Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 9 , 2017

‘Dizu dia Nzamb Wetu Dishich Chikupu’

‘Dizu dia Nzamb Wetu Dishich Chikupu’

Masuku makat kuum, ni yisalamb yikat kukwanyat, pakwez dizu dia [Nzamb wetu] dishich chikupu.”—ISAY 40:8.

MIMINY: 43, 48

1, 2. (a) Mwom wakimba kwikal mutapu ik pakad Bibil? (b) Yom ik yitukwashina kutaninamu mu Dizu dia Nzamb?

MWOM wey wakimba kwikal mutapu ik anch Bibil kwamwamu? Wafanyinap kwikal ni yiyul ya manangu mulong wa kukutakel dichuku diawonsu. Wafanyinap kwijik uyakin piur pa Nzamb, piur pa mwom ni piur pa machuku ma kurutu. Ni wafanyinap kwikal ni chitongijok ap chimwing piur pa yom yasalay Yehova kudi antu end pakur.

2 Tujikitishin mulong etu tudiap mu mwikadil winou wa ushon. Yehova watwinka Dizu diend, Bibil. Washilamu anch uruu wad ukez kushakam chikupu ni chikupu. Kambuy Pita wajimbula mazu ma Isay 40:8. Ap anch verse winou kalondinap pakampwil piur pa Bibil, pakwez usadidin uruu wa Bibil. (Tang 1 Pita 1:24, 25.) Tukutwish kutaninamu kamu nakash mu Bibil anch twamutang kamu mu dizu dietu dia chivadik. Antu akatina Dizu dia Nzamb ijing kamu chom chinech. Mu kusut kwa mivu yivud, antu asala usu nakash mulong wa kukarumun Bibil ni kusal anch ikalaku ap anch kwading rupompat ni milong  yikash. Yehova ukatin anch antu avud ‘apanda ni kushiken ku kwijik ronganyin rakin ra uyakin.’—1 Timote 2:3, 4.

3. Yom ik tukwisambina mu mutu wa mulong winou? (Tal chipich cha kwisambishin.)

3 Mu mutu wa mulong winou, tukwisambin mutapu wadandamena kwikalaku Dizu dia Nzamb chikalap nchik (1) kuswimp kwa mazu, (2) kuya kurutu kwa yom ya politik kwaswimpa dizu dialondangau kudi antu avud ni (3) rupompat pa kukarumun Bibil. Mambamb minam makutukwash mutapu ik? Musangar wetu mulong wa Bibil ni Mwin kumufund ukupandakan nakash.—Mike 4:2; Rom 15:4.

KUSWIMP KWA MAZU

4. (a) Mutapu ik uswimpina mazu mu kusut kwa mivu? (b) Mutapu ik twija anch Nzamb kakatinap anch dizu kampand diawiy didia dia pakampwil? Ni chinech chikwovishin mutapu ik?

4 Pasutina chisu, mazu makat kuswimp. Mazu ni mutapu wa kulond yikat kushalijan yisu yimwing ni mutapu walondangau pakur. Pamwing ap ukutwish kutong chilakej cha dizu ulondining. Chinech chidi kand chakin ni mazu malondangau pakur. Dizu dia Hebereu ni dia Grek dilondinau antu nlel dishalijadin ni dizu dia Hebereu ni Grek diafundau nich Bibil. Antu avud katwishinap kutesh Bibil mu mazu mamufundau nich pakur, chawiy akwet kuswir kwa Bibil ukarumwinau. Amwing atongin anch ang ilej dizu dia Hebereu ni dia Grek wa pakur, akutwish kumutesh Bibil nawamp. Pakwez chinech chikutwishap kuyikwash nakash mudi mutonginau. * (Tal mazu ma kwinshin.) Tujikitishin nakash anch Bibil ap yikunku ya Bibil ayikarumwin kal mu mazu piswimp 3000. Yehova ndiy ukatina anch antu a “mangand mawonsu, ni a michid yawonsu, ni a jindim jawonsu” ataninamu mu Dizu diend. (Tang Kujingunik 14:6.) Chakin kamu, chinech chikat kusal kamu anch tuseja piswimp ni Nzamb wetu ukweta rukat ni wakad kasolikany.—Midimu 10:34.

Tujikitishin nakash anch Bibil ap yikunku ya Bibil ayikarumwin kal mu mazu piswimp 3 000

5. Yom ik yasala anch Bible du roi Jacque ikala wa usey?

5 Mutapu waswimpa mazu wasala anch mutapu wa kukarumun Bibil uswimpa kand. Bibil wa kusambish wakarumunau wading uswapela kutang kovikanap kand nawamp mu kusut kwa mivu. Chilakej chidi cha Bible du roi Jacques, wabudishau kapamp ka kusambish mu muvu wa 1611. Wikala Bibil wijikena nakash wa Inglish. Mutapu wa kulond wasadinau mu Bible du roi Jacques wikala nich usu nakash mu dizu dia Inglish. * (Tal mazu ma kwinshin.) Pakwez, Bibil winou wasadina dijin Yehova tupamp tukemp. Jindond jivud mu Mifund ya Hebereu pading dijin dia Nzamb mudi mwasadinau pakur, Bibil winou wasadina dijin “NSALEJAM” mu mamuny majim. Kupwa in kuchap asadina dijin “NSALEJAM” mu mamuny majim mu  maverse mamwing ma Mifund ya Grek ya win Kristu. Mu mutapu winou, Bible du roi Jacques witiya anch dijin dia Nzamb diawiy kand didia mu Mansuk Masu.

6. Mulong wak tujikitishin mulong wa Traduction du monde nouveau?

6 Pabudika kapamp ka kusambish Bible du roi Jacques, mazu ma Inglish masadinau mamekena anch mading ma katat. Pakwez mu kusut kwa mivu, mazu mamwing masambisha kwikal makur ni nlel chikasiken kumatesh. Yom yiney yasadika kand mwamu mu ma Bibil ma pakur makarumunau mu mazu makwau. Chawiy tujikitishin nakash mulong wa kwikal nich Les Saintes Écritures. Traduction du monde nouveau, mulong usadidin mazu malondinau katat. Bibil winou udiaku wa kabuj ap wa chikunku mu mazu 150 ni kusut. Chinech chimeken anch antu avud mu mangand akutwish katat kutang Bibil winou ukarumwinau mu mazu mau ma chivadik. Mazu movikena ni masadidinau katat yisadin anch chiswakala uruu wa Nzamb kushik ku michim yetu. (Kuseng 119:97) Pakwez chom chisadina kamu anch Traduction du monde nouveau ikala kamu wa pakampwil chidi mulong utekin dijin dia Nzamb pa jindond pidiading pakur.

DIZU DILONDINAU ANTU AVUD

7, 8. (a) Mulong wak in Yuda avud a mu mivu yitot yisatu ya kusambish K.C.C. katwishap kutesh Mifund ya Hebereu? (b) Bibil wa Grek wa Septante chom ik?

7 Kuya kurutu kwa yom ya politik mu mangand kwaswimpa kand mutapu walondangau antu yisu yimwing. Pakwez Yehova wikala nich kashinsh anch Bibil ikalaku mu mazu mafanyinau antu kutesh nawamp. Chilakej, mikand 39 ya kusambish ya Bibil ayifunda kudi in Yuda, ap anch in Isarel. Awiy antu a kusambish “inkishau mazu kudi Nzamb mulong wa kumalam.” (Rom 3:1, 2) Awiy afunda chakusambish mikand yiney mu dizu dia Hebereu ap dia Aram. Pakwez mu mivu yitot yisatu ya kusambish K.C.C., in Yuda avud kateshap kand dizu dia Hebereu. Mulong wak? Chisu chakwatay Alexandre le Grand ndond jivud mu mangand, want wa in Grek wapalangana. Mudi chibudikin, dizu dia Grek dikala dizu dialondangau nakash mu ma teritwar mayikelau kudi in Grèce, ni antu avud asambisha kulond Grek pa ndond pa kulond mazu mau ma chivadik. (Daniel 8:5-7, 20, 21) Kuswimp kwinoku kwikal kand ni usu padi in Yuda avud, chawiy niyau chayikasikena kutesh Bibil mu dizu dia Hebereu. Mutapu ik wafanyina kupwa mulong winou?

8 Piswimp mivu 250 kurutu kwa Yesu kuvadik, mikand yitan ya kusambish ya mu Bibil ayikarumuna mu dizu dia Grek. Kupwa, akarumuna chad Mifund ya Hebereu yashalaku. Bibil winou wakarumunau amutazuka anch Bibil wa Grek wa Septante. Ndiy Bibil wijikena wakarumanau mwawonsu mu Mifund ya Hebereu.

9. (a) Bibil wa Septante ni ma Bibil makwau makarumunau mayikwasha antu mutapu ik kutang Dizu dia Nzamb? (b) Chikunku ik ukatining nakash mu Mifund ya Hebereu?

9 Bibil wa Septante wasala anch chiyiswapela in Yuda alondang dizu dia Grek kutang Mifund ya Hebereu mu dizu dia Grek. Ov, ukutwish kutongin musangar wovau pateshau ni patangau Dizu dia Nzamb mu dizu diau diateshau nawamp? Kupwa chad, yikunku yikwau ayikarumuna mu mazu makwau malondangau antu mudi Syriaque, Gothique, ni Latin. Mulong antu avud atwisha kutang ni kutesh nawamp Dizu dia Nzamb,  chawiy adikata. Ni ading ni maverse mau mading makatinau, mudi mutukatina kand etu nlel. (Tang Kuseng 119:162-165.) Chakin kamu, Dizu dia Nzamb diadandamena kwikalaku chikalap nchik kuswimp kwa yom ya politik ni kwa mazu malondangau nakash.

RUMPOMPAT MULONG WA KUMUKARUMUN BIBIL

10. Mu chirung cha John Wycliffe, mulong wak antu avud katwishap kutang Bibil?

10 Mu kusut kwa mivu, antakel avud akweta usu asala usu wa kuyikangesh antu kutang Bibil. Pakwez antu amwovang Nzamb wom, awiy adandamena kusal usu chakwel Bibil ikala kudi antu awonsu. Umwing wa pakach pa antu inay wading John Wycliffe, muntu winou washakama mu Angleterre mu mivu ya 1400. Ndiy wamana anch muntu ni muntu ufanyidin kutang Bibil. Padingay mwom, antu avud mu Angleterre ading kand kal ateshangap uruu wa Bibil mu mazu mau ma chivadik. Ma Bibil mading ni usey nakash, ni chading chitin kufund kopi umwing wa Bibil ku makas. Chawiy, antu akemp awiy kwau adinga ni Bibil. Chikwau kand, antu avud mu chisu chinicha katwishangap kutang. Antu ayangang mu egliz ateshang Bibil amutang lel nich dizu dia piur mu Latin, pakwez dined diading kwau dizu dikur ni antu akad kwilej kaditeshangap kwau. Mutapu ik wasalay Yehova chakwel antu ikala ni Bibil mu dizu diau dia chivadik?—Jinswir 2:1-5.

John Wycliffe ni antu akwau akata anch muntu ni muntu ikala ni Dizu dia Nzamb. Ov, niyey mwawiy ukatina? (Tal paragraf wa 11)

11. Bibil wa Wycliffe wading ni usu ik?

11 Mu muvu wa 1382, John Wycliffe ni antu akwau akarumuna Bibil mu dizu dia Inglish. Bibil wa Wycliffe wijikana nakash pakach pa chisak cha antu chitazukinau anch Lollards (in kwilejend). Antu inay akata Bibil. Endangana ra pansh mu ul ni ul mwi ngand yawonsu ya Angleterre. In kwilej inay ayitangina antu Bibil ni anyinkishola antu yikunku ya Bibil yafundau ku makas. Mudimu wau wasala anch Bibil ijikana kamu nakash.

12. Mutapu ik wovau antakel a relijon piur pa Wycliffe ni mudimu wend?

12 Antakel a chirelijon amukisa Wycliffe, Bibil wend nau in kwilejend. Ayizengola in kwilejend ni ajiyisha ma Bibil mawonsu matanangau. Ap anch Wycliffe wading wafil kal kwend, amakurump a chirelijon  amwela anch udi mbwambol ap mukankuny wa Egliz. Apunda mafup mend, amwosha ni adjibula mishit mu kawit utazukinau anch Swift. Pakwez antu avud akata kutang ni kutesh Dizu dia Nzamb ni Egliz katwishap kand kuyikangesh. Mu yitot ya mivu yalondulaku, antu avud mwi Mputu ni mu jingand jikwau ja pa mangand mawonsu asambisha kukarumun ni kuchap Bibil mu mazu kushalijan mafanyinau kutesh kudi antu avud.

‘NDIY UKATA KUKUFUNDISH CHAKWEL EY UTANINAMU’

13. Chom ik tufanyidina kwikal nich kashinsh? Ni mutapu ik chikata kukasikesh ritiy retu?

13 Bibil amupepila kudi Nzamb. Pakwez chinech chirumburikinap anch mudimu wasalau mulong wa kukarumun Bibil wa Septante, Bibil wa Wycliffe ni Bible du roi Jacques, ap Bibil mukwau, aupepila kudi Nzamb. Chikwau kand, anch twashinshikin ma Bibil minam makarumunau, chimeken kamu patok anch Dizu dia Nzamb didandamendin kwikalaku, mudi mwashilayimu Yehova. Chinech chikasikeshin ritiy retu anch chom chin chawonsu chikushilayimu Yehova, chikuwanyin.—Joshua 23:14.

14. Mutapu ik yom twilejina piur pa Bibil yisadin anch rukat retu mulong wa Nzamb rikasikan?

14 Pitwilejina mutapu walamay Yehova Dizu diend, ritiy retu mudiay ndiy ni rukat retu yikat kukasikan. * (Tal mazu ma kwinshin.) Mulong wak Yehova watwinka Bibil pa ndond ya kusambish ni kupwa washilamu anch ukumulam? Mulong utukatin ni ukatin kutufundish chakwel ayinetu tutaninamu. (Tang Isay 48:17, 18.) Chom chinech chitubachikin kumukat ni kumuziyin.—1 Yohan 4:19; 5:3.

15. Yom ik tukwileja mu mutu wa mulong ulondwilaku ou?

15 Tukatin kamu nakash Dizu dia Nzamb, chawiy mutapu ik tukutwisha kutaninamu nakash mu kutang kwetu kwa Bibil? Mutapu ik tukutwisha kuyikwash antu tutanina mu mudimu wa kulejan kusanger Bibil? Mutapu ik in kufundish mu chikumangen mukutwishau kwikal nich kashinsh anch yom yawonsu yifundishinau yimedin pa Dizu dia Nzamb? Tukwisambin yipul yiney mu mutu wa mulong ulondwilaku ou.

^ par. 4 Tal mutu wa mulong ulondina anch “Faut-il apprendre l’hébreu et le grec?” mu Chinong cha Kalam cha 1 Ngond wa 11, 2009, mu Français.

^ par. 5 Mazu mavud mijikena ma Inglish madiokil mu Bible du roi Jacques, mudi “kuwish mpal yend pansh,” “chikit cha mazeu mam,” ni “kwazuril muchim wey.”—Kubudik 22:31; Job 19:20; Kuseng 62:8.

^ par. 14 Tal mushet ulondina anch “ Ez Wimenap Amwiney!

|