Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 7 , 2017

‘Mushimanany Yah!’—Mulong wak?

‘Mushimanany Yah!’—Mulong wak?

Mushimanany Yah! . . . Chifanyidin kumushiman’—KUSENG 147:1.

MIMINY: 9, 23

1-3. (a) Chisu ik chafundau Kuseng 147? (b) Yom ik tukutwisha kwilejin kusutil ku kwilej Kuseng 147?

YISU YIVUD tukat kumutumbish muntu anch twasanger yom yalonday ap yasalay. Chinech chifanyidin kutubachik mud ik kumutumbish Yehova Nzamb! Tukat kumushiman mulong wa dikand diend dijim, tumena mu yom yend yatangay yishimokishena ni tukat kumutumbish mulong wa rukat rend rikurikina mulong wetwetu, tumena pamupanay Mwanend mudi difut.

2 Anch twatang Kuseng 147, tumen patok anch mwin kufund winou wading ni maswir nakash ma kumushiman Yehova. Wayikasikesha kand antu akwau kumushiman Nzamb pamwing ni ndiy.—Tang Kuseng 147:1, 7, 12.

3 Twijap muntu wafunda Kuseng 147. Pakwez mwin kufund washakama pamwing ap chisu chachirikau in Isarel mu Yerusalem payikwolau kudi Yehova kudiokal mu Babilon. (Kuseng 147:2) Nfund a kuseng wamutumbisha Yehova mulong kapamp kakwau antu end akutwish kumwifukwil chad mwi ngand yau. Kupwa nfund a kuseng wapana kand mayingishin makwau ma  kumushiman Yehova. Mayingishin ik mamwing? Ni mayingishin ik ukweta ma kulond anch “Aleluya!,” ap anch ‘Mushimanany Yah!’? —Kuseng 147:1.

YEHOVA UKAT KWOK MICHIM YINENGANENA

4. Chisu chayikwolau in Isarel kudi Mwant Sirus, afanyina kwiyov mutapu ik ni mulong wak?

4 Tong mutapu wafanyinau kwov in Isarel chisu chadingau mu uswik mu Babilon. Antu ayitwala mwinimwa asambisha kuyiswingish ni kuyilej anch: ‘Tuwangilanyap muminy wa Siyon.’ Pakwez in Yuda kovap musangar wa kuwang. Yerusalem, diyingishin diau dia musangar, ading amusheshin kal. (Kuseng 137:1-3, 6) Michim yau yading yinenganen ni ading akwet kuswir kwa kuyikasikesh. Pakwez mudi mwatakela kulond Dizu dia Nzamb, Yehova wayikwasha antu end. Mutapu ik? Mwant Sirus wa in Peris wakwata Babilon ni walonda piur pa Yehova anch: ‘Ndiy wanginkishin kand chisend cha kumutungin chikumbu mu Yerusalem.’ Sirus wayileja kand in Isarel anch: ‘Muntu mwawonsu udia pakach penen wa antwend, el Yehova Nzamb wend ikala nend, achirik kwend.’ (2 Jinsangu 36:23) Chinech chafanyina kuyikasikesh in Isarel ading mu Babilon mud ik!

5. Chom ik chalonday nfund a kuseng piur pa usu ukwetay Yehova wa kutwok?

5 Yehova kakasikeshap kwend ching muchid wa Isarel pakwez wakasikesha kand mwin Isarel mwawonsu panrend. Yehova usadin kand mwamu nlel mulong wetwetu. Nfund a kuseng wafunda anch Nzamb “ukat kwok abukukina mu muchim, ukat kukas yitat yau.” (Kuseng 147:3) Anch tuyedin ap tunenganen, tukutwish kwikal ni kashinsh anch Yehova utubangidin. Yehova ukat kutwongoj ni ukat kwok yovil yisansena. (Kuseng 34:18; Isay 57:15) Ukat kutwink manangu ni usu mulong tutwisha kurish nich milong yetu.—Jakobu 1:5.

Yehova ukat kutwongoj ni ukat kutukwash chakwel twova nawamp

6. Mutapu ik tukutwisha kutaninamu mu mazu ma nfund a kuseng madia mu Kuseng 147:4? (Tal chipich cha kwisambishin.)

6 Kupwa nfund a kuseng watala mwiur ni walonda anch Yehova “wachinda atutumbu” ni “wayipila awonsu majin mau.” (Kuseng 147:4) Nfund a kuseng wamana atutumbu, pakwez kadingap wij uvud wau. Nlel unou, in siyans ij anch kudi mamiliyar ma atutumbu mu rukongal retu (galaxie). Ni kukutwish kwikal tutikit ni tutikit twa jinkongal ja atutumbu mwiur! Antu kakutwishap kuchind atutumbu awonsu, pakwez Sakatang ukutwish. Chawiy, wij katumbu ni katumbu nawamp nakash, chawiy wayipila majin. (1 Korint 15:41) Nzamb wija katumbu win mwawonsu ukwij kand ey. Wij kamu nawamp ndond udia, mutapu wiyovila ni yom ukweta nich kuswir!

7, 8. (a) Chom ik chijay Yehova piur petwetu? (b) Let chilakej chimekeshina ranaken ra Yehova.

7 Yehova wijing yom yikushikedina mu mwom, ni ukwet usu wa kukukwash mulong wa milong yey. (Tang Kuseng 147:5.) Ukutwish kuman anch milong yey yikasiken nakash ni anch ukutwishap kurish nich. Nzamb wijing mimbu yetu, “ndiy ukat kuvurik anch,  etu tudi kwetu rufunfut.” (Kuseng 103:14) Tudi antu akad kuwanyin, chawiy tukat kurumbok chisu chawonsu, ni tukutwish kuziy. Tal mutapu tukata kunenganan mulong wa yom tukata kulond, mulong wa maku mayimp ap yovil ya mukau tukata kwikal nich! Yehova kakwetap uyimp ap umwing, pakwez wij kamu nawamp mutapu tukata kwiyov.—Isay 40:28.

8 Ov, wamenap kal chikas cha usu cha Yehova chikat kukukwash mu mar? (Isay 41:10, 13) Chinech chamushikena chibol umwing utazukinau anch Kyoko. Kupwa kwa kumuswimp chisend, waziya nakash. Pakwez mutapu ik wijikay Kyoko anch Yehova wij milong yend? Mu chikumangen chend chisu, mwading antu avud afanyina kutesh yovil yend. Wova mudi Yehova ukat kumulej anch: “Nikukatin chidiap mulong udi chibol, pakwez mulong udi mwanam changadim ni wipanin kal kudi am. Nikatin anch usanger mwom wey mudi Kaman wam!” Mutapu ik wakumekeshinay Yehova anch “manangu mend [madi] makad musul”?

YEHOVA UKAT KUTWINKISH YOM TUKWETA NICH KUSWIR

9, 10. Mutapu ik wa usey nakash ukutukwashay Yehova? Let chilakej.

9 Etu awonsu tukwet kuswir kwa yom mudi yakudia, yakudjal ni ndond ya kulal. Pamwing ap ukutwish kwiyakamish anch ukwetap yakudia yivud. Pakwez wasala divu mulong wa kubudish yakudia yivud mulong wa antu awonsu, ap kand mulong wa “an a nkwaj adidila nzal.” (Tang Kuseng 147:8, 9.) Anch Yehova ukat kuyidish ankwaj, tukutwish kwikal ni kashinsh anch ukuwanyish maswir metu ma ku mujimbu.—Kuseng 37:25.

10 Cha usey nakash, Yehova ukat kutwinkish yom tuswirikedina mulong wa kulam ritiy rikash, ni utwinkishin “chisambu cha Nzamb chisutila ronganyin [rawonsu].” (Filip 4:6, 7) Mukadivar utazukinau anch Mutsuo ni mukajend amana mutapu wayikwashau kudi Yehova. Chisu chasadika rinkind mukash utazukinau anch tsunami mu Japon mu 2011, iyepa rufu pakandamau pa musong wa chikumbu chau. Dichuku dinidia, ashadisha yom yivud yadingau nich. Alala mu kapalikany ka piur pa chikumbu chau mujadina ni mwading mashik nakash. Pamanch, akimba chom chafanyina kuyikasikesh. Chom chimwing chamanau wading ching Annuaire 2006 des Témoins de Jéhovah. Paburilay Mutsuo buku, wamana mutu wa mulong ulondina anch “Le tsunami le plus meurtrier jamais recensé.” Chikunku chinech chading chisambidin mulong wa kuzal kwa divu kwasadika mu Sumatra mu 2004 kwashesha antu avud nakash kusutamu rinkind wasadika kal. Mutsuo ni mukajend adila pading patanginau yom yayishikena akadivar nau anambaz. Iyova anch Yehova wayikasikesha kamu mu mutapu wadingau nich kuswir. Yehova wayibangina kand mu mitapu yikwau. Akadivar nau a mu Japon ayinkisha yakudia ni yakudjal. Pakwez kuyendin kudi akadivar atumau kudi dirijek dia Nzamb kwayikasikesha nakash. Mutsuo ulondin anch: “Nova anch Yehova wading kamu piswimp ni muntu ni muntu ni watubangina nakash. Kongoj mudi ik!” Chakusambish Nzamb ukat kutwinkish yitukweta nich kuswir mulong wa kulam ritiy rikash, ni kupwa ukat kuwanyish maswir metu ma ku mujimbu.

 TANINAMU MU UKWASH UDIOKILA KUDI NZAMB

11. Chom ik tufanyidina kusal mulong wa kutaninamu mu ukwash wa Nzamb?

11 Yehova “ukat kuyizambul antu itudishina.” Utukatin ni ukat kutukwash. (Kuseng 147:6a) Mutapu ik tukutwisha kutaninamu mu ukwash wend? Tufanyidin kwikal ni urund wa piswimp ni ndiy. Mulong wa kwikal ni urund winou, tufanyidin kwikal antu itudishina. (Sofoniy 2:3) Antu itudishina akat kumuchingejin Yehova anch ukutenchik kuburen kutentam kwawonsu ni ukupwish mar mau. Antu inay akwet dilau dia Yehova.

12, 13. (a) Mulong wa kutaninamu mu ukwash wa Nzamb, chom ik tufanyidina kuvurik? (b) Nany ukatay kusanger Yehova?

12 Ku mutambu ukwau Nzamb “ukat kuyishikumwish antu ayimp pansh.” (Kuseng 147:6b) Tukatinap anch chom chinech chitushiken! Tukatin anch Nzamb  atumekeshin rukat rend rishinshamena. Chawiy tufanyidina kukis yom yikisinay. (Kuseng 97:10) Chilakej, tufanyidin kukis yom ya masandj. Chinech chirumburikin anch tufanyidin kwipuk yom yawonsu yikutwisha kutushikij ku masandj, kuwejinaku ni pornografi. (Kuseng 119:37; Mateu 5:28) Chinech chikutwish kukasikan nakash, pakwez chidi cha usey nakash mulong tukutambul yiyukish ya Yehova.

13 Tukutwishap kurish njit jinej ayinetu. Tufanyidin kumuchingejin Yehova. Ov, Yehova ukwov musangar anch twachingejin yom yichingejidinau antu akwau mulong wa kuyikwash? Bwat, Yehova kakatap ‘kusanger mu usu wa atubar.’ Ov, tufanyidin kuchingejin usu wetu ayinetu ap usu wa antu akwau? Yehova kakatap kusanger “mu mau ma antu.” (Kuseng 147:10) Pakwez, tufanyidin kudandamen kumulembil mulong wa kutukwash ni kumwit mulong wa kutulam mulong wa kuziy kwetu. Yehova kakuziyap kutesh malembil ma mutapu winou. “[Yehova] ukat kusanger mu antu akata kumulimish, awiy kamu akungamedina mu rukat rend rudimukina.” (Kuseng 147:11) Mulong ushinshamen ni utukatin, twij anch ukutukwash kuwin maku metu mayimp.

14. Nfund a kuseng wading ni kashinsh ka chom ik?

14 Yehova utwinkishin kashinsh anch ukutukwash chisu tukweta milong. Pachirikau in Isarel mu Yerusalem, nfund a kuseng watonga mutapu wayikwashau kudi Yehova. Nfund a kuseng wawanga anch: “Mulong Ndiy wakasikesha mitond ya ku yis yey, wayukisha aney mukach mwey. Wapan chisambu ku mimbu yey.” (Kuseng 147:13, 14) Mulong Yehova wakasikesha yis ya musumb, chinech chasala anch nfund a kuseng iyova anch udi mu diking. Chamwinkisha kashinsh anch Yehova ukuyiking antu end.

Mutapu ik ukutwisha kutukwash Dizu dia Nzamb chisu tukweta yakamish mulong wa mar metu? (Tal paragraf wa 15-17)

15-17. (a) Mutapu ik tukutwisha kwiyov yisu yimwing piur pa mar metu, pakwez mutapu ik ukatay Yehova kusadin Dizu diend mulong wa kutukwash? (b) Let chilakej chimekeshina anch dizu dia Nzamb dikat ‘kuya mau nakash’ mulong wa kutukwash.

15 Ukutwish kwiyakamish mulong wa milong yey, pakwez Yehova ukutwish kukwinkish manangu mulong wa kurish nich. Nfund a kuseng walonda anch Nzamb ukat  “kutum uruu wend pansh; dizu diend dikat kuya mau nakash.” Kupwa nfund a kuseng wajimbula yom yitok ya mashik, mbundu ni ruvul wa mayal ni wipula anch: ‘Nany ukutwisha kwiman ku mashik mend?’ Walonda kand anch “dizu diend dikat kwenguril mayal ma ruvul.” (Kuseng 147:15-18) Nzamb wetu, wija chom chawonsu ni ukutwisha kusal chom chawonsu, ukata kuyikel mbundu ni yom yitok ya mashik, ukutwish kand kukukwash chakwel uwina milong yin yawonsu.

Ov, ukat kuman mu mwom wey anch Yehova ukat kusal swa mulong wa kukutakel?

16 Nlel unou, Yehova ukat kututakel kusutil Dizu diend, Bibil. Nfund a kuseng walonda anch dizu dia Yehova dikat ‘kuya mau nakash’ mulong wa kutukwash. Nzamb ukat kututakel mu mutapu uwamp ni pa chisu chiwanyidina. Tong mutapu utanidinamu kusutin Bibil, mu mikand ya “kashalapol ushinshamena ni kubabal,” mu program wa JW Télédiffusion, kapend ka jw.org, amakurump a chikumangen ni kusutil kand akadivar ni anambaz ney. (Mateu 24:45) Ov, ukat kuman mu mwom wey anch Yehova ukat kusal swa mulong wa kukutakel?

17 Nambaz utazukinau anch Simone wamana mutapu wamukwasha Dizu dia Nzamb. Wiyova anch kakwetap usey ni watonga anch Yehova kakatap kumusanger. Chawiy, chisu chaziyay, wadandamena kumulembil Yehova ni kumwit ukwash wend. Wadandamena kand kwilej Bibil. Simone walonda anch: “Kand kal nikalap ni mulong chad nalik kuman usu ni ukwash wa Yehova.” Chinech chamukwasha chakwel ikala ni chitongijok chiwamp.

18. Mulong wak wiyovil anch Yehova udi piswimp niyey, ni mayingishin ik ukweta ma ‘Kumushiman Yah!’?

18 Nfund a kuseng wading wij anch Yehova watonda muchid wa Isarel wa pasak mulong wa kwikal antu end pakach pa michid yawonsu ya pa mangand. Wawiy muchid umwing watambula “dizu” dia Nzamb ni ‘malejan mend.’ (Tang Kuseng 147:19, 20.) Nlel tukwet chisend chijim cha kututazuk pa dijin dia Nzamb. Tujikitishin nakash mulong tumwij, tukwet Dizu diend mulong wa kututakel ni anch tukutwish kwikal ni urund wa piswimp ni ndiy. Mudi mwin kufund Kuseng 147, ukwet mayingishin mavud nakash ma ‘Kumushiman Yah!’ ni kuyikasikesh antu akwau kusal niyau mwamu.