Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 7 , 2017

‘Dilany Nau Antu Adidina’

‘Dilany Nau Antu Adidina’

Dandamenany kukasikeshijan muntu ni mukwau ni kwashijanany kand.’—1 TESALONIK 5:11.

MIMINY: 53, 28

1, 2. Mulong wak tukweta kuswir kwa kwambambin mutapu wa kuyongoj antu akweta ushon? (Tal chipich cha kwinsambishin.)

SUSI walonda anch: “Muvu umwing kupwa kwa kufish mwanetu, twadandamena kwov ushon nakash.” Mukadivar umwing ulondin anch kupwa kwa kufish mukajend kwa rinkank “nova ushon wakad kutwish kurumburil.” Cha ushon, antu avud akat kwikal ni ushon mudi winou. Mu chikumangen cha win Kristu nlel, akadivar nau anambaz netu avud kakatiningap anch anamakwau afa kurutu Harmagedon eza. Pamwing ap mwanamakwey wafil kal ap wij muntu ukweta ushon mulong wafishin. Anch mwawiy ukutwish kwiyipul anch: ‘Mutapu ik nikutwisha kumwongoj muntu ukweta ushon wa chidil?’

2 Antu amwing alondining anch chisu chikutwish kwok yitat yawonsu. Pakwez chiding kamu mwamu? Mwadia mufu umwing ulondin anch: “Namana anch chidi chakin kulond anch yom yikatay muntu kusal mu chisu chinicha, yawiy  yikata kumukwash kuyerik.” Chitat cha ku mujimbu chitin chisu ni kuchok nawamp mulong chipwa. mutapu wawiy umwing, chitin chisu ni kwipan mulong wa kupwish yovil ya ushon. Yom ik ya pakampwil yikutwisha kuyikwash antu akweta ushon wa kufish kukepish ushon wau ?

YEHOVA UDI “NZAMB UKATA KUPAN KWONGOJ KWAWONSU”

3, 4. Mulong wak tukutwish kwikal ni kashinsh anch Yehova wij ushon wetu?

3 Tatukwetu wa ranaken Yehova, udi muntu ukata kutwinkish rongoj tuswirikedina. (Tang 2 Korint 1:3, 4.) Ndiy udia chilakej chijim cha ranaken, ni uyikanin antu end anch: “Am yam mwin kukwongojany.”—Isay 51:12; Kuseng 119:50, 52, 76.

Yehova uchingedin kurutu oku dichuku dikuyivumbulay amakundj ashinshamena

4 Tatukwetu wa mwiur ni ndiy wafisha anend akatish, mudi kashalapol wend Aburaham, Isak, Jakobu, Moses, ni Mwant David. (Kuchind Michid 12:6-8; Mateu 22:31, 32; Midimu 13:22) Bibil utulejin anch Yehova uchingedin kurutu oku dichuku dikuyivumbulay amakundj inay ashinshamena. (Job 14:14, 15) Pa chisu chinicha, akusangar ni akusanger ukash wa mujimbu uwanyidina. Yehova wafisha kand Mwanend wa kusambish. Bibil ulondin anch Yesu wading muntu umwing ‘wamusangarishanga’ Nzamb. (Jinswir 8:22, 30) Tukutwishap kutongin mutapu wovay Yehova pamanay mwanend ukat kufa rufu risansena.—Yohan 5:20; 10:17.

5, 6. Mutapu ik ukatay kutwongoj Yehova?

5 Tukutwish kwikal kamu ni kashinsh anch Yehova ukutukwash. Tufanyidin kumulembil Yehova yisu yawonsu ni kumulej runeng ni ushon tukweta. Chikasikeshin mudi ik kwijik anch Yehova wij nawamp yovil yetu ni utwinkishin rongoj tuswirikedina! Pakwez mutapu ik usadiningay mwamu?

6 Mutapu umwing ukatay kusadin Yehova mulong wa kutwongoj udi kusutin spiritu wend utumbila. (Midimu 9:31) Yesu washilamu anch Tatukwetu wa mwiur ukat kupan spiritu wend utumbila kudi antu awonsu akata kumwit. (Luka 11:13) Susi, twambambinang kwiur oku, ulondin anch: “Yisu yivud tukat kwas manungin pansh ni kumulembil Yehova mulong wa kutwongoj. Chisu chimwing, chisambu cha Nzamb chikat kulam michim yetu ni manangu metu.”—Tang Filip 4:6, 7.

YESU NIYEND WIJ YOVIL YETU

7, 8. Mulong wak tukutwish kwikal nich kashinsh anch Yesu ukutwongoj?

7 Padingay panap pansh, Yesu wimburija kamu nawamp mikadil yiwamp ya Tatukwend kusutin yom yalonday ni yasalangay. (Yohan 5:19) Yehova wamutuma Yesu panap pansh mulong wa kuyongoj antu akweta “michim ya runeng” ni “antu awonsu adidila.” (Isay 61:1, 2; Luka 4:17-21) Antu ading ij anch Yesu wading wij nawamp mar mau ni wakatang kuyikwash.—Hebereu 2:17.

 8 Padingay Yesu uchid nsand, ni ndiy wafisha arund nend a piswimp ni anamakwend. Chilakej, chimeken anch tatukwend wa kumulil Josef, wafa padingay Yesu uchid nsand. * (Tal mazu ma kwinshin.) Tongin mutapu chamukasikena nsand mukemp mudi winou kujijamen ushon ni mar mend ni ma makwend ni ma anamakwend amband ni amakundj.

9. Mutapu ik wamekeshay Yesu runeng chisu chafay Lazar?

9 Pasalangay mudimu wend, Yesu wamekeshang kamu anch wayiteshang antu ni witekang pa ndond yau . Chilakej, pafay murund nend Lazar, Yesu wova ushon nakash mudi ushon wovay Mariy ni Mart. Mulong wayanakena nakash, wasambisha kudil ap anch wading wij anch ukumuvumbul Lazar.—Yohan 11:33-36.

10. Mutapu ik ukutwisha kwikal ni kashinsh anch Yesu wijing mutapu twiyoviling?

10 Nlel unou, mutapu ik ukutwisha kutukwash mazu ma kongoj malonday Yesu pakur? Bibil ulejen patok anch Yesu kaswimpinap. Bibil ulondin anch: “Yesu Kristu udi kusu mutapu umwing nangalosh, ilel, ni chikupu.” (Hebereu 13:8) Amutazukin anch “mwin kuyitwal antu ku dipandish” mulong usadin anch chituswapela kushakam chikupu. Yesu wijing kamu nawamp ushon wetu ni “katat Yesu ukutwish kuyikwash antu ozinau kudi Sakudimban.” (Midimu 3:15; Hebereu 2:10, 18) Chawiy, tukutwish kwikal ni kashinsh anch Yesu udandamedin kwov ushon pamenau antu akwau mar. Wij ushon wau ni ukutwish kand kuyongoj ‘pa chisu chiwanyidina.’—Tang Hebereu 4:15, 16.

“KONGOJ KUDIOKILA MU MIFUND”

11. Mifund ik ya pakampwil yikutwisha kukongoj?

11 Rusangu piur pa ushon wovay Yesu chisu chafay Lazar kudi kwau kongoj kumwing pakach pa kongoj kuvud kudia mu Dizu dia Nzamb. Chinech chikutwishap kutukashimwish, mulong “yom yawonsu yafundau pakur ayifunda mulong wa malejan metu, chakwel ku kujijaman kwetu ni ku rongoj ra Mifund tutwisha kwikal nich ruchingej.” (Rom 15:4) Anch ukwet ushon, ukutan mazu ma kwongoj mu maverse malondwilaku am:

  • ‘[Yehoha] udi piswimp nau awiy akweta michim yinenganena, ukat kuyipandish akweta michim ya runeng.’—Kuseng 34:18, 19.

  • “Mu kuvul kwa minan mu muchim wam, kwongoj kwey [Yehova] kwatokish kal ku muchim wam to.”—Kuseng 94:19.

  • “Tukat kumulembil Nsalejetu Yesu Kristu amwinend, ni Nzamb Tatukwetu watukata, chad watwinkish kujijaman kwa chikupu, ni ruchingej ruwamp ku ranaken rend. Tulembil anch ndiy ukez kukwongojany ni kukasikesh michim yen mu yisalijok yawonsu yiwamp, ni mu mazu mawonsu mawamp.”—2 Tesalonik 2:16, 17. *—Tal mazu ma kwinshin.

 CHIKUMANGEN CHIDI MUSUL WA KWONGOJ KUJIM

12. Mutapu ik tukutwisha kuyongoj antu akwau?

12 Antu akweta ushon akutwish kand kutan rongoj mu chikumangen cha win Kristu. (Tang 1 Tesalonik 5:11.) Mutapu ik ukutwisha kuyikasikesh ni kuyongoj antu akweta “muchim wa runeng”? (Jinswir 17:22) Vurik anch kudi “chisu chimwing cha [kuninet], kudi chisu chikwau cha kulond.” (Mulej 3:7) Mwadia mufu umwing dijin diend Dalene ulondin anch antu akweta ushon aswirikedin kulejan yitongijok yau ni mutapu wiyovilau. Pakwez chom cha usey nakash ukutwisha kusal kudi kumutesh pakad kumukaturij. Junia, ukweta mpanyend wijipa ulondin anch: “Ap anch ukutwishap kupwish ushon wa antu anenganena, cha usey nakash chidi anch ukatin kutesh mutapu wiyovilau.”

13. Chom ik tufanyidina kuvurik piur pa runeng?

13 Tufanyidin kuvurik anch etu awonsu tukovangap ni kumekesh runeng mu mutapu umwing. Yisu yimwing chikasikening kamu kurumburil nawamp runeng tukweta ap ushon twovila. Dizu dia Nzamb dilondin anch: “Muchim wij kusansan kwau iwinau, ni muntu mweny kakutwiship kwibombamu nau mu musangar wend.” (Jinswir 14:10) Ap anch muntu wamekesh mutapu wiyovilay, chiswapelingap chisu chawonsu kudi antu akwau kutesh kurumburik kwa yom yikimbinay kulond.

Yisu yivud, chom cha ukwash nakash ukutwisha kusal kudi ‘kudil nau antu adidina’

14. Yom ik tukutwisha kulond mulong wa kuyongoj antu akweta runeng?

14 Chikutwish kwikal chikasikena kwijik yom ya kumulej muntu ukweta runeng. Pakwez Bibil ulondin anch: “Jindim ja in manangu jikat kwokan.” (Jinswir 12:18) Antu avud akat kutan mazu ma kuyongoj nich antu akwau madia mu broshir Quand la mort frappe un être aimé. * (Tal mazu ma kwinshin.) Yisu yivud, chom cha ukwash nakash ukutwisha kusal kudi ‘kudil nau antu adidina.’ (Rom 12:15) Gaby, ukweta nfumwend wafa, ulondin anch yisu yimwing mutapu umwing wa kumekesh yovil yend udi wa kudil. Uwejidinaku anch: “Wawiy mutapu nitanining rongoj anch arund adil pamwing ni yamam. Mu chisu chinicha nikwiyovangap kand anch nikwet ushon amwinam.”

15. Mutapu ik tukutwisha kuyongoj antu akwau anch twaman anch chitukasikedin kusal mwamu pa kuya kumutal muntu? (Tal kand mushet ulondina anch “ Mazu Mawamp ma Kwongoj Nich.”)

15 Anch umen anch chikukasikedin kumulej muntu yom ya kumwongoj nich, chiswapel kumutumin mukand ap kumufundin mesaj. Ukutwish kufundap maverse ma kwongoj nich, mikadil yiwamp uvurikina ya muntu wafang ap kumulej yom ya musangar yakushikenanya. Junia ulondin anch: “Kutambul mesaj ma kukasikesh ap  kwintazuk mulong wa kusutish chisu pamwing nau anamakwam in Kristu, kwankwasha nakash kamu. Yom yiney yamekesha anch ankatin ni ambangidin nakash.”

16. Mutapu ik uwamp wa kuyongoj nich antu akwau?

16 Malembil metu makutwish kuyikwash akadivar nau anambaz netu anenganena. Tukutwish kuyilembil ap kulembil nau pamwing. Ap anch chikutwish kukukasiken kusal mwamu mulong utongin anch ukudil, malembil mey madiokila ku muchim makutwish kwongoj nakash . Dalene uvurikin anch: “Yisu yimwing pezangau anambaz mulong wa kwingongoj, nayipulang anch akatin kulembil pamwing niyamam. Asambisha kulembil, kwinsambishin amamatang, pakwez yisu yivud mu mazu makemp dizu diau diakasikana ni alembila malembil madiokila ku muchim. Ritiy rau rikash, rukat rau, ni kwibangin kwau kwakasikesha ritiy ram nakash.”

DANDAMEN KWONGOJ ANTU AKWAU

17-19. Mulong wak tufanyidina kudandamen kuyongoj antu akwau?

17 Chikasiken kwijik kamu nawamp chisu chikudandamenay muntu kwikal ni ushon. Anch muntu ukatina wafa, kwisambishin arund ni anamakwey akutwish kwikalaku mulong wa kukongoj. Pakwez kupwa kwa antu kuchirik kwol kwau, antu akweta runeng akudandamen kwikal ni kuswir kwa rongoj. Chawiy irijeka mulong wa kuyikwash. ‘Murund muwamp ukat kumekesh rukat machuku mawonsu. Udi mwanamaku wavadika mulong wa kukwash mu yisu ya mar.’ (Jinswir 17:17) Tufanyidin kuyongoj  antu akweta ushon mu chisu chikwetau kuswir kwetwetu.—Tang 1 Tesalonik 3:7.

18 Vurik anch muntu ukweta ushon ukusambish kwov runeng chisu chawonsu. Chinech chikutwish kwikal mulong wa kuvurik machuku kanang, mizik yimwing, yipich, midimu, ap res ra chom kanang, dizu ap chirung kanang cha muvu. Anch mufir ap mwadia mufu wasal chom kanang kapamp ka kusambish amwinend, mudi kukumangan ku chitentam ap ku Chivurikish, chikutwish chamunenganesh nakash. Mukadivar umwing ulondin anch: “Nachingejina anch kuvurik kapamp ka kusambish dichuku twatijana kupwa kwa rufu ra mukajam kwafanyina kwinsal nayimp nakash ni chadingap chiswapela. Pakwez akadivar akemp nau anambaz atenchika mulong wa kukumangan pamwing nau arund a piswimp chakwel kangal niyov anch nidi amwinam.”

19 Vurik anch antu akweta ushon akwet kuswir kwa kuyikasikesh kadiap kwau ching mu yisu ya pakampwil. Junia urumburil anch: “Ukwash ni urund wa chisu chawonsu udi wa ukwash nakash kusutamu kwau ukwash upaninau pa chisu cha kuvurik dichuku diasadika chom kanang. Yisu mudi yakad kutongin yidi ya usey nakash ni yikat kulet rongoj nakash.” Chidi chakin anch tukutwishap kupwish ushon wau ap yovil ya kwikal ayinau, pakwez tukutwish kuyikasikesh antu akweta ushon ni runeng pa kusal yom mudi yiney. (1 Yohan 3:18) Gaby ulondin anch: “Nimujikitishin Yehova nakash mulong wa amakurump a rukat ezang kwintal mulong wa mar mawonsu manshikena. Asala niyova anch nidi mu makas ma rukat ma Yehova.”

20. Mulong wak kushilamu kwa Yehova udi musul wa rongoj rijim?

20 Chidi chikasikeshina kwijik anch Yehova, Nzamb wa kwongoj kwawonsu, ukudiosh runeng rawonsu chisu cha divumbuk. (Yohan 5:28, 29) Nzamb ushidinamu anch ‘ukez chakin kuminy rufu chikupu, ni Mukaleng Mwant Yehova ukez chakin kukusumun mansoj mwis mwawonsu.’ (Isay 25:8) Chawiy, pa ndond pa ‘kudil nau antu adidina,’ muntu mwawonsu pa divu ‘ukusangar pamwing nau antu awonsu asangera.’—Rom 12:15.

^ par. 8 Bibil ulondin anch Josef wading uchid kal mwom padingay Yesu ni mivu 12. Pakwez Yosef kamujimbwilap chisu chasalay Yesu chilay chend chakusambish pakarumunay mem kwikal maar. Chinech chimekeshin anch pamwing ap Josef wading wafil kal. Chikwau kand, chisu chadingay Yesu pa mutond wa mar, wamuleja kambuy Yohan kumulam makwend, chawiy anch Josef wading uchid mwon ing Yesu kakimbap kulond mwamu.—Yohan 19:26, 27.

^ par. 11 Mifund yikwau yimenau antu avud anch yikutwish kuyongoj yawiy ey: Kuseng 20:1, 2; 31:7; 38:8, 9, 15; 55:22; 121:1, 2; Isay 57:15; 66:13; Filip 4:13; ni 1 Pita 5:7.

^ par. 14 Tal kand mutu wa mulong ulondina anch “Yikasikeshany Antu Afishina Kal, Mudi Mwasalay Yesu” mu Chinong cha Kalam cha 1 Ngond wa 12, 2010.