Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 8 , 2017

Yipul ya in Kutang

Yipul ya in Kutang

Mulong wak rusangu ra Mateu piur pa mwom wa kwisambishin wa Yesu rishalijadin ni rusangu ra Luka?

Rusangu ra Mateu piur pa kuvadik kwa Yesu ni mwom wend wa kwisambishin rishalijadin ni rusangu ra Luka mulong mwin kufund mwawonsu washinshikina pa yitongijok ni yom yamushikena muntu ni muntu.

Rusangu ra Mateu risambidin nakash yom yamushikena Josef. Rilejen mutapu wasalay pijikay anch Mariy ukwet madikaj, mu chilat chamurumburilau kudi mwangel yom yiney ni mutapu walondulay yom yamulejau kusal kudi mwangel. (Mateu 1:19-25) Rirumburil kand mutapu wamulejau Josef kudi mwangel mulong wa kuchinin mu Idjibit ni dijuku diend ni mutapu waziyinay. Mateu utulejin kand anch Josef amuleja mu chilat chikwau kudi mwangel anch achirika mwi ngand ya Isarel ni anch wachirika ni wakwata mupak wa kushakam ni dijuku diend mu Nazaret. (Mateu 2:13, 14, 19-23) Mu mashapitre maad ma kusambish ma Evanjil wend, Mateu wajimbula dijin dia Josef tupamp chinan, pakwez dia Mariy tupamp tunying.

Pakwez rusangu ra Luka ralonda nakash piur pa Mariy. Rilejen mutapu wezau kumutal Mariy kudi mwangel Gaburiel, mutapu wayay kumutal mwanamakwend Elizabet ni mazu mend ma kumutumbish nich Yehova. (Luka 1:26-56) Rirumburil kand yom yamulejau Mariy kudi Simeyon piur pa mar makumushikena Yesu machuku ma kurutu. Kupwa Luka ulejen kand chisu chayay Yesu mu tempel ni dijuku diend padingay ni mivu 12. Mu rusangu rend, Luka wamujimbula nakash mazu ma Mariy kusutamu ma Josef, ni utulejin kand mutapu wiyovangay Mariy piur pa yom yiney. (Luka 2:19, 34, 35, 48, 51) Mu mashapitre maad ma kusambish ma Evanjil wend, Luka wafunda dijin dia Mariy tupamp 12, pakwez dia Josef tupamp 3. Chawiy Mateu utulejin nakash yom yatongay ni yasalay Josef. Pakwez Luka washinshikina pa yom yatongay ni yamushikena Mariy.

Majuku mashikijina kudi Yesu amafundin kand mu mutapu ushalijadina mu ma Evanjil minam maad. Mateu ujimbwil majuku mashikijina ku dijuku dia Josef ni anch Yesu wading mwan wa kulil kudi Josef, wading ni mbil ya kuyikel pa want wa David. Mulong wak? Mulong Josef wading mwan wa mu muchid wa David kusutin mwanend Salomon. (Mateu 1:6, 16) Pakwez Luka wajimbula majuku mashikijina ku dijuku dia Mariy ni walejana anch Yesu wading ni mbil ya chivadik mulong wa want wa David ‘kulondwish ku mujimbu.’ (Rom 1:3) Mulong wak? Mulong Mariy wading mwan wa mu dijuku dia David kusutin mwanend Natan. (Luka 3:31) Chad mulong wak Luka kalondinap anch Mariy wading mwan mband wa Heli? Mulong yom yafundau yijikena yading ching yikwet majim ma amakundj a majuku. Chawiy pafunday Luka piur pa Josef ni kulejan anch udi mwan wa Heli, antu ijika anch chinech chirumburikin anch Josef wading tatuwenend a Heli.—Luka 3:23.

List ulejena majuku mashikijina kudi Yesu udia mu Evanjil wa Mateu ni wa Luka umekeshin anch Yesu wading kamu Mesia washilaumu kudi Nzamb. Uman umekeshina anch Yesu wading mwan wa mu dijuku dia Mwant David wading wijiken nawamp, chawiy Afaris nau Asadus katwishap kutadik. Rusangu ra Mateu ni ra Luka piur pa majuku ma Yesu rikasikeshin ritiy retu ni ritwinkishin kashinsh anch kushilamu kukwau kwa Nzamb kukuwanyin kamu.