Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 7 , 2017

Yipul ya in Kutang

Yipul ya in Kutang

Ov, mwin Kristu ufanyidin kwikal ni ut, mudi ut wa kalibir ap mat makwau mulong wa kwichidij nich mulong wa antu akwau?

In Kristu alondwiling mbil ja Bibil chisu chikwatinau mupak mulong wa kwichidij ni kwilam ayinau. Mbil jinej jimekeshin anch chikwikal chiyimp kudi mwin Kristu kusadin mat mudi ut wa kalibir ap mat makwau mulong wa kwichidij mulong wa antu akwau. Tong piur pa yom yilondwilaku ey:

Mwom wa muntu udi utumbila ku mes ma Yehova. Nfund a kuseng David wafunda piur pa Yehova anch: “Mulong musul wa [mwom] udi kudi ey.” (Kuseng 36:9) Chawiy, anch mwin Kristu watond kwichidij ap kuchidij yom yend, ufanyidin kusal yom yawonsu mulong wa kwipuk kwikal mwin kwichil mash, kwawiy kulond anch kangal rufu ra muntu kanang rikala pa mutu wend.—Kuvurik Yijil 22:8; Kuseng 51:14.

Chidi chakin anch chom chawonsu chikusadinay muntu mulong wa kwichidij nich chikutwish kusal anch ikala mwin kwichil mash. Pakwez, ut uswapel kujip nich muntu, chikalap nchik kwa kwikatin ap mu mutapu wakad kutongin. * (Tal mazu ma kwinshin.) Chikwau kand, mwin kujipan ukutwish kwikal wajimanang kal, chad anch waman ut, yom yikupandakan kuyip nakash ni muntu ukutwish kumujip mukwau.

Yesu payilejay in kwilejend kusend jimpak uchuku kurutu afa, chadingap mulong wa kwichidij ayinau. (Luka 22:36, 38) Pakwez Yesu wakimba kuyifundish chom chimwing cha usey: In kwilejend kafanyinap kusadin chisum, ap anch ayirishikish kudi antu akweta mat. (Luka 22:52) Kupwa kwa Pita kusadin mpak mulong wa kumutap kashalapol wa mwin kupesh mujim, Yesu wamuleja Pita anch: “Chirish mpak yey mu chilal.” Kupwa Yesu walonda mbil yiyitakedina in Kristu kushik ni nlel unou: “Muntu mwawonsu ukata kurish nich mpak ya musamun, akez kumujip kand kwi mpak ya musamun.”—Mateu 26:51, 52.

Mudi mwatakelau kulejan mu Mike 4:3, antu a Nzamb “akez kachil jimpak jau ja misamun jikal jinkasu, ni mirumbu yau jimpak ja kukatul nich yakwangul.” In Kristu akin ayij mulong adi antu a chisambu. Akat kulondul yijil yayinkau kudi Nzamb kusutin kambuy Paul yilondina anch: “Anch muntu wakusalany yon yiyimp, niyen kangal wamusadilany yom yiyimp” ni anch ikala mu “chisambu nau antu awonsu.” (Rom 12:17, 18) Ap anch Paul wamana mar nakash, ni wading kand mu ‘ubaj wa ampongarik,’ kajipap mbil ja Bibil mulong wa kwichidij amwinend. (2 Korint 11:26) Pakwez, wamuchingejina Nzamb ni wading wij anch yiyul yend ya manangu yidia mu Bibil ‘yiwapil kusutamu mat ma njit.’—Mulej 9:18.

Kudi in Kristu, mwom udi wa usey nakash kusutamu yom ya ku mujimbu. Twij anch “mwom wakin wa muntu kiudiap mu yom yikwetay.” (Luka 12:15) Chawiy anch kwambamb mu mutapu wa matul ni mwij ukweta ut kumukangeshinap kusal yikatinay, tufanyidin kulondul chiyul cha Yesu chilondina anch: “Kangal wamufundakeshinany muntu mwawonsu ukukusalanya nayimp.” Chinech chikutwish kurumburik anch tukumulik asenda yawonsu yikatinau. (Mateu 5:39, 40; Luka 6:29) * (Tal mazu ma kwinshin.) Chakin,  chidiap chiwamp kukakalijan nau in kujipan ap in kusalan nayimp. Kakutwishap pamwing ap kutusal nayimp anch twalondul chiyul cha Bibil ni twipuk ‘kwibaz kwa yom tukweta ni kwa yom tusadila.’ (1 Yohan 2:16) Didi kand diking kudi etu anch amutej netu atwij anch tudi Atuman a Yehova akweting chisambu.—Jinswir 18:10.

In Kristu akat kulimish kom ka antu akwau. (Rom 14:21) Akadivar nau anambaz amwing akutwish kwov kuyip ap chikutwish kuyipwakesh, anch ijik anch mukadivar nau mwin Kristu ukwet ut mulong wa kwichidij nich mulong wa antu akwau. Tukutwish kwikal ni mbil ya kwikal ni ut, pakwez mulong tuyikatin akadivar nau anambaz netu, tukutwishap kusal chom chin chawonsu twija anch chikutwish kuyipwakesh.—1 Korint 10:32, 33; 13:4, 5.

In Kristu afanyidin kwikal chilakej chiwamp kudi antu akwau. (2 Korint 4:2; 1 Pita 5:2, 3) Anch mwin Kristu ukwet ut mulong wa kwichidij mulong wa antu akwau, amakurump akumwinkish yiyul ya mu Bibil. Anch wadandamen kulam ut, kakwikalap chilakej chiwamp. Mudi chibudikin, kakwikalap ni yisend ap midimu ya pakampwil mu chikumangen. Mbil yiney yimutadin kand mwin Kristu udandamedina kusadin ut mu mudimu wend wa ku mujimbu. Chikutwish kwikal chiwamp anch wasal usu wa kukimb mudimu ukwau wa kusal. *—Tal mazu ma kwinshin.

Mwin Kristu ufanyidin kukwat mupak mulong wa kwichidij amwinend, dijuku diend ni yom yend ni kwijik kwisu kukusalay mudimu. Pakwez anch watond mu mutapu winou, mipak yiney yifanyidin kwimen pa mbil ja Bibil. Nzamb wetu wa manangu watwinkisha mbil jinej mulong utukatin. Chawiy chisadina anch in Kristu akweta urund wa piswimp ni Yehova kakatap kulam ut mulong wa kwichidij ayinau mulong wa antu akwau. Ijing anch ang amuchingejin Nzamb ni alondul mbil ja Bibil mu mwom wau, akwikal mu diking diakin chikupu ni chikupu.—Kuseng 97:10; Jinswir 1:33; 2:6, 7.

Pa chisu cha mar makash, in Kristu akumuchingejin Yehova ni kakwichidijap ayinau

^ par. 3 Mwin Kristu ukutwish kwikal ni ut (mudi kalibir ap ut ukwau) mulong wa kujip nich annam ap mulong wa kwichidij nich mulong wa annam a yidiany. Anch kasadidinap ut, ufanyidin kudioshamu yidiang, ap kuutek pa ndond yiwamp ap kuujindjik. Mu jindond mujidikinau kwikal ni mat, ap mukangeshinau kudi mbur matad kwikal ap kuland mat, in Kristu akat kulimish mbil jinej.—Rom 13:1.

^ par. 6 Mulong wa kwijik mutapu wa kwichidij amwiney ku masandj ma ku usu, tal mutu wa mulong ulondina anch “Comment éviter le viol” mu Réveillez-vous! wa 8 Ngond wa 3, 1993

^ par. 2 Mulong wa jinsangu jivud jitadina mudimu witina kwikal ni ut, tal Chinong cha Kalam cha 1 Ngond wa 11, 2005, paj 31; ni cha15 Ngond wa 7, 1983, paj 25-26, mu Français.