Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 8 , 2017

Ov, Ukwet Rusot ra Kuchingel Nich Kushimpish Muchim?

Ov, Ukwet Rusot ra Kuchingel Nich Kushimpish Muchim?

Niyen kand, shimpishany michim yen.JAKOBU 5:8.

MIMINY: 35, 7

1, 2. (a) Yom ik yikutwisha kutushikij kwiyipul anch: “Ov, kushik chisu ik?” (b) Nlel unou, mutapu ik ukutwisha kutukasikesh yilakej ya atushalapol a pasak?

“OV, KUSHIK chisu ik?” Chinech chawiy chipul chipulau aprofet ashinshamena Isay ni Abakuk. (Isay 6:11; Abakuk 1:2) Chisu chafunday Mwant David Kuseng wa 13, wipula chipul chinech tupamp tunying. (Kuseng 13:1, 2) Ni chisu chamunyingumukau Yesu Kristu kudi antu akad ritiy, wayipula anch: ‘Ov, kushik chisu ik?’ (Mateu 17:17) Niyetu tukutwish kwipul chipul chinech nlel.

2 Yom ik yikutwisha kutushikij kwiyipul anch: “Ov, kushik chisu ik?” Pamwing ap chom chiyimp chatushikedin. Tukutwish kwikal ayej ap kunanap. Ap pamwing ap tukwet yakamish mulong tudi mu ‘yisu ya mar yikasikena nakash.’ (2 Timote 3:1) Ap kand yisalijok yiyimp ya antu atunyingumukina yawiy yisadina anch tuziya nakash. Chikalap nchik diyingishin  dia mutapu ik, chikasikeshin kwijik anch Yehova kayifishap nich atushalapol end a pasak amwipula chipul chinech.

3. Yom ik yikutwisha kutukwash chisu tudia mu yisu yikash?

3 Yom ik yikutwisha kutukwash chisu tudia mu yisu yikash yikasikena kujijamen? Jakobu, mwanchend a Yesu amupepila kutulej anch: “Anamakwam in Kristu, shimpishany michim yen djat ni pakuchirikinay Nsalejetu Yesu.” (Jakobu 5:7) Chawiy etu awonsu tufanyidin kushimpish muchim. Pakwez kushimpish muchim chom ik ni mutapu ik tukutwisha kumekesh mwikadil winou uwamp?

KUSHIMPISH MUCHIM CHOM IK?

4, 5. (a) Kushimpish muchim chom ik, ni mutapu ik tukutwisha kwikal in kushimpish muchim? (b) Mutapu ik mwarumburilay Jakobu kushimpish muchim? (Tal chipich cha kwisambishin.)

4 Bibil ulondin anch kushimpish muchim kudiokiling ku spiritu utumbila wa Nzamb. Pakad ukwash wa Nzamb, chikasiken nakash kudi antu akad kuwanyin kwikal in kushimpish muchim chisu chidiau mu yisu yikash. Kushimpish muchim chidi chipan chidiokila kudiay Nzamb ni tumekeshin anch tumukatin Yehova ni antu akwau anch twamekesh mwikadil winou. Anch tushimpishinap muchim, rukat tukweta piur pa antu akwau rikuziy. (1 Korint 13:4; Galatia 5:22) Kushimpish muchim kwitin ik? Kwitin kujijamen yisu yikash ni kudandamen kwikal ni chitongijok chiwamp. (Kolosay 1:11; Jakobu 1:3, 4) Kushimpish muchim kutukwashin kand kushal ashinshamena kudi Yehova chikalap nchik milong tukweta. Kukutukwash kand kulik kufundakesh chisu tumena mar. Bibil ulondin anch tufanyidin kwikal ni rusot ra kwitiyij kuchingel. Dined diawiy dilejan dia usey twilejidina mu mukand wa Jakobu 5:7, 8. (Tang.)

5 Mulong wak tufanyidin kumuchingel Yehova chakwel asala yom? Mwin kwilej Jakobu wafanikesha mashakamin metu ni mwin kudim. Ap anch mwin kudim ukat kusal usu nakash mulong wa kukun mbut jend, kakutwishap kusop chisu ni mutapu ujipamina. Ufanyidin kuchingel nich kushimpish muchim mulong “divu dibudish yakwangul ya usey.” Chilik chimwing, kudi yom yivud yitwakad kutwish kusop chisu tuchingedina kuwanyin kwa kushilamu kwa Yehova. (Marko 13:32, 33; Midimu 1:7) Mudi mwin kudim, tufanyidin kuchingel nich kushimpish muchim.

6. Yom ik tukutwisha kwilej kusutil chilakej cha muprofet Mike?

6 Muprofet Mike wajijamena mashakamin makash, mudi kand etu nlel unou. Wading ushich mu chisu chayikelay Mwant Akaz. Akaz wading mwant muyimp nakash. Mudi chibudikin, kwadinga uyimp nakash mwi ngand. Yom yayipa nakash chawiy Bibil walonda anch antu ading “akat kusal yom yiyimp nich mushiku.” (Tang Mike 7:1-3.) Mike wading wij anch kafanyinap kuswimp yom yiney. Chawiy, yom ik yafanyinay kusal? Utulejin anch: “Pakwez am nimuchingedil [Yehova]. Nimuchingejin Nzamb wam ukez kantesh.” (Mike 7:7) Mudi Mike, niyetu tufanyidin kumekesh ‘mwikadil wa kuchingel.’

7. Mulong wak tufanyidin kusal yom yivud kusutamu ching kuchingel anch Yehova awanyisha kushilamu kwend?

7 Anch tukwet ritiy mudi ra Mike, tukwikal ni rusot mulong wa kumuchingel Yehova.  Mwikadil wetu udiap mudi wa muntu udia mu rukan uchingedina dichuku dikumujipau. Udi muntu ushindidilau kuchingel ni kachingedinap kamu dichuku dinidia. Yom yishalijadin nakash niyetu! Tukwet rusot ra kumuchingel Yehova mulong twij anch pa chisu chiwanyidina ukuwanyish kushilamu kwend pakutwinkay mwom wa chikupu! Chawiy tukat ‘kujijaman ni kushimpish muchim nich musangar.’ (Kolosay 1:11, 12) Chisu tuchingedina, tufanyidin kubabal nakash mulong kangal twinan anch Yehova kasadinap yom swa swa. Anch twasal mwamu, Yehova kakusangarap.—Kolosay 3:12.

YILAKEJ YIWAMP YA KUSHIMPISH MUCHIM

8. Yom ik twilejina kusutil amakundj nau amband ashinshamena a pakur?

8 Yom ik yikutukwasha kwikal ni rusot ra kuchingel nakash? Tukutwish kutong piur pa amakundj nau amband ashinshamena a pakur amuchingela Yehova mulong awanyisha kushilamu kwend. (Rom 15:4) Chisu tutongina piur pa yilakej yau, chidi chiwamp kuvurik mivu yinch yachingelau, mulong wak ading ni rusot ra kuchingel ni mutapu wayiyukishau kudi Yehova mulong wa kushimpish kwau kwa muchim.

Aburaham wachingela mivu yivud kurutu ijukurend Esau ni Jakobu avadika (Tal paragraf wa 9, 10) )

9, 10. Aburaham ni Sara amuchingela Yehova mu mivu yinch?

9 Shinshikin chilakej cha Aburaham ni Sara. Mulong amekesha ‘ritiy ni kushimpish muchim,’ aswana ‘kushilamu.’ Bibil utulejin anch ‘kupwa kwa Aburaham kushimpish muchim,’ Yehova washilamu anch ukumuyukish ni kumusal anch ikala tatuku wa muchid ujim. (Hebereu 6:12, 15)  Mulong wak Aburaham wading ukwet kuswir kwa kushimpish muchim? Mulong kwafanyina kusut chisu chilemp kurutu kwa uprofet winou kuwanyin. Nisan 14 muvu wa 1943 kurutu kwa Kristu, Aburaham ni Sara ni antu a chikumbu chend chawonsu awuka Wit wa Efrat ni andama mwi Ngand ya Kushilamu. Pakwez Aburaham wachingela mivu 25 kurutu kwa mwanend Isak kuvadik ni wachingela kand mivu 60 kurutu kwa ijukurend Esau ni Jakobu kuvadik.—Hebereu 11:9.

10 Chikunku ik cha Ngand ya Kushilamu chaswanay Aburaham? Bibil ulondin anch Yehova “kamwinkishap Aburaham pa chisu chinicha ngand yend amwinend, ap kusu kachibar kakemp, bwat. Pakwez Nzamb wamushilamu kupan ngand yiney kudi ndiy ni kudi a majuku mend makeza kwez. Pa chisu chamushilaum kudi Nzamb, pinipa Aburaham wading kand kal avala mwan.” (Midimu 7:5) Kwasuta mivu 430 kupwa kwa Aburaham kwauk Wit wa Efrat chakwel anend ikala chad muchid wafanyina kushakam mwi ngand yiniya.—Kubudik 12:40-42; Galatia 3:17.

11. Mulong wak Aburaham wachingela, ni yiyukish ik yikumanay mulong wa kushimpish kwend kwa muchim?

11 Aburaham wachingela mulong wading nich kashinsh anch Yehova ukuwanyish kushilamu kwend. Wading ni ritiy mudiay Yehova. (Tang Hebereu 11:8-12.) Aburaham wading ni musangar wa kuchingel ap anch kamanap kuwanyin kwa kushilamu kwawonsu kwa Nzamb kurutu kwa kufa. Pakwez tongin piur pa musangar wa Aburaham chisu chikumuvumbulau mu paradis panap pansh. Ukushimwok nakash pakutangay rusangu rend ni ra dijuku diend mu Bibil. * (Tal mazu ma kwinshin.) Tongin kand piur pa musangar ukwikalay nich pa kwijik chisend chijim chadingay nich mu kuwanyin kwa rusot ra Nzamb piur pa Mesia washilaumu! Tukutwish kwikal nich kashinsh anch Aburaham ukwiyov kamu anch yiyukish yiney yading yifanyidin kuyichingel.

12, 13. Mulong wak Josef waswirikena kushimpish muchim, ni chitongijok ik chiwamp chadingay nich?

12 Josef, mwijukuril wa Aburaham wading niyend mwin kushimpish muchim. Amumekeshina kuburen kutentam kukash nakash. Chakusambish, anamakwend amulandisha mu usuk padingay pamwing ap ni mivu 17. Chikwau kand, amudimbena makasu anch wakimba kusal masandj ku usu ni mband wa mwant wend ni amudjibula mu rukan. (Disambishil 39:11-20; Kuseng 105:17, 18) Ap anch Josef wading kashalapol ushinshamena wa Nzamb, wamekana mudi amupupin pa ndond pa kumuyukish. Pakwez kupwa kwa mivu 13, yom yawonsu yaswimpa. Josef amubudisha mu rukan ni wikala nyikel wa kaad ukweta usu nakash mu Idjibit.—Disambishil 41:14, 37-43; Midimu 7:9, 10.

Josef wading wij anch Yehova wading umen yom yawonsu ni anch chading cha usey nakash kuchingel yiyukish yend

13 Ov, kuburen kutentam kwinoku kwamovisha Josef ujim? Wiyova anch Yehova wamulik kal? Bwat. Josef wachingela nich kushimpish muchim. Chom ik chamukwasha? Rading ritiy rend mudiay Yehova. Wijika anch Yehova umen yom yawonsu. Tumen mwamu kusutil yom yayilejay anamakwend anch: “Kangal wakamany kwen, bwat! Ov, yam nidia pa ndond ya Nzamb?  En wasotanya kwinsalany nayimp, pakwez Nzamb wakarumuna kuyip kwikal kuwap chakwel antu avud ez apanda mudi ilel.” (Disambishil 50:19, 20) Josef wading wij anch chading chifanyidin kuchingel yiyukish ya Yehova.

14, 15. (a) Mulong wak kushimpish muchim kwa David kushimwokishen? (b) Yom ik yamukwasha David kuchingel nich kushimpish muchim?

14 Mwant David niyend wamana mar nakash mulong wa kuburen kutentam. Yehova wamuzizila David many mulong wa kwikal mwant wa Isarel padingay nsand. Pakwez David wafanyina kuchingel mivu 15 kurutu ikala mwant wa muchid wend. (2 Samwel 2:3, 4) Pa chisu chinicha kand, David wachinang ni wajingamang mulong wa Mwant Saul, wakimbang kumujip. * (Tal mazu ma kwinshin.) Mudi chibudikin, David kadingap kwend ni chikumbu ap chimwing. Washakamang mwi ngand ja wingendj ap mu mandam mwimpay. Kupwa, Saul amujipa kwi njit. Pakwez David wadandamena kand kuchingel mivu yikwau sambwad kurutu ikala kamu chad mwant wa muchid wawonsu wa Isarel.—2 Samwel 5:4, 5.

15 Mulong wak David wading ukwet rusot ra kuchingel nich kushimpish muchim? Utwakwil mu kuseng ndiy umwing mwafunday tupamp tunying anch: “Kushik djat ni ku muvu ik?” Ulondin anch: “Chawiy nikungamedina mu rukat rey ridumukina. Muchim wam ukusangar mulong wa dipandish diey. Nikumuwangil [Yehova], mulong ndiy wansadil kal kuwap.” (Kuseng 13:6) David wading wij anch Yehova umukatin ni wakata chisu chawonsu kumushinshamen. Watonga piur pa chisu chamukwashau kudi Yehova pakur ni wachingela chisu chikupwishau mar mend kudi Yehova. David wading wij anch chading chifanyidin kuchingel yiyukish ya Yehova.

Yehova kakatap kutwit anch tusala yom yakaday amwinend kukat kusal

16, 17. Mutapu ik Yehova ni Yesu mwashau chilakej chiwamp mu kuchingel?

16 Yehova kakatap kutwit anch tusala yom yakaday amwinend kukat kusal. Washa chilakej chijim nakash mulong wa kuchingel. (Tang 2 Pita 3:9.) Chilakej, tunan twa mivu twasutina kal mu chir cha Eden, Satan wamufunda Yehova anch udi nyikel muyimp. Yehova ukat ‘kuchingel nich kushimpish muchim’ chisu chikutumbishau kamu dijin diend. Antu ‘amuchingedina kamu ndiy’ akwikal ni yiyukish yishimwokishena nakash.—Isay 30:18.

17 Yesu niyend wading mwin kuchingel. Chisu chadingay panap pansh, wading ushinshamena djat ni ku rufu. Mu muvu wa 33, wamekesha usey wa chipan chend kudi Yehova mwiur. Pakwez wachingela djat ni mu muvu wa 1914 mulong asambisha lel kuyikel mudi Mwant. (Midimu 2:33-35; Hebereu 10:12, 13) Ap mwamu, Yesu udandamedin kuchingel djat ni kwisudiel kwa Mivu Kanan  ya Winyikel wend kurutu ashesha akankuny end awonsu. (1 Korint 15:25) Chinech chidi chisu chilemp nakash cha kuchingel. Mwaning, chidi cha usey nakash kuchingel yiyukish yiney.

YOM IK YIKUTUKWASHA?

18, 19. Yom ik yikutukwasha chakwel tuchingela nich kushimpish muchim?

18 Chimeken patok anch Yehova ukatin anch twikal in kushimpish michim, akweta rusot ra kuchingel. Yom yikutukwasha kusal mwamu? Tufanyidin kumulembil Nzamb mulong wa spiritu wend utumbila. Vurik anch, kushimpish muchim kukat kudiokal ku spiritu utumbila wa Nzamb. (Efes 3:16; 6:18; 1 Tesalonik 5:17-19) Chawiy mwita Yehova mulong akukwasha kujijaman nich kushimpish muchim!

19 Vurik kand yom yamukwasha Aburaham, Josef nend David kuchingel nich kushimpish muchim mulong wa kuwanyin kwa kushilamu kwa Yehova. Rading ritiy rau ni ruchingej rau mudiay Yehova. Kitonginap kwau ching piur pa ayinau ni pa yom yading yikatinau. Anch twatong piur pa yom mutapu yenda nawamp kudi awiy, niyetu tukwikal akasikeshinau mulong wa kumekesh mwikadil wa kuchingel.

20. Yom ik tufanyidina kusal?

20 Chawiy, ap anch turishin ni mar, tukusal usu wa kumekesh ‘mwikadil wa kuchingel.’ Yisu yimwing tukutwish kwiyipul anch: “Ov, kushik ni chisu ik, A Yehova?” (Isay 6:11) Pakwez nich ukwash wa spiritu utumbila wa Nzamb, tukutwish kumwimburij muprofet Jeremiy ni kulond anch: ‘Yehova udi ku mutambu wam,’ ni ‘Chawiy nikudandamen kamu nikumekesh mwikadil wa kumuchingel ndiy.’—Madil ma Jeremiy 3:21, 24.

^ par. 11 Piswimp mashapitre 15 ma mukand wa Disambishil misambidin mwom wa Aburaham. Chikwau kand, antu afunda Mifund ya Grek ya win Kristu alonda piur pa Abraham tupamp 70 ni kusut.

^ par. 14 Yehova wamulika Saul kupwa kwa kuyikel mu mivu yaad kwau. Chawiy, Saul wadandamena kand kuyikel mivu 38 ni kusut, kushik ni pafay.—1 Samwel 13:1; Midimu 13:21.