Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 8 , 2017

Rukat—Mwikadil wa Usey

Rukat—Mwikadil wa Usey

YEHOVA wamupepila kambuy Paul kufund piur pa mikadil chidivu yidiokiling ku usu wa spiritu utumbila. (Galatia 5:22, 23) Mikadil yiney yawonsu ayitazukin anch ‘dibuj dia spiritu.’ * (Tal mazu ma kwinshin.) Dibuj dined didi kand chikunku cha ‘wuntu usu’ difanyidinau in Kristu kudjal. (Kolosay 3:10) Mudi mukata mutond kusong mabuj anch akat kuwichil mem chisu chawonsu, muntu niyend ukutwish kwikal ni mikadil yiney yiwamp anch spiritu utumbila ukat kusadin padiay ndiy mu mwom wend.—Kuseng 1:1-3.

Mwikadil wa kusambish wajimbulay Paul ridi rukat. Mutapu ik ukweta mwikadil winou usey? Paul walonda anch pakad rukat, wading “muntu wamwamu.” (1 Korint 13:2) Pakwez rukat chom ik ni mutapu tukutwisha kurikudish ni kurimekesh dichuku diawonsu?

RUKAT CHOM IK?

Ap anch chikasiken kurumburil kamu nawamp rukat chom ik, Bibil urumburil mutapu utonginingay ni usadiningay muntu ukweta rukat. Chilakej, muntu ukweta rukat udi ‘ushimpishina muchim ni muwamp’ ni ukat “kusanger mu uyakin.” Anch muntu ukwet rukat, ukat ‘kusend yom yawonsu, kwitiy yom yawonsu, kuchingej yom yawonsu, kujamish mu yom yawonsu.’ Ukweting rukat rikurikina mulong wa antu akwau, ukat kuyibangin ni udi murund ushinshamena. Pakwez anch muntu kakwetap rukat, ukweting mukau, chibud, ukat kusal yom mu mutapu uyimp, ukwet choy ni kakatap kulikishin. Pa ndond pa kumekesh mikadil yiney yiyimp, tufanyidin kamu kuyikat akwetu ni rukat rakin, rukat rakad “kwitong.”—1 Korint 13:4-8.

YEHOVA NI YESU ASHA CHILAKEJ CHIWAMP CHA RUKAT

“Nzamb udi rukat.” (1 Yohan 4:8) Midimu yend ni yisal yend yawonsu yimekeshin mwamu. Chisal chend chijim cha rukat chading cha kumutum Yesu panap pansh mulong wa kuman mar ni kutufil. Kambuy Yohan walonda anch: “Talany mutapu watulejay Nzamb rukat rend, ndiy wamutuma Mwanend kapwokal mu mangand chakwel etu tutambul mwom wa chikupu kudi ndiy. Kurumburik kwa rukat rakin kwawiy oku, kiyetup twamukata Nzamb, pakwez ndiy watukata etu, chad wamutuma Mwanend kwikal yakupesh ya kulikishin yitil yetu yawonsu.” (1 Yohan 4:9, 10) Kusutin rukat ra Nzamb, akutwish kutulikishin yitil yetu ni tukutwish kwikal ni ruchingej ni mwom.

Yesu wamekesha rukat rend kudi an a antu papanay mwom wend mulong wa kusal rusot ra Nzamb. Kambuy Paul utulejin anch: “Yesu Kristu wasala rusot ra Nzamb, chad mwamu ndiy watushitwisha etu awonsu ku yitil yetu, mulong ndiy wapana mujimbu wend kwikal yakupesh ya kapamp kamwing kusu.” (Hebereu 10:9, 10) Kwikil muntu wafanyina kumekesh rukat rijim mudi riner. Yesu walonda anch: “Kwikil rukat rupandakena kujimb mudi muntu kufa mulong wa arund nend.” (Yohan 15:13) Ov, antu akad kuwanyin akutwish kwimburij rukat ra Yehova ni  ra Yesu ramekeshau? Mwaning! El tumanany mutapu tukutwisha kusal mwamu.

‘ENDILANY MU RUKAT’

Paul utukasikeshin anch: “Chawiy londulany mu chilik cha Nzamb mudi an akatilau; endilany mu rukat mudi Kristu chakukatanyay en, wipana amwinend mulong wetwetu.” (Efes 5:1,2, TMK) Chirumburikin ik ‘kwendil mu rukat’? Chirumburikin kumekesh rukat chisu chawonsu. Tukutwishap kulond kwau anch tuyikatin akwetu. Tumekeshin anch tuyikatin mu yom tusadina. Yohan wafunda anch: “Anam akarukat, kichifanyidinap rukat retu rikal kusu ra kulond mazu mawamp, pakwez rufanyidin kwikal rukat rakin rimekedina mu yisalijok yetu yiwamp.” (1 Yohan 3:18) Chilakej, tulejen “rusangu ruwamp ra Want” mulong tumukatin Yehova ni amutej netu. (Mateu 24:14; Luka 10:27) Tukat ‘kwendin mu rukat’ anch tudi ashimpishina muchim, awamp ni akata kulikishin. Tukat kusadin chiyul cha Bibil chilondina anch: “Mudi mwakulikishinanyau en kudi [Yehova]. Niyen salany kand mwamu.”—Kolosay 3:13.

Anch twamuyul ap kumupup muntu, chinech chimekeshinap anch tukwetap rukat. Chilakej, mulong wa kuyininetish anau, anvaj amwing akat kusal yom yitinau anau. Pakwez nvaj umukatina nakash mwanend kakumwinkishap yom yawonsu yitinay anch chitin kusal mwamu. Chilik chimwing, ap anch Nzamb udi rukat, “[Yehova] ukat kumukand muntu mwawonsu ukatilay.” (Hebereu 12:6) Chawiy chidi cha rukat kupan kupup kuwanyidina anch chidi cha usey. (Jinswir 3:11, 12) Pakwez vurik anch etu awonsu tudi akayitil ni yisu yivud tukat kukangany kumekesh rukat. Chawiy etu awonsu tukutwish kuwapish mutapu wa kumekesh rukat. Mutapu ik tukutwisha kusal mwamu? El tushinshikinany mitapu yisatu.

MUTAPU IK TUKUTWISHA KUKUDISH RUKAT?

Chakusambish, mwita Nzamb chakwel akwinka spiritu wend utumbila ukata kulet rukat. Yesu walonda anch Yehova ukat kupan “[spiritu] utumbila kudi awonsu akata kwit.” (Luka 11:13) Chawiy tukutwish kwikal nich kashinsh anch ang twalembil mulong wa spiritu utumbila ni twalik anch atukwasha, tukwikal ni rukat ripandakena. (Galatia 5:16) Chilakej, anch udi mukurump, ukutwish kwit spiritu utumbila chakwel akukwasha kwikal ni rukat chisu ufanyidina kuyiyul antu akwau kusutin Bibil. Pakwez anch udi nvaj, ukutwish kand kwit spiritu wa Nzamb akukwasha kupup aney pakad ujim, pakwez nich rukat.

Cha kaad, tong nakash piur pa mutapu wamekeshay Yesu rukat ap chisu chamusadinau nayimp kudi antu akwau. (1 Pita 2:21, 23) Anch muntu wakurumbukin ap waman anch wakusadin kal nayimp, iyipula anch: ‘Yom ik yelangay kusal Yesu?’ Nambaz umwing utazukinau anch Leigh wamana anch kwiyipul chipul chinech amwinend kwamukwasha kutong kurutu kwa kusal chom kanang. Ulondin anch: “Dichuku dimwing, muntu twasalang nend mudimu wayitumina antu akwau twasalang nau mudimu mesaj mayimp piur pamam ni piur pa mudimu wam nasalang. Changovisha kuyimp nakash. Pakwez niyipula amwinam anch: ‘Mutapu ik nikutwisha kumwimburij Yesu mu kushakam ni muntu winou?’ Kupwa kwa kutongin pa yom yafanyinay Yesu kusal, nakwata mupak wa kudiul mulong winou ni kulik kuwisambin kand. Kupwa, nijika anch muntu winou twasalang nend mudimu wading urishin ni mayej makash ni wading mu yakamish nakash. Chawiy namana anch kadingap pamwing ap wij kurumbuk kwa yom yafunday. Kwimburij chilakej cha Yesu cha kumekesh rukat ap anch ansarumuna, kwankwasha kumekesh rukat ra mutapu umwing kudi mukwetu wa mudimu.” Anch twamwimburij Yesu, tukuyikat akwetu chisu chawonsu.

Cha kasatu, ileja mutapu wa kumekesh rukat ra kwipan. Riner rawiy rukat riyimekeshina in kwilej akin a Yesu. (Yohan 13:34, 35) Yesu amwinend wading ni rukat riner ni watushila chilakej chiwanyidina. Mutapu ik mwamu? Pa kudiokal mwiur, “washa ndond yend ku rukat rend amwinend” mulong wetwetu “djat kamu ku rufu.” (Filip 2:5-8) Anch twimburij rukat ra kwipan ra Yesu, yitongijok ni yovil yetu  yikwikal mudi yendendiy ni tukutek maswir ma antu akwau pa ndond ya kusambish kusutamu metwetu ayinetu.

KUTANINAMU MU KUMEKESH RUKAT

Kudi kutaninamu nakash anch twamekesh rukat. El tushinshikinany yilakej yaad:

Mutapu ik tutanidinamu anch twamekesh rukat?

  • UUMWING WA UKADIVAR WA PA MANGAND MAWONSU: Mulong tukatijadin umwing ni mukwau, twij anch akadivar ni anambaz chikalap nchik chikumangen chin chawonsu chidiau tukutwisha kwendin pa mangand mawonsu akutwak ni musangar. Yiyukish mud ik pa kwijik anch akukatin kudi “anamakwe[y] in Kristu apalangena mu mangand”! (1 Pita 5:9) Tukutwish kutan rukat mudi riner ching pakach pa antu a Nzamb.

  • CHISAMBU: ‘Kukwashijan muntu ni mukwau mu rukat’ kutukwashin kusanger “chisambu chitukasina en awonsu pamwing.” (Efes 4:2, 3) Tumening chisambu chinech ku yikumangan yetu ni ku yitentam yetu. Ov, witiyinap anch mwikadil winou wa chisambu udi wa pakampwil mu mangand minam maurikina? (Kuseng 119:165; Isay 54:13) Anch twasal chisambu nau akwetu, tumekeshin kamu anch tuyikatin chakin ni chinech chikumusangaresh Tatukwetu wa mwiur.—Kuseng 133:1-3; Mateu 5:9.

“RUKAT RIKAT KUTUKUDISH”

Paul wafunda anch: “Rukat rikat kutukudish.” (1 Korint 8:1) Chirumburikin ik? Mu 1 Korint shapitre wa 13, utazukinau antu amwing anch “Kuseng wa Rukat,” urumburil mutapu ukata rukat kutukudish. Rukat rikat kukimb yisakin ya antu akwau. Rukat rikat kuwanyish maswir ma antu akwau. (1 Korint 10:24; 13:5) Ni mulong rikwet yitongijok yiwamp, rikat kubangin, kushimpish muchim ni kuwap, rikat kukasikesh majuku ni uumwing wa yikumangen.—Kolosay 3:14.

Kudi mitapu yivud ya kumekesh rukat kudi akwetu, pakwez rukat retu mulong wa Nzamb rawiy rikweta usey nakash ni tufanyidin kukasikesh rukat mudi riner. Mulong wak? Mulong rukat retu mulong wendendiy ritutekin mu uumwing! Antu a yaku kushalijan, a ulomb wa chikit kushalijan ni a mazu kushalijan amwifukwidil Yehova pamwing ni amusadidin ‘chikij ku chikij.” (Sofoniy 3:9) El tusalany usu wa kumekesh mwikadil winou wa usey wa dibuj dia spiritu utumbila wa Nzamb dichuku diawonsu.

^ par. 2 Winou wawiy mutu wa mulong wa kusambish pakach pa mitu ya milong chidivu yikwisambina mwikadil wawonsu wa dibuj dia spiritu.