“Kudi Ey nizambwila mes mam, A Ey ushiching mu maur!”—KUSENG 123:1, TMK.

MIMINY: 143, 124

1, 2. Chom ik chirumburikina kumutal Yehova?

TUSHICH pa “yisu ya mar yikasikena nakash” kujijamen. (2 Timote 3:1) Ni mashakamin madandamedin kwikal makash nakash kurutu Yehova ashesha mangand minam mayimp ni kulet chisambu chakin pa divu. Mulong wa diyingishin dined, tukutwish kwiyipul anch: ‘Kudi nany nikata kukimb ukwash ni umutakel?’ Tukutwish kwakul pakad kulab anch “Kudi Yehova,” ni chinech chidi chakul chiwamp nakash.

2 Chom ik chirumburikina kumutal Yehova? Ni mutapu ik tukutwisha kwikal nich kashinsh anch tudandamedin kumutal ndiy chisu tukweta milong? Pakur, mwin kufund Bibil umwing warumburila mutapu chidia cha usey nakash kumutal Yehova chisu tukweta kuswir kwa ukwash. (Tang Kuseng 123:1-4.) Walonda anch ang twamutal Yehova, tudi mudi kashalapol umutadina mwant wend. Mutapu ik chidia mwamu?  Kashalapol ukat kumutal ap kumuchingejin mwant wend chakwel amwinkisha yakudia ni kumuchidij. Pakwez ufanyidin kand kumutal mwant wend nawamp chakwel atesha yom yikatinay mwant wend anch asala, ni kupwa ufanyidin kuyisal. Chilik chimwing, tufanyidin kwilej Dizu dia Nzamb nawamp dichuku diawonsu chakwel tutesha yom yikatinay Yehova anch tusala ni kupwa tufanyidin kuyisal. Mwamu tukutwish kwikal nich kashinsh anch Yehova ukutukwash chisu tukweta kuswir kwa ukwash.—Efes 5:17.

3. Yom ik yikutwisha kutuletin kampuw mu kumutal Yehova?

3 Ap anch twij anch tufanyidin kumutal Yehova chisu chawonsu, yisu yimwing tukutwish kwikal ni kampuw. Chinech chawiy kamu chamushikena Mart, murund wa piswimp wa Yesu. Mart wading “wiyakamishin nakash mulong wa midimu yivud.” (Luka 10:40-42) Anch muntu ushinshamena mudi Mart wikala ni kampuw ap anch Yesu wading nend pamwing, tukutwishap kushimwok anch niyetu tukutwish kwikal ni kampuw. Chawiy, yom ik yikutwisha kutuletin kampuw patumutadina Yehova? Mu mutu wa mulong winou, tukwisambin mutapu tukutwisha kushiken kwikal ni kampuw kusutin yom yisadinau antu akwau. Ni tukwilej mutapu tukutwisha kudandamen kumutal Yehova.

IKUNDJ USHINSHAMENA WASHADISHA DILAU DIEND

4. Mulong wak tukutwish kushimwok pa kutesh anch Moses washadisha chisend chend cha kwandam mwi Ngand ya Kushilamu?

4 Chakin kamu Moses wading umutadin Yehova chakwel amutakel. Bibil utulejin anch “wadandamena [kujijaman] mudi umumen Nzamb wakad kumekanang ku mes.” (Tang Hebereu 11:24-27.) Ulondin kand anch “mu Isarel kimwamekanap kand muruu wa Nzamb wading mudi Moses, ndiy kamu wijikijanay nend [Yehova] mpal ni mpal.” (Kuvurik Yijil 34:10) Pakwez ap anch Moses wading murund wa piswimp wa Yehova, washadisha chisend chend cha kwandam mwi Ngand ya Kushilamu. (Kuchind Michid 20:12) Yom ik yiyimp yasadika?

5-7. Yom ik yashikena kupwa kwa in Isarel kubudik mu Idjibit, ni yom ik yasalay Moses?

5 Piswimp angond aad kupwa kwa in Isarel kudiokal mu Idjibit, ni kurutu ashika ku Mukandu wa Sinay, chom chimwing chikash chashikena. Antu asambisha kunyinyit mulong kwadingap mem. Asambisha kumulond Moses nayimp ni ajimana nakash chawiy “Moses wamudidila [Yehova] anch: ‘Nikusal nchik nau antu inay? Awiy adi piswimp ni kwingas am mayal!’” (Kubudik 17:4) Yehova wamwinkisha Moses mbil jovikena kamu nawamp. Yehova wamuleja kusend mukombu wend ni kuubul ku diyal dia mu Horeb. Bibil ulondin anch: “Moses wasala mwamu kurutu kwa amakurump a in Isarel.” Kupwa mem mabudika, in Isarel ikala ni mem mavud ma kuna ni mulong wapwa.—Kubudik 17:5, 6.

6 Bibil utulejin anch Moses wapila ndond yinaya dijin anch Masaha, dirumburikina anch “Kupak,” ni Meriba, dirumburikina anch “Matend.” Mulong wak? “Mulong wa matend ma an a Isarel, mulong awiy amupaka [Yehova] ni kulond anch: ‘Ov, [Yehova] udi mukach mwetu anch bwat?’”—Kubudik 17:7.

7 Mutapu ik wiyovay Yehova piur pa yom yashikena ku Meriba? Wiyova anch in Isarel amubwambwil kal ndiy ni ulabu wend, chidiap anch amubwambwila Moses. (Tang Kuseng 95:8, 9.) Yom yasalau in Isarel  yading yiyimp nakash. Pakwez Moses wasala chom chiwamp. Wamutala Yehova ni kupwa walondula nawamp mbil jend.

8. Yom ik yasadika piswimp ni kwisudiel kwa weny wa in Isarel mwi mpay?

8 Pakwez, yom ik kand yasadika ya mutapu umwing kupwa kwa mivu 40? In Isarel ading piswimp ni kwisudiel kwa weny wau mwi mpay. Ashika pa ndond yimwing piswimp ni Kadesh, piswimp ni mwimbu wa Ngand ya Kushilamu. Ndond yiney ading ayitazukin kand anch Meriba. * (Tal mazu ma kwinshin.) Mulong wak? Mulong in Isarel anyinyita kand anch kakwetap mem ma kuna. (Kuchind Michid 20:1-5) Pa chisu chinacha, Moses warumbuka nakash.

9. Mbil ik japanay Yehova kudi Moses, pakwez yom ik yasalay Moses? (Tal chipich cha kwisambishin.)

9 Yom ik yasalay Moses pabwambwilau antu? Kapamp kakwau kand, Moses wamutala Yehova chakwel amutakel. Pakwez pa chisu chinech Yehova kamulejap Moses kubul ku diyal. Wamuleja Moses kusend mukombu wend, kuyitwal antu piswimp ni diyal ni kudilej diyal. (Kuchind Michid 20:6-8) Ov, Moses wasala mwamu? Bwat. Wiyakamisha nakash ni wajimana chawiy wayiswejena antu anch: “En in kubwambul, teshany katat. Ov, komb tukukubudishinany mem mu diyal dined?” Kupwa wabula mukombu mu diyal, kadiap kapamp kamwing pakwez tupamp twaad.—Kuchind Michid 20:10, 11.

Moses kaziyinap kwi mbil jisu jamwinkishau kudi Yehova

10. Mutapu ik wovay Yehova mulong wa yom yasalay Moses?

10 Yehova wajimana nakash mulong wa Moses. (Kuvurik Yijil 1:37; 3:26) Mulong wak Yehova wajimana mwamu? Diyingishin dimwing dikutwish kwikal anch Moses kaziyinap kwi mbil jisu jamwinkishau kudi Yehova.

11. Pabulay ku diyal, mulong wak Moses wafanyina kuyibachik in Isarel kutong anch Yehova kandiyap wasala chilay?

11 Kukutwish kwikal diyingishin dikwau diasala anch Yehova ajimana. Mayal majim mading ku Meriba wa kusambish mading makasiken nakash. Chikalap nchik usu ukutwishay muntu kubul nich ku mayal minam, kwikil muntu ukutwisha kuchingej anch kukubudik mem. Pakwez mayal mading ku Meriba wa kaad mading mashalijadin ni ma kusambish. Mayal mavud ma kwinakwa mading maziyin ni maswapela kusukumok. Mulong mayal minam mading maziyin, yisu yivud mem mapwekang ni matengamang mu divu. Mwamu, antu akutwish kwau kuvit mem minam anch apund mu diyal. Chawiy, pabulay Moses ku diyal pa ndond pa kudilej, ov, in Isarel afanyina kutong anch mem minam mibudikidin kwau aminau ni chidiap anch Yehova ndiy wasala kal chilay? * (Tal mazu ma kwinshin.) Tukutwishap kulond nich kashinsh.

 MUTAPU WABWAMBWILAY MOSES

12. Disu dikutwisha kwikal diyingishin dikwau diasala anch Yehova ajimana mulong wa Moses nend Aron?

12 Kukutwish kand kwikal diyingishin dikwau diasala anch Yehova ajimana mulong wa Moses ni Aron. Moses wayileja antu anch: “Ov, komb tukukubudishinany mem mu diyal dined?” Palonday Moses anch “tukukubudishinany,” pamwing ap wading ulondin piur pendendiy amwinend ni Aron. Yom yalonday Moses yadingap ya kalimish mulong kamwinkishap Yehova katumb kawonsu mulong wa chilay chinech. Kuseng 106:32, 33 ulondin anch: “Asarumuna kand ujim wa [Yehova] ku mem ma Meriba, chad Moses wamana mar mulong wa awiy. Awiy amusudisha ku muchim, chad walonda yom yakad kutongijok.” * (Tal mazu ma kwinshin.) (Kuchind Michid 27:14) Moses kamwinkishap Yehova ntumb yimuwanyidina. Yehova wamuleja Moses ni Aron anch: “Wabwambwilanya ku dizu diam.” (Kuchind Michid 20:24) Chinech chading chitil chijim nakash!

13. Mulong wak mutapu wamupupau Moses wading utentamina ni uwamp?

13 Yehova wading umuchingejidin nakash Moses ni Aron mulong ading atakedin antu end. (Luka 12:48) Kurutu kwa yiney, Yehova kitiyijap in Isarel a pa chirung chinacha andama mwi Ngand ya Kushilamu mulong amubwambwila. (Kuchind Michid 14:26-30, 34) Chawiy chading chitentamin ni chiwamp kumupup Moses kudi Yehova mu mutapu umwing chisu chabwambwilay. Mudi mwayisalau in kubwambwil akwau, Moses kamwitiyijap kwandam mwi Ngand ya Kushilamu.

DISHIN DIA MULONG

14, 15. Yom ik yamubachika Moses kumubwambwil Yehova?

14 Yom ik yamubachika Moses kumubwambwil Yehova? Shinshikin kand yom yilondinay Kuseng 106:32, 33 anch: “Asarumuna kand ujim wa [Yehova] ku mem ma Meriba, chad Moses wamana mar mulong wa awiy. Awiy amusudisha ku muchim, chad walonda yom yakad kutongijok.” Chawiy ap anch in Isarel amubwambwila Yehova, Moses ndiy wasula ku muchim ap wajimana. Waburena kwilam ni walonda pakad kutongijok piur pa yibudikin.

15 Moses wimika kumutal Yehova mulong wasala anch yisal ya antu akwau yimuletina kampuw. Kapamp ka kusambish panyinyitau antu mulong wa mem, Moses wasala yom yiwamp. (Kubudik 7:6) Pakwez pamwing ap waziya ni wiyakamisha mulong in Isarel abwambwila mu mivu yivud. Pamwing ap Moses wading utongidin kwend piur pa yovil yend amwinend pa ndond pa kukimb mutapu ukutwishay kumutumbish Yehova.

Tufanyidin kudandamen kumutal Yehova ni kumuziyin chisu chawonsu

16. Mulong wak tufanyidin kutongin piur pa yom yasalay Moses?

16 Anch muprofet ushinshamena mudi Moses wikala ni kampuw ni kusal chitil, chom chinech chikutwish niyetu kutushiken. Moses wading piswimp ni kwandam mwi Ngand  ya Kushilamu, niyetu tudi piswimp ni kwandam mwi ngand yisu. (2 Pita 3:13) Tusotinap ap pakemp kushadish dilau dined dia pakampwil. Pakwez mulong wa kwandam mwi ngand yisu, tufanyidin kudandamen kumutal Yehova ni kumuziyin chisu chawonsu. (1 Yohan 2:17) Malejan ik tukutwisha kwilejin ku kurumbuk kwa Moses?

KANGAL WITIY YOM YISADINAU ANTU AKWAU YIKULETINA KAMPUW

17. Mutapu ik tukutwisha kwipuk kushadish mwikadil wa kwilam anch twov ujim?

17 Kangal washadish mwikadil wa kwilam anch wajiman. Yisu yimwing, milong ya mutapu umwing yikat tushiken tupamp tuvud. Pakwez Bibil ulondin anch: “Chawiy kangal tuziyany mu kusal yom yiwamp, mulong mu chirung cha kwangul, tukez kwangul anch kituziyinap.” (Galatia 6:9, NWT; 2 Tesalonik 3:13) Anch chom kanang ap muntu watujimesh tupamp ni tupamp, ov, tukat kutongijok kurutu kwa kulond? Tukat kusop yovil yetu? (Jinswir 10:19; 17:27; Mateu 5:22) Anch antu akwau atusarumun, tufanyidin kwilej ‘kusha ujim pa ndond yau,’ kwawiy kulond anch kumushil Yehova chisu cha kumekesh ujim wend. (Tang Rom 12:17-21.) Ov, chinech chirumburikin ik? Pa ndond pa kujiman, tukat kumuchingel Yehova nich kushimpish muchim chakwel asala chom kampand piur pa mulong wetu  anch waman anch chidi cha usey. Anch twasal usu wa kufundakesh pa ndond pa kumutal Yehova, tukutwish kumuburen kalimish.

18. Yom ik tufanyidina kuvurik piur pa kulondul mbil?

18 Londul nich kudimuk mbil ja katat. Ov, tukat kulondul nich kushinshaman mbil ja katat jitwinkishinay Yehova? Tufanyidinap kwetu kudandamen kusal yom mudi mutapu twayisalang pakur mulong wa kwel anch twijididin kal kusal mwamu. Pakwez, tufanyidin kwikal aswapela kulondul mbil jisu jitwinkishinay Yehova kusutin dirijek diend. (Hebereu 13:17) Chikwau kand, tufanyidin kubabal chakwel kangal “[twapandakesh] pa yom yifundilau.” (1 Korint 4:6) Anch twalondul nawamp mbil ja Yehova, tudandamedin kumutal ndiy.

Dilejan ik tufanyidina kwilejin kusutin mutapu wasalay Moses anch antu akwau arumbuk? (Tal paragraf wa 19)

19. Mutapu ik tukutwisha kwipuk anch kurumbuk kwa antu akwau kangal kuyipisha urund wetu ni Yehova?

19 Kangal witiy kurumburik kwa antu kuyipisha urund wey ni Yehova. Anch twadandamen kumutal Yehova, tukuyipishap urund wetu ni ndiy ap kujiman mulong wa yom yisadinau antu akwau. Chinech chidi pakampwil cha usey nakash anch tukwet yisend kampand mu dirijek dia Yehova, mudi mwadingay Moses. Chakin kamu, etu awonsu tukwet kuswir kwa kusal usu nakash ni kumuziyin Yehova chakwel tupanda. (Filip 2:12) Chawiy, anch tukwet yisend yivud, Yehova utuchingejidin kand nakash. (Luka 12:48) Pakwez anch tumukatin chakin kamu Yehova, kwikil chom chikutupwakesha ap kutwauril ku rukat rend.—Kuseng 119:165; Rom 8:37-39.

20. Yom ik tufanyidina kusal usu wa kusal?

20 Tushich pa chirung chikash ni cha milong nakash. Chawiy chidia cha usey nakash kudandamen kumutal Yehova, “ushiching mu maur,” chakwel twijika yom yikatinay anch tusala. Tufanyidinap kwitiy yisal ya antu akwau kuyipish urund wetu ni Yehova. Yom yamushikena Moses yitufundishin dilejan dined dia usey nakash. Pa ndond pa kujiman nakash anch antu akwau arumbok, el tusalany usu wa ‘kumutal Yehova Nzamb wetu kushik ni chisu chikutumekeshinay ranaken.’—Kuseng 123:1, 2.

^ par. 8 Meriba wisambidinau pinap wading ushalijadin ni Meriba wadinga piswimp ni Refidim wading utazukinau kand anch Masaha. Pakwez, ndond jinej jaad ajitazuka anch Meriba mulong in Isarel alangwisha matend ap kunyinyit pa ndond jinej.—Tal cart wa 7 udia mu kabuku Ukwash Mulong wa Kwilej Dizu dia Nzamb.

^ par. 11 Mwin manangu umwing wa milong ya Bibil ulondin anch kukwatijan ni yinshakur ya in Yuda, in kubwambwil alonda anch chadingap kwau chilay mulong Moses wading wij anch diyal dined diading dikwet mem mukach. Chawiy chakimbau anch Moses asala kand chilay ku diyal dikwau. Pakwez, chidi kwau chishankur.

^ par. 12 Tal Chinong cha Kalam cha 15 Ngond wa 10, 1987, “Yipul ya in Kutang,” mu Français.