukutwisha kumekesh anch tukatin dijin dia Yehova? Kusutin mwikadil wetu. Yehova witin anch twikal atumbila. (Tang 1 Pita 1:15, 16.) Chinech chirumburikin anch tumwifukwidin ching ndiy ni tumuziyidil ni muchim wetu wawonsu. Ap anch atuzengol, tusadin usu wetu wawonsu wa kushakam kukwatijan ni yom yitufundishinay Yehova. Mu kushakam kukwatijan ni mbil ja Yehova, tupanin katumb mulong wa dijin dend. (Mateu 5:14-16) Tumekeshin anch yijil yend yidi yiwamp ni anch Satan udi mukamakasu. Tudiap antu awanyidina, chawiy tukutwish kurumbuk. Pakwez anch twarumbuk, tukukarumuk ni kusal usu wa kulik kusal yom yikupipeja dijin dia Yehova.—Kuseng 79:9.

6. Mutapu ik utumenay Yehova anch tutentamin, ap anch tudi antu akad kuwanyin?

6 Twikala azizidilau many ap “amikoku akwau,” Yehova ukutulikishin yitil yetu anch twatek ritiy mu difut. Witiyin mudi in kumwifukwil end ching antu ipanina ayinau kudi ndiy. Ulondin piur pa in Kristu azizidilau many atentamina mudi anend ni “amikoku akwau” atentamina mudi arund nend. (Yohan 10:16; Rom 5:1, 2; Jakobu 2:21-25) Chawiy lel, ap katat, difut dikutwish kusal anch chituswapela kwikal ni urund uwamp pamwing ni Tatukwetu ni kutumbish dijin diend.

“WANT WEY WEZA”

7. Difut diletishin yiyukish ik?

7 Mu malembil ma chilakej, Yesu walonda anch: “Want wey weza.” Mutapu ik ukwatijadina difut ni Want wa Nzamb? Want wa Nzamb, ap winyikel ausadin kudi Yesu nau antu 144 000 atondinau pakach pa antu. Difut disadil anch chiyiswapela antu inay kuvumbuk chakwel aya mwiur. (Kujingunik 5:9, 10; 14:1) Akwikal ant ni in kupesh ni akuyikel pa divu diawonsu pamwing ni Yesu mu mivu kanan. Pa chisu chinicha, Yehova ukusadin Want mulong  wa kusal divu dikala paradis ni kuyikwash antu awonsu kwikal awanyidina. Atushalapol a Yehova adia mwiur ni adia pansh akusal chad dijuku dimwing. (Kujingunik 5:13; 20:6) Yesu ukumujiyish Satan ni ukudiosh milong yawonsu yaletishay.—Disambishil 3:15.

8. (a) Mutapu ik wayikwashay Yesu in kwilejend kwijik usey wa Want wa Nzamb? (b) Mutapu ik tukwashina Want nlel?

8 Yesu wayikwasha in kwilejend chakwel ijika usey wa Want wa Nzamb. Mutapu ik? Kupwa kwa dibatish diend, Yesu wasambisha kapamp kamwing mudimu wa kulejan “rusangu ruwamp ra Want wa Nzamb” kwawonsu kwading kuyilay. (Luka 4:43) Wayileja kand in kwilejend chakwel ikala atuman end “djat ni kusudiedila mangand.” (Midimu 1:6-8) Nlel, kusutin kusal mudimu wa kulejan Want, antu akwet mutapu wa kwilej piur pa difut ni kwikal an a Want wa Nzamb. Tukumekesh anch tudi an ashinshamena a Want kusutin kuyikwash azizidilau many kulejan rusangu ruwamp mu mangand mawonsu.—Mateu 24:14; 25:40.

“RUSOT REY ARISALA”

9. Mulong wak tukutwisha kwikal ni Kashinsh anch Yehova ukuwanyish chitongijok chend mulong wa antu?

9 Yom ik yakimbay kulond Yesu palonday kand anch: “Rusot rey arusala”? Anch Yehova walond anch chom kanang chikusadik, chakin kamu chikusadik. (Isay 55:11) Wimbwambol wa Satan ukumukangeshap Yehova kusal chom kanang. Risu rusot ra Yehova mulong wa divu? Wakata anch divu dizwul nau an awanyidina a Adam ni Ev. (Disambishil 1:28) Anch Adam ni Ev afa pakad kuval an, chitongijok cha Nzamb cha kwizwish divu nau anau chakimbap kuwanyin. Chawiy Yehova wayilika chakwel avala an. Difut diyinkishin antu awonsu akweta ritiy mutapu wa kwikal awanyidina ni wa kushakam chikupu. Yehova uyikatin antu ni ukatin anch twikal ni mwom wakatay anch twikal nich.

10. Mutapu ik ukutaninawamu antu afila kal mulong wa difut?

10 Chid nchik piur pa ma miliyon ni ma miliyon ma antu akata kufa pakad kumwijik Yehova? Yehova ukatin anch antu kangal afa. Chawiy ukuyivumbul antu afila kal. Difut disadin anch chiyiswapel kwikal aom. Chawiy, akutwish kwilej piur pa Yehova ni kushakam chikupu. (Midimu 24:15) Yehova udi Musul wa mwom. Pakuyivumbulau antu afila kal kudi Yehova, ndiy ukwikal Tatukwau. (Kuseng 36:9) Mu malembil ma chilakej, Yesu walonda anch Yehova udi “Tatukwetu udia mwiur.” (Mateu 6:9) Yehova wamwinkisha kal Yesu chisend cha usey cha kuyivumbul afu. Chawiy chalonday Yesu anch: “Yam [divumbuk] ni mwom.”—Yohan 6:40, 44; 11:25,TMK.

11. Risu rusot ra Nzamb mulong wa “chisak chipandakena kujimb”?

11 Yesu walonda kand anch: ‘Muntu mwawonsu ukata kusal yom yisotilay Nzamb, ndiy winou makwam, ap mpanyam, ap mwanamakwam.’ (Marko 3:35) Rusot ra Nzamb ridi anch antu a michid yawonsu ni a tubil twawonsu ni a mazu mawonsu ikala in kumwifukwil end. Ayitazukin mudi “chisak chipandakena kujimb, chakad kutwish kuchind kudi muntu.” Atekin kal ritiy mu difut ni akatin kumuziyin Nzamb. Akat kumutumbish ni kulond anch: “Dipandish didi kudi Nzamb wetu, ushicha pa nkwas, ni kudi Mwan a mukoku.”—Kujingunik 7:9, 10,TMK.

12. Yom ik twilejina kusutin malembil ma Yesu piur pa chitongijok cha Yehova mulong wa antu?

 12 Twilej kal yom yivud piur pa Yehova ni chitongijok chend mulong wa antu kusutin malembil ma chilakej ma Yesu. Chakusambish, tufanyidin kusal yawonsu tukutwisha mulong wa kutumbish dijin dia Yehova ni kumulimish. (Isay 8:13) Chakupesh cha difut dia Yesu, chiletishin dipandish kudi etu, ni chitumbishin kand dijin dia Nzamb. Chawiy dijin dia Yesu amwinend dirumburikin anch, ‘Yehova udi Dipandish.’ Cha kaad, Yehova ukusadin Want wend mulong wa kulet kutaninamu kwawonsu kwa difut mulong wa antu aziyidina. Cha kasatu, tukwet kashinsh anch kwikil chom ap chimwing chikukangesha rusot ra Yehova kusadik.—Kuseng 135:6; Isay 46:9, 10.

MEKESH KUJIKITISH KUDI YEHOVA MULONG WA DIFUT

13. Mulong wak tukat kutambul dibatish?

13 Mutapu wa usey wa kumekesh anch tujikitishin mulong wa difut kudi kwipan kudi Yehova ni kutambul dibatish. Mu kusal mwamu, tumekeshin anch tukwet ritiy mulong wa difut ni anch “tudi ayen a [Yehova].” (Rom 14:8) Anch twatambul dibatish, tukat kumwit Yehova chakwel atwinkish “kom kadia zwang.” (1 Pita 3:21) Yehova ukat kutwakul kusutin yiyukish ya difut. Ni tukwet kamu kashinsh anch ukutwinkish chom chin chawonsu chatukanay.—Rom 8:32.

Mutapu ik tumekeshina anch tujikitishin mulong wa difut? (Tal paragraf wa 13, 14)

14. Mulong wak Yehova utwitin kuyikat antu akwau?

14 Chom chawonsu chisadiningay Yehova chidi mulong wa rukat rend. Rusot rend ridi anch in kumwifukwil end amwimburij ni akatijan umwing ni mukwau. (1 Yohan 4:8-11) Anch twayikat antu, tukumekesh patok anch tukatin kwikal “an a [Tatukwetu] udia mwiur” (Mateu 5:43-48) Yijil yaad yipandakena kujimb yawiy ey: Chakusambish chilondin anch mukata Yehova, ni cha kaad chilondin anch yikata antu akwau. (Mateu 22:37-40) Mutapu umwing wa kumekesh rukat kudi antu udi wa kuyifundish rusangu ruwamp ra Want wa Nzamb. Anch twaziyin ku yijil ya Yehova ya kuyikat antu akwau, pakampwil akadivar netu, rukat retu mulong wendendiy rikwikal ‘riwanyidina.’—1 Yohan 4:12, 20.

 DIFUT DILETIN YIYUKISH YIDIOKILA KUDI YEHOVA

15. (a) Yiyukish ik tutambwila katat yidiokila kudiay Yehova? (b) Yiyukish ik tukutambula mu machuku ma kurutu?

15 Yehova utwinkishin kashinsh anch mulong tukwet ritiy mu difut, ‘ukutulikishin’ yitil yetu. Ukutulikishin yitil yetu chikupu. (Tang Midimu 3:19-21.) Mudi mutwambambinang kwiur oku, difut disadin anch Yehova ayitiya antu amwing kwikal anend a mwiur. Antu inay adi azizidilau many. (Rom 8:15-17) Uyitazukin antu adia pakach pa “amikoku akwau” ikala antwend a mu dijuku dia pa divu. Kupwa kwa kwikal awanyidina, kukwikal kupak kwa nsudien. Anch ikal ashinshamena kudi Yehova, ukuyitiy niyau kwikal anend. (Rom 8:20, 21; Kujingunik 20:7-9) Yehova ukudandamen kuyikat anend awonsu. Difut dikudandamen kulet yiyukish chikupu. (Hebereu 9:12) Yehova watwinkisha chipan chinech cha usey, ni kwikil muntu ap umwing ukutwisha kututambulach.

16. Difut ditukwashin nchik kwikal akolikina?

16 Anch twakarumuk mulong wa yitil yetu, kwikil chom ap chimwing chikutwishay kusal Djabul mulong wa kutukangesh kwikal dichuku dimwing antu a mu dijuku dia Yehova. Yesu wafa “kapamp kamwing.” Difut adipana chikupu. (Hebereu 9:24-26) Adam watuletina rufu, pakwez ya kupesh ya Yesu yikutuletin mwom wa chikupu. Difut dikutukol kudiokal mu mangand ma Satan ni ku wom wa rufu.—Hebereu 2:14, 15.

17. Rukat ra Yehova rirumburikin ik kudi ey?

17 Kushilamu kwa Nzamb kukuwanyin kamu chakin. Mudi mimbu yakad kuswimpang yatekay Yehova ku yom yatangay, Yehova kakez kaswimpap. Kakutulikap ap pakemp. (Malakiy 3:6) Yehova utwinkishin yom yikwau yivud nakash kulik kwau ching chipan cha mwom. Utwinkishin rukat rend. ‘Twijika, ni twitiyija rukat rikwetay Nzamb mulong wetwetu. Nzamb udi rukat.’ (1 Yohan 4:16) Kushilamu kwend kuding chisu chawonsu kwakin. Kurutu oku, divu dikwikal paradis muwamp nakash. Antu awonsu adia akash akumwimburij Yehova ni akukatijan umwing ni mukwau. Kupwa, atushalapol awonsu a Yehova adia mwiur ni adia pansh akulond anch: “Kushiman, ni uyaj, ni manangu, ni kujikitish, ni katumb, ni dikand, ni ukash yikala kudi Nzamb wetu chikupu ni chikupu! Amen!”—Kujingunik 7:12.