“Nzamb utentamin, ndiy kakutwishap kuvuramen yisalijok yen ap rukat ruumekeshinanya [mulong wa] dijin diend.”—HEBEREU 6:10.

MIMINY: 39, 30

1. Maswir ik ma chivadik tukweting etu awonsu?

UKWIYOV nchik anch muntu wija ni ulimishina wavuramen dijin diey, ap kand chiyimp nakash, kakuvurikinap? Chinech chikutwish kukuziyish nakash. Mulong wak? Mulong etu awonsu tukweting maswir ma chivadik ma kwikal witiyinau kudi antu akwau. Pakwez tukatin anch asala yom yivud kusutamu kwau kutwijik chitudia. Tukatin ijika anch tudi antu a mutapu ik ni yom twasala.—Kuchind Michid 11:16; Job 31:6.

2, 3. Yom ik yikutwisha kushiken ku maswir metu ma kwikal witiyinau kudi antu akwau? (Tal chipich cha kwisambishin.)

2 Pakwez anch tubabelap, maswir minam ma chivadik ma kusot kwijikan makutwish kwikal mayimp. Mangand ma Satan makutwish kutubachik kwikal ni ntumb ap kwikal muntu wa usey nakash. Anch yom mudi yiney yashiken, tusadinap anch Tatukwetu wa mwiur, Yehova Nzamb, atambula kwijikan ni difukwil yimufanyidina.—Kujingunik 4:11.

3 Pa chirung cha Yesu, antakel amwing a chirelijon ading ni  chitongijok chiyimp piur pa kwijikan. Yesu wayibabesha in kwilejend anch: “Yibabelany alej a Yijil mulong awiy akatil kwendangan adjit ankandj alemp, akatil ching antu ayilangwishang awiy mu jindond mudia antu avud. Akatil kushakam mu jindond ja uyaj mu yikumbu ya kulembil, akatil kand kushakam jindond ja katumb ku misambu.” Walonda kand anch: “Akez kuyilej kadimu kupandakan!” (Luka 20:46, 47) Chinyim nich awiy, Yesu wamubaza mwadia mufu kazwendj wapana nfalang jaad jikemp nakash, ap anch pamwing ap kwikil muntu ap umwing wamana yom yasalay. (Luka 21:1-4) Chakin kamu, chitongijok cha Yesu piur pa kwijikan chading chishalijadin nakash ni cha antu akwau. Mutu wa mulong winou ukutukwash kwikal ni chitongijok chiwamp piur pa kwijikan, chitongijok chikatinay Yehova Nzamb anch twikala nich.

MUTAPU UWAMP WA KWIJIKAN

4. Wisu mutapu uwamp wa kwijikan ni mulong wak?

4 Mutapu ik uwamp wa kwijikan? Udiap mutapu wa kwijikan ukatinau antu avud kwikal nich kusutin ku kwilej nakash, kwikal mwin kwisak mujim ap kwikal ni ntumb mu yom ya kwipuwangej ya mangand. Paul warumburila yom yiney palonday anch: “Pakwez, mulong katat washikenany kal kumwijik Nzamb, ap wikalany kal ijikena kudi Nzamb, ov, mulong wak uchirikinanya kand ku yom ya pa dishin yiziyina ni ya chamwamu ni kukat kuyisadin mudi asuk kapamp kakwau?” (Galatia 4:9, NWT) Dilau diwamp mud ik dia kwikal “ijikena kudi Nzamb,” Nyikel Mujim wa mangand mawonsu! Yehova wij chitudia, utukatin ni ukatin anch twikala piswimp ni ndiy. Yehova watutanga chakwel tutwisha kwikal arund nend.—Mulej 12:13, 14.

5. Yom ik tufanyidina kusal chakwel atwijika kudi Nzamb?

5 Twij anch Moses wading murund wa Yehova. Pamwitay Yehova anch: “Nlejap jinjil jey,” Yehova wamwakula anch: “Nikusal yom yawonsu yiwangipula, mulong ey watapil kal kwey dilau diam, niyam nikwij dijin diey.” (Kubudik 33:12-17) Yehova ukutwish kutwijik pakampwil. Pakwez yom ik tufanyidina kusal mulong wa kwikal arund a Yehova? Tufanyidin kumukat ni kupan mwom wetu kudi ndiy.—Tang 1 Korint 8:3.

6, 7. Yom ik yikutwisha kutubachik kushadish urund wetu ni Yehova?

6 Pakwez, tufanyidin kudandamen kulam urund wetu wa usey nakash ni Tatukwetu wa mwiur. Mudi in Kristu a kusambish a mu Galatia, tufanyidin kulik kusal mudi asuk a “yom ya pa dishin yiziyina ni ya chamwamu” ya mangand minam, pamwing ni ntumb ni kwijikan kudia mu mangand. (Galatia 4:9) In Kristu a mu Galatia inay ading amwijikin kal Nzamb ni Nzamb wading wayijikin kal. Pakwez Paul walonda anch akadivar inay amwing ading “achirikin kal kand” ku yom ya chamwamu. Chawiy mu kulond kukwau, Paul wading uyipwil anch: ‘Mulong wak uchirikidinany ni kusambish kusal kand mudi asuk mulong wa yom ya chamwamu ni ya usup?’

7 Ov, chom mudi chinech chikutwish kand kutushiken niyetu? Inge, chikutwish. Mudi Paul, patwijika uyakin, chimeken anch twalika ntumb ni kwijikan kwa mu mangand ma Satan. (Tang Filip 3:7, 8.) Pamwing ap twalika kutambul nfalang jikatau kupan mulong wa kwilej nich shikol yijim, mudimu uwamp ap mitapu kampand ya kwikal ni nfalang  jivud. Ap pamwing twading twijiken nakash ap ampich mulong twading ni ukaliweny mu mizik ap mu masengan. Pakwez twalika yom yiney yawonsu. (Hebereu 11:24-27) Chikutwish kwikal usup anch twinan piur pa mipak yiwamp ni kutong anch mwom wetu wafanyina kwikal uwamp anch twadandamena kusal yom yiney! Chitongijok mudi chinech chikutwish kutubachik kuchirik kand ku yom ya mangand minam, yom twakata mupak anch yading “yiziyina ni ya chamwamu.” *—Tal mazu ma kwinshin.

KASIKESH MASWIR MEY MA KWIKAL WIJIKENA KUDI YEHOVA

8. Yom ik yikukasikesha maswir metu ma kwikal ijikena kudi Yehova?

8 Mutapu ik ukutwisha kukul nakash maswir metu ma kwikal ijikena kudi Yehova chakwel tulika kukat kwijikan kwa mangand? Tufanyidin kushinshikin uyakin waad wa usey. Chakusambish, Yehova ukat kuyijik chisu chawonsu antu amusadidina nich kushinshaman. (Tang Hebereu 6:10; 11:6) Yehova uyimen atushalapol end ashinshamen mudi adi a usey nakash, chawiy umen anch chikutwishap kwikal ‘chitentamina’ anch wayivuramen. Yehova wijing “aend.” (2 Timote 2:19) Ndiy “wij njil ya in kutentam” ni wij mutapu wa kuyipandish.—Kuseng 1:6; 2 Pita 2:9.

9. Let yilakej yimekeshina mutapu wamekeshay Yehova dilau diend kudi antu end.

9 Yisu yimwing, Yehova wayimekeshina antu end dilau mu mitapu ya pakampwil nakash. (2 Jinsangu 20:20, 29) Chilakej, tong piur pa mutapu wayipandishay antu end ku Karung Musuz chisu chading chiyilondwilau kudi amasalay a usu a Farao. (Kubudik 14:21-30; Kuseng 106:9-11) Chinship chinech chading chishimwokishen nakash ni chasala anch antu ading ndond yinaya adandamena kwisambin pa chom chinech kupwa kwa mivu 40. (Joshua 2:9-11) Chakin kamu chitukasikeshin kuvurik mutapu wayikatay Yehova antu end ni kusadin usu wend mulong wa kuyipandish pasak, mulong piswimp ap Gog wa Magog ukuturishikish. (Ezekiel 38:8-12) Pa chisu chinacha, tukwikal ni musangar nakash anch twachingel dilau dia Nzamb, kulik dia mangand.

Yisu yimwing Yehova ukat kuyifut atushalapol end mu mitapu yakad kuchingejin

10. Uyakin ik ukwau tufanyidina kushinshikin?

10 Uyakin wa kaad tufanyidina kushinshikin udi anch Yehova ukutwish kutwijik mu mitapu yitwakad kuchingejin. Anch antu asal yom yiwamp mulong kwau wa kuyibaz kudi antu akwau, Yehova kakuyifutap. Mulong wak? Mulong mudi mwalonday Yesu, anch antu akwau ayibaz, dined diawiy difut diau. (Tang Mateu 6:1-5.) Ku mutambu ukwau, Yehova ukat ‘kuman mu ujindj’ antu akad kubazau mulong wa yom yiwamp yisadinau kudi antu akwau. Ukat kuman yom yisadinau ni ukat kuyifut ap kuyiyukish. Ni yisu yimwing Yehova ukat kuyifut atushalapol end mu mitapu yakad awiy kutongin.

 YEHOVA WAMWIJIKA CHANGADIM WIKEPISHINA MU MUTAPU WAKAD KUTONGIN

11. Mutapu ik Yehova wamwijikay Mariy?

11 Yehova wamutonda mband umwing changadim dijin diend Mariy kwikal maku wa Mwanend Yesu. Mariy wading ushich mu kamusumb kakemp ka Nazaret, kading kulemp ni Yerusalem mwading tempel muwamp nakash. (Tang Luka 1:26-33.) Mulong wak Yehova wamutonda Mariy? Mwangel Gaburiel wamuleja Mariy anch ‘watap kal dilau kudi Nzamb.’ Tukutwish kuman anch wading murund wa piswimp nakash wa Yehova kusutin yom yamulejay mwanamakwend Elizabet. (Luka 1:46-55) Yehova wading ukat kumushinshikin Mariy, ni wamwinkisha chiyukish chakad kuchingejin mulong wading ushinshamen kudi ndiy.

12, 13. Mutapu ik wamutumbishau Yesu chisu chavadikay ni chisu chamutwalau kudi Mariy mu tempel kupwa kwa machuku 40?

12 Pavadikay Yesu, Yehova wamuleja nany piur pa kuvadik kwa Mwanend? Kayilejap antakel ajim ading ayikedina mu Yerusalem ni mu Betlehem. Pakwez, watuma angel kudi atufung ikepishina ading alamina amikoku pol pa musumb wa Betlehem. (Luka 2:8-14) Kupwa atufung inay eza kumutal mwan wavadika. (Luka 2:15-17) Mariy ni Josef afanyina kushimwok nakash pamanau Yesu akat kumulimish mu mutapu winou. Mutapu ukatay Yehova kusal yom ushalijadin nakash ni mutapu ukatay Djabul kusal yom. Patumay Satan a astrolog mulong wa kumutal Yesu nau anvajend, antu awonsu a mu Yerusalem ijika piur pa kuvadik kwa Yesu ni chinech chaleta kanrumbangesh nakash. (Mateu 2:3) Mudi chibudikin, an avud akad kwau mulong ayijipa.—Mateu 2:16.

13 Chijil cha Yehova chayilejay in Isarel chading chilondin anch machuku 40 kupwa kwa kuval mwan ikundj, maku wading ufanyidin kupan yakupesh kudi Yehova. Chawiy Mariy, Josef pamwing ni Yesu adiokala mu Betlehem mulong wa kuya mu tempel wa mu Yerusalem pa chintampu cha akilometre chinan. (Luka 2:22-24) Mwi njil, Mariy wading ufanyidin kwiyipul anch in kupesh afanyina kusal chom kampand cha  pakampwil mulong wa kumutumbish Yesu. Yesu amutumbisha, pakwez mu mutapu wakadiay Mariy kuchingejin. Yehova wamutonda Simeyon, muntu “muwamp, wading umulimishin Nzamb,” ni muprofet mband Ana, mwadia mufu wading ni mivu 84, mulong wa kulejan anch Yesu ukwikal Mesia washilaumu, ap Kristu.—Luka 2:25-38.

14. Mutapu ik wamufutau Mariy kudi Yehova?

14 Ov, Yehova wadandamena kumwijikish Mariy mulong wamulila ni kumulam Yesu nich kushinshaman? Mwaning. Nzamb wikala nich kashinsh anch yom yimwing yalonday Mariy ayifunda mu Bibil. Chimeken anch Mariy kadingap ni mutapu wa kwendangan ni Yesu mu mivu yisatu ni chikunku yasalay mudimu wa kulejan. Pamwing ap mulong wading mwadia mufu, wafanyina kushakam ku Nazaret. Chawiy wishalap yom yiwamp yivud yamanau antu akwau. Pakwez wadingaku chisu chafay Yesu. (Yohan 19:26) Kupwa, Mariy wading kand mu Yerusalem pamwing nau in kwilej a Yesu kurutu atambula spiritu utumbila pa Pentekot. (Midimu 1:13, 14) Chimeken anch niyend amuzizila many pamwing nau in kwilej akwau. Anch chading mwamu, chirumburikin anch niyend watambula mutapu wa kwikal pamwing ni Yesu mwiur chikupu. Dined didi difut dipandakena kuwap mulong wa mudimu wend ushinshamena wasalay!

YEHOVA WAMWIJIKA MWANEND

15. Mutapu ik wamekeshay Yehova dilau diend kudi Yesu chisu chadingay pa divu?

15 Yesu kasotap kumutumbish kudi antakel a marelijon ap a chipolitik. Pakwez tupamp tusatu, Yehova walonda kamu kudiokal mwiur ni chinech chasala Mwanend ijika anch Tatukwend umukatin. Chinech chafanyina kumukasikesh Yesu nakash! Kupwa kamu kwa kumubatish Yesu mu Wit wa Yordan, Yehova walonda anch: “Ey udi Mwanam unikatila nakash. Am nikat kusangar mulong weyey.” (Mateu 3:17) Chimeken anch Yohan Mubatish ndiy kusu muntu umwing watesha mazu minam. Kupwa, piswimp muvu umwing kurutu kwa  Yesu kufa, atwimbuy end asatu atesha palonday Yehova piur pa Yesu anch: “Winou udi mwanam unikatila, nikat kusanger mwi ndiy, muteshany.” (Mateu 17:5) Kapamp ka nsudiel, machuku makemp kurutu kwa Yesu kufa, Yehova walonda kand kudi Mwanend kudiokal mwiur.—Yohan 12:28.

Yom ik wilejidina kusutil mutapu wamwijikau Yesu kudi Yehova? (Tal paragraf wa 15-17)

16, 17. Mutapu ik wamutumbishau Yesu kudi Yehova mu mutapu wakad kuchingejin?

16 Yesu wading wij anch antu akumutazuk anch mwin masaal ni anch wafanyina kufa rufu ra usany nakash. Pakwez, walembila anch rusot ra Nzamb risadika, ridiap rendendiy. (Mateu 26:39, 42) ‘Wajijamena mutond wa mar, wapipeja usany,’ mulong wakata anch amwijik kudi Tatukwend, kadiap kudi antu. (Hebereu 12:2) Mutapu ik wamwijikau Yesu kudi Yehova?

17 Padingay Yesu pa divu, walembila mulong ikala kand ni katumb kadingay nich pasak, chisu chadingay mwiur ni Tatukwend. (Yohan 17:5) Bibil kalejenap ndond ap yimwing anch Yesu wachingeja kwikal ni katumb nakash. Kachingejinap kutambul difut dia pakampwil mulong wasala rusot ra Yehova pa divu. Pakwez yom ik yasalay Yehova? Wamutumbisha Yesu mu mutapu wakadiay ndiy kuchingejin. Yehova pamuvumbulay Yesu, wamuteka pa ‘ndond ya piur’ mwiur. Wamwinkisha kand Yesu spiritu wakad kufang, chom chading chakad kal kutambulangap kudi muntu mukwau! * (Tal mazu ma kwinshin.) (Filip 2:9; 1 Timote 6:16) Winou wading mutapu ushimwokishena mud ik wamufutau Yesu kudi Yehova mulong wa mudimu wend ushinshamena!

18. Yom ik yikutukwasha kukimb dilau dia Yehova kulik dia mangand?

18 Chom ik chikutukwasha kukimb dilau dia Yehova kulik dia mangand? Tufanyidin kushinshikin pa kwijik anch Yehova uyijing chisu chawonsu atushalapol end ashinshamena ni anch ukat kuyifut mu mitapu yakad kuchingejin. Tukutwish kusal usu wa kutongin mutapu ukutuyukishay Yehova mu machuku ma kurutu! Pakwez pa chisu chinech, pitudandamedina kujijamen milong ni yakamish mu mangand minam mayimp, tufanyidin kuvurik anch mangand minam makat kusut. Chawiy kwijikan mu mangand minam ni kwawiy kukusut. (1 Yohan 2:17) Pakwez Tatukwetu wa rukat, Yehova, kakavuramenap ap pakemp mudimu ni rukat retu tumumekeshidina mulong wa dijin diend, mulong ndiy “utentamin.” (Hebereu 6:10) Chakin kamu ukumekesh dilau diend kudi etu, pamwing ap mu mitapu yitwakad kutongin ap pakemp!

^ par. 7 Makarumun makwau ma Bibil masadidin dizu “yakad usey,” “yivundila,” “ya usup,” ni “ya ushon” pa ndond palondinau anch “ya chamwamu.”

^ par. 17 Difut dined diading diakad kuchingejin, mulong mwom wakad kufang kaujimbwilap mu Mifund ya Hebereu.