Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 9 , 2017

Imburijany Ranaken ra Yehova

Imburijany Ranaken ra Yehova

[Yehova, Yehova], Nzamb wa ranaken ni mwin riy.” —KUBUDIK 34:6.

MIMINY: 18, 12

1. Mutapu ik wimekeshay Yehova kudiay Moses? Mulong wak chom chinech chidi cha usey?

CHISU chimwing, Nzamb wimekesha kudiay Moses palonday mulong wa dijin Diend ni mikadil Yend yimwing. Yehova wafanyina kukasikeshin pa usu wend ap manangu mend, pakwez walonda chakusambish piur pa riy ni ranaken rend. (Tang Kubudik 34:5-7.) Moses waswirikena kwijik anch Yehova ukutwish kumukwash. Chawiy Yehova wakasikeshina mikadil yimekeshina anch ukatining kamu kuyikwash atushalapol end. (Kubudik 33:13) Mutapu ik ukata kwiyov pa kwijik anch Yehova ukat kutubangin kamu nakash? Mutu wa mulong winou ukasikeshin pa ranaken, udia mwikadil wa kwitek pa ndond ya antu amena mar ni kuswiriken kuyikwash.

2, 3. (a) Yom ik yimekeshina anch chiding cha chivadik kudi antu kumekesh ranaken? (b) Mulong wak ufanyidin kwipan mu yom yilondinay Bibil piur pa ranaken?

2 Yehova udi mwin ranaken, ni wayitanga antu mu chifu chend. Chawiy chiding cha chivadik kudi antu kuyibangin antu akwau. Ap antu akad kumwijik Yehova, akat kumekesh  ranaken yisu yivud. (Disambishil 1:27) Mu Bibil, tutaninamu jinsangu jivud ja antu amekesha ranaken. Chilakej, pakimbay Salomon kwijik mband ik pakach pa amband inay aad wading makwend a mwan, wayipaka palonday anch mubarilany mwan pakach. Makwend a mwan wamwanakena nakash mwan winou, chawiy wamwilembina mwant anch mwinkishay kwey mukwetu. (1 Ant 3:23-27) Chilakej chikwau cha ranaken chading cha mwan mband wa Farao. Pamutanay mwan Moses, ndiy wijika anch udi mwin Hebereu ni akutwish kumujip. Pakwez “wamwovila riy,” ni wakwata mupak wa kumulik mudi mwanend.—Kubudik 2:5, 6.

3 Mulong wak tufanyidin kwilej yom yivud piur pa ranaken? Mulong Yehova ukatining anch tumwimburija. (Efes 5:1) Ap anch atutanga mulong wa kumekesh ranaken, tudi antu akad kuwanyin ni tukweting maswir ma choy. Yisu yimwing chiswapelingap kukwat mupak anch tukuyikwash antu akwau ap anch tukwitongin ayinetu. Yom ik yikutwisha kutukwash kwipan nakash kudi akwetu? Chakusambish, tushinshikinany mutapu wamekeshay Yehova nau antu akwau ranaken. Cha kaad, el tuman mutapu tukutwisha kwimburij ranaken ra Nzamb ni mulong wak chidi chiwamp kudi etu kusal mwamu.

YEHOVAH UDI CHILAKEJ CHIWANYIDINA CHA RANAKEN

4. (a) Mulong wak Yehova watuma angel mu Sodom? (b) Yom ik tukutwisha kwilejin ku yom yashikena ku dijuku dia Lot?

4 Bibil ukwet yilakej yivud yilondina piur pa ranaken ra Yehova. Chilakej, tong yom yamusadinay Lot. Lot wading muntu utentamina “wanenganananga” mulong wa antu ayimp ading mu Sodom ni Gomor. Antu inay kamulimishangap Nzamb, chawiy Yehova wamana anch chifanyidin kuyijip. (2 Pita 2:7, 8) Yehova watuma angel kudiay Lot mulong wa kumulej anch Sodom ni Gomor akumujiyish ni ey ufanyidin kuchin. Bibil ulondin anch: “Lot walabijoka, chad amakundj inay amukwata pa chikas, ni cha mukajend, ni pa makas ma anend amband aad, mulong [Yehova] wamwovila riy. Awiy ayibudisha, ayitwala kuns kulemp kusha musumb.” (Disambishil 19:16) Mutapu wateshay Yehova yom yading yikwatakenay nich Lot, tukutwish kwikal nich kashinsh anch ukutesh mulong win wawonsu tukweta.—Isay 63:7-9; Jakobu 5:11; 2 Pita 2:9.

Yehova wijing kamu nawamp mar tukweting

5. Mutapu ik utufundishina Dizu dia Nzamb mutapu wa kumekesh ranaken?

5 Yehova wayifundisha kand antu end kumekesh ranaken. Tong piur pa chijil chimwing chayinkishay an a Isarel. Anch muntu wasondam nfalang kudi mukwau, muntu wasondjikanang ufanyidin kutambul disun diend mudi chizu kushik ni pakumuchirishinau nfalang jend. (Tang Kubudik 22:25, 26.) Pakwez muntu wamusondjikang ufanyidin kumuchirishin muntu wasondamang disun diend urel chakwel atwisha kwibwik uchuku. Chawiy muntu  wakad ranaken ndiy walikang kuchirish disun dined kudi mukwau, pakwez Yehova ndiy wayifundisha antu end kwikal in ranaken. Mbil yidia mu chijil chinech yitufundishin ik? Kangal twavuramen maswir ma anamakwetu in Kristu. Anch twakimb kumukwash mukadivar ap nambaz umena mar, tufanyidin kamu kusal mwamu.—Kolosay 3:12; Jakobu 2:15, 16; tang 1 Yohan 3:17.

6. Yom ik tukutwisha kwilejin ku ranaken ra Yehova piur pa yitil ya in Isarel?

6 Yehova wayanakena in Isarel ap chisu chamusadinangau yitil. Tutangin anch: “Yehova Nzamb wa angakirilau wadandamena kuyibabesh pa kuyitumin aruu end, wayibabesha tupamp ni tupamp, mulong wayovila antu end riy ni ndond yend.” (2 Jinsangu 36:15, NWT) Chilik chimwing, tufanyidin kuyanaken antu akad kal kumwijik Yehova pakwez akutwisha kukarumuk ni kwikal arund nend. Yehova kakatinap anch muntu ap umwing ajiya ku dirumburish diezina. (2 Pita 3:9) Chawiy pachidia kal chisu ap, tufanyidin kulejan uruu wend wa kubabesh kudi muntu win mwawonsu tukutwisha kulej ni kukwash antu avud chakwel ataninamu mu ranaken ra Nzamb.

7, 8. Mulong wak dijuku dimwing ditiyija anch Yehova wayanakena?

7 Nlel, atushalapol avud a Yehova amen kal ranaken rend. Chilakej, mu mivu ya 1990 mu Bosnie, michid yivud yarishang ni yajipijanang. Dijuku dimwing diading dishich mwinimwa ni mwanau ikundj wa mivu 12 dijin diend Milan. Milan, yayend ikundj, anvajend ni Atuman akwau ading akat kusal weny mu motak adiokil mu Bosnie mulong wa kuya mu Serbie. Ading ayil ku chitentam, kwafanyinau kuyibatish anvaj a Milan. Pashikau ku mwimbu wa ngand, amasalay amwing amana anch muchid wa dijuku dia Milan wading ushalijadin ni michid yikwau ni ayishirisha mu motak. Chawiy amasalay ayisha akadivar akwau mu motak chakwel adandamena ni weny wau. Kupwa kwa machuku maad, amasalay kitiyap anch dijuku dined diya. Kwinsudien, mukurump wa amasalay wadingau nau, wamutazuka mukurump wau ni kumwipul anch yom ik tufanyidina kuyisal. Dijuku dined diading dishich pinipa ni diatesha mukurump wau ukat kwakul anch: “Yitwalany kuns ni yilozany!”

8 Pading pambambinau amasalay, angendj aad eza kudi dijuku dined. Ayileja mu kayauyau anch niyau adi Atuman ni anch akadivar adia mu motak awiy ayileja kal yom yasadika kal. Atuman aad inay amuleja Milan ni yayend andama mu motak chakwel asuta mwimbu wa ngand mulong amasalay kasopangap mikand ya an. Kupwa akadivar inay ayileja anvaj niyau asuta mwimbu wa ngand chakwel atanijana nau mutambu ukwau. Milan wiyakamisha nakash ni wiyipula anch chifanyidin kusip ap kudil. Anvajend ayipula akadivar aad inay anch: “Ov, utonginany anch akutulik kamu tuya?” Pakwez pading payilau, chamekana mudi anch amasalay kadingap ayimen. Milan ni yayend atanijana ni anvajau mutambu ukwau wa ngand, ni aya ku chitentam. Ikala nich kashinsh anch Yehova wakula ku malembil mau! Twij kusutin mu Bibil anch Yehova kakuyikingangap atushalapol end chisu chawonsu mu mutapu mudi winou. (Midimu 7:58-60) Pakwez pa mulong winou, Milan walonda anch: “Chamekana  kudi am anch angel abwika mes ma amasalay ni Yehova ndiy watupandisha.”—Kuseng 97:10.

Mudi Yesu, ov, niyey ukwet maswir nakash ma kuyikwash antu ni kuyifundish piur pa Yehova?

9. Mutapu ik wiyovay Yesu piur pa yisak ya antu yading yimulondwila? (Tal chipich cha kwisambishin.)

9 Yesu wading chilakej chiwamp cha ranaken. Wayovila antu riy mulong wamana anch “awiy ading aziyin ni kujilijil mudi amikoku akad kafung.” Chawiy, yom ik yasalay? “Ndiy wasambisha kuyilej yom yivud.” (Mateu 9:36; tang Marko 6:34.) Pakwez, Afaris kadingap ni ranaken ni kakatangap kuyikwash antu. (Mateu 12:9-14; 23:4; Yohan 7:49) Mudi Yesu, ov, niyey ukwet maswir nakash ma kuyikwash antu ni kuyifundish piur pa Yehova?

10, 11. Ov, chiding chiwamp chisu chawonsu kumekesh ranaken? Rumburil.

10 Chinech chirumburikinap anch chisu chawonsu chiding chiwamp kumekesh ranaken. Chilakej, Mwant Saul wamana anch wamekesha ranaken chisu chalikay kumujip Agag, wading mwant wa in Amalek ni mukankuny wa antu a Nzamb. Saul kajipap kand annam awonsu a in Amalek. Pakwez Yehova wamuleja Saul kujip in Amalek awonsu ni annam au awonsu. Mulong Saul wabwambwila, chawiy Yehova kamwitiyap kand kwikal mwant. (1 Samwel 15:3, 9, 15) Yehova udi Nzwij utentamina. Ukutwish kutang michim ya antu, ni wijing chisu chifanyidina kulik kumekesh ranaken. (Madil ma Jeremiy 2:17; Ezekiel 5:11) Kurutu oku ukulet dirumburish kudi antu awonsu alikina kumuziyin. (2 Tesalonik 1:6-10) Chikwikalap kand chisu kudiay Yehova cha kumekesh ranaken kudi antu ayimp. Pakwez, pakuyijiyishay antu ayimp, ndiy ukumekesh ranaken kudi antu atentamina akupandishay.

11 Chakin kamu, chidiap chisend chetu cha kuyirumburish antu ap anch akupand ap akufa. Pakwez, tufanyidin kusal yom yawonsu tukutwisha kusal mulong wa kuyikwash antu. Yom ik yimwing tukutwisha kusal mulong wa kumekesh ranaken kudi antu akwau? Tal yiyul yikemp ey yilejenau.

MUTAPU TUKUTWISHA KUMEKESH RANAKEN

12. Mutapu ik ukutwisha kumekesh ranaken mu mutapu uyisadina antu akwau?

12 Ikal mwin kukwash dichuku diawonsu. Yehova uyilejin in Kristu amekesha ranaken kudi amutej nau ni kudi akadivar nau. (Yohan 13:34, 35; 1 Pita 3:8) Chirumburikina ranaken kudi “kuman mar pamwing.” Muntu ukata kumekesh ranaken usadining usu wa kuyikwash antu akwau amena mar. Chawiy tufanyidin kukimb mitapu yiwamp ya kuyikwash akwetu, pamwing ap kwipan mulong wa kuyisadinaku midimu ya ku chikumbu ap kwitiy atutuma.—Mateu 7:12.

Mekesh ranaken mu kuyikwash antu akwau mu mitapu kushalijan (Tal paragraf wa 12)

13. Yom ik yisadiningau antu a Nzamb anch kwashiken mar ma chitangil?

13 Ipana mu mudimu wa kukwash. Anch twaman antu akat kuman mar mulong wa mar ma chitangil, tufanyidin kamu kuyanaken. Antu a Yehova ayijing kamu nawamp mulong wa kuyikwash antu akwau mu yisu  mudi yiney. (1 Pita 2:17) Chilakej, nambaz umwing wa mu Japon, wading ushich mu teritwar mwasadika kuzal kwa divu ni rinkind mukash utazukinau anch tsunami mu muvu wa 2011. Walonda anch “amukasikesha nakash ni kumwongoj” pamanay in kusal mudimu a kwisotin akat kudiokal mu mal kushalijan ma mu Japon ni ma mu jingand jikwau mulong wa kutungiril yikumbu ni Yot ya Want. Wawejinaku anch: “Yom yiney yankwasha kwijik anch Yehova ukat kwintongin. Ni akwetu Atuman akat kutubangin umwing ni mukwau. Ni akadivar ni anambaz avud a pa mangand mawonsu akat kulembil mulong wetwetu.”

14. Mutapu ik ukutwisha kuyikwash antu ayedina nau amapal?

14 Yikwasha antu ayedina nau amapal. Pitumening antu amena mar mulong wa mayej ni mulong wa upal, tukat kuyanaken. Tuchingedin kuman disudiel dia yom yiney, chawiy tulembil anch Want wa Nzamb weza. Mu chisu chinech, tusadin yom yawonsu tukutwisha mulong wa kuyikwash antu ayedina nau amapal. Mwin kufund umwing wafunda anch dichuku dimwing makwend ipal, wading uyedina mayej ma Alzheimer (mayej makata kushadish pakemp pakemp manangu ma muntu), wiyipishina mu masun mend. Padingay ukat kusal usu wa kutut masun, akokala ku chis chend. Atuman ezang kumutal chisu chawonsu ashika. Anambaz inay amwipula anch akutwish kumukwash. Mband winou walonda anch: “Chikwatishen usany pakwez ukutwish kwinkashany.” Anambaz amukwasha kutut. Kupwa amusadina  chay ni ashakama pamwing mulong wa kwambamb nend. Mwanend wajikitisha nakash ni walonda anch Atuman “akat kusadin yom yifundishiningau.” Ranaken rey mulong wa antu ayedin ni amapal rikat kukubachik ey mulong wa kusal yom yawonsu ukutwisha mulong wa kuyikwash?—Filip 2:3, 4.

15. Mudimu wetu wa kulejan ukat kuyikwash antu akwau mutapu ik?

15 Yikwasha antu amwijik Yehova. Mutapu uwamp tukutwisha kuyikwash antu udi wa kuyifundish piur pa Nzamb ni piur pa Want wend. Mutapu ukwau udi wa kuyikwash chakwel ijika mulong wak kuziyin kwi mbil ja Yehova chidi chom chiwamp kudi awiy. (Isay 48:17, 18) Mudimu wa kulejan udi mutapu uwamp wa kumutumbish Yehova ni kumekesh ranaken kudi antu akwau. Ukutwish kusal yivud mu mudimu wa kulejan?—1 Timote 2:3, 4.

RANAKEN RIDI KAND RUWAMP KUDI EY!

16. Mutapu ik tutanidinamu anch tudi in ranaken?

16 In kwilej ukash wa manangu alondining anch ranaken rikat kuwapish ukash wetu wa mujimbu ni urund wetu nau antu akwau. Anch wayikwash antu amena mar, ukwov musangar, ukwikal ni ruchingej nakash, ukwiyovap anch udi amwiney ni ukwikalap ni yitongijok yiyimp. Kumekesh ranaken kudi kuwamp kudi ey. (Efes 4:31, 32) Anch rukat ratubachik kuyikwash antu akwau, tukwikal ni kom kawamp mulong twij anch tusadin yom yikatinay Yehova anch tusal. Ranaken rikutukwash kwikal anvaj awamp, ambay a uruw awamp ni arund awamp. Chikwau kand, antu amekeshining ranaken kudi antu akwau, atambwiling ukwash chisu chidiau mu maswir.—Tang Mateu 5:7; Luka 6:38.

17. Mulong wak ufanyidin kwikal mwin ranaken?

17 Ap anch kumekesh ranaken kudi kuwamp kudi etu, diyingishin dijim dia kumekesh ranaken didi anch tukatin kumwimburij Yehova ni kumwinkish ntumb. Ndiy udia Musul wa rukat ni wa ranaken. (Jinswir 14:31) Watushila chilakej chend chiwanyidina. Komb el tusalany yom yawonsu tukutwisha kusal mulong wa kumwimburij Nzamb kusutin kumekesh ranaken. Mwamu tukusej piswimp ni akadivar nau anambaz netu ni tukwikal mu urund uwamp nau antu tudia nau piswimp.—Galatia 6:10; 1 Yohan 4:16.