Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 7 , 2017

Kimbany Mapit Makin

Kimbany Mapit Makin

Ikalany ni arund nich dipit diakad kutentam.”LUKA 16:9, TMK.

MIMINY: 32, 51

1, 2. Mulong wak mu mangand minam mudandamedin kwikal atuzwendj?

NLEL UNOU, mangand ma kwisak makwet chisum ni maburedin kutentam. Chilakej, chikasiken nakash kudi ansand avud kuman mudimu. Antu amwing akat kutek mwom wau mu ubaj mulong wa kushemunikin mu jingand jikweta mapit nakash. Ap mu jingand jikweta mapit nakash, mudi niyau atuzwendj. Pa mangand mawonsu, ampich adandamedin kwikal ampich nakash chad atuzwendj niyau adandamedin kwikal atuzwendj nakash. Kukwatijan ni kukimbijol kwa katat, mpich 1 pa ampich chitot ukwet nfalang ja antu 99 pa antu chitot. Chakin kamu, padandamedinau antu amwing kwikal ni nfalang ja kushakam nich mu mivu yivud, pakwez ma miliyar ma antu akwau adi atuzwendj nakash. Yesu wading wij chom chinech palonday anch: “En ushichany nau atuzwendj machuku mawonsu.” (Marko 14:7) Mulong wak kuburen kutentam kwinoku kudiaku?

2 Yesu wading wij anch ching Want wa Nzamb wawiy ukuswimpa mangand ma kwisak minam. Bibil ulejen anch “in kwisak,” ap yom ya kwisak pamwing ni yom ya politik ni ya relijon yidi ya mangand ma Satan. (Kujingunik 18:3) Antu a Nzamb atwishin kamu kwidiosh mu yom ya politik ni ya relijon wa makasu. Pakwez, antu a Nzamb avud katwishinap kwidiosh mu yom ya kwisak ya mangand ma Satan.

3. Yipul ik tukushinshikina?

 3 Mulong tudi in Kristu, tufanyidin kushinshikin mwikadil wetu pantaliken ni yom ya kwisak ya mangand minam. Mulong tusal mwamu, tufanyidin kwiyipul anch: ‘Mutapu ik nikutwisha kusadin yom yam ya ku mujimbu mulong wa kumekesh anch nimushinshamedin Nzamb? Mutapu ik nikutwisha kulik kwiyandjik nakash mu yom ya kwisak ya mangand? Yom ik yisadikina nlel yimekeshina anch antu a Nzamb amuchingejidin kamu ndiy?’

RUSANGU RA KASHALAPOL WAKAD KUTENTAM

4, 5. (a) Chom ik chamushikena kashalapol wa mu rusangu ra Yesu? (b) Yesu wayileja in kwilejend kusal chom ik?

4 Tang Luka 16:1-9. Rusangu ra Yesu piur pa kashalapol wakad kutentam rifanyidin kututongish etu awonsu. Amufunda kashalapol anch udi mwin kushesh dipit, ni mwant wend wakwata mupak wa kumudiosh ku mudimu. * (Tal mazu ma kwinshin.) Pakwez kashalapol wasadina ‘manangu.’ Kurutu kwa kudiokal pa mudimu, wata urund nau antu afanyina kumukwash mu machuku ma kurutu. Yesu kalejanap rusangu riner mulong in kwilejend asala yom yakad kutentam chakwel ashakama nawamp. Yawiy yikatau kusal antu a mangand minam. Pakwez, Yesu wasadina rusangu riner mulong wa kulejan dilejan dia usey nakash.

5 Yesu wading wij anch mudi mwadingay kashalapol winou mu mashakamin makash, in kwilejend avud afanyina kuman anch chiyikasikedin kushakam nawamp mu mangand minam makad kutentam. Chawiy wayileja anch: “Ikalany ni arund nich dipit diakad kutentam.” Mulong wak? Mulong anch dipit dined diapwa, arund inay, Yehova ni Yesu, “akez kukwakany mwi ndond ya kushakam chikupu.” Yom ik tukutwisha kwilejin ku chiyul cha Yesu?

6. Mutapu ik twija anch yom ya kwisak ya nlel yadingap mu chitongijok cha Nzamb?

6 Ap anch Yesu karumburilap mulong wak watazuka yom ya ku mujimbu anch ‘yakad kutentam,’ Bibil ulejen patok anch kwikal ni nfalang jivud jidiokila ku yom yikwetay muntu yadingap mu chitongijok cha Nzamb. Chilakej, Yehova wamwinkisha Adam ni Ev yom yivud nakash kusutamu yading yikwetau nich kuswir mu chir cha Eden. (Disambishil 2:15, 16) Kupwa, chisu chayinkau antu azizidilau many spiritu utumbila kudi Nzamb, “kwikil muntu walonda anch: “Yom yinipitina yidi yamam amwinam ya pa kampwil,” pakwez awonsu anganijananga yom yadingau akwet.” (Midimu 4:32) Muprofet Isay walonda anch kwafanyina kwikal chisu chikusangerau antu awonsu yakudia yidiokila ku divu. (Isay 25:6-9; 65:21, 22) Pakwez kurutu chisu chinech chishika, in kwilej a Yesu akwet kuswir kwa kusadin ‘manangu.’ Afanyidin kusadin yom ya ku mujimbu yakad kutentam ya mangand minam mulong wa kushakam, ni kusal kand usu wa kumusangaresh Nzamb.

SADIN KWA MANANGU MAPIT MAKAD KUTENTAM

7. Chiyul ik chapanay Yesu chidia mu Luka 16:10-13?

7 Tang Luka 16:10-13. Kashalapol wa mu rusangu ra Yesu wikala nau arund mulong wa kutaninamu amwinend. Pakwez, Yesu wakata anch in kwilejend ikala nau  arund mwiur mulong wa mayingishin makad choy. Wakata twijika anch mutapu tusadidina mapit makad kutentam ukutwish kumekesh anch tumushinshamedin Nzamb ap bwat. Mutapu ik tukutwisha kusal mwamu?

8, 9. Let yilakej yilejena mutapu umekeshinau antu amwing kushinshaman kwau mu kusadin mapit makad kutentam.

8 Mutapu umwing wa kumekesh kushinshaman nich yom yetu ya ku mujimbu udi wa kupan yipan mulong wa mudimu wa kulejan usadikina pa mangand mawonsu wasambelau kulejan kudi Yesu anch ukusadik. (Mateu 24:14) Changadim umwing uchidia mukemp wa mu Inde wasala kamushet kend kakemp ni watekangamu nfalang chisu chawonsu. Walika ni kuland yom yend ya kusengan nich mulong wa kusal mwamu. Pizula kamushet kinak, wapana nfalang jinej jawonsu jalamay mulong wa kujisadin mu mudimu wa kulejan. Mukadivar umwing wa mu Inde wading ni chir cha mis ya koko (noix de coco). Wapanang mis yivud ku biro wa in kukarumun wa ku Malayalam. Mulong biro ukweting kuswir kwa kuland mis ya koko, wamana anch chipan chend chiding cha usey nakash kusutamu kulet nfalang. Kwawiy kwinoku ‘kusadin manangu.’ Mutapu wawiy umwing, akadivar a mu Grèce akat kupan chisu chawonsu many ma mpach, mantek ni yakudia yikwau ku dijuku dia Betel.

9 Mukadivar mukwau wa mu Sri Lanka wapana rupang rend mulong wa kusadinamu yikumangan ni yitentam ni chikumbu mulong wa antu adia mu mudimu wa chisu chawonsu. Chidi chipan cha nfalang mulong wa akadivar, pakwez udi ukwash ujim kudi in kulejan adia kwinikwa aburedina nfalang jivud. Mu jingand mulikishinau mudimu wetu wa kulejan, akadivar akat kusadin yikumbu yau mudi Yot ya Want. Chinech chikat kuyikwash ayibol ni antu akwau akad kwikal ni nfalang jivud kwikal ni ndond ya kukumangen pakad kufut nfalang.

Antu a Nzamb asadidin yom yau ya ku mujimbu mulong wa uwamp wa antu akwau

10. Yom ik yimwing tukata kutaninamu anch twapan ni muchim umwing?

10 Yilakej yiney yimekeshin anch antu a Nzamb adi ‘ashinshamena mu yom yikemp.’ (Luka 16:10) Akat kusadin yom yau ya kumujimbu mulong wa antu akwau kutaninamu. Mutapu ik ukatau kwiyov arund a Yehova piur pa kupan yipan yiney? Akwet musangar nakash mulong ij anch ang apan ni muchim umwing, akwikal ni mapit “makin” mwiur. (Luka 16:11) Nambaz umwing upanining nfalang chisu chawonsu mulong wa kukwash mudimu wa Want ulondin anch chom chimwing chakad kutongin chamushikena mu kusut kwa mivu. Ulondin anch: “Pinidandamedina kupan nakash yom ya ku mujimbu, nimen anch nidandamedin kuswimp chitongijok cham piur pa antu akwau. Nidi mwin kulikishin nakash, nidi mwin kushimpish muchim mulong wa antu akwau ni nitiyining swa anch arumbukin ni nitiyining yiyul.” Antu avud  amen kal anch akat kutaninamu ayinau anch ikal ni muchim wa kupan.—Kuseng 112:5; Jinswir 22:9.

11. (a) Muchim wetu wa kupan ukat kumekesh anch ‘tusadidin manangu’ mutapu ik? (b) Yom ik yisadikina pakach pa antu a Nzamb nlel? (Tal chipich cha kwinsambishin.)

11 Tumekeshin kand anch ‘tusadidin manangu’ chisu tusadidining yom yetu ya ku mujimbu mulong wa kuyikwash antu akwau mu mudimu wa kulejan. Chawiy, ap anch tukutwishap kusal mudimu wa chisu chawonsu ap kushemunikin kwi ndond kudia maswir nakash, tukudandamen kuyikwash antu akwau. (Jinswir 19:17) Chilakej, yipan yetu yikat kukwash mulong wa kubudish mikand ni kukwash mudimu wa kulejan mu ma teritwar ma uzwendj mwitiyinau antu avud uyakin. Mu jingand mudi mu Congo, mu Madagascar ni mu Rwanda, ma Bibil makwet usey nakash. Yisu yimwing Bibil ukweting usey nakash wa makut makatau kumufut muntu pa ngond ap pa rubing. Mu mivu yivud, akadivar netu akat kutond pa kuland yakudia mulong wa majuku mau ni pa kuland Bibil. Chawiy mulong wa yipan ya antu akwau ni “kwilakej” nfalang jinej, dirijek dia Yehova dikat kukarumun ni kwangan ma Bibil chamwamu kudi antu a mu majuku mau ni kudi in kwilej a Bibil. (Tang 2 Korint 8:13-15.) Chawiy komb antu akata kupan nau akata kutambul akwikal chad arund a Yehova.

MUTAPU IK TUKUTWISHA KULIK KWIYANDJIK MU KWISAK KWA MANGAD MINAM?

12. Mutapu ik wamekeshay Aburaham anch wamuchingejina Nzamb?

12 Tukutwish kand niyetu kwikal arund a Yehova anch twalik kwiyandjik nakash mu yom ya kwisak ya mangand minam ni anch twakimb kamu mapit “makin”. Yom yiney yawiy yasalay muntu ushinshamena Aburaham. Wamuziyina Yehova ni wadiokala mu musumb wa dipit wa Ur mulong wa kuya kushakam mu minkand mulong wading ukatin kwikal murund wa Yehova. (Hebereu 11:8-10) Wamuchingejina Yehova chisu chawonsu pa ndond pa kuchingejin mapit mend ma ku mujimbu. (Disambishil 14:22, 23) Yesu wayikasikesha antu akwau mulong amekesha ritiy ra mutapu winou. Chawiy chamulejay Yesu nsand wading mpich anch: “Anch usotil kwikal muntu uwanyidina, yang ukalandish yom yawonsu yiukweta, upan nfalang jinej kudi atuzwendj, chawiy ey ukez kwikal nich mapit ma mwiur. Chad wez wikal mwin kwilej wam.” (Mateu 19:21) Nsand winou kadingap nich ritiy mudi ra Aburaham. Pakwez kwading kand antu akwau amuchigejina Nzamb.

13. (a) Chiyul ik chamwinkau Timote kudi Paul? (b) Mutapu ik tukutwisha kusadin chiyul cha Paul nlel?

13 Timote wading ikundj wa ritiy. Kupwa kwa kumutazuk Timote anch “isalay muwamp wa Kristu Yesu,” Paul wamuleja anch: “Muntu usadila mudimu wa usalay ukatil kumusangarish mukurump wamwandjika ku mudimu, chawiy ndiy kakubangakup kand milong ya mwom wakad wa usalay.” (2 Timote 2:3, 4) In kwilej a Yesu nlel, pamwing ni miliyon umwing ni kusut wa antu adia mu mudimu wa chisu chawonsu, asadin usu mulong wa kusadin chiyul cha Paul. Akat kujijamen yoziu mulong wa kulik  kwiyandjik mu mapiblisite ma mangand minam makweta ris. Akat kuvurik mbil yilondina anch: “Mwin kusondam ukat kwikal muswik wa mwin kumusondjik.” (Jinswir 22:7) Satan ukatin anch tusutish chisu chetu ni usu wetu wawonsu mulong wa kusadin mangand mend ma kwisak. Antu amwing akat kusondam nfalang jivud nakash mulong wa kuland chikumbu, motak, kwilej shikol ap kand mulong wa kusal musambu wa uruw. Anch tubabelap, tukutwish kwandam mu dibaz dia mivu yivud. Tumekeshin anch tusadidin manangu anch twapipej mwom wetu, twiyep mabaz ni twasadin nfalang mu mutapu uwamp. Mu mutapu winou tukwishadin mulong wa kumusadin Nzamb pa ndond pa kwikal asuk a yom ya kwisak ya mangand minam.—1 Timote 6:10.

14. Mupak ik tufanyidina kukwat? Let yilakej.

14 Mulong wa kupipej mwom, tufanyidin kutek Want wa Nzamb pa ndond ya kusambish. Ikundj umwing ni mukajend ading ni sosiete mujim wayandjikinang nfalang nakash. Pakwez akata kuchirik mu mudimu wa chisu chawonsu. Chawiy ambay a uruw inay alandisha sosiete wau, waat wau ujim ni yom yau yikwau ya ku mujimbu. Kupwa ipana kwa kwikatin mulong wa kukwash kutung biro mujim wa pa mangand mawonsu ku Warwick, mu New York. Chinech chading cha pakampwil kudi awiy mulong asala pamwing ku Betel ni mwanau mband ni tatuwenau, ni mwi mbing kanang asala pamwing ni anvaj a ikundj, niyau asala ku Warwick. Nambaz umwing udia chibol mu Colorado, mu États-Unis, wamana mudimu wa kusal chisu chikemp ku bank. Amakurump end a mudimu asangara nakash mulong wa mudimu wend chawiy amwinkwisha mudimu wa chisu chawonsu ni amuleja anch akumuwejin difut kapamp kasatu. Mulong mudimu winou wafanyina kumukangesh kusal mudimu wend wa kulejan, chawiy walika difut dined. Yiney yidi kwau yilakej yikemp ya kwipan kusadinau atushalapol a Yehova. Anch twakwat mupak wa kutek yisakin ya Want pa ndond ya kusambish, chikumekesh anch tukwatin nich usey urund wetu ni Nzamb ni anch mapit makin makwet usey nakash kusutamu yom ya ku mujimbu.

ANCH MAPIT MA KU MUJIMBU MAPWA

15. Mapit ik makata kulet musangar ujim?

15 Kwikal ni yom ya ku mujimbu yivud kurumburikinap anch tukwet dilau dia Nzamb. Yehova ukat kuyiyukish antu adia “ampich mu midimu yiwamp.” (Tang 1 Timote 6:17-19.) Chilakej, nambaz utazukinau anch Lucia wijika anch kwading maswir ma in kulejan mu Albanie. * (Tal mazu ma kwinshin.) Chawiy wadiokala mu Italie waya mu Albanie mu 1993. Kadingap ni mudimu, pakwez wamuchingejina Yehova anch ukumukwash. Wileja dizu dia in Albanie ni wakwasha antu 60 ni kusut kwipan kudi Yehova. Tukutwishap pamwing ap etu awonsu kwikal ni yibudikin mudi yiney pitusadina mudimu wa kulejan mu teritwar wetu. Pakwez yom yawonsu tusadina mulong wa kuyikwash antu akwau kumwijik Yehova ni kwikal arund nend chidi chom cha usey nakash tukusangera chikupu.—Mateu 6:20.

Yom tusadina mulong wa Yehova ni mulong wa Want wend yikutuletin musangar nakash

16. (a) Chom ik chikushikena ku yom ya kwisak ya mangand minam? (b) Mutapu ik chikutwisha kwikal ni usu mu mutapu wetu wa kuman yom ya ku mujimbu?

16 Yesu walonda patok anch yom ya kwisak ya mangand ma nlel yikupwa. Walonda anch: ‘Chisu chikupwa mapit minam  ma ku mujimbu’, kalondap anch ‘ang mapwa’ (Luka 16:9). Mu machuku minam ma nsudien, ma bank mamwing mawil ni jingand jivud jikwet milong yikash ya nfalang. Pakwez machuku ma kurutu am, yom yikupandakan kuyip. Yom ya politik, ya relijon ni ya kwisak ya mangand ma Satan yikupwa. Muprofet Ezekiel ni Sofoniy asambela kulond anch utad wa or ni wa argent, yom yading yikweta usey nakash mu kwisak yikwikal ya chamwamu. (Ezekiel 7:19; Sofoniy 1:18) Tukwiyov nchik anch tukimbin kufa chad twajingunin anch twapana mapit makin mulong wa mapit makad kutentam ma mangand minam? Tukutwish kwiyov mudi mwiyovay muntu wasala mudimu nakash mu mwom wend wawonsu mulong wa kwikal ni nfalang jivud, chad kwinsudien wajingunin anch nfalang jinej jidi ja makasu. (Jinswir 18:11) Yom ya ku mujimbu ya mangand minam yikupwa. Kangal washadish chisend chey cha kusadin yom ya ku mujimbu mulong wa kwikal nau arund mwiur. Yom tusadina mulong wa Yehova ni mulong wa Want wend yikutuletin musangar nakash.

17, 18. Yom ik yichingedinau arund a Nzamb?

17 Pakweza Want wa Nzamb, kwikil muntu ukufutina chikumbu ap kusondam nfalang. Yakudia yikwikal yamwamu ni yivud nakash, kukwikalap kuswir kwa kuyifut adokiter ap kuland mon. Arund a Yehova akusanger yom yiwamp yidiokila ku divu. Utad wa argent ni wa or ni mayal makwau akumasadin mulong wa kuwap kwau, chidiap mulong wa kumupitish kand muntu. Mitond yiwamp ya mabay, mayal, ni yikung yikwikal yamwamu mulong wa kutung nich yikumbu yiwamp. Arund netu akutukwash chamwamu, pakad kuyifut nfalang. Tukwanganijan yom yawonsu yiwamp ya pa divu.

18 Yiney yidi kwau yom yikemp yichingedinau antu akwikala nau arund mwiur. In kumwifukwil Yehova adia panap pansh akuwang mulong wa musangar chisu chikulonday Yesu anch: “Ezany, en antu ayukishau kal kudi Tatukwam! Ezany, uswanany Want wakurijekinanyau kudiokal ku disambishil dia mangand.”—Mateu 25:34.

^ par. 4 Yesu kalondap anch kufundan kwinoku kwading kwakin ap kwa makasu. Pakwez, dizu ‘kufundan’ didia mu Luka 16:1 dikutwish kurumburik anch kudi muntu kanang walonda yom ya makasu piur pa kashalapol winou. Pakwez Yesu washinshikina piur pa mutapu wakulay kashalapol, kashinshikinap pa mayingishin masala anch amudiosh kashalapol pa mudimu.

^ par. 15 Rusangu ra mwom ra Lucia Moussanett ridi mu Réveillez-vous! wa 22 ngond wa 6 2003, paj wa 18-22.