Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 8 , 2017

Mutapu Tukata Kudjol ni Kudjibul Wuntu Ukur

Mutapu Tukata Kudjol ni Kudjibul Wuntu Ukur

Djolany wuntu ukur ni yaku yau.’ KOLOSAY 3:9.

MIMINY: 52, 54

1, 2. Yom ik yimeningau antu kudi Atuman a Yehova?

ANTU avud amening kamu anch Atuman a Yehova adi a pakampwil. Chilakej, mwin kufund umwing Anton Gill wabaza mikadil ya Atuman a Yehova mu Allemagne Nazi. Wafunda anch: “Atuman a Yehova ayikisa kudi in Nazi. . . . Mu muvu wa 1939 kwadinga Atuman 6 000 mu [kompony wa mar].” Wawejinaku anch ap anch Atuman amana mar nakash, ading ayij anch adi antu a kuchingejin, itudishina ap anch ayizengodin, amushinshamedina Nzamb wau ni adia mu uumwing.

2 Mivu yasutina ey, antu a mu Afrique du Sud amen niyau yom yimwing ya pakampwil kudi Atuman a Yehova. Chisu chimwing, Atuman a ulomb wa chikit kushalijan mwi ngand yiniya kayitiyijap kukumangan pamwing. Pakwez, Diarubing 18 Ngond wa 12, 2011, Atuman 78 000 ni kusut a ulomb wa chikit kushalijan a mu Afrique du Sud ni a mu jingand ja piswimp akumangana pamwing mulong wa program wa pakampwil mu  chiwandj chijim cha ndundu mu Johannesburg. Mwin kulam umwing wa chiwandj chinech walonda anch: “Kand kal nimanangap chisak chijim cha antu chikweta yisal yiwamp mudi chinech mu chiwandj chinech. Awonsu ading adjit nawamp. Ni antu inay arijeka chiwandj nawamp. Pakwez pa yawonsu yiney, ukwetany ulombu wa chikit kushalijan.”

3. Yom ik yisadina anch uumwing wa ukadivar wetu wikala wa pakampwil?

3 Chawiy ap antu akad kwikal Atuman akutwish kuman patok anch uumwing wa ukadivar wa pa mangand mawonsu udi wa pakampwil. (1 Pita 5:9.) Mulong wak tushalijadin nau antu adia mu yitenchik yikwau? Mulong ku ukwash wa Bibil ni wa spiritu utumbila, tusadin usu nakash wa kuswimp ayinetu yom yakad kumusangaresh Yehova. ‘Tudjodil wuntu ukur,’ ni tudjadil chad ‘wuntu usu.’—Kolosay 3:9, 10.

Chiswapel kuswimp nakash mu mwom wetu

4. Yom ik tukwisambina mu mutu wa mulong winou? Ni mulong wak?

4 Kupwa kwa kudjol wuntu ukur, tufanyidin kuudjibul. Mu mutu wa mulong winou, tukwilej chakusambish mutapu wa kudjol wuntu ukur ni mulong wak chidi cha usey. Tukuman anch chiswapel kudi muntu kuswimp nakash mu mwom wend chikalap nchik yom yiyimp yasalay. Kupwa tukwisambin kand mutapu ukutwishau antu asadina kal mivu yivud mu uyakin niyawiy kudjol wuntu ukur. Mulong wak tukwet kuswir kwa kwisambin yom yiney? Cha ushon, chimeken anch antu amwing asambisha kumusadin Yehova kadandamedinap kand kubabal. Asambisha kal kutong ni kusal yom mudi yasalangau pakur kurutu kwa kumwijik Yehova. Etu awonsu tufanyidin kuvurik kubabesh kulondina anch: “Chawiy chifanyidin muntu mwawonsu utongila anch: Niminy dang, ababal, chamwamu ukuwa.”—1 Korint 10:12.

DJIBUL MAKU MAWONSU MA MASANDJ

5. (a) Let chilakej chimekeshina mulong wak chidi cha kuswakej kudjol wuntu ukur. (Tal chipich cha kwisambishin.) (b) Yisalijok ik ya wuntu ukur yilejenau mu Kolosay 3:5-9?

5 Yom ik ukusala anch wijik anch masun mey mikisin ni makwet didjimb diyimp? Ukumadjol kamu swa swa. Chilik chimwing, anch twijik anch tusadin yom yikisinay Yehova, tufanyidin kamu kuswimp swa. Palonday piur pa yisalijok yiyimp yiney, Paul walonda anch: “Djibulany yom yiney yawonsu.” El tushinshikinany yom yaad pakach pa yom yiney: yisal ya masandj ni kwijond.—Tang Kolosay 3:5-9.

6, 7. (a) Mutapu ik umekeshina mazu ma Paul anch chitin usu nakash mulong wa kudjol wuntu ukur? (b) Sakura wading ni mashakamin ma mutapu ik? Yom ik yamwinkisha usu wa kuswimp?

6 Yisal ya masandj. Mu Bibil, ‘yisal ya masandj’ mudi kand yisal yawonsu ya masandj pakach pa ikundj ni mband akad kwatijan mu mutapu ufanyidina kurutu kwa antu awonsu. Paul walonda anch in Kristu afanyidin ‘kudjibul yidi yau ya mujimbu’ anch yiyibachikin ku yisal ya  masandj. Chinech chirumburikin anch tufanyidin kusal usu nakash mulong wa kudiosh maku mayimp. Kusal mwamu kukutwish kukasikan, pakwez tukutwish kuwin!

7 Tukutwish kuman mwamu kusutin chilakej cha nambaz utazukinau anch Sakura wa mu Japon. * (Tal mazu ma kwinshin.) Padingay Sakura ukat kupam, wiyovang anch udi amwinend ni wovang ushon. Mulong wa kudiosh yovil yend ya kwikal amwinend, wasambisha kusal masandj pawanyishay mivu 15. Sakura wasalang masandj nau antu avud ni wadiosha mavumu kapamp kasatu. Walonda anch: “Kwisambishil, niyova anch nidi mu diking anch nasal masandj ni natonga anch ankatin ni answirikedin. Pakwez pinadandamena kusal masandj nakash, niyovap kand anch nidi mu diking.” Mwikadil winou wadandamena djat ni pawanyishay Sakura mivu 23. Chawiy wasambisha kwilej Bibil nau Atuman a Yehova ni wakata yom yilejay. Yehova wamukwasha chakwel alika yisal yend ya masandj ni awina yovil yend ya kwifish nich ni ya usany. Nlel unou, Sakura usadin mudi chibol wa rawonsu ni kiyovilap kand anch udi amwinend. Ulondin anch: “Nikwet musangar nakash wa kutaninamu mu rukat ra Yehova dichuku ni dichuku.”

MUTAPU WA KULIK YISAL YIJONDILA

8. Yisal ik yikutwisha kusal anch Nzamb atuma anch twijondin?

8 Kwijond. Mu Bibil, “kwijond” yidiap kwau ching yom ya masandj. Yikutwish kumekesh yom mudi kuna ruwand ap kusal maswimbu mayimp. (2 Korint 7:1; Efes 5:3, 4) Chikutwish kand kumekesh yom yikatau antu kusal mu ujindj mudi kutang mabuku malangwishina maku ma masandj ap kutal pornografi. Yom yiney yikutwish kumushikij muntu ku yisalijok yijondila mudi kwichuku. (Kolosay 3:5) *—Tal mazu ma kwinshin.

9. Yom ik yikutwisha kushiken anch muntu wakudish ‘maku mayimp ma masandj’?

9 Antu akata kutalang pornografi akat kukudish ‘maku mayimp ma masandj’ ni akutwish kwikal asuk a masandj. In kukimbijol amen kal anch kwikal musuk wa pornografi kudi mudi kwikal musuk wa maar ap wa yom yikata kulewishan. Chawiy chishimokishenap kwijik anch chaku cha kutal pornografi chikwet yibudikin yiyimp nakash. Muntu ukutwish kwikal ni yovil yikash ya usany, kulik kusal mudimu nawamp, kuburen musangar mu dijuku, kujip uruw ap kwijip. Muvu umwing kupwa kwa ikundj umwing kudiokal mu usuk wa kutal pornografi, walonda anch watwisha chad kwilimish amwinend.

10. Mutapu ik mwadiokalay Ribeiro mu usuk wa kutal pornografi?

10 Kudi antu avud, jiding njit jikash nakash chakwel anch adiokala mu usuk wa kutal pornografi. Pakwez chiswapel kuwin njit jinej. Tal chilakej cha Ribeiro wa mu Brésil. Padingay nsand, wadiokala kwol kwau ni waya kusal mudimu ku sosiete ukata kukumangej mapaper. Kwinikwa wamana mikand ya pornografi. Ribeiro walonda anch: “Pakemp pakemp, nikala musuk. Chayipa nakash mulong natwishap kand kuchingel anch mband  nading nishicha nend adiokala ku chikumbu chad lel nitala ma video ma pornografi.” Kupwa dichuku dimwing ku mudimu, Ribeiro wamana muruzu wa mabuku makumangejangau kal ni wamana buku ufundinau anch Le secret du bonheur familial. Wamunona ni wasambisha kumutang. Yom yilejay yamubachika kwilej Bibil nau Atuman a Yehova. Pakwez kwasuta chisu chilemp nakash pakwel anch Ribeiro adiokala mu usuk wa pornografi. Yom ik yamukwasha? Warumburila anch: “Kusutin malembil, kwilej Bibil ni kutongijokin pa yom nileja, musangar wam mulong wa mikadil ya Nzamb wakula kushik ni panikala ni rukat rikash mulong wa Yehova kusutamu maku mam ma kutal pornografi.” Nich ukwash wa Bibil ni wa spiritu utumbila wa Nzamb, Ribeiro waswimpa mwikadil wend, watambula dibatish ni katat usadin mudi mukurump wa chikumangen.

Tufanyidin kumukat Yehova nakash kamu ni kukis yom yiyimp

11. Yom ik yikumukwasha muntu chakwel akolika mu usuk wa pornografi?

11 Ijikany anch mulong wa kudiokal mu usuk wa pornografi, Ribeiro wasala yom yivud kusutamu kwau ching kwilej Bibil. Wafanyina kutongin nakash piur pa yom yatangay mu Bibil ni kulik anch yimushika ku muchim wend. Wamulembila Yehova ni wamwita ukwash. Yom yiney yamukwasha Ribeiro chakwel rukat rend mulong wa Nzamb rakasikana, chawiy wawina maku mend ma kutal pornografi. Mulong wa kudiokal mu usuk wa pornografi, niyetu tufanyidin kumukat Yehova nakash ni kukis yom yiyimp.—Tang Kuseng 97:10.

LIK UJIM, KULOND KUYIMP NI MAKASU

12. Yom ik yamukwasha Stephen kulik ujim ni kulond kuyimp?

12 Antu amwing akat kujimanang swa ni akat kuyilond antu akwau mazu mayimp ni ma masaal. Anch chinech chashiken, antu awonsu a mu dijuku akat kwov nayimp. Tatuku umwing wa mu Australie utazukinau anch Stephen wachipang nakash ni wading kujiman nakash ap mu tuyom tukemp tukemp. Ulondin anch: “Am ni mukajam twaurika kapamp kasatu ni twading piswimp ni kujip uruw.” Kupwa, asambisha kwilej Bibil nau Atuman, ni Stephen wasala usu wa kusadin yom yilejay. Ulondin anch kurutu kwa kumwijik Yehova, wading kujiman nakash anch chom chin chawonsu chamwovish kuyip ni wiyovang mudi bomb ukimbina kubarik. Pakwez kupwa kwa Stephen kulondul yiyul ya Bibil, yom yawapa. Ulondin anch: “Mwom wa dijuku dietu wawapa nakash. Ku ukwash wa Yehova, nikwet katat chisambu nakash.” Nlel unou, Stephen usadin mudi nkwash wa mudimu ni mukajend udi chibol wa rawonsu kudiosh mivu yivud. Amakurump a chikumangen cha Stephen alonda anch: “Stephen udi zong, udi mukadivar usadina mudimu nakash ni ukwet mwikadil wa kwikepish.” Alonda kand anch kand kal amumana ujimen. Stephen kibazap mulong wa kuswimp wuntu wend. Ulondin anch: “Nafanyinap kwikal ni yiyukish yiney yiwamp mu mwom  wam anch nitiyap ukwash wa Yehova wa kuswimp kamu wuntu wam.”

13. Mulong wak ujim udi wa ubaj? Yom ik yitubabeshinay Bibil piur pa ujim?

13 Bibil utubabeshin anch tufanyidin kwipuk kujiman, kuyilond antu akwau yom yiyimp ap kuyiswejin. (Efes 4:31) Yom yiney yikat kushikij ku yisal ya chisum. Nlel, antu avud mu mangand atongining anch ujim ni yisal ya chisum yidi kwau yom yiwamp. Pakwez yisalijok yiney yikat kumupipej Sakatang wetu. Akadivar netu avud aswimpin kal yisalijok yau ni adjadin kal wuntu usu.—Tang Kuseng 37:8-11.

14. Ov, chiswapel kudi muntu ukweta chisum kwikal muntu witudishina?

14 Mukadivar utazukinau anch Hans usadin mudi mukurump mu chikumangen mu Australie. Ntakel wa chisak cha amakurump wa chikumangen cha Hans walonda anch: “Udi mukadivar witudishina nakash ukusangera kwijikijan nend.” Pakwez pakur Hans kadingap muntu witudishina. Padingay nsand, wasambisha kuna maar nakash ni wikala mwin chisum. Chisu chimwing chanay maar, wajimana nakash ni wamujipa murund nend mband. Hans amukasa mu mivu 20, pakwez rukan raswimpap wuntu wend. Chawiy makwend wamuleja mukurump umwing wa chikumangen chakwel aya kumutal ni Hans wasambisha kwilej Bibil. Walonda anch: “Nasala usu nakash mulong wa kudjol wuntu wam ukur. Mufund wa Bibil wankasikesha wading wa Isay 55:7, ulondina anch: ‘Chifanyidin antu ayimp akarumun yaku yau,’ ni 1 Korint 6:11, ulondina piur pa antu alika kusal yitil anch: ‘Antu amwing a pakach pen ading  mwamu.’ Mu mivu yivud, Yehova wankwasha nich kushimpish muchim kusutin spiritu wend utumbila mulong wa kudjal wuntu usu.” Hans watambula dibatish padingay mu rukan ni amubudisha mu rukan kupwa kwa kusal mivu 17 ni chikunku. Walonda anch: “Nijikitishin nakash mulong wa riy ripandakena ra Yehova ni dilikishin diend.”

15. Chom ik chikwau chidia chikunku cha wuntu ukur? Bibil ulondin ik piur pa chom chinech?

15 Makasu madi chikunku cha wuntu ukur. Chilakej, antu avud akat kudimban mulong wa kwiyep kuland mikand ya mbur matad ap mulong wa kwipuk kwitiyin kurumbuk kwau. Pakwez Yehova udi “Nzamb wa uyakin.” (Kuseng 31:5) Chawiy witin anch in kwifukwil end awonsu ‘alonda uyakin’ ni ‘kangal alonda yom ya makasu.’ (Efes 4:25; Kolosay 3:9) Chakin kamu, tufanyidin kulond uyakin ap anch chovishen usany ap chikasiken.—Jinswir 6:16-19.

MUTAPU WAWINAU

16. Yom ik yikutukwasha kudjol wuntu ukur?

16 Chiswapelap kudjol wuntu ukur ku usu wetu ayinetu. Sakura, Ribeiro, Stephen ni Hans awonsu arisha nakash mulong wa kuswimp mwom wau ukur. Yom yayikwasha wading usu wa Dizu dia Nzamb ni wa spiritu wend utumbila. (Luka 11:13; Hebereu 4:12) Mulong wa kutaninamu mu usu winou, tufanyidin kutang Bibil dichuku diawonsu, kutongijokin pa yom tutangina ni kulembil chisu chawonsu mulong wa kwit manangu ni usu wa kusadin yom twilejina. (Joshua 1:8; Kuseng 119:97; 1 Tesalonik 5:17) Tutanidinamu kand mu Dizu dia Nzamb ni spiritu wend utumbila anch twirijek ni twakumangan ku yikumangan ya chikumangen. (Hebereu 10:24, 25) Ni tufanyidin kand kusadin yom yivud yitwinkinau kudi dirijek dia Yehova, mudi mikand yetu, JW Télédiffusion, JW Library ni kapend ka jw.org.—Luka 12:42.

Mutapu ik tukutwisha kudjol wuntu ukur?(Tal paragraf wa 16)

17. Yom ik tukwisambina mu mutu wa mulong ulondwilaku ou?

17 Twisambin kal yisalijok yiyimp yivud yifanyidinau in Kristu kudjol ni kudjibul chakwel amusangaresha Yehova. Pakwez kudi kand yom yikwau yivud tufanyidina kusal. Tufanyidin kudjal wuntu usu ni kusal anch udandamena kwikal mu mwom wetu. Mu mutu wa mulong ulondwilaku ou, tukwisambin mutapu tukutwisha kusal mwamu.

^ par. 7 Majim mamwing madia mu mutu wa mulong winou amaswimpa.

^ par. 8 Tal shapitre wa 25 mu buku Les jeunes s’interrogent. Réponses pratiques, Volim 1.