Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 9 , 2017

Tukudishany Mwikadil wa Kwilam

Tukudishany Mwikadil wa Kwilam

Dibuj dia spiritu didi . . . kwilam.” —GALATIA 5:22, 23, NWT.

MIMINY: 52, 22

1, 2. (a) Yom ik yikushikena anch twaburen kwilam? (b) Mulong wak tufanyidin kwisambin piur pa mwikadil wa kwilam?

KWILAM udi mwikadil utukwashinay Yehova Nzamb kwikal nich. (Galatia 5:22, 23) Yehova ukwet mwikadil wa kwikal uwanyidina. Pakwez, etu tukutwishap kuwikal nich uwanyidina mulong tudi antu akad kuwanyin. Chakin kamu, kuburen mwikadil wa kwilam udi musul wa milong yivud yikwetau antu avud nlel. Kuburen mwikadil winou kukutwish kumushikij muntu alabisha kusal yom ya usey ap akanganya kusal nawamp ku shikol ap ku mudimu. Kuburen kwilam kukutwish kand kumutwal muntu kulond yom yiyimp, kuleu, chisum, kujip uruw, kwandam mu mabaz, kwikal musuk wa chom kanang, kwandam mu rukan, kwikal ni yovil ya runeng, mayej makata kusamburok mulong wa masandj ni madikaj makad kuchingejin.—Kuseng 34:11-14.

2 Antu akad kwilam akat kwiletin milong ayinau ni antu akwau. Ni pasutina chisu, chimeken kamu anch antu adandamedin kuburen mwikadil wa kwilam. Chinech chikutwishap kutukashimwish, mulong Dizu dia Nzamb diatakela kulond anch kuburen mwikadil wa kwilam udi uman umekeshina anch  tushich mu “machuku ma kwisudiel.”—2 Timote 3:1-3.

3. Mulong wak tukwet kuswir kwa kwilam?

3 Mulong wak tukwet kuswir kwa kwilam? Kudi mayingishin maad ma usey. Chakusambish, antu akata kulam nawamp yovil yau ni yitongijok yau akweting milong yikemp. Chikat kuyiswapel kand kwikal ni urund uwamp ni kwiyep yovil ya ujim, ya kwiyakamish ap ya ushon. Cha kaad, mulong wa kushal mu urund ni Nzamb, tufanyidin kujijamen yoziu ni kusop maswir mayimp. Yawiy yakanganyay Adam ni Ev kusal. (Disambishil 3:6) Mudi awiy, antu avud nlel akwet milong yikash mulong aburedin kwilam.

4. Yom ik yifanyidina kumukasikesh nich muntu mwawonsu urishina mulong wa kukangany kulam nawamp maku mayimp?

4 Yehova wijing anch tudi antu akad kuwanyin ni chawiy chitukasikedining kwilam. Pakwez ukatin kutukwash chakwel tuyikela maku metu mayimp. (1 Ant 8:46-50) Chidiay Murund mukatish, ukat kuyikasikesh mu mutapu uwamp antu amening anch yisu yimwing chiyikasikedining kuyikel yovil yau ni maswir mau. Mu mutu wa mulong winou, tukwilej chilakej cha Yehova piur pa mwikadil wa kwilam. Tukwilej kand yilakej ya mu Bibil, yiwamp ni yiyimp ni tukuchirikin yiyul ya kusadin yikutwisha kutukwash.

YEHOVA WATUSHILA CHILAKEJ

5, 6. Chilakej ik cha kwilam chatushilay Yehova?

5 Kwilam kwa Yehova kuwanyidin mulong ndiy uwanyidin mu jinjil jawonsu. (Kuvurik Yijil 32:4) Pakwez etu tudi antu akad kuwanyin. Chawiy tufanyidina kudandamen kushinshikin chilakej chend cha kwilam chakwel tumwimburija nawamp. Chikutukwash kwijik mutapu tufanyidina kusal mu mutapu uwamp anch twamen anch yom yimwing yikutwish kutwovish ujim. Yilakej ik yimwing yimekeshina kwilam kwa Yehova?

Kwilam kwa Yehova kuwanyidin mulong ndiy uwanyidin mu jinjil jawonsu

6 Tong mutapu wasalay Yehova chisu chabwambwilay Satan mu Eden. Chimeken anch, kufund kwa Djabul kwasala anch atushalapol ashinshamena a Nzamb adia mwiur ova nayimp, ujim ni iyova anch kakwetap usey. Pamwing ap niyey wiyovil mwamu anch watongin piur pa mar mawonsu maletishay Satan. Pakwez Yehova kajimbishap mulong winou. Wakula mu mutapu uwamp. Yehova kajimanap swa ni wakula nawamp ku wimbwambwol wa Satan. (Kubudik 34:6; Job 2:2-6) Mulong wak? Yehova walika anch chisu chisuta mulong kakatinap anch muntu mwawonsu ajiya, pakwez “usotil antu awonsu kukarumuk kudiokal ku yitil yau.”—2 Pita 3:9.

7. Yom ik twilejidina ku chilakej cha Yehova?

7 Chilakej cha Yehova chitufundishin anch tufanyidin kutong nawamp kurutu kwa kulond ni kangal kusal yom mau mau. Chawiy anch ukwet kuswir kwa kukwat mupak wa usey, itekina chisu cha kutong. Lembil mulong wa manangu ma kulond ni ma kusal yom yiwamp. (Kuseng 141:3) Anch tukwet ujim ap twovil kuyip, chiswapel nakash kusal yom yakad kutongin. Ni chawiy chayishikija antu amwing kwinan mulong wa yom yalondau  ap yasalau pakad kutong!—Jinswir 14:29; 15:28; 19:2.

YILAKEJ YIWAMP NI YIYIMP YA ATUSHALAPOL A NZAMB

8. (a) Kwisu tukutwisha kutan yilakej yiwamp ya kwilam? (b) Yom ik yamukwasha Josef kujijamen choziu pamulejau kudi mband wa Potifar kusal nend masandj? (Tal chipich cha kwisambishin.)

8 Yilakej ik ya Bibil yikasikeshina usey wa kwilam? Chilakej chimwing ukutwisha kutongin chidi cha Josef mwan wa Jakobu. Wajijamena choziu chisu chasalangay mu chikumbu cha Potifar, mwant wa atulam a Farao. Mband wa Potifar wamukata Josef nakash mulong wading “muntu wa chimbu chiwamp ni chifu cha ufun,” ni wadandamena kumulej chisu chawonsu anch alala nend. Yom ik yamukwasha Josef kujijamen choziu chinech? Witekina kamu chisu cha kutong nakash kurutu piur pa yom yikushikena anch walal nend. Chawiy, chisu chamukwatau mu masun kudi mband winou, wamuchina mau. Walonda anch: “Ing am nikutwish nchik lel kusal kuyip mudi kwinoku, ni kusal kand chitil kurutu kwa Nzamb?”—Disambishil 39:6, 9; tang Jinswir 1:10.

Mwita Yehova akukwasha manangu ni kwilam chakwel ujijamena choziu

9. Mutapu ik ukutwisha kwirijek mulong wa kujijamen yoziu?

9 Yom ik twilejidina ku chilakej cha Josef? Anch atupak mulong wa kujip yijil ya Nzamb, tufanyidin kujijamen choziu. Kurutu kwa kwikal Atuman a Yehova, antu amwing ading ipanin kal mu kudia nakash, kuleu, kuna ruwand ni yom yilewishena, masandj ap yom yikwau kand. Chawiy ap kupwa kwa dibatish, akutwish kand kwikal apakinau mulong wa kusal yom yiney. Anch yom yiney yakushiken, tong nakash mutapu ukuyipa urund wey ni Yehova anch wipan kand mu kusal yom yiney. Ufanyidin kusal usu wa kujingunin yom yiletishina choziu chinech ni kukwat mupak wa kwiyep yom yiney. (Kuseng 26:4, 5; Jinswir 22:3) Anch niyey akupak mwamu, mwita Yehova akukwasha manangu ni kwilam chakwel ujijamena choziu.

10, 11. (a) Yom ik yiyishikedina ansand avud ku shikol? (b) Yom ik yikuyikwasha ansand in Kristu kujijamen choziu cha kujip yijil ya Nzamb?

10 Yom yidia mudi yamushikena Josef yiyishikedin kand ansand avud in Kristu nlel. Chilakej chimwing chidi cha changadim utazukinau anch Kim. Arund nend a ku shikol ibazang mu mambamb mau mutapu wasalangau masandj kwinsudiel kwa rubing. Kim kadingap ni jinsangu mudi jinej ja kuyilej. Walonda anch kwikal ushalijadina kwamusala iyova anch “amulik kal ni udi amwinend” yisu yimwing ni arund nend a shikol atonga anch usupin mulong kasadinap masandj. Pakwez Kim wading ukwet manangu. Wading wij anch choziu cha kusal masandj chikutwish kwikal chikash nakash anch uchid kal nsand. (2 Timote 2:22) Ansand akwau amwipulang chisu chawonsu mulong wa kwijik anch uchid kal kajik. Chinech chamukwasha mutapu wa kuyirumburil mulong wak ulikining kusal masandj. Tuyijikitishin nakash ansand in Kristu akwatina mupak wa kujijamen milong ya masandj, ni Yehova uyisangaredin kamu nakash!

 11 Bibil utwinkishin kand yilakej ya antu alika kujijamen choziu cha kusal masandj. Ni utulejin yibudikin yiyimp yikushikena anch twalik kwilam. Anch yom yamushikena Kim yakushiken niyey, tong piur pa nsand chisup ulejenau mu Jinswir shapitre wa 7. Tong kand piur pa Amunon ni yom yiyimp yamushikena mulong wa yisal yend. (2 Samwel 13:1, 2, 10-15, 28-32) Anvaj akutwish kuyikwash anau kukudish mwikadil wa kwilam ni manangu chisu chisambinau nau piur pa yilakej yiney pasadinau difukwil dia mu dijuku.

12. (a) Mutapu ik Josef walamay nawamp yovil yend pantaliken nau anamakwend? (b) Milong ik tukutwisha kwikal nich chakwel tuyikela yovil yetu?

12 Mu chisu chikwau kand, Josef washa chilakej chiwamp cha kwilam. Chinech chamekana chisu chezau anamakwend kuland yakudia mu Idjibit. Mulong wa kwijik mutapu wading utonginau, Josef kayilejap anch wading mwanamakwau. Papandakana yovil yend, wayisha anamakwend ni waya ku ujindj mulong wa kudil. (Disambishil 43:30, 31; 45:1) Anch mukadivar ap nambaz wasal chom cha kukujimesh, kwimburij chilakej cha Josef cha kwilam kukukukwash ulika kulond ap kusal yom yikukunenganesha. (Jinswir 16:32; 17:27) Ap pamwing ap ukwet anamakwey opatinau kal mu chikumangen. Anch mwawiy, ufanyidin kushinshikin yovil yey chakwel wipuka kwambamb nend yom yakad usey. Chinech chikutwish kukasikan kusal mwamu. Pakwez chikwikal chiswapela ang wavurik anch wimburijin chilakej cha Yehova ni usadin yom yikulejinay kusal.

Kwikil muntu ufanyidina kwichingejin ni kutong anch ndiy kakutwishap kuwil mu yoziu

13. Malejan ik twilejina ku yom yashikena mu mwom wa Mwant David?

13 Tukutwish kand kutaninamu ku chilakej cha Mwant David. Chisu chamusarumunau kudi Saul ni Shimey, David kajimanap ap kasadinap usu wend padiau awiy. (1 Samwel 26:9-11; 2 Samwel 16:5-10) Pakwez, David kadingap ni mwikadil wa kwilam chisu chawonsu. Twij mwamu pitutangina piur pa chitil chasalay ni Batisheba ni mutapu wasalay ku ris ra Nabal. (1 Samwel 25:10-13; 2 Samwel 11:2-4) Tukutwish kwilejin malejan ma usey kudi David. Chakusambish, atulam adia pakach pa antu a Nzamb afanyidin kwilam chakwel kangal asadina nayimp wintakel wau. Cha kaad, kwikil muntu ufanyidina kwichingejin ni kutong anch ndiy kakutwishap kuwil mu yoziu.—1 Korint 10:12.

SAL YOM UKUTWISHA KUSAL

14. Yom ik yamushikena mukadivar umwing, ni mulong wak mutapu wetu wa kwakul ku yom yamushikena mudi yiney udi wa usey?

14 Yom ik ukutwisha kusal mulong wa kuwapish mwikadil wey wa kwilam? Shinshikin yom yamushikena Luigi. Motak umwing wakonga kwinyim kwa motak wend. Ap anch mwin kwendish mukwau ndiy wasadisha akisidan winou, shofer winou wasambisha kumuswejen Luigi ni kukimb kutend nend. Luigi wamulembila Yehova mulong anineta ni wasala usu wa kumudutish shofer mukwau. Pakwez muntu winou wadandamena kuswej. Chawiy Luigi wafunda nimero wa motak ni  waya kwend wamusha muntu winou udandamedin kuswej. Kupwa kwa rubing rimwing, Luigi weza kumuchirikin mband umwing padingay mu mudimu wa kulejan. Mband winou wading wa shofer winou! Ikundj winou wova usany ni wita dilikishin mulong wa yisal yend yiyimp. Wamuleja Luigi chakwel atuzuka sosiete wa assurance wend mulong amurijekina Luigi motak. Ikundj winou wibomba mu mambam ma Bibil ni wasangera. Mulong wa chinech, Luigi wamana anch chading cha usey kuninet kupwa kwa akisidan winou ni mutapu wakimba yom kuyip anch wova ujim.—Tang 2 Korint 6:3, 4.

Mutapu wetu wa kwakul ukutwish kwikal ni yibudikin pa mudimu wetu wa kulejan (Tal paragraf wa 14)

15, 16. Dilejan dia Bibil dikutwish kukukwash mutapu ik ey ni dijuku diey kukudish mwikadil wa kwilam?

15 Dilejan dia Bibil dia chisu chawonsu ni dia mushiku dikutwish kuyikwash in Kristu kukudish mwikadil wa kwilam. Vurik yom yamulejau Joshua kudi Nzamb anch: “Mukand wa yijil yiney uwapidil kwez kwikal mu kan mwey. Ukez kutongijokang muten  ni uchuku chakwel ey ukutwish kubabal kulam yawonsu yifundilaumu. Chad ukez kuyukil mu yisalijok yey yiwamp, ni kukolik.” (Joshua 1:8) Pakwez, mutapu ik dilejan dia Bibil dikutwisha kukukwash kukudish mwikadil wa kwilam?

Dilejan dia Bibil dia chisu chawonsu dikutwish kukukwash kukudish mwikadil wa kwilam

16 Twilej kal anch mu Bibil mudi yilakej yimekeshina mutapu tukutwisha kutaninamu anch twilam ni mutapu tukumana mar anch twalik kwilam. Yehova wasala anch afunda yilakej yiney mulong wa kutaninamu. (Rom 15:4) Chikwikal cha manangu kudi etu kutang, kwilej ni kutong nawamp piur pa yom yiney. Sal usu wa kwijik mutapu wa kuyisadin ni mu dijuku diey. Mwita Yehova akukwasha kusadin yiyul yidia mu Dizu diend. Anch waman anch uburedin mwikadil wa kwilam mu mitapu kanang, ufanyidin kwitiyin. Kupwa lembil piur pa mulong winou ni sal usu wa kuman mutapu wa kuwapish. (Jakobu 1:5) Kimbijol mu mikand yetu mulong wa kutan yiyul ya kusadin yikutwisha kukukwash.

17. Mu jinjil ik mukutwishau anvaj kuyikwash anau kukudish mwikadil wa kwilam?

17 Mutapu ik ukutwisha kuyikwash aney kukudish mwikadil wa kwilam? Anvaj ij anch anau kavadikap ni mwikadil winou. Chawiy afanyidin kuyifundish anau mikadil yiwamp kusutin yilakej yau ayinau. (Efes 6:4) Anch waman anch aney aburedin mwikadil wa kwilam, iyipula amwiney anch umekeshin chilakej chiwamp ap bwat. Ukutwish kumekesh chilakej chiwamp mu kusal mudimu wa kulejan chisu chawonsu, mu kukumangan ku yikumangan ni mu kutakel difukwil dia mu dijuku. Ni kangal kwov wom wa kuyikangesh aney kusal yom kanang anch chidi cha usey! Yehova wamutekina Adam ni Ev mimbu. Mimbu yiney yafanyina kuyikwash kwilej kulimish wintakel wa Yehova. Mutapu wawiy umwing, anch anvaj ayipup anau ni kuyishil chilakej chiwamp, yom yiney yikutwish kuyifundish anau mwikadil wa kwilam. Rukat mulong wa wintakel wa Nzamb ni kulimish yijil yend yidi yom yimwing pakach pa yom ya usey nakash ukutwisha kuyikwash aney chakwel ikala nich.—Tang Jinswir 1:5, 7, 8.

18. Mulong wak tufanyidin kutond arund netu nich manangu?

18 Twikala anvaj ap bwat, etu awonsu tufanyidin kutond arund netu nich manangu. Anch arund ney amukatin Yehova, akukukasikesh witekina mipak yiwamp ni wiyepa milong. (Jinswir 13:20) Yilakej yau yikukubachik kwimburij mwikadil wau wa kwilam. Pakad ntaad mwikadil wey uwamp ukuyikasikesh kand niyau. Mwikadil wa kwilam tukwikala nich ukutukwash kwikal nich dilau dia Nzamb, kusanger mwom wetu ni kupan yom yiwamp kudi antu tukatina.