“[Nikez] kawanyish kutenchik kwam. Yawonsu yinalonda yikez kasadik.”ISAY 46:11.

MIMINY: 25, 18

1, 2. (a) Yom ik yatujinguninay Yehova? (b) Kushilamu ik tutanina mu Isay 46:10, 11 ni 55:11?

MAZU makusambish ma mu Bibil maswakel pakwez malondin yom yikurikina anch: “Pakusambish Nzamb watanga diur ni divu.” (Disambishil 1:1) Tumening kwetu ching yom yikemp pakach pa yom yivud yatangay Nzamb mwi ngand ya kabuj, ni twij yom yikemp piur pa yom yidia mu rinzwizu, chitokish, ni usu ukata kupwit chom kuchidiosh piur, chapalik pansh (gravité). (Mulej 3:11) Pakwez, Yehova watujingunina chitongijok chend mulong wa divu ni mulong wa antu. Wayitanga antu mu chifu chend ni wakata anch asanger mwom panap pa divu. (Disambishil 1:26) Afanyina kwikal anend, ni Yehova wafanyina kwikal Tatukwau.

2 Mu shapitre wa kasatu wa Disambishil, twilejin anch chitongijok cha Yehova achiyipisha. (Disambishil 3:1-7) Pakwez kwikil mulong ukukanganyay Yehova kupwish. Kwikil muntu ap umwing ukutwisha kukangesh chitongijok chend. (Isay 46:10, 11; 55:11) Tukutwish kwikal ni kashinsh anch  chitongijok chakusambish cha Yehova chikuwanyin kamu nawamp pa chisu chiwanyidina!

3. (a) Mafundish ik ma usey matukwashina kutesh nawamp uruu wa mu Bibil? (b) Mulong wak tukimbina kwisambin mafundish minam? (c) Yipul ik tukushinshikina?

3 Pakad ntaad, twij chidia chitongijok cha Nzamb mulong wa divu ni mulong wa antu, ni twij nawamp mudimu wa Yesu mu chitongijok chinech. Winou udi uyakin wa mu Bibil wa usey nakash ni pamwing ap wawiy uyakin twileja wa kusambish pitwasambisha kwilej Dizu dia Nzamb. Katat tukatin kuyikwash antu akwau chakwel niyau ijika mafundish minam ma usey. Tukwet mutapu wa pakampwil wa kusal mwamu mu chisu chinech cha muvu, pitutazukina antu mulong wa kukumangan ku Chivurikish cha rufu ra Kristu. (Luka 22:19, 20) Anch ez kukumangan ku chivurikish chinech cha usey, akwilej yom yivud nakash piur pa chitongijok chiwamp cha Nzamb. Chawiy, chinech chidi chisu chiwamp cha kutongin pa yipul ya pakampwil tukutwisha kusadin mulong wa kuyikasikesh antu akwau chakwel akumangan. Mu mutu winou, tukushinshikin yipul yisatu: Chisu chitongijok cha Nzamb mulong wa divu ni mulong wa antu? Mulong wak chayipa? Ni mulong wak cha kupesh cha difut cha Yesu chidi nfungul ufungwila ku chis chakwel chitongijok cha Nzamb chiwanyina?

CHISU CHADING CHITONGIJOK CHA SAKATANG?

4. Yitang yilejen mutapu ik “uyaj wa Nzamb”?

4 Yehova udi Sakatang ushimokishena. Chom chawonsu chatangay chikwet mbil ja piur nakash. (Disambishil 1:31; Jeremiy 10:12) Yom ik tukutwisha kwilejin ku kuwap kwa yitang ni mutapu wayitenchikay kal? Twij anch yom yawonsu yatangay Yehova, kudiokal ku yom yikemp kushik ku yom yijim, yawonsu yidi ya ukwash. Chikwau kand, anch watong piur pa ma selil mashimokishena ma muntu, ap watal mwan wavalangau, ap watal kuwap kwa muten anch wandam, ukat kwiyov nchik? Tukat kusanger yom yiney mulong Yehova watutanga nich ukaliweny wa kwijik yom yiwamp.—Tang Kuseng 19:1; 104:24.

5. Yom ik yasalay Yehova chakwel yitang yend yawonsu yitwisha kusal mudimu pamwing nawamp?

5 Yehova wateka mimbu nawamp ku yitang yend yawonsu. Wateka mimbu ku yom yatangay, ni wateka kand yijil yiwamp. Wateka mimbu yiney chakwel yom yawonsu yidia mu mangand yisala nawamp pamwing. (Kuseng 19:7-9) Yom yin yawonsu mu mangand yikwet ndond yau yayitekau ni mudimu wau. Chilakej, usu ukata kupwit yom ulamining rikind udia piswimp ni pansh, ni ulamin aturung ni mambek. Pakad usu winou, mwom wakimbap kwikal uwamp pa divu. Mimbu yatekay Yehova mu yom yatangay yisadin anch kangal kwikal kanvundangesh mu mangand mawonsu. Chinech chimekeshin anch Yehova ukwet chitongijok mulong wa divu ni antu. Mu mudimu wetu wa kulejan, tukutwish kuyikwash antu akwau chakwel amwijika Sakatang wa mangand minam.—Kujingunik 4:11.

6, 7. Yipan ik yimwing yamwinkau Adam ni Ev kudi Yehova?

6 Chitongijok cha Yehova chading anch antu ashakam chikupu pa divu. (Disambishil 1:28; Kuseng 37:29) Yehova upanining,  wamwinkisha Adam ni Ev yipan kushalijan ya usey. (Tang Jakobu 1:17.) Yehova wayinkisha want ipau ni ukalaweny wa kutong, wa kukat, ni wa kusanger urund. Sakatang wamuleja Adam mutapu wa kusal yom yidia yiwamp. Adam wileja kand mutapu wafanyinay kwilam amwinend, kulam annam, ni kulam ngand. (Disambishil 2:15-17, 19, 20) Yehova wamwinkisha Adam ni Ev ukalaweny wa kupak ya kudia, kukwat yom, wa kuman, wa kutesh, kwov didjimb dia yom yiwamp yayisadinau kudi Yehova. Mu mutapu winou, afanyina kusanger mwom mwi ndond yau yiwamp yadingau. Adam ni Ev ading ni midimu yivud yiwamp ya kusal. Ni afanyina kudandamen kwilej ni kujingunin yom yisu chikupu.

7 Yom ik kand yikwau yading mu chitongijok cha Nzamb? Yehova wamwinkisha Adam ni Ev mutapu wa kuval an awanyidina. Ni anau niyau ading afanyidin kuval an kushik ni pakwizwila antu pa divu diawonsu. Yehova wakata anch anvaj ayikat anau mudi ndiy mwayikatay anend akusambish ading awanyidina, Adam ni Ev. Wayinkisha antu divu ni yom yawonsu ya usey ni yiwamp yadinga pa divu. Yafanyina kwikal ndond yau ya kushakam, ni kafanyinap kuyidioshamu.—Kuseng 115:16.

MULONG WAK CHAYIPA?

8. Mulong wak Nzamb wamwinkisha Adam ni Ev chijil chidia mu Disambishil 2:16, 17?

8 Yom yasadikap kamu nawamp mudi mwakatay Yehova anch yisadik. Yom ik yashikena? Yehova wamwinkisha Adam ni Ev chijil chiswapela chakwel ijika mutapu wa kusadin usu wa mimbu yau. Walonda anch: “Ukutwish kudia kwey mabuj ma mitond yawonsu ya mu chir. Pakwez dibuj dia mutond ou wa ronganyin ra kuwap ni kuyip kangal kudidia. Mulong dichuku diukeza kudidia, chakin ukez kufa.” (Disambishil 2:16, 17) Chijil chinech chadingap chikasikena kudi awiy kuchitesh. Ni chadingap chikasikena kudi awiy kuchiziyin, mulong ading ni yakudia yiwamp yivud mu chir cha Eden.

9, 10. (a) Mutapu ik wamufundau Yehova kudi Satan? (b) Mupak ik wakwatay Adam ni Ev? (Tal chipich cha kwinsambishil.)

9 Satan Djabul wasadin nnak mulong wa kumudimb Ev chakwel amumbwambwila Tatukwend, Yehova. (Tang Disambishil 3:1-5; Kubudik 12:9) Satan waletisha mulong palonday anch an a Nzamb ayijidika kudia ‘mutond win wawonsu wa mu chir.’ Chidi mudi wading ulondin anch: ‘Ukutwishanap kwen kusal yom ukatinanya?’ kupwa wamuleja anch: “Kiukufanyap kwen, bwat.” Makasu mudi ik. Chikwau kand, wasala usu wakumwitiyijish Ev anch kakwetap kwend kuswir kwa kumutesh Nzamb. Palonday anch: “Mulong Nzamb wij anch dichuku diukez kudiany mabuj minima, mes men makez kuburik.” Satan walonda anch Yehova kakatap anch adia dibuj mulong chinech chakimba kuyinkish rongayin ra pakampwil. Kupwa, wayikana yom ya makasu anch: “Niyen ukez kwikalany mudi Nzamb, in kwijik kuwap ni kuyip.”

10 Adam ni Ev afanyina kukwat mupak wa kusal yom yikusalau. Afanyina kumuziyin Nzamb, anch afanyina kumutesh nnak? Cha ushon nakash, atonda kumubwambwil Nzamb. Amulika Yehova kwikal Tatukwau ni amulondula Satan. Ashala ayinau, pakad ukwash wa Yehova.—Disambishil 3:6-13.

11. Mulong wak Yehova kavuramedinap chitil cha Adam ni Ev?

 11 Pajipay Adam ni Ev chijil cha Nzamb, kikalap kand awanyidina. Pakwez, ikala akankuny a Nzamb, mulong ndiy ukisining uyimp. ‘Mes mend madi zwang mulong wa kuman yom yidia yiyimp.’ (Abakuk 1:13) Anch Yehova kasalap chom ap chimwing piur pa chitil cha Adam ni Ev, ing yitang yend yawonsu yijikena nawamp yakimba kuyip. Angel nau antu afanyina kwiyipul anch afanyina niyau kuchingejin dizu dend. Pakwez Yehova udi ushinshamena kwi mbil jend, kajiyipishap bwat. (Kuseng 119:142) Ap anch Adam ni Ev ading ni want ipau, katwishap kwiyep yibudikin ya kumubwambwil Yehova. Afa kamu ni achirika ku rufunfut kwayidioshau.—Disambishil 3:19.

12. Yom ik yayishikena an a Adam?

12 Padiay Adam ni Ev dibuj, Yehova kayitiyijap kand kwikal antu a dijuku diend. Wayopata mu chir cha Eden, ni kitiyijap kand anch achirikamu. (Disambishil 3:23, 24) Wasala anch arish ni yibudikin ya mupak wau wakwatau. (Tang Kuvurik Yijil 32:4, 5.) Chawiy, katwishap kand kwimburij mikadil ya Yehova nawamp. Adam washadisha machuku mawamp ma kurutu mulong wendendiy ni mulong wa anend. Wayiswanisha anend ching kuburen kuwanyin, chitil ni rufu. (Rom 5:12) Adam washadisha mutapu uwamp wa kushakam chikupu. Adam ni Ev kafanyinap kuval an awanyidina, chawiy ni anau kafanyinap kuval an awanyidina. Kudiosh kwamudimbau Adam ni Ev kudi Satan kumubwambwil Nzamb, Djabul udandamedin kuyibachik antu awonsu kusal mwamu.—Yohan 8:44.

DIFUT DIACHIRISHA URUND NI NZAMB

13. Yom ik yakatay Yehova mulong wa antu?

13 Yehova udandamedin kuyikat antu. Ap anch Adam ni Ev amulika Yehova, pakwez udandamedin kukat anch antu ikala ni urund uwamp ni ndiy. Ni kakatiningap anch umwing wau afa. (2 Pita 3:9) Chawiy, Nzamb watenchika kamu kapamp kamwing anch an a antu ata kand nend urund kapamp kakwau. Mutapu ik wasalay mwamu pakad kuyipish mbil jend jatekay amwinend? El tumanany.

Pamulikau kudi Adam ni Ev, Nzamb watenchika kapamp kamwing anch an a antu akutwish kand kwikal arund nend

14. (a) Kukwatijan ni Yohan 3:16, yom ik yasalay Nzamb mulong wa kuyikol antu ku chitil ni ku rufu? (b) Chipul ik tukwisamba nau antu?

14 Tang Yohan 3:16. Antu avud tukutazuka ku Chivurikish ijing nawamp verse winou. Chad mutapu ik ukwashina ya kupesh ya Yesu kwikal ni mwom wa chikupu? Tukwet mutapu wa kuyikwash antu chakwel ijik chakul ku chipul chinech pitukuyitazuka kwez ku Chivurikish, pitudia nau ku Chivurikish, ni pitukuya kuyital kupwa kwa Chivurikish. Akutesh yivud piur pa difut, akwijik kand yivud piur pa mutapu Yehova uyikatinay antu nakash, ni mutapu ukwetay manangu.  Yom ik yilondina piur pa difut tukutwisha kwambamb nau?

15. Mutapu ik wading ushalijadinay Yesu ni Adam?

15 Yehova wapana muntu uwanyidina ukutwisha kupan mwom wend mudi difut. Muntu winou uwanyidina wading ufanyidin kwikal ushinshamena kudi Yehova. Wading ufanyidin kupan mwom wend kwa kwikatin mulong wa antu. (Rom 5:17-19) Yehova washemunina mwom wa Yesu, chitang chend cha kusambish, kumudiosh mwiur mulong wa kumulet panap pansh. (Yohan 1:14) Chawiy Yesu wikala muntu uwanyidina, mudi kamu mwadingay Adam kwinsambishin. Pakwez chinyim ni Adam, Yesu walondula mbil ja Yehova mudi muntu uwanyidina. Ap padingay mu yoziu yikash, Yesu kajipap chijil ap chimwing cha Nzamb.

16. Mulong wak difut diading chipan cha usey nakash?

16 Pafay mudi muntu uwanyidina, Yesu wapandisha antu ku chitil ni ku rufu. Wawanyisha yom yawonsu nawamp yading yifanyidinay Adam kuwanyish kudi antu awonsu. Yesu wading muntu uwanyidina, ushinshamena, ni umuziyidina kamu Nzamb. (1 Timote 2:6) Wafa mulong wetwetu, ni yakupesh yend yayinkisha amakundj awonsu, amband awonsu, ni an awonsu mutapu wa kushakam chikupu. (Mateu 20:28) Difut diend didi nfungul ufungwila ku chis chakwel chitongijok cha Nzamb chiwanyina.—2 Korint 1:19, 20.

YEHOVA WATWAZURILA CHIS CHAKWEL TWANDAMA KAND

17. Difut dialetisha yom ik?

17 Yehova watwinkisha difut dikweta  usey uvud. (1 Pita 1:19) Watukwata nich usey nakash chawiy chasalay anch Mwanend mukatish afa mulong wetwetu. (1 Yohan 4:9, 10) Mu mutapu winou, Yesu wikala tatukwetu pa ndond pa Adam. (1 Korint 15:45) Yesu wasala chituswapela kushakam chikupu, ni watwinkisha kand mutapu wa kuchirik mu dijuku dia Nzamb dichuku dimwing. Kusutin difut, an a antu akwikal awanyidina ni Yehova ukwitiyij anch achirika kand mu dijuku diend anch kajipinap yijil yend. Tong bil mutapu chikwikala chiwamp pakwikalau antu awonsu ashinshamena ku Yehova ni kwikal awanyidina! Kupwa antu awonsu mwiur ni pansh akubombakan pamwing mu kusal dijuku dimwing. Etu awonsu tukwikal an a Nzamb.—Rom 8:21.

18. Chisu ik chikwikalay Yehova ‘yom yawonsu mulong wa muntu mwawonsu’?

18 Ap anch anvaj etu akusambish amulika Yehova, pakwez ndiy wadandamena kuyikat antu, ni wapana difut. Ap anch tudi akad kuwanyin, Satan kakutwishap kutukangesh kwikal ashinshamena kudi Yehova. Kusutin difut, Yehova ukutukwash twikala kamu awanyidina. Tong bil mutapu ukwikala mwom anch antu awonsu ‘amwijik Mwan ni kutek ritiy kudiay ndiy’, akwikal ni mwom wa chikupu! (Yohan 6:40) Tatukwetu mukatish ni wa manangu ukuwanish chitongijok chend ni kuyikwash antu kwikal awanyidina. Mwamu Yehova ukwikal chad ‘yom yawonsu mulong wa muntu mwawonsu.’—1 Korint 15:28.

19. (a) Kujikitish mulong wa difut kukutubachik kusal ik? (Tal mushet ulondina anch: ‘ El tudandamen Kukimb Antu Awayindina.’) (b) Yom ik tukwileja mu mutu wa mulong ulondwilaku ou?

19 Kujikitish kwetu mulong wa difut kukutubachik kuyilej antu akwau mulong wa chipan chinech cha usey. Antu akwet kuswir kwa kwijik anch kusutin difut, Yehova uyinkishin antu awonsu kwa rukat mutapu wa kushakam chikupu. Pakwez difut diletin yom yivud kusutamu yitwalonda kal. Dipwishin milong yaletay Satan mu chir cha Eden. Tukushinshikin mutapu wasalay mwamu mu mutu wa mulong udia kurutu oku.