Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 9 , 2017

‘Dizu dia Nzamb . . . Dikwet Usu’

‘Dizu dia Nzamb . . . Dikwet Usu’

“Dizu dia Nzamb didi diom, ni [dikwet] usu.”—HEBEREU 4:12, TMK.

MIMINY: 37, 48

1. Yom ik yikwinkina kashinsh anch Dizu dia Nzamb dikwet usu? (Tal chipich cha kwisambishin.)

ANTU a Yehova akwet kashinsh anch uruu wend mulong wa antu ni Dizu diend, “didi diom, ni [dikwet] usu.” (Hebereu 4:12) Twamen kal usu wa Bibil mu mwom wetu ni mu mwom wa antu akwau. Kurutu kwa kwikal Atuman, amwing ading ij, asuk a yom yilewishena ni in kusal masandj. Akwau ading ni katumb ni nfalang nakash, pakwez adandamena kwiyov anch aburedin chom chimwing mu mwom wau. (Mulej 2:3-11) Cha musangar, avud ading akad kwikal ni ruchingej katat akwet chad ruchingej ni wintakel. Mu Chinong cha Kalam, tutangining ni kusanger jinsangu jinej mu mitu ya milong yilondina anch “Bibil Ukarumwin Mwom ya Antu.” Ap kupwa kwa kwikal in Kristu, antu amwing afanyidin kudandamen kukasikesh urund wau ni Yehova nich ukwash wa Bibil.

2. Mutapu ik Dizu dia Nzamb dikala nich usu mu mivu chitot ya kusambish?

2 Chidiap cha kushimok anch antu avud aswimpin nakash chisu chilejinau uyakin. Akadivar nau anambaz netu a mu mivu  chitot ya kusambish ading ni ruchingej ra kuya mwiur aswimpa mu mutapu winou. (Tang 1 Korint 6:9-11.) Palonday Paul piur pa antu akulika kuswan Want wa Nzamb, wawejinaku anch: “Antu amwing a pakach pen ading mwamu.” Dizu dia Nzamb ni spiritu wend utumbila wayikwasha antu inay kuswimp. Pakwez ap kupwa kwa kwikal in Kristu, amwing asala yitil yijim yayipisha urund wau ni Yehova. Chilakej, Bibil ujimbwil mukadivar uzizidilau many wopatau mu chikumangen. Kupwa, waswimpa ni amuchirisha kand mu chikumangen cha win Kristu. (1 Korint 5:1-5; 2 Korint 2:5-8) Chikasikeshin anch akadivar nau anambaz netu asala usu wa kuswimp kamu nakash mulong wa usu wa Dizu dia Nzamb.

3. Yom ik tukwisambina mu mutu wa mulong winou?

3 Dizu dia Nzamb dikwet usu nakash. Mulong Yehova ndiy watwinkad, tufanyidin kwikal nich kashinsh anch tudisadidin nawamp. (2 Timote 2: 15) Mutu wa mulong winou ukwisambin yom tukutwisha kusal mulong wa kusadin usu wa Bibil (1) mu mwom wetu ayinetu, (2) mu mudimu wetu wa kulejan, ni (3) chisu tufundishina ku chimet. Yom twilejina mwinomu yikutukwash kumekesh rukat ni kujikitish kudi Tatukwetu wa mwiur, utufundishina mulong wa kutaninamu kwetu.—Isay 48:17.

MU MWOM WETU AYINETU

4. (a) Yom ik tukutwisha kusal mulong Dizu dia Nzamb dikala nich usu padi etu? (b) Mutapu ik ukwitekina chisu mulong wa kutang Bibil wey?

4 Chakwel twitiy anch Dizu dia Nzamb dikala nich usu padi etu, tufanyidin kuditang chisu chawonsu. Tufanyidin kusal usu wa kuditang dichuku ni dichuku. (Joshua 1:8) Avud pakach petu akwet midimu nakash ya kusal, pakwez tufanyidinap kulik anch chom chin chawonsu ap yisend tukweta yitukangesha kutang Bibil. (Tang Efes 5:15, 16.) Tukutwish kwitekin chisu cha kumutang pamanch, yisu yimwing muten ap urel. Twitiyin yom yafunday nfund a kuseng anch: “A, mudi nikatila yijil yey! Nikat kuyitong mu yisu yawonsu.”—Kuseng 119:97.

Tufanyidinap kulik anch chom chin chawonsu, ap yisend yetu, yitukangesha kutang Bibil dichuku diawonsu

5, 6. (a) Mulong wak tukwet kuswir kwa kutongijok pa yom tutangina? (b) Mutapu ik kutongijokin pa yom tutangina kukutwisha kwikal ni chibudikin chiwamp? (c) Kutang Bibil ni kutongijokin pa yom utangina kukukukwash ey mutapu ik?

5 Pakwez, chifanyidinap kwau kwimen pa kutang Bibil. Tufanyidin kamu kutongijokin pa yom tutangina nakash ni kushinshikin pa yom twatanga kal. (Kuseng 1:1-3) Chawiy tukutwish chad kusadin manangu ma Bibil mu mwom wetu. Chawiy ap anch twatang Bibil wabudishinau kal ap udia mu mashin, tufanyidin kwitiy anch Dizu dia Nzamb dituswimpa ni ditubachika kusal chom kanang.

6 Mutapu ik kutongijokin pa yom tutangina kukutwisha kwikal ni chibudikin chiwamp? Chisu tutangina Bibil, tufanyidin kupimaku ni kwiyipul anch: ‘Yom yiney yinfundishin chom ik piur pa Yehova? Mutapu ik nikutwisha kusadin yom nitangina mu mwom wam? Kuswimp ik niswirikedina kusal?’  Anch twatongijokin pa Dizu dia Nzamb ni kulembil piur pa yom tutangina, tukukat kuyisadin. Mwamu tukutwish chad kuman usu wa Bibil mu mwom wetu.—2 Korint 10:4, 5.

MU MUDIMU WA KULEJAN

7. Mutapu ik tukutwisha kusadin nawamp usu wa Dizu dia Nzamb mu mudimu wetu wa kulejan?

7 Chidi cha usey anch tusadin Dizu dia Nzamb chisu chawonsu patulejena ni patufundishina. Mukadivar umwing walonda anch: “Anch ulejen ku chikumbu ni chikumbu pamwing ni Yehova amwinend, ukulond kwey ey amwiney anch ukulik anch niyend alonda?” Anch twamutangin muntu Bibil, twitiyijin anch Yehova alonda kudi ndiy. Anch twatond verse nawamp, ukwikal nich usu nakash kusutamu yom yawonsu tukutwisha kulond. (1 Tesalonik 2:13) Anch udi mu mudimu wa kulejan, ov, usadining usu wa kutang mu Bibil chisu chawonsu anch chitwishikin kusal mwamu?

Pitumutangidina muntu kanang mu Bibil, twitiyin anch Yehova ambamba nend

8. Mulong wak tuswirikedin kusal yivud kusutamu kwau kutang maverse chisu tulejena?

8 Pakwez, tukwimenap kwetu ching pa kutang verse wa Bibil kudi antu tulejina. Antu avud kijingap kwau kurumbuk kwa Bibil. Chinech chading kand chakin mu mivu chitot ya kusambish, ni chidi kand mwamu nlel. (Rom 10:2) Tufanyidinap kutong anch mwin chikumbu uteshin kurumburik kwa verse twamutangina kal. Tukutwish kumukwash mu kuchirikin mazu ni yitongijok ya pa dishin ya verse ni kumurumburil chirumburikina verse winou. Anch twasal mwamu, Dizu dia Nzamb dikutwish chad kushik mu manangu ni mu michim ya antu.—Tang Luka 24:32.

9. Mutapu ik tukutwisha kuyikwash antu alimisha Bibil kusutin yom tukulonda kurutu kwa kutang verse? Let chilakej.

9 Yom tukulonda kurutu kwa kutang verse yikutwish kand kumukwash mwin chikumbu kulimish Bibil. Chilakej, tukutwish kulond anch: “El tutala yilondinay Sakatang wetu pa mulong winou.” Ap anch tulondin ni muntu wakad kwijik yitiyij ya win Kristu, tukutwish kulond anch: “El tutala yilondina Mifund Yitumbila.” Anch twatanijan ni muntu wakad kubanginaku milong ya relijon, tukutwish kumwipul anch: “Kand kal kwey uteshangap yom yiney yalondau pakur?” Anch twavurik anch muntu ni muntu ukwet yinshakur ni yitiyij yend, tukusal yawonsu tukutwisha kusal mulong wa kusambish mambamb metu mu mutapu usangareshina.—1 Korint 9:22, 23.

10. (a) Yom ik yamushikena mukadivar umwing? (b) Niyey wamenap kal usu wa Dizu dia Nzamb mu mudimu wey wa kulejan?

10 Antu avud amen kal anch kusadin Dizu dia Nzamb kukweting usu padiau antu alejiningau. Chilakej, mukadivar umwing wayangang kumutal ikundj umwing ipal watangang mikand yetu mu mivu yivud. Dichuku dimwing, pa ndond pa kumwinkish Chinong cha Kalam cha katat, ndiy wamutangina kamu verse. Watanga 2 Korint 1:3, 4, ulondina anch: “Tatuku wa riy ni Nzamb wa kwongoj kwawonsu . . . ukat kutwongoj mu  mar metu mawonsu.” Mazu minam mamushika ikundj winou ipal ni chawiy wamuleja mukadivar kutangiril kand verse winou. Kupwa ikundj walonda anch ndiy ni mukajend ading akwet kuswir kwa kuyongoj. Mulong wa verse winou, wakata kamu kwijik yivud piur pa Bibil. Komb kusadin Dizu dia Nzamb mu mudimu wetu wa kulejan kukwet kamu usu nakash!—Midimu 19:20.

CHISU TUFUNDISHINA KU CHIMET

11. Chisend ik chikwetau akadivar akata kufundish ku chimet?

11 Tukatining kukumangan ku yikumangan yetu ni ku yitentam. Diyingishin dia usey tukweta dia kukumangan chidi mulong wa kumwifukwil Yehova. Tukat kutaninamu kand mu yom tukata kwilej. Mulong wa diyingishin dined, akadivar akata kufundish ku chimet akwet dilau dijim ni chisend chijim. (Jakobu 3:1) Afanyidin kwikal nich kashinsh anch mafundish mau mimedin pa Dizu dia Nzamb. Anch ukwet chisend chinech, mutapu ik ukutwisha kusadin usu wa Bibil mulong wa kuyishik antu akuteshina ku michim?

12. Mutapu ik ukwikalay nich muntu usadina diskur kashinsh anch diskur diend dimedin pa Bibil?

12 Mifund yifanyidin kwikal ya usey nakash mu diskur din diawonsu. (Yohan 7:16) Chawiy ufanyidin kubabal nakash piur pa mutapu wey usadina diskur ni yom wamana ap yilakej ukusadina mulong kangal yimena pa manangu mey, pakwez yimena pa Bibil.  Chikwau kand, ufanyidin kuvurik anch kutang mu Bibil chidiap chom chimwing ni kufundish yom yidia mu Bibil. Pakwez anch watang maverse mavud, antu kakutwishap kwau kumavurik. Chawiy tond nawamp maverse ufanyidina kusadin. Itekina chisu cha kumatang, kumarumburil, kulet yilakej ni kumasadin nawamp. (Nehemiy 8:8) Anch diskur diey dikwet plan, ikal nich kashinsh anch wilejin plan winou nawamp ni maverse masadidinau. Sal usu wa kwijik plan ni mutapu ukwatijadina maverse. Kupwa sadin maverse mamwing mulong wa kufundish yom ya usey yidia mu plan. (Ukutwish kutan yiyul yiwamp anch wasadin dilejan dia 21 kushik ku 23 dia buku Tirez profit de l’École du ministère théocratique.) Ni chidia cha usey nakash, mwita Yehova ukwash chakwel ulejana yitongijok yiney yiwamp yidia mu Bibil.—Tang Esidera 7:10; Jinswir 3:13, 14.

13. (a) Mutapu ik wovay nambaz umwing pateshay verse umwing watangau ku yikumangan? (b) Mutapu ik wiyoviling pakatau kusadin Bibil ku yikumangan yetu?

13 Padingay nambaz umwing uchid kal mwanikanch mu Australie, yom yivud yiyimp yamushikena, ni ap anch kupwa wamwijika Yehova, wading udandamedin kutong anch Yehova kamukatinap. Ku yikumangan, nambaz winou watesha verse wamushika nakash ku muchim. Watongijokina piur pa verse winou ni wakimbijola, ni yamubachika kutang kand maverse makwau mu Bibil. Wikala chad nich kashinsh  anch Yehova umukatin. * (Tal mazu ma kwinshin.) Ov, niyey kand kal uteshangap verse ku chikumangan ap ku chitentam wakushik ku muchim mu mutapu winou?—Nehemiy 8:12.

14. Mutapu ik tukutwisha kumekesh anch tukwatin nich usey ni tukatin Dizu dia Yehova?

14 Ov, tukumujikitishap Yehova mulong wa Dizu diend diatufundinay, Bibil? Ndiy washilamu anch dikudandamen kwikalaku, ni udandamedin kulam kushilamu kwinoku. (1 Pita 1:24, 25) Chawiy tufanyidin kwikal nich kashinsh anch tukat kutang Bibil dichuku diawonsu, tumusadidin mu mwom wetu ni tumusadidin mulong wa kuyikwash antu akwau. Anch twasal mwamu, tumekeshin anch tukatin ni tusangaredin nakash dipit dined dia usey nakash, ni cha usey nakash, Mwin kumufund, Yehova Nzamb.

^ par. 13 Tal mushet ulondina anch “ Kuswimp Kwasadika.”