Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 8 , 2017

Mutapu Tukata Kudjal ni Kulam Wuntu Usu

Mutapu Tukata Kudjal ni Kulam Wuntu Usu

‘Djalany wuntu usu.’ —KOLOSAY 3:10.

MIMINY: 43, 27

1, 2. (a) Mutapu ik twija anch chiswapel kudjal wuntu usu? (b) Mikadil ik ya wuntu usu tukwileja mu Kolosay 3:10-14?

MU BIBIL wa Les Saintes Écritures. Traduction du monde nouveau, tutanin mazu ‘wuntu usu’ tupamp twaad. (Efes 4:24; Kolosay 3:10) Chirumburikin wuntu ‘watangau kukwatijan ni rusot ra Nzamb.’ Ov, chikutwish kutuswapel kudjal wuntu winou usu? Mwaning. Yehova wayitanga antu mu chifu chend, chawiy tukutwish kwimburij mikadil yend yiwamp.—Disambishil 1:26, 27; Efes 5:1.

2 Chidi chakin anch mulong twaswana kuburen kuwanyin, yisu yimwing etu awonsu tukweting maku mayimp. Chikwau kand, antu atunyingumukina akwet kand usu padi etu. Pakwez ku ukwash wa riy ra Yehova, tukutwish kwikal mutapu wa antu akatinay anch twikala. Mulong wa kutukwash kusal mwamu, el twisambinany mikadil yisadina chikunku cha wuntu usu. (Tang Kolosay 3:10-14.) Kupwa tukuman chad mutapu  tukutwisha kumekesh mikadil yiney mu mudimu wetu wa kulejan.

‘EN AWONSU UDIANY MU UUMWING’

3. Mwikadil ik umwing wa wuntu usu?

3 Paul warumburila anch kulik kwikal ni kasolikany udi mwikadil wa wuntu usu. Walonda anch: “kwikil kand Mugrek ap Muyuda, ap uyila ku mukand ni wakad kuya ku mukand, [angedj], win Skitan, muswik ap mwant ipau.” * (Tal mazu ma kwinshin.) Mu chikumangen, kwikil muntu ufanyidina kuman anch udi muwamp nakash kuyisutamu antu akwau mulong wa ulomb wend wa chikit, muchid wend ap ndond yikwetay. Mulong wak? Mulong tudi in kwilej a Yesu, ‘tudi etu awonsu mu uumwing.’—Kolosay 3:11; Galatia 3:28.

Tufanyidinap kumusadin muntu mwawonsu ni kasolikany chikalap nchik ulomb wend wa chikit ap yaku ya kwol kwau

4. (a) Atushalapol a Yehova afanyidin kuyisadin antu akwau mutapu ik? (b) Yom ik yikutwisha kuyipish uumwing wa win Kristu?

4 Anch twadjal wuntu usu, tukuyilimish antu awonsu, chikalap nchik ulomb wau wa chikit ap yaku yau. (Rom 2:11) Mu jindond jimwing mu mangand, chikutwish kukasikan nakash kusadin yom yiney. Chilakej, pakur mu Afrique du Sud, amakurump a ngand ateka jindond kushalijan mulong wa kushakamamu kudi antu a ulombu wa chikit kushalijan. Antu avud mwi ngand yiniya, pamwing nau Atuman adandamedin kushakamamu. Chisak Chitakedila chayikasikesha akadivar anch ‘tangurikany.’ Chawiy mwi Ngond wa 10 muvu wa 2013, itiyija kusal kutenchik kwa pakampwil kwayikwasha akadivar a ulombu wa chikit kushalijan chakwel ijikijana nawamp umwing ni mukwau.—2 Korint 6:13.

5, 6. (a) Kutenchik ik kwasalau mwi ngand yimwing mulong wa kuyikwash antu a Nzamb kwikal mu uumwing? (Tal chipich cha kwisambishin.) (b) Yibudikin ik yadingaku?

5 Akadivar itenchika chakwel machuku ma nsudiel ma rubing, Atuman a yikumangen yaad asadinang mazu kushalijan ap a ulomb wa chikit kushalijan asutisha chisu pamwing. Akadivar nau anambaz a yikumangen yiney yaad ipana mu kulejan pamwing, akumangana pamwing ni aya kutalijan ku yikumbu yau. Yitot ya yikumangen yipana mu kusal mwamu ni biro wa mutiy watambula marapor mawamp. Chayisangaresha kand antu akad kwikal Atuman. Chilakej, paster umwing wa relijon walonda anch: “Nidiap Kaman, pakwez nilondin anch ukwetany kurijek kuwamp kwa kusal mudimu wa kulejan ni ubombakenany michid yawonsu.” Mutapu ik wiyovau akadivar ni anambaz piur pa kutenchik kwinoku?

6 Kwisambishil, nambaz ulondina dizu dia Xhosa utazukinau anch Noma wova wom wa kuyitazuk akadivar a mu chikumangen cha Inglish ku chikumbu chend.  Pakwez kupwa kwa kulejan nau Atuman ayindel ni kuya kuyital ku yikumbu yau, wiyova chad nawamp. Walonda anch: “Adi kwau pamwing niyetu!” Chisu chezau akadivar ni anambaz a mu chikumangen cha Inglish kulejan pamwing nau akadivar a mu chikumangen cha dizu dia Xhosa, Noma niyend wayitazuka ku chikumbu chend mulong wa kudia nau. Wasangara nakash pamanay ngendj wend umwing, mukurump wa chikumangen udia chindel, ukat kusanger kushakam pa chitwam cha plastik. Kusutin program winou udandamedina, akadivar ni anambaz avud akat kwikal ni arund asu ni adandamedin kwijikijan nau antu akwau a ndond kushalijan.

DJALANY RANAKENNI KUWAP

7. Mulong wak tufanyidin kumekesh chisu chawonsu ranaken?

7 Antu a Yehova akuman mar kushik kamu ni pakupwila mangand ma Satan. Kuburen mudimu, mayej makash, kuzengol, mar ma chitangil ni kushadish yom ya ku mujimbu mulong wa chisum ap yom yikwau yiyimp yikutwish kutushiken etu awonsu. Mulong wa kukwashijan mu yisu yiney ya mar, tufanyidin kumekesh ranaken rakin. Ranaken ripandakena rikutubachik kuyisadin antu akwau yom yiwamp. (Efes 4:32) mikadil yiney yidi ya wuntu usu. Yikutukwash kumwimburij Nzamb ni kuyongoj antu akwau.—2 Korint 1:3, 4.

8. Yom ik yiwamp yikutwisha kushiken anch twamekesh ranaken ni kwikal antu awamp kudi antu awonsu a mu chikumangen? Pan chilakej.

8 Mutapu ik tukutwisha kuyanaken antu adia mu chikumangen chetu adiokila ngand yikwau ap akad kwikal ni mutapu? Tufanyidin kuyak nawamp, kwikal nau mu urund ni kuyikwash chakwel amana anch tukwet nau kuswir mu chikumangen. (1 Korint 12:22, 25) Chilakej, Dannykarl wadiokala mu Filippines mulong wa kuya mu Japon. Mulong wading ngendj, kamusadinap nawamp ku mudimu mudi mwayisadinangau antu a mudimu akwau. Chawiy waya kukumangan ku yikumangan ya Atuman a Yehova. Dannykarl walonda anch: “Antu awonsu akumangana ading in Japon, pakwez angaka nawamp nakash, mudi ading angij kudiosh pakur.” Kuwap kwa akadivar kwadandamena kumukwash kumusejin Yehova piswimp. Mu kusut kwa chisu Dannykarl watambula dibatish ni nlel usadin mudi mukurump wa chikumangen. Amakurump akwau akwet musangar mulong ndiy ni mukajend, Jennifer, adi mu chikumangen chau ni alondin anch: “Akwet mwom uswapela padiau ayibol ni adi chilakej chiwamp mulong atekin Want pa ndond ya kusambish.”—Luka 12:31.

9, 10. Pan chilakej chimekeshina yibudikin yiwamp yidingaku anch twamekesh ranaken mu mudimu wa kulejan.

9 Tukwet mutapu wa kusal “nawamp kudi antu awonsu” anch twalejan rusangu ruwamp ra Want. (Galatia 6:10) Atuman avud akat kuyanaken angendj ni akat kusal usu wa kwilej dizu diau. (1 Korint 9:23) Usu wau ukat kulet yibudikin yiwamp. Chilakej, nambaz udia chibol mu Australie utazukinau anch Tiffany wileja dizu dia Swahili mulong wa kukwash chikumangen chidia mu musumb wa Brisbane. Ap anch kwilej dizu dined kwading kukasiken, wikala ni mwom uwamp. Tiffany ulondin anch: “Anch ukatin kusal mudimu wa kulejan  usangareshina, kusadin mu chikumangen cha dizu dia wingendj kudi kweyey. Kudi mudi kusal weny pakad kusha musumb wey. Ukwijik chidia uumwing wa ukadivar wa pa mangand mawonsu ni kuman uumwing ushimwokishena.”

Yom ik yiyibachikina in Kristu chakwel ayikwasha angendj? (Tal paragraf wa 10)

10 Dijuku dimwing dia mu Japon niyau diasala mwamu. Changadim Sakiko ulondin anch: “Twatanijanang nau angendj a mu Brésil chisu twayangang mu mudimu wa kulejan. Pitwayilejang mifund mu Bibil wau wa Portugais, mudi Kujingunik 21:3, 4 ap Kuseng 37:10, 11, 29, ateshang kamu nawamp ni yisu yimwing adilang.” Dijuku dined diayanakena nakash angendj inay ni diakata kuyikwash kwilej uyakin, chawiy diasambisha kwilej Portugais mu dijuku diau. Kupwa, dijuku dined diasambisha kukwash chakwel asambisha kusal chikumangen cha Portugais. Kupwa kwa mivu yivud, diayikwasha angendj avud chakwel ikala atushalapol a Yehova. Sakiko ulondin anch: “Chading chitin kusal usu nakash mulong wa kwilej Portugais, pakwez yiyukish yisutinamu usu twasala. Tumujikitishin Yehova nakash.”—Tang Midimu 10:34, 35.

DJALANY KWIKEPISH

11, 12. (a) Mulong wak tufanyidin kwikal ni chitongijok chiwamp mulong wa kudjal wuntu usu? (b) Yom ik yikutukwasha kushal ikepishina?

11 Usu tusadina mulong wa kudjal wuntu usu ufanyidin kumutumbish Yehova, kadiap mulong wa kututumbish kudi antu akwau. Vurik anch ap angel ading awanyidina ikala ni chibud ni asala chitil. (Ilikej ni Ezekiel 28:17.) Mulong tudi antu akad kuwanyin, chikutwish kutukasiken kwipuk chibud. Pakwez, tukutwish kudjal kwikepish. Yom ik yikutukwasha kusal mwamu?

12 Chom chimwing chikutwisha kutukwash kwikal ikepishina kudi kutang Dizu dia Nzamb dichuku diawonsu ni kutongijokin pa yom tutangina. (Kuvurik Yijil 17:18-20) Tufanyidin pakampwil kutongijokin nakash piur pa yom yatufundishay Yesu ni chilakej chend chiwamp cha kwikepish. (Mateu 20:28) Yesu wading wikepishin ni wayowisha in kwilejend ku mend. (Yohan 13:12-17) Chom chikwau tukutwisha kusal kudi kumulembil Yehova mulong wa spiritu wend. Spiritu wend ukutwish kurish ni yitongijok ya kwiyov anch tudi awamp nakash kusutamu akwetu.—Galatia 6:3, 4; Filip 2:3.

Anch tudi ikepishina, chikumangen chikwikal mu chisambu ni uumwing

13. Yom ik tukutaninamu anch twikal ikepishina?

 13 Tang Jinswir 22:4. Yehova utwitin anch twikala ikepishina. Kwikepish kuletining yiyukish yivud. Anch tudi ikepishina, chikumangen chikwikal mu chisambu ni mu uumwing. Chikwau kand, Yehova ukutwinkish ranaken rend. Kambuy Pita walonda anch: “En awonsu, djalany kwitudish, mulong . . . Nzamb uyipompatin in kwibaz, pakwez ukat kuyanaken in kwitudish.”—1 Pita 5:5.

DJALANY KWITUDISH NI KUSHIMPISH MUCHIM

14. Nany udia chilakej chiwamp cha kwitudish ni cha kushimpish muchim?

14 Mu mangand ma nlel, anch muntu witudishin ni ukat kushimpish muchim, antu akwau akat kutong anch uziyin. Pakwez chinech chidiap chakin. Mikadil yiney yiwamp yidiokiling kudiay Yehova, Muntu ukweta usu nakash mu mangand mawonsu. Ndiy udia chilakej chiwamp nakash cha kwikal witudishina ni ushimpishina muchim. (2 Pita 3:9) Chilakej, tong mutapu washimpishay Yehova muchim chisu chamwakulay Aburaham ni Lot kusutin angel End. (Disambishil 18:22-33; 19:18-21) Ni tong kand mutapu washimpishay Yehova muchim chisu chamubwambwilangau kudi muchid wa Isarel mu mivu 1500 ni kusut.—Ezekiel 33:11.

15. Chilakej ik chashay Yesu cha kumekesh kwitudish ni kushimpish muchim?

15 Yesu wading mwin “kwitudish.” (Mateu 11:29) Wading ushimpishin muchim nakash mulong wa kuziy kwa in kwilejend. Chisu chasalay mudimu wend panap pansh, amulondang Yesu nayimp ni kumufund. Pakwez wading witudishin ni ushimpishina muchim djat ni ku rufu rend. Padingay Yesu ukat kwov kusansan nakash pa mutond wa mar, wamwita Tatukwend chakwel ayilikishina antu amujipa. Walonda anch: “Awiy kijap yom yisadilau.” (Luka 23:34) Ap chisu chadingay mu mar nakash ap kusansan, washala witudishina ni ushimpishina muchim.—Tang 1 Pita 2:21-23.

16. Mutapu ik tukutwisha kumekesh kwitudish ni kushimpish muchim?

16 Paul walejana mutapu umwing tukutwisha kumekesh kwitudish ni kushimpish muchim pafunday anch: “Kwashijanany akasikena ni aziyila, anch muntu ukwet mulong ni mukwau chifanyidin kulikishijadin umwing ni mukwau, mudi mwakulikishinanyau en kudi [Yehova]. Niyen salany kand mwamu.” (Kolosay 3:13) Chakwel tuyilikishina akwetu, tufanyidin kwikal itudishina ni ashimpishina muchim. Kusal mwamu kukuletish ni kulam uumwing mu chikumangen.

17. Mulong wak kwitudish ni kushimpish muchim kudi kwa usey?

17 Yehova utwitin anch twikala itudishina ni ashimpishina muchim mulong wa antu akwau. Mikadil yiney yidi ya usey nakash anch tukatin anch tushakama mwi ngand yend yisu. (Mateu 5:5; Jakobu 1:21) Anch tudi itudishina ni ashimpishina muchim, tumutumbishin Yehova ni tuyikwashin akwetu niyau kusal mwamu.—Galatia 6:1; 2 Timote 2:24, 25.

 DJALANY RUKAT

18. Mutapu ik wovijadina rukat ni kulik kwikal ni kasolikany?

18 Mikadil yiney yawonsu twambambina kal yovijadin ni rukat. Chilakej, mwin kwilej Jakobu wayiyula akadivar nend mulong ayisadinang ampich nawamp kusutamu atuzwendj. Walonda anch chinech chovijadinap ni chijil cha Nzamb chilondina anch “mukata mukwen mudi ey amwiney.” Kupwa wawejinaku anch: “Anch en ukwetany kasolikany, [usadinany] chitil.” (Jakobu 2:8, 9) Anch tuyikatin antu, tufanyidinap kuyikis mulong wa kufumb kwau, ulomb wau wa chikit ap ndond yikwetau. Tukuyisadinap yom mu mutapu wa kumekesh kasolikany. Kulik kwikal ni kasolikany udi mutapu uwamp wa wuntu tufanyidina kwikal nich.

19. Mulong wak chidi cha usey kudjal rukat?

19 Rukat ridi kand ‘rishimpishina muchim ni ruwamp’ ni ‘rikatap kwishimek.’ (1 Korint 13:4) Tufanyidin kwikal ashimpishina muchim, awamp ni ikepishina mulong wa kuyilej amutej netu rusangu ruwamp. (Mateu 28:19) Mikadil yiney yisadin kand anch chituswapela kwovijan nawamp ni akadivar nau anambaz etu awonsu mu chikumangen. Anch etu awonsu twamekesh rukat mudi riner, chikumangen chetu chikwikal mu uumwing ni chikumuletin Yehova ntumb. Antu akwau akuman uumwing ni akusej ku uyakin. Parumburilay Bibil piur pa wuntu usu, choviken nawamp anch: “Pa yom yiney yawonsu anzukeshanyap rukat, rawiy mwoj wa kukukasany mu umwing uwanyidina.”—Kolosay 3:14.

‘DANDAMENANY KWIKAL ASU’

20. (a) Yipul ik tufanyidina kwiyipul ayinetu? Ni mulong wak? (b) Machuku ik mawamp ma kurutu tuchingedina?

20 Tufanyidin kwiyipul ayinetu anch, ‘Kuswimp ik nifanyidina kusal mulong wa kudjol ni kudjibul wuntu ukur?’ Tufanyidin kumulembil Yehova ni kumwit chakwel atukwasha. Tufanyidin kusal usu nakash wa kuswimp yitongijok yiyimp ni yisal yiyimp chakwel tutwisha ‘kuswan Want wa Nzamb.’ (Galatia 5:19-21) Tufanyidin kand kwiyipul anch, ‘Ov, nikat kudandamen kuswimp mutapu wam wa kutong mulong wa kumusangaresh Yehova?’ (Efes 4:23, 24) Tudi antu akad kuwanyin, chawiy tufanyidin kudandamen kusal usu nakash mulong wa kudjal ni kulam wuntu usu. Chinech chidi chom chidandamedina. Musangar mud ik tukwikala nich anch muntu mwawonsu wadjal wuntu usu ni wimburij mikadil yiwamp ya Yehova mu mutapu uwanyidina!

^ par. 3 Chisu cha pakur, antu atongang anch in Skitan ading antu akad kwijik mutapu wa kushakam, chawiy ayikisang nakash.