Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 8 , 2017

 MU YOM YETU YIKUR

“Chisu ik Kand Tukusala Chitentam Chikwau?”

“Chisu ik Kand Tukusala Chitentam Chikwau?”

MWADING mwi ngond wa 11 muvu wa 1932 mu Musumb wa Mexique, musumb wading antu avud nakash miliyon umwing ni kusut. Kupwa kwa rubing rumwing, ateka kasu ka mwi njil kapamp ka kusambish. Pakwez antu ading kand akwet musangar mulong wa chom chikwau. Atubambasang ading iminy ku gar wa train ni ma kamera mau, mulong wa kumwak ngendj wa pakampwil wezina. Ngendj winou wading nany? Wading Joseph F. Rutherford, mukurump wa Sosiete Watch Tower. Atuman a mu musumb winiwa ading achingedin kumwak mukadivar Rutherford, wading wezina kusal chitentam cha machuku masatu.

Âge d’or walonda anch: “Chimeken kamu patok anch chitentam chinech chikushal mu rusangu mudi chom cha usey nakash” mulong wa usu usadikina wa kupalangesh uyakin mu Mexique. Pakwez chitentam chinech chading kwau chikemp mulong kwakumangana kwau antu 150. Chad mulong wak lel chading cha usey?

Kurutu kwa chitentam chinech kusadik, uyakin wadingap kwau upalangena nakash mu Mexique. Pakwez kusambish mu muvu wa 1919, kwasadikang yitentam yikemp, pakwez kwa muvu winou uvud wa yikumangen wakepa. Patekau biro wa mutiy mu Musumb wa Mexique mu muvu wa 1929, yamekana anch yom yasambisha kuwap, pakwez kwading kuchid yom yikwau yifanyidina kurijek. Dirijek diayileja akolporter atazukinau katat anch ayibol anch kangal abombakesha kwisak ni mudimu wa kulejan. Kolporter umwing wajimana nakash piur pa yom yiney ni walika uyakin, ni wateka chisak chend cha in kwilej a Bibil. Chikwau kand pa chisu chinicha, ntakel wa biro wa mutiy amuswinkana mulong wa yisal yend yiyimp. Atuman ashinshamena a mu Mexique ading akwet kuswir kwa kuyikasikesh.

Payay kuyital, Mukadivar Rutherford wayikasikesha nakash antu ashinshamena mudi inay nich madiskur maad ku chitentam, ni madiskur matan matekau ku radio. Kading kapamp kakusambish kudi akadivar kusadin radio mulong wa kupalangesh rusangu ruwamp mu Mexique mwawonsu. Kupwa kwa chitentam amuteka ntakel musu wa biro wa mutiy mulong wa kutakel mudimu. Atuma ikala chad ni mushiku nakash, ni ku ukwash wa Yehova adandamena kulejan rusangu ruwamp.

Chitentam cha muvu wa 1941, mu Musumb wa Mexique

Muvu walondulaku, 1933, kwasadika yitentam yaad mwi ngand yiniya, chimwing mu Veracruz ni chikwau mu musumb wa Mexique. Akadivar asala mudimu nakash mu teritwar ni ikala ni yibudikin yiwamp. Chilakej, mu muvu wa 1931, kwading kwau in kulejan 82. Mu muvu wa 1941, uvud wapandikana tupamp dikum! Antu piswimp 1000 eza mu Musumb wa Mexique mulong wa kusal Chitentam cha Uteokras cha muvu wa 1941.

 “KWIZUL MU JINJIL”

Mu muvu wa 1943, Atuman asambisha kulejan mulong wa Chitentam cha Uteokras chikweta mutu wa mulong ulondina anch “La nation libre”, chading chifanyidina kusadikin mu misumb 12 ya Mexique. * (Tal mazu ma kwinshin.) Asala mwamu padjalau yijingidij yibombakeshinau. Yom yiney ading ayisadin ni yijingidij yaad yikwatijadina pamwing ni ya kujal pa makij, chijingidij chimwing chading chimeken kurutu ni chikwau kwinyim. Atuman asadinang yijingidij yiney mulong wa kulejan yitentam yau kudiosh kamu mu muvu wa 1936.

Gazet wa mu muvu wa 1944 ulejena chisak cha akadivar adjita yijingidij yaad mu Musumb wa Mexique

Kulejan nich yijingidij yiney kwaya kamu kurutu nakash mu Musumb wa Mexique chawiy chasala anch gazet La Nación afunda piur pa Atuman akumangana ku chitentam chinicha anch: “Dichuku diakusambish ayileja kutazuk antu avud. Dichuku dia kaad, eza avud nakash.” Egliz Katolik kasangarap mulong wa uvud winou, chawiy asambisha kuyipompat Atuman. Pakwez akadivar nau anambaz kovap wom. Adandamena kulejan mulong wa chitentam. Mutu wa mulong ukwau wa La Nación walonda anch: “Musumb wawonsu wayimana.” Walonda anch akadivar nau anambaz “ikala mudi yijingidij yiney ya yom yaad yibombinau.’” Mutu wa mulong wamekesha yipich ya akadivar nau anambaz mu jinjil ja Musumb wa Mexique. Piur pa chipich ading afundinap anch: “Kwizul mu jinjil.”

MAULAL MADING “MAZIYINA NI MAKWETA CHIRUNGIL KUSUTAMU PANSH PA SIMA”

Mu mivu yiniya, Atuman avud asala usu nakash mulong wa kushik ku yitentam yikemp yasadikang mu Mexique. Akadivar ni anambaz avud adiokala ku mal ma kulemp kwakad kwikal train ni jinjil jijim. Chikumangen chimwing chafunda anch: “Mutapu umwing wa kwambamb wading ching kusutin foni.” Chawiy antu atumangau mulong wa kuya ku musumb ukusadikina chitentam endinang pa atubar ap afanyina kwend machuku mavud mulong wa kutan ndond kusutidina train.

Atuman avud ading kwau atuzwendj ni asalang usu nakash mulong wa kushik ku chitentam. pashikangau kwinikwa, avud ashikenang ku yikumbu ya Atuman, ni ayakang nawamp ni ayimekeshinang rukat. Akwau alalang kwau mu Yot ya Want. Chisu chimwing, akadivar piswimp 90 ashikena ku biro wa mutiy, alalang pa makarton ma mikand. Annuaire walonda anch akadivar ajikitisha nakash mulong wa makarton minam mulong mading “maziyina ni makweta chirungil kusutamu pansh pa sima.”

Kudi Atuman inay, chading chitin kusal usu nakash mulong wa kukumangan pamwing ni akadivar nau anambaz. Nlel unou, kudi Atuman 850000 ni kusut mu Mexique, ni akwet niyau mwikadil wawiy umwing wa kujikitish. * (Tal mazu ma kwinshin.) Rapor wa Annuaire wa muvu wa 1949 walonda anch usu wasalau akadivar wakepishap mushiku wau mulong wa kumwifukwil Yehova. Chitentam chin chawonsu chasalangau, wading “mutu wa mulong ujim wa mambamb mau mu chisu chilemp kupwa kwa chitentam chinech.” Chipul chiyipulangau akadivar chisu ni chisu chading anch: “Chisu ik kand tukwikala ni chitentam chikau?”—Mu Yom Yetu Yikur ya mu Amérique Centrale.

^ par. 9 Kukwatijan ni Annuaire wa mu muvu wa 1944, chitentam chinech chayijikisha nawamp Atuman a mu Mexique.

^ par. 14 Mu Mexique, antu 2262646 akumangen ku Chivurikish cha muvu wa 2016.