Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 7 , 2017

‘Nzamb . . . Awanyish Kutenchik Kwey Kwawonsu’

‘Nzamb . . . Awanyish Kutenchik Kwey Kwawonsu’

Musangera [Yehova], ndiy ukukwinkish rusot ra muchim wey.”—KUSENG 37:4.

MIMINY: 11, 44

1. Mupak ik ufanyidinau kukwat ansand mulong wa machuku mau ma kurutu? Yom ik yikutwisha kuyikwash kulik kwiyakamish nakash? (Tal chipich cha kwinsambishin.)

EN ANSAND, ukutwishany kwitiyij anch kurutu kwa kusal weny, chiding cha manangu kwirijek mulong wa ndond ukuya. Mwom udi mudi weny, ni chisu wirijekina mulong wa kuya kwi ndond ukatina kuya chawiy chisu udia nsand. Chakin kamu, chiswapelingap kwirijek mu mutapu winou. Changadim utazukinau anch Heather walonda anch: “Chikwatishening wom. Ufanyidin kukwat mupak wa yom ukusala mu mwom wey.” Anch niyey wiyovil mwamu, vurik anch Yehova ulondin anch: ‘Kangal watalijol, mulong am nidi Nzamb wey. Nikez kukukasikesh. Nikez kukukwash chakin.’—Isay 41:10.

2. Mutapu ik wija anch Yehova ukatin anch urijeka machuku mey ma kurutu ma musangar?

2 Yehova ukukasikeshin urijeka kwa manangu machuku mey ma kurutu. (Mulej 12:1; Mateu 6:20) Ukatin anch wikal ni musangar. Chinech chimeken patok anch waman, watesh ni anch wapak yom yatangay. Yehova ukat kututongin mu mitapu  yikwau. Utwinkishin yiyul ni utufundishin mutapu uwamp wa kushakam. Chawiy anch antu alik yiyul yend ya manangu kakatap kusangar. Ukat kuyilej antu alikining kulondul yiyul yend anch: ‘En watondanya kulik kwinziyil. . . . Talany! Atushalapol am akez kikal ni musangar, pakwez en ukez kwovany usany. Talany! Atushalapol am akez kawang nich musangar.’ (Isay 65:12-14) Anch twatond kwa manangu mu mwom wetu, tukumuletin Yehova ntumb.—Jinswir 27:11.

KWAT MIPAK YIKUKULETINA MUSANGAR

3. Yom ik yikwitinay Yehova kusal?

3 Yom ik yikwitinay Yehova kusal? Mulong wa kwikal ni musangar, ufanyidin kumwijik Yehova ni kumusadin. Wawiy mutapu wayitangau antu kudi Yehova. (Kuseng 128:1; Mateu 5:3) Annam akat ching kwau kudia, kuna ni kuval an. Pakwez Yehova ukwitin anch ey utenchika mwom wey chakwel wikala ni musangar. Sakatang wey udi “Nzamb wa rukat,” ‘Nzamb wa musangar,’ watanga antu mu “chifu chend.” (2 Korint 13:11; 1 Timote 1:11; Disambishil 1:27) Ukwikal ni musangar anch wamwimburij Nzamb wetu wa rukat. Bibil ulondin anch: “Chiyukish cha mwin kupan chipandakenamu cha mwin kutambul.” (Midimu 20:35) Ov, kand kal wovangap mwamu amwiney? Winou wawiy uyakin wa pa dishin piur pa mwom. Chawiy Yehova ukimbin anch utenchika yom ukutwisha kusal machuku ma kurutu yimedina pa rukat mulong wa antu akwau ni mulong wendendiy.—Tang Mateu 22:36-39.

Ukwikal ni musangar anch wamekesh rukat

4, 5. Yom ik yamwovisha Yesu musangar?

4 Yesu Kristu wayishila ansand chilakej chiwamp. Padingay mwan mukemp, wafanyina kusengan. Mudi mulondina Dizu dia Nzamb anch kudi “chisu . . . cha kusip” ni “chisu chikwau cha kuja maj.” (Mulej 3:4) Yesu waseja kand piswimp ni Yehova kusutil ku kwilej Mifund. Padingay ni mivu 12, alej a mu tempel ashimwoka mulong “wakulanga kwa manangu.”—Luka 2:42, 46, 47.

5 Yesu pikalay muntu mukurump, kusal yom yamulejau kusal kudi Nzamb kwamusangaresha. Chilakej, Nzamb wakata anch ndiy ‘arumburil rusangu ruwamp kudi atuzwendj’ ni “kuyilej amputames rusangu ra kuyerik.” (Luka 4:18) Kuseng 40:8 urumburil yovil ya Yesu anch: “Nikwet musangar pakusadil rusot rey, A Nzamb wam.” Yesu wasangara kuyifundish antu akwau piur pa Tatukwend. (Tang Luka 10:21.) Kupwa kwa kwambamb ni mband umwing piur pa difukwil diakin, Yesu wayileja in kwilejend anch: ‘Yakudia yam yidi kusal rusot rendendiy wantuma am, ni kupwish mudimu wend.’ (Yohan 4:31-34) Yesu wading ni musangar mulong wamukata Nzamb ni antu akwau. Anch niyey wasal mwamu, ukwikal ni musangar.

6. Mulong wak chidi chiwamp kwambamb ni antu piur pa yom utenchikina kusal mu machuku ma kurutu?

6 In Kristu avud asambisha mudimu wa uchibol padingau achid ansand. Ov, ukutwish kwambamb ni amwing a pakach pau piur pa mipak yey? “Kwakad chiyul kutenchik kukat kuwa, pakwez in chiyul avud  kutenchik kukat kujamish.” (Jinswir 15:22) Akadivar nau anambaz inay akukulej anch kusal mudimu wa uchibol kudi kufumb kukukwasha mu mwom wey wawonsu. Yesu wileja yom yivud nakash kudiay Tatukwend padingay mwiur. Kupwa, chisu chasalay mudimu wend panap pansh, wadandamena kand kwilej. Wovang musangar palejanangay rusangu ruwamp kudi antu akwau ni walama kujijaman mu yisu ya mar. (Tang Isay 50:4; Hebereu 5:8; 12:2) El tumanany mutapu ukutwisha mudimu wa chisu chawonsu kukuletin musangar.

MULONG WAK KWIKADISH IN KWILEJ UDI MUDIMU UWAMP

7. Mulong wak ansand avud akweting musangar wa kwikadish antu in kwilej?

7 Yesu watuleja kuya ‘kwikadish in kwilej’ ni kuyifundish antu. (Mateu 28:19, 20) Anch utenchikin kusal mudimu winou mu mwom wey wawonsu, ukwikal ni mwom usangareshina umutumbishina Nzamb. Mudi muding midimu yawonsu, ukwet kuswir kwa chisu mulong wa kwikal ni ukaliweny. Mukadivar Timothy wasambisha mudimu wa uchibol padingay nsand ulondin anch: “Nikatin kumusadin Yehova chisu chawonsu mulong udi mutapu nimekeshina anch nimukatin. Kwisambishil, natwishangap kusambish malejan ma Bibil, pakwez pinashemunikina mu teritwar mukwau, mwi ngond umwing nikala nau in kwilej a Bibil avud. Mwin kwilej umwing wasambisha kwez ku Chot cha Want. Kupwa kwa kwilej mwa angond aad Shikol ya Bibil ya Akadivar Ajich, natambula chisend chisu ni nasambisha kwilej nau antu anying. Nikatining kuyifundish antu, pinikata kuman mutapu uyiswimpinau kudi spiritu utumbila.” * (Tal mazu ma kwinshin.)—1 Tesalonik 2:19.

8. Yom ik yasalau ansand amwing mulong wa kulejan kudi antu avud?

8 Ansand amwing ileja dizu dikwau. Chilakej, Jacob, wa mu Amérique du Nord, ufundin anch: “Panading ni mivu sambwad, akwetu a ku shikol avud ading in Vietnam. Nakatang kuyilej piur pa Yehova, chawiy mu chisu chinicha nakwata mupak wa kwilej dizu diau. Yisu yivud, nileja pa kwilikej Chinong cha Kalam cha dizu dia Vietnam ni cha Inglish. Nikala kand nau arund a mu chikumangen cha piswimp chisadidina dizu dia Vietnam. Pinawanyisha mivu 18, nasambisha mudimu wa uchibol. Kupwa, nileja Shikol ya Bibil ya Akadivar Ajich. Chinech chankwasha mu chisend cham chisu cha uchibol, mulong ndond nidia nidi kwam mukurump amwinam mu chisak chisadidina dizu dia Vietnam. In Vietnam avud akat kushimwok mulong nileja dizu diau. Akat kwintazuk, ni yisu yivud nikat kusambish kwilej nau Bibil. Amwing aya kurutu ni atambula dibatish.”—Ilikej ni Midimu 2:7, 8.

9. Mudimu wa kwikadish in kwilej utufundishin ik?

9 Mudimu wa kwikadish in kwilej ukufundishin kwikal ni yaku yiwamp piur pa mudimu, mutapu wa kwambamb nawamp ni mutapu wa kwikal muntu wa kuchingejin ni udimukina. (Jinswir 21:5; 2 Timote 2:24) Pakwez mudimu winou ukukuletin musangar wa pakampwil mulong wilejin mutapu wa kumekesh yom witiyijina mu Mifund. Wilejin kand mutapu wa kusal mudimu pamwing ni Yehova.—1 Korint 3:9.

10. Mutapu ik ukutwisha kwikal ni musangar mu mudimu wa kwikadish in kwilej ap anch antu a mu teritwar wey kakatap kusanger?

 10 Ukutwish kwikal ni musangar mu mudimu wa kwikadish in kwilej ap anch antu akemp mu teritwar wey awiy akatina kwilej Bibil. Mulong wa kwikadish in kwilej, chikumangen cha kabuj chisadin pamwing mudi chisak. Ap anch mukadivar ap nambaz umwing ndiy watanina muntu udia mwin kwilej, etu awonsu tukwet musangar mulong twipanin mu mudimu wa kukimb. Chilakej, Brandon wasala mivu chidivu mu mudimu wa uchibol mwi ndond mwading antu akemp ilejang Bibil, ulondin anch: “Nakata kulejan rusangu ruwamp mulong chawiy chom chitwitinau kusal kudi Yehova. Nasambisha mudimu wa uchibol kupwa kamu kwa kupwish shikol. Nikwet musangar wa kuyikasikesh akadivar ansand a mu chikumangen chetu ni kuman mutapu uyilau kurutu mu spiritu. Kupwa kwa kwilej Shikol ya Bibil ya Akadivar Ajich, natambula chisend chisu cha uchibol. Chidi chakin anch kand kal nilejap ni muntu mu teritwar nidia waya kurutu ni kutambul dibatish, pakwez akwetu asadin mwamu. Nikwet musangar mulong nakwata mupak wa kwipan nakash mu mudimu wa kwikadish in kwilej.”—Mulej 11:6.

MIPAK UKWATINA YIKUKUSHIKIJ KWISU

11. Mitapu ik yikwau ya mudimu wa Yehova yasangerau ansand avud?

11 Kudi mitapu yivud ya kumusadin Yehova. Chilakej, ansand avud akwashin mudimu wa kutung. Kudi maswir ma yitot ya Yot ya Want. Ndond jinej jikat kumutumbish Yehova, chawiy kukwash kutung ndond jinej kukutwish kukuletin musangar. Ukutwish kand kwikal ni musangar pa kusal pamwing ni akadivar nau anambaz ney. Ni ukutwish kwilej yom yivud, mudi mutapu wa kusal mudimu nawamp ni mutapu wa kwovijan nau antekel ey.

Antu akata kusalany mudimu wa chisu chawonsu akutambul yiyukish yivud (Tal paragraf wa 11-13)

12. Mutapu ik ukutwisha mudimu wa uchibol kukushikij ku mitapu yikwau?

12 Mukadivar utazukinau anch Kevin ulondin anch: “Ap anch nading mwanikanch, nakata kumusadin Yehova mu mudimu wa chisu chawonsu dichuku dimwing. Kupwa, nasambisha mudimu wa uchibol pinawanyisha mivu 19. Mulong wa kwinkwash amwinam, nasala mudimu wa chisu chikemp ni mukadivar umwing wading mwin kutung. Nileja mutapu wa kupamp chikumbu, kutek yis ni madidish. Kupwa, nasala mivu yaad ni chisak cha in kukwash jindond kusadikina rinkind mukash, kutungiril Yot ya Want ni yikumbu ya akadivar. Pinatesha anch kudi maswir ma in kutung mu Afrique du Sud, nafunda fomu ni antazuka. Munomu mu Afrique, nading kushemunik nakash mu yisak ya kutung Yot ya Want chisu chawonsu. Chisak cham cha in kutung chidi mudi dijuku. Tushiching pamwing, twilejining Bibil pamwing ni tusadining mudimu pamwing. Nikwet kand musangar mulong wa kulejan pamwing nau akadivar rubing rawonsu.  Mipak nakwata pinading nsand yinletidin musangar mu mutapu unakad kutongin.”

“Mipak nakwata pinading nsand yanletina musangar mu mutapu unakad kutongin”

13. Mulong wak ansand avud akwet musangar wa kumusadin Yehova ku Betel?

13 Ansand amwing ading ayibol katat asadin ku Betel. Mudimu wa Betel uletin musangar mu mwom mulong yom yawonsu usadina kwinikwa yidi mulong wa Yehova. Antu asadina ku Betel akwashin mulong wa kubudish ma Bibil ni mikand chakwel antu ileja uyakin. Dustin, muntu usadina ku Betel ulondin anch: “Nasala anch mudimu wa chisu chawonsu wikala mudimu wam pinading ni mivu chidivu ni nasambisha mudimu wa chisu chawonsu pinapwisha shikol. Kupwa kwa muvu umwing ni chikunku, antazuka ku Betel, pinashika kwinikwa nileja mutapu wa kusadin mashin ma kubudish nich mikand ni mutapu wa kutek maprogram mu ma ordinater. Ku Betel, nisangaredining kutesh piur pa kuya kurutu kwa mudimu wa kwikadish in kwilej usadikina pa mangand mawonsu. Nikatin kusadin kwinoku mulong yom tusadina yiyikwashin antu chakwel amusejina Yehova.”

MIPAK IK UKUKWATA MULONG WA MACHUKU MEY MA KURUTU?

14. Yom ik ukutwisha kusal katat mulong wa kwirijek mulong wa mudimu wa kulejan wa chisu chawonsu?

14 Mutapu ik ukutwisha kwirijek mulong  wa mudimu wa kulejan wa chisu chawonsu? Mulong wa kumusadin Yehova mu mutapu uwamp, ufanyidin kukudish mikadil ya win Kristu. Kwilej Dizu dia Nzamb chisu chawonsu, kutongijokin nakash pa yom wilejina ni kusal usu wa kumekesh ritiy rey ku yikumangan ya win Kristu. Mu chisu udia ku shikol, ukutwish kuwapish ukaliweny wey wa kwambamb nau antu piur pa rusangu ruwamp. Ijik mutapu wa kuyisanger antu pa kuyipul yipul kwa manangu mulong wa kwijik yitongijok yau ni kutesh yakul yau. Chikwau kand, ukutwish kwipan mulong wa kusal yom kanang mu chikumangen, mudi kukwash kurijek ni kulam nawamp Chot cha Want. Yehova ukat kusanger kusadin antu ikepishina ni akatina kusal mudimu. (Tang Kuseng 110:3; Midimu 6:1-3) Kambuy Paul wamuleja Timote kusal mudi mishoner mulong ‘akadivar aleta uman uwamp piur pend.’—Midimu 16:1-5.

Mu chisu udia ku shikol, ukutwish kuwapish ukaliweny wey wa kwambamb nau antu piur pa rusangu ruwamp

15. Yom ik ukutwisha kusal mulong wa kwikal ni mudimu ukukukwash kusal uchibol?

15 Atushalapol avud adia mu mudimu wa chisu chawonsu akweting kuswir kwa kwikal ni mudimu wa ku mujimbu. (Midimu 18:2, 3) Pamwing ap ukutwish kwilej shikol ya mivu yikemp yikutwisha kukukwash kwikal ni mudimu wa chisu chikemp mu teritwar wen. Ambamb ni kalam wa munyingumuku ni ayibol akwau piur pa mipak yey, ni it yiyul yau. Kupwa, mudi mulondinay Bibil, “shikij mijikit yey kudi [Yehova], ni yitongijok yey yakusal chom yikez kawanyin.”—Jinswir 16:3; 20:18.

16. Mudimu wa chisu chawonsu ukurijekin mutapu ik mulong wa yisend yikwau mu machuku ma kurutu?

16 Ukutwish kwikal nich kashinsh anch Yehova ukatin anch ey ‘ulamata’ ku machuku mawamp ma kurutu. (Tang 1 Timote 6:18, 19.) Mudimu wa chisu chawonsu ukukukwash kwikal mwin Kristu uswila mu spiritu piusadina nau antu akwau adia mu mudimu wa chisu chawonsu. Chikwau kand, antu avud amana anch kusambish mudimu wa chisu chawonsu padingau ansand kwayikwasha mu uruw wau. Yisu yivud, antu asambisha uchibol kurutu kwa kwatijan adandamedin kusal kand pamwing padiau ambay a uruw.—Rom 16:3, 4.

17, 18. Kukwat mipak kwitin kutekamu muchim mutapu ik?

17 Kuseng 20:4 ulondin piur pa Yehova anch: “Chifanyidin [Nzamb] akwinkisha yom yawonsu mudi muukatila mu muchim wey.” Piutenchikina mulong wa machuku ma kurutu, tong kamu nakash piur pa yom ukimbina kusal mu mwom wey. Tong piur pa yom yisadinay Yehova mu chirung chetu ni yom ukutwisha kusal mu mudimu wend. Kupwa, tenchik kusal yom yimusangareshina.

18 Anch wasadin mwom wey mulong wa kumusadin Yehova nakash ni kumutumbish, ukwikal ni musangar nakash. Ukutan ‘musangar mudiay [Yehova], ndiy ukukwinkish rusot ra muchim wey.’—Kuseng 37:4.

^ par. 7 Shikol ayiswimpin kal ni ayitazukin chad anch Shikol ya in Kulejan a Want.