Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 8 , 2017

“Chisambu cha Nzamb Chisutila Ronganyin Rawonsu”

“Chisambu cha Nzamb Chisutila Ronganyin Rawonsu”

Chisambu cha Nzamb chisutila ronganyin rawonsu chikwez kulam michim yen.FILIP 4:7, TMK.

MIMINY: 39, 47

1, 2. Yom ik yamushikena Paul ni Silas mu musumb wa Filip? (Tal chipich cha kwisambishin.)

TONGIN mutapu wasadika yom. Mwading mukach mwa uchuku. Amishoner aad, Paul ni Silas, ading mu kapalikany ka rukan kajadina bwi mu musumb wa Filip. Katwishap kuyinkek mulong ading ayikasin ku mend ni jinyim jau jading jiswanin nakash mulong wa yibul yayichintau. (Midimu 16:23, 24) Pamanch pa dichuku dinidia, chisak cha antu cheza chamukakalijan ku usu Paul ni Silas pa sok. Pawiy pinapa, asambisha kuyirumburish. Ayapodila masun mau ni ayibula nfimbu nakash. (Midimu 16:16-22) Kuburen kutentam mud ik! Paul wading mwan a ngand wa Rom, ni wading uwanyidin kumurumburish nawamp. *—Tal mazu ma kwinshin.

2 Pa chisu chidiau mu rukan, Paul wafanyina kutong piur pa yom yasadika dichuku dinidia ni piur pa antu ading ashicha  mu musumb wa Filip. Kadingap ni sinagog mu musumb wau, mudi mwading misumb yikwau yendinay Paul. Chawiy in Yuda ifukwilang pol pa yis ya musumb piswimp ni kawit. (Midimu 16:13, 14) Ov, chinech chading mulong mu musumb mwadingap kwau amakundj dikum a in Yuda, uvud wa antu wading witinau mulong wa kwikal ni sinagog? Antu ading ashicha mu musumb wa Filip ading kwibaz nakash mulong ading an a ngand ya Rom. (Midimu 16:21) Pamwing ap chawiy chatongau anch Paul ni Silas ading in Yuda, kakutwishap kwikal an a ngand ya Rom. Tukwetap kamu kashinsh pa mulong winou, pakwez twij anch Paul ni Silas ayiteka mu rukan pakad mulong.

3. Mulong wak Paul kwovap kurumbuk chisu chamutekau mu rukan, pakwez wading ni chitongijok ik?

3 Pamwing ap Paul watonga mutapu ik washikay mu musumb wa Filip. Angond akemp kurutu, Paul wading mutambu ukwau wa Karung wa Eje, mu Aziy Mukemp. Padingay kwinikwa, spiritu utumbila wamukangesha kulejan mu jindond kanang. Chading mudi spiritu utumbila wading umubachikin kuya ndond yikwau. (Midimu 16:6, 7) Pakwez kwisu? Padingay mu Trowas, Paul wamana mu chishimushimu akat kumulej anch: “Ez ku Masedon.” Rusot ra Yehova rading rimeken kamu patok! Chawiy Paul waya kapamp kamwing ku Masedon. (Tang Midimu 16:8-10.) Pakwez chom ik chashikena? Kupwa kamu kwa kushik mu Masedon, amuteka mu rukan! Mulong wak Yehova walika anch yom yiney yimushiken Paul? Wafanyina kusal machuku minch mu rukan? Ap anch Paul wading ukat kwiyipul piur pa yom yiney, walama ritiy rikash ni wadandamena kwikal ni musangar. Ndiy ni Silas asambisha “kulembil ni kuwang miminy ya kumutumbish nich Nzamb.” (Midimu 16:25) Chisambu cha Nzamb chalama michim ni manangu mau.

4, 5. (a) Yom yikata kutushiken yikutwish kufanikan mutapu ik ni ya Paul? (b) Mutapu ik waswimpa yom yamushikena Paul mu mutapu wakad kuchingejin?

4 Kand kal wiyovangap mudi Paul? Pamwing ap yisu yimwing mu mwom wey wita ukwash wa Nzamb mulong akukwasha kukwat mupak ni wiyova anch wading kulondul ukwash wa spiritu utumbila. Pakwez kupwa kwa yiney, wikala ni milong yivud ni wasala kuswimp nakash mu mwom wey. (Mulej 9:11) Katat anch watongin piur pa yom yiney, ukutwish kwiyipul anch mulong wak Yehova walika anch yom yiney yishikena. Yom ik yikutwisha kukukwash chakwel udandamena kujijaman ni kumuchingejin kamu Yehova? Tukutwish kutan chakul kusutin yom yamushikena Paul ni Silas kupwa kwa yom yiney.

5 Padingay Paul ni Silas akat kuwang, yom yivud yakad kuchingejin yasambisha kusadik. Chakusambish, kwasadika kuzal kwa divu kukash. Yis ya rukan yazurika kapamp kamwing. Kupwa, moj yading yiyikasinau antu a rukan yasuburika. Chad Paul wamukangesha kalam wa rukan anch alika kwijip, ni kalam wa rukan ni dijuku diend diawonsu ayibatisha. Mukwacha pamanch, antakel a musumb ayituma amasalay kuya kumubudish Paul ni Silas mu rukan ni kuyilej anch adiokala mu musumb mu chisambu. Chisu chajinguninau antakel anch Paul ni Silas ading an a ngand a Rom, ijika anch arumbuka nakash ni eza chad ayinau mulong wa kuyibudish. Pakwez kurutu kwa  kubudik mu musumb, Paul ni Silas alonda anch aya bil amuladika Lidi, nambaz musu wabatishau. Asadina kand chisu chinech mulong wa kuyikasikesh akadivar akwau a mu musumb wa Filip. (Midimu 16:26-40) Tal mutapu waswimpa yom yiney pakad kulab!

CHISAMBU “CHISUTILA RONGANYIN RAWONSU”

6. Katat tukwisambin yom ik ni tukuchirikin yom ik?

6 Yom ik twilejidina kusutin yom yiney? Yehova ukutwish kusal yom yakad kuchingejin, chawiy tufanyidinap kwiyakamish anch tumen mar. Twij anch dilejan dined diamushimokisha nakash Paul kusutin yom yayifundinay akadivar a ku Filip piur pa yakamish ni chisambu cha Nzamb. Mu mutu wa mulong winou tukwisambin mazu ma Paul madia mu Filip 4:6, 7. (Tang.) Ni tukuchirikin nsangu jimwing ja mu Bibil jilejena mutapu wasalay Yehova yom yakad kuchingejin. Kupwa chad tukwisambin mutapu ukutwisha “chisambu cha Nzamb” kutukwash kujijamen mar mu kumuchingejin kamu Yehova.

Yehova ukutwish kusal yom yakad kuchingejin, chawiy tufanyidinap kwiyakamish nakash chisu tumena mar

7. Dilejan ik diafundishay Paul chisu chayifundinay akadivar a ku Filip, ni yom ik tukutwisha kwilejinaku?

7 Chisu chatangau akadivar a ku Filip mukand wa Paul, chom ik chatongau piur pa mukand winou? Avud pakach pau avurika yom yamushikena Paul ni Silas ni mutapu wayikwashau kudi Yehova mu mutapu wakad kuchingejin. Dilejan ik diayifundishay Paul mu mukand wend? Dilejan diading anch: Kangal wiyakamishany. Lembilany ni ukutambulany “chisambu cha Nzamb chisutila ronganyin rawonsu.” Mazu minam marumburikin ik? Ma Bibil mamwing makarumwin anch “chisutil yilat yetu yawonsu” ap anch “chisutil yitongijok ya antu awonsu.” Chawiy Paul wading ulondin anch “chisambu cha Nzamb” chishimokishen nakash mu mutapu wakad kutwish kuchitongin. Yisu yimwing twijingap mutapu ukupwa milong yetu, pakwez Yehova wij. Ni ukutwish kusal yom yakad kuchingejin.—Tang 2 Pita 2:9.

8, 9. (a) Ap anch Paul wamana mar mu Filip, yom ik yiwamp yamushikena mulong wa yom yiney? (b) Mulong wak akadivar a mu Filip afanyina kuchingejin mazu ma Paul?

8 Mukand wa Paul wafanyina kuyikasikesh akadivar a ku Filip patonginau piur pa yom yayisadinau kudi Yehova mivu dikum yasuta. Ap anch Yehova walika anch Paul ni Silas amana mar mu mutapu wakad kutentam, yom yiney yasadika mulong wa “kulond mulong wa rusangu ruwamp ni kurukasikesh.” (Filip 1:7) Antakel inay a musumb wa Filip kameshap kand chikumangen chisu cha win Kristu mar. Pamwing ap mulong Paul walonda anch udi mwan a ngand wa Rom, mwin kwilej Luka watwisha kushal mu musumb wa Filip kupwa kwa Paul ni Silas kudiokalamu. Luka wapana chad ukwash nakash kudi in Kristu asu a mu Filip.

 9 Patangau akadivar a mu Filip mukand wa Paul, ijika anch mazu mend madingap ma mu yitongijok yend. Paul wamana mar nakash. Ap chisu chayifundinay akadivar inay, wading mu rukan mu chikumbu chend mu Rom. Pakwez wadandamena kumekesh anch ukwet “chisambu cha Nzamb.”—Filip 1:12-14; 4:7, 11, 22.

‘KANGAL WIYAKAMISHANY MULONG WA CHOM CHAWONSU’

10, 11. Yom ik tufanyidina kusal anch twiyakamishin piur pa mulong, ni yom ik tufanyidina kuchingejin?

10 Yom ik yikutwisha kutukwash chakwel kangal ‘twiyakamisha piur pa chom chawonsu’ pakwez twikala ni “chisambu cha Nzamb”? Mazu ma Paul kudi in Filip mamekeshin anch ang twiyakamishin piur pa mulong, kulembil kudi kwa usey nakash. Chawiy anch twikal ni yakamish, tufanyidin kutek yakamish yetu mu malembil. (Tang 1 Pita 5:6, 7.) Anch wamulembil Yehova, ikal kamu nich kashinsh anch ukat kukubangin. Mujikitisha chisu chawonsu mulong wa yiyukish utambwila. Ni kangal wavuramen anch Yehova ukutwish “kusal yom yivud yipandakena yipul yetu ap yom yitutongila.”—Efes 3:20.

11 Mudi Paul ni Silas, tukutwish kushimok mulong wa yom yisadinay Yehova mulong wa kutukwash. Yikutwishap kwikal yom yakad kutongin, pakwez yidi yom yitukweta nich kuswir chisu chawonsu. (1 Korint 10:13) Chinech chirumburikinap anch tufanyidin kwetu kushakam, pakad kusal chom ni kuchingel anch Yehova ukurijek ap kupwish milong yetu. Tufanyidin kusal yom kukwatijan ni malembil metu. (Rom 12:11) Yisal yetu yimekeshin anch tudi in kashinsh ni anch tumwinkishin Yehova yom mulong wa kutuyukish. Tufanyidinap kuvuramen anch Yehova ukutwish kusal yom kupandakanamu yitumwitina ap yituchingejina anch atusadin. Yisu yimwing ukat kutukashimwish pa kutusadin yom yakad kuchingejin. Chawiy el tushinshikinany yilakej yimwing yikukasikesha kashinsh ketu mu ukaliweny ukwetay Yehova wa kutusadin yom yakad kuchingejin.

YILAKEJ YIMEKESHINA MUTAPU UKATAY YEHOVA KUSAL YOM YAKAD KUCHINGEJIN

12. (a) Yom ik yasalay Mwant Ezekias chisu chamwovishau wom kudi Mwant Sanakerib? (b) Yom ik twilejidina ku mutapu wapwishay Yehova mulong winou?

12 Mu Bibil mudi yilakej yivud yimekeshina mutapu ukatay Yehova kusal yom yakad kuchingejin. Chilakej, padingay Ezekias Mwant wa Yuda, mwant wa Asiria Sanakerib wandama ni wakwata misumb yawonsu ya Yuda kudioshaku Yerusalem. (2 Ant 18:1-3, 13) Kupwa Sanakerib weza chad kurishikish Yerusalem. Yom ik yasalay Mwant Ezekias? Chakusambish, wamulembila Yehova mulong wa kumukwash ni wita chiyul kudi Isay, muprofet wa Yehova. (2 Ant 19:5, 15-20) Kupwa, Ezekias wamekesha anch wading ni manangu pa kufut chibau chamwitau kudi Sanakerib. (2 Ant 18:14, 15) Kupwa kwa yawonsu, Ezekias warijeka musumb mulong wa kuyikangesh akankuny pakwezau kuyitekin chibeng. (2 Jinsangu 32:2-4) Mulong winou wapwa mutapu ik? Yehova watuma mwangel ni wajipa amasalay 185000 a Sanakerib mu uchuku umwing. Ezekias kachingejinap anch yom yiney yikusadik mwamu!—2 Ant 19:35.

Dilejan ik twilejina kusutin yom yamushikena Josef?—Disambishil 41:42 (Tal paragraf wa 13)

13. (a) Dilejan ik twilejina kusutin yom yamushikena Josef? (b) Yom ik yakad kuchingejin yamushikena Sara?

 13 Shinshikin yom yamushikena nsand Josef. Padingay mu rukan mu Idjibit, Josef katonginap anch ukez kikal muntu wa kaad ukweta usu nakash mu Ijibit ap anch Yehova ukez kamusadin mulong wa kupandish dijuku diend ku kabwakat. (Disambishil 40:15; 41:39-43; 50:20) Pakad ntaad yom yasalay Yehova yading yisutinamu yom yawonsu yading kutongin Josef. Tong kand piur pa Sara, ngakiril mband wa Josef. Mulong wading wapamin kal, ov, Sara wachingejina anch Yehova wafanyina kumukwash kuval mwan amwinend, anch wachingejina anch ukukwikal ni mwan kusutin mwilomb wend? Kuvadik kwa Isak kwading kwakad kuchingejin kamu kudi Sara.—Disambishil 21:1-3, 6, 7.

14. Kashinsh ik tukutwisha kwikal nich mudiay Yehova?

14 Tuchingejidinap anch Yehova apwisha milong yetu mu chilay kurutu kwa ngand yisu kwez. Ni tumwitinap Yehova anch atusadina yom yishimokishena nakash mu mwom wetu. Pakwez twij anch Yehova wayikwasha atushalapol end a pasak mu mutapu wakad kuchingejin. Ni Yehova  kaswimpinap. (Tang Isay 43:10-13.) Chinech chitwinkishin kashinsh mudiay ndiy. Tufanyidin kwikal nich kashinsh anch ukutwinkish usu tukweta nich kuswir mulong wa kusal rusot rend. (2 Korint 4:7-9) Yom ik twileja kal kusutil chilakej cha Ezekias, cha Josef ni cha Sara? Yehova ukutwish kutukwash ap anch tudi mu yisu yikash nakash anch twashal ashinshamena kudi ndiy.

Yehova ukutwish kutukwash ap anch tudi mu yisu yikash nakash anch twashal ashinshamena kudi ndiy

15. Yom ik yikutukwasha kwikal ni “chisambu cha Nzamb” ap anch tukwet milong, ni chinech chiswapel mutapu ik?

15 Mutapu ik tukutwisha kwikal ni “chisambu cha Nzamb” ap anch tukwet milong? Tufanyidin kudandamen kukasikesh urund wetu ni Yehova. Urund mudi winou uswapel kusutin difut dia Kristu Yesu. Difut didi pakach pa midimu yishimokishena ya Yehova. Mulong wa difut, ukutwish kutulikishin yitil yetu ni tukutwish kwikal ni kom kadia zwang ni tukutwish kumusejin ndiy.—Yohan 14:6; Jakobu 4:8; 1 Pita 3:21.

CHISAMBU CHIKULAM MICHIM NI MANANGU MEN

16. Yom ik yikushikena anch twatambul “chisambu cha Nzamb”? Let chilakej.

16 Yom ik yikushikena anch twatambul “chisambu cha Nzamb chisutila ronganyin rawonsu”? Bibil ulondin anch “chikulam” michim ni manangu metu. (Filip 4:7) Mu dizu dia Grek kulond anch “kulam,” kwading kulond kwa usalay kwamekesha chisak cha amasalay atekau mulong wa kuking musumb. Antu ading achisha mu musumb wa Filip ading ayilamin kudi chisak cha amasalay mudi chinech. Afanyina kulal nawamp uchuku mulong ading ij anch musumb wau auchidijin. Mutapu wawiy umwing, anch tukwet “chisambu cha Nzamb,” tukwiyakamishap ni manangu ni michim yetu yikwikal zong. Twij anch Yehova ukat kutubangin ni ukatin anch tuya kurutu. (1 Pita 5:10) Ni chinech chikat kutuking ku yovil ya kwiyakamish nakash ap kuziy.

17. Yom ik yikutwisha kutukwash chakwel tumuchingejina Yehova pa chisu cha mar makash?

17 Piswimp ap mar makash mezin mulong wa antu awonsu. (Mateu 24:21, 22) Twijap kamu nawamp yom yikumushikena muntu ni muntu. Pakwez, tufanyidinap kwiyakamish nakash piur pa chisu chinicha. Ap anch twijap kamu yom yawonsu yikusalay Yehova, pakwez tumwij Nzamb wetu. Twij yom yasalay pakur mulong wa atushalapol end ashinshamena. Tumen anch chikalap nchik yom yikushikena, Yehova ukwikal nich kashinsh anch chitongijok chend chiwanyin. Ni ukusal mwamu mu mutapu wakad kuchingejin! Chawiy, chisu chin chawonsu chikatay Yehova kutusadin chom kanang, tukat kuman mu mutapu ukwau anch ‘chisambu cha Nzamb chisutil ronganyin rawonsu.’

^ par. 1 Chimeken kand anch Silas niyend wading mwan a ngand wa Rom.—Midimu 16:37.