Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 9 , 2017

‘Ikal Utakamena . . . ni Sal Mudimu’

‘Ikal Utakamena . . . ni Sal Mudimu’

‘Ikal utakamena ni usu ni sal mudimu. Kangal wov wom, kangal wakam, mulong Yehova . . . udi ni yeyey.’ —1 JINSANGU 28:20.

MIMINY: 23, 29

1, 2. (a) Chisend ik cha usey chamwinkau Salomon? (b) Mulong wak David wakama piur pa Salomon?

SALOMON watambula chisend cha pakampwil. Yehova wamutonda chakwel atakela mudimu wa kutung tempel mu Yerusalem, chading chisend chijim cha usey nakash cha kutung! Tempel winou wading ufanyidin kwikal wa “ufun nakash,” ni wading ufanyidin kwijikan mulong wa kuwap kwend. Cha usey nakash, tempel winou wafanyina kwikal ‘chikumbu cha Yehova Nzamb wakin.’—1 Jinsangu 22:1, 5, 9-11.

2 Mwant David wading nich kashinsh anch Nzamb ukumukwash Salomon. Pakwez Salomon wading ‘uchidi mwan mukemp, kand kal ikala nich manangu.’ Ov, wafanyina kwikal utakamena mulong wa kwitiy chisend cha kutung tempel? Ap usand wend ni kuburen manangu kwakimba kumukangesh kusal mwamu? Chakwel atwisha, Salomon wading ufanyidin kwikal utakamena ni kusal mudimu.

3. Yom ik yafanyinay Salomon kwilej piur pa kutakaman kwa tatukwend?

 3 Salomon wafanyina kwilej yom yivud piur pa kutakaman kwa tatukwend, David. Ap anch David wading uchid kal nsand mukemp, warisha nau annam a yidiany eza kukwat amikoku a tatukwend. (1 Samwel 17:34, 35) Wamekesha kand kutakam kujim chisu charishay ni isalay chifuvu ukwatishena wom, chitabu Goliat. Chakin kamu, nich ukwash wa Nzamb ni diyal disidina, David wamuwina Goliat.—1 Samwel 17:45, 49, 50.

4. Mulong wak Salomon wading ukwet kuswir kwa kutakaman?

4 Twaman kal chad mulong wak David wading ni diyingishin diwamp dia kumuyul Salomon mulong wa kwikal utakamena ni kutung tempel. (Tang 1 Jinsangu 28:20.) Anch Salomon kamekeshap kutakaman, wom wafanyina kumukwat ni kumukangesh chad kusambish mudimu. Ni chakimba kuyip nakash mulong wafanyina kukangany kuwanyish chisend chend.

Tukwet kuswir kwa ukwash wa Yehova mulong wa kwikal atakamena ni kusal mudimu utwinkishinay

5. Mulong wak tuswirikedin kutakaman?

5 Mudi Salomon, tukwet kuswir kwa ukwash wa Yehova mulong wa kwikal atakamena ni kusal mudimu utwinkishinay. Chawiy el komb twileja yilakej ya antu amwing amekesha kutakaman pakur. Kupwa tukutwish kutong mutapu tukutwisha kumekesh kutakaman ni kuwanyish mudimu wetu.

YILAKEJ YA KUTAKAMAN

6. Yom ik yikushimokishina piur pa kutakaman kwa Josef?

6 Josef wamekesha kutakaman chisu chamwozau kudi mband wa Potifar mulong wa kusal nend masandj. Wading wij anch mwom wend wafanyina kwikal mu ubaj anch walik. Pakwez pa ndond pa kwitiyij, ndiy wamekesha kutakaman ni wamuchina mband winou kapamp kamwing.—Disambishil 39:10, 12.

7. Mutapu ik wamekeshay Rahab kutakaman? (Tal chipich cha kwisambishin.)

7 Rahab udi kand chilakej chikwau cha kutakaman. Pezau in kutentish a Isarel ku chikumbu chend, wafanyina kwov wom ni kulik kuyikwash. Pakwez mulong wamuchingejina Yehova, wamekesha kutakaman payijindjikay amakundj inay aad ni wayikwasha chakwel achina. (Joshua 2:4, 5, 9, 12-16) Rahab wading witiyijin anch Yehova ndiy Nzamb wakin, ni wading nich kashinsh anch chikalap nchik, ndiy ukuyinkish an a Isarel ngand. Kalikap anch wom wa antu akwau, ni wa mwant wa Yeriko ni antu end, umuzadisha. Pakwez, ndiy wasala nich kutakaman ni wipandisha amwinend ni wapandisha dijuku diend.—Joshua 6:22, 23.

8. Mutapu ik kutakaman kwa Yesu kwikala nich usu padiau atwimbuy?

8 Atwimbuy ashinshamena a Yesu amekesha niyau kutakaman nakash. Amana kutakaman kwamekeshay Yesu, ni chinech chayikwasha niyau kumwimburij. (Mateu 8:28-32; Yohan 2:13-17; 18:3-5) Papakijau kuyikangesh kudi Asadus kufundish piur pa Yesu, awiy alika kwitiy.—Midimu 5:17, 18, 27-29.

9. Mutapu ik utukwashinay 2 Timote 1:7 kwijik kwisu kudiokila kutakaman?

9 Josef, Rahab, Yesu ni atwimbuy akwata  mupak wa kusal yom yading yiwamp. Amekesha kutakaman, chidiap anch mulong ading nich kashinsh mu ukaliweny wau, pakwez chidi mulong amuchingejina Yehova. Yisu tukwikala nich kuswir kwa kutakaman, niyetu tufanyidin kumuchingejin Yehova, kangal twichingejin ayinetu. (Tang 2 Timote 1:7.) El tushinshikinany yom yaad ya mu mwom yikutukwasha kuswiriken kutakaman: mu dijuku dietu ni mu chikumangen.

YOM YITINA KUTAKAMAN

10. Mulong wak ansand in Kristu aswirikedin kutakaman?

10 Kudi yom yivud yikata kushiken yisadina anch ansand in Kristu aswirikena kutakaman mulong wa kumusadin Yehova. Akutwish kwilejin ni kulondul chilakej cha Salomon, wamekesha kutakaman chisu chakwatay mupak wa manangu wa kupwish kutung tempel. Ap anch ansand akutwish ni afanyidin kuyitakel kudi anvajau, akwet niyau mipak yau ya usey yikutwishau kukwat. (Jinswir 27:11) Aswirikedin kutakaman mulong wa kukwat mipak ya manangu mulong wa kwijik anany afanyidina kwikal arund nau, yom ik yifanyidinau kusal mulong wa kwipuwangej , mutapu ik ufanyidinau kushal ishitwila mu manangu ni chisu ik chifanyidinau kutambul dibatish. Aswirikedin kutakaman mudi kwinoku mulong kangal asala rusot ra Satan, ukata kumusaal Nzamb masaal.

11, 12. (a) Mutapu ik wamekeshay Moses kutakaman? (b) Mutapu ik ukutwishau ansand kwimburij chilakej cha Moses?

11 Chom chimwing cha usey chikutwishau ansand kusal kudi kukwat mipak ya yom yikusalau machuku ma kurutu. Mu jingand jimwing, akat kuyikasikesh ansand chakwel ileja mashikol ma piur ni kukimb mudimu ukutwisha kuyifut nfalang jivud. Pakwez mu jingand jikwau, nfalang jikasiken kumekan, ni ansand akat kwiyov anch afanyidin kusal mudimu nakash mulong wa kukwash majuku mau. Anch yom mudi yiney yakushiken, tongin pa chilakej cha Moses. Amulila kudi mwan mband wa Farao, chawiy wafanyina kwitekin mupak wa kwikal mpich nakash ap wa kwikal wa usey nakash. Tongin piur pa yibachikin yafanyinay kwikal nich ku dijuku diend dia mu Idjibit, alej nau in yiyul! Pakwez Moses wading utakamen ni watonda kwikal pamwing nau antu a Nzamb. Kupwa kwa Moses kudiokal mu Idjibit ni kusha mapit mend, wamuchingejina kamu Yehova. (Hebereu 11:24-26) Mudi chibudikin, Yehova wamuyukisha nakash ni ukumuyukish kand chipandakena mu machuku ma kurutu.

12 Anch ansand itekin mipak nich kutakaman mu mudimu wa Yehova ni atek yisakin ya Want pa ndond ya kusambish mu mwom wau, ndiy ukuyiyukish. Ukuyikwash chakwel awanyisha maswir ma majuku mau. Mu mivu chitot ya kusambish, nsand Timote wipana mu mwom wend mulong wa kumusadin Nzamb, niyey ukutwish kusal mwamu. * (Tal mazu ma kwinshin.)—Tang Filip 2:19-22.

Ov, ukwatin mupak wa kwikal utakamena mu yom yawonsu mu mwom wey? (Tal paragraf wa 13-17)

13. Mutapu ik kutakaman kwamukwasha nambaz umwing changadim kuwanyish mipak yend?

13 Nambaz umwing wa mu Alabama, mu États-Unis, waswirikena kutakaman mulong wa kwitekin mipak mu mudimu wa Nzamb. Ufundin anch: “Pinading niyila mu kupam, nalondangap nakash. Nabambangap nakash nau antu ku Chot cha Want, ni natwishangap kukokal ku yis ya antu nakad kwijik.” Nich ukwash wa anvajend ni antu  akwau mu chikumangen, changadim winou mwin Kristu wawanyisha mupak wend wa kwikal chibol wa rawonsu. Ulondin anch: “Mangand ma Satan makasikeshidin nakash pa kwilej mashikol ma piur, kwikal ni ntumb, ni nfalang ni yom yivud ya ku mujimbu anch yawiy yom yiwamp.” Pakwez wajingunina kand anch antu avud kakutwishangap kwau kuwanyish yom yiney ni yikat kuyiletin yakamish ni mar. Wawejinaku kand anch: “Pakwez kumusadin Yehova kwanletina musangar ujim ni kwov kurumburik kwa yom nasala.”

14. Chisu ik chiswirikedinau anvaj in Kristu kutakaman?

14 Anvaj in Kristu niyau aswirikedin kutakaman. Chilakej, mukurump wey wa mudimu ukutwish kukulej anch usalang mudimu mwa asaa avud kusut muukata kusalang mu machuku mawitekina kal ey kurutu mulong wa kusal difukwil diey dia mu dijuku, mudimu wa kulejan ap kuya ku yikumangan ya chikumangen. Uswirikedin kutakaman mulong wa kumulej mukurump wey wa ku mudimu anch bwat ni kuyishil aney chilakej chiwamp. Pamwing ap anvaj amwing mu chikumangen ayilikin anau asala yom yiwakad ey kukat anch aney ayisala. Anch anvaj inay akwipul uyileja mulong wak usadinap mwamu, ov, ukutwish kwikal utakamena ni kuyirumburil nich kalimish?

15. Mutapu ik ukutwishay Kuseng 37:25 ni Hebereu 13:5 kuyikwash anvaj?

15 Chitin kutakaman mulong wa kuyikwash anetu itekina ni awanyisha mipak mu mudimu wa Nzamb. Chilakej, anvaj amwing akutwish kwov wom wa kuyikasikesh anau adandamena kusal mudimu wa uchibol, kusadin  kwi ndond kudia maswir nakash, kusadin ku Betel ap kand kukwash mudimu wa kutung Yot ya Want ni Yot ya Yitentam. Pamwing ap akutwish kwikal nich wom anch anau kakutwishap kuyilam chisu chikunanapau. Pakwez, anvaj akweta manangu akat kumekesh kutakaman ni ritiy anch Yehova ukuwanyish kushilamu kwend. (Tang Kuseng 37:25; Hebereu 13:5.) Anvaj amekeshina kutakaman mudi kwinoku ni amuchingejidina kamu Yehova akuyikwash kand anau kusal mwamu.—1 Samwel 1:27, 28; 2 Timote 3:14, 15.

16. Mutapu ik anvaj amwing wayikwashinau anau kwitekin mipak mu mudimu wa Nzamb, ni mutapu ik watanidinawamu anau?

16 Ambay a uruw amwing a mu États-Unis ayikwasha anau chakwel ipana kumusadin Yehova. Ikundj ulondin anch: “Kurutu anetu asambisha kwend ni kulond, twayilejang piur pa musangar wa kusal mudimu wa uchibol ni wa kusadin chikumangen. Katat yiney yawiy mipak yau.” Wawejaku anch mulong anau itekina ni awanyisha mipak yau, chayikwasha kurish ni yoziu ya mangand ma Satan ni ipana kamu mu kumusadin Yehova. Mukadivar ukweta an aad walonda anch: “Anvaj avud asadin usu nakash ni kusadin mapit mau mulong wa kuyikwash anau chakwel ipana ku yom mudi ya masengan, kwipuwangej ni kwilej. Choviken kamu anch chitin kusal usu ni kusadin mapit mulong wa kuyikwash anetu awanyisha mipak yikukwasha chakwel alama urund uwamp ni Yehova. Ukwikal musul ujim nakash wa musangar kudiap ching kuyiman anetu akat kuwanyish mipak yau ya mu spiritu, pakwez mulong wa kusal nau pamwing.” Ukutwish kwikal nich kashinsh anch anvaj ayikwashining anau kwitekin ni kuwanyish mipak mu mudimu wend akweting yiyukish ya Nzamb.

KUTAKAMAN MU CHIKUMANGEN

17. Let yilakej ya kutakaman mu chikumangen cha win Kristu.

17 Niyetu tufanyidin kumekesh kutakaman mu chikumangen. Chilakej, amakurump a chikumangen aswirikedin kutakaman chisu chifanyidinau kupwish milong ya yitil yijim ap chisu chiyikwashinau antu adia mu ubaj mulong wa milong ya chimwingang. Amakurump amwing akat kuya kuyital antu adia mu rukan mulong wa kwilej nau antu asangaredina ap kutakel yikumangan. Ni chidi nchik piur pa anambaz ajich? Akwet mitapu yivud ya kumekesh kutakaman ni kumusadin Yehova. Akutwish kusal mudimu wa uchibol, kushemunikin kwi ndond kudia maswir nakash, kusal mudimu pamwing ni Biro Utadina Mudimu wa Kutung ni kuya ku Shikol ya in Kulejan a Want. Amwing akat kuyitazuk mulong wa kuya ku Shikol ya Gilead.

18. Mutapu ik ukutwishau anambaz apamina kal kumekesh kutakaman?

18 Tuyikatin anambaz netu apamina kal, ni tukwet kand musangar wa kwikal nau mu chikumangen! Ap anch amwing katwishinap kand kusal mudi mwasalangau pakur mu mudimu wa Nzamb, akutwish kudandamen kumekesh kutakaman ni kusal mudimu. (Tang Titus 2:3-5.) Chilakej, nambaz wapamina kal ufanyidin kumekesh kutakaman anch amakurump amulej kuya kumuyul nambaz uchidia kal changadim piur pa kudjal nawamp. Kafanyidinap kumuswejen nambaz winou piur pa mutapu wend wa kudjal, pakwez mu mutapu uwamp, ukumukwash kutong anch masun mend makutwish kuyipwakesh antu akwau. (1 Timote 2:9, 10) Anch anambaz amekesh rukat rau mu mitapu yiney, akutwish kukasikesh chikumangen.

19. (a) Mutapu ik ukutwishau akadivar abatishinau kal kumekesh kutakaman? (b) Mutapu ik ukutwishay Filip 2:13 ni 4:13 kuyikwash akadivar chakwel ikala atakamena?

 19 Akadivar abatishinau kal niyau aswirikedin kutakaman ni kusal mudimu. Anch ikal ni rusot ra kusal mudi ankwash a mudimu ap amakurump, chikumangen chikutaninamu nakash. (1 Timote 3:1) Pakwez, amwing akutwish kwidjidjek kusal mwamu. Pamwing ap mukadivar wasala yitil pakur, ni katat ukat kwiyov anch kawanyidinap kwend kusal mudi nkwash wa mudimu ap mukurump wa chikumangen. Mukadivar mukwau ukutwish kwiyov anch kakwetap kwend ukaliweny wa kusal mudimu winou. Anch wiyovil mutapu winou, Yehova ukutwish kukukwash chakwel wikala utakamena. (Tang Filip 2:13; 4:13.) Vurik chilakej cha Moses. Niyend wiyova anch kadingap kawanyidina kusal yom yamulejau kusal kudi Yehova. (Kubudik 3:11) Pakwez Yehova wamukwasha kwikal utakamena ni kusal yom yading ya usey. Mutapu ik ukutwishay mukadivar wabatishinau kal kutan kutakaman mudi kwinoku? Ukutwish kulembil kudi Yehova mulong wa ukwash ni kutang Bibil dichuku diawonsu. Ukutwish kand kutongijokin pa yilakej ya antu a mu Bibil amekesha kutakaman. Ukutwish nich kwikepish kuyilej amakurump mulong amufumba ni apana ukwash ku chikumangen mu mutapu kanang ukwetau nich kuswir. Tuyikasikeshin akadivar awonsu ikal atakamena ni kusal mudimu nakash mulong wa chikumangen!

‘YEHOVA . . . UDI NI YEYEY’

20, 21. (a) David wamuvurisha Salomon chom ik? (b) Tukutwish kwikal nich kashinsh ka chom ik?

20 Mwant David wamuvurisha Salomon anch Yehova ukwikal nend kushik ni pakupwishinay kutung tempel. (1 Jinsangu 28:20) Salomon watongijokina kamu pa mazu minam, ni kalikap anch usand wend ap kuburen manangu kumukangesha kusal mudimu. Pakwez, wamekesha kutakaman nakash, nich ukwash wa Yehova wapwisha kutung tempel wa ufun nakash mu mivu sambwad ni chikunku.

21 Yehova wamukwasha Salomon, ni ukutwish kand kutukwash etu kwikal atakamena ni kuwanyish mudimu wetu mu majuku ni mu yikumangen yetu. (Isay 41:10, 13) Anch twamekesh kutakaman patumusadidina Yehova, tukutwish kwikal nich kashinsh anch ukutuyukish katat ni mu machuku ma kurutu. Chawiy lel, ‘ikal utakamena . . . ni sal mudimu.’

^ par. 12 Ukutwish kutan yiyul yimwing yilejena mutapu wa kwitekin mipak mu mudimu wa Nzamb Glorifiez votre Créateur en vous fixant des objectifs spirituels,” udia mu Chinong cha Kalam cha 15 Ngond wa 7, 2004, mu Français.