‘Munyikany chitokish chen kurutu kwa antu chakwel akutwish . . . kumutumbish Tatukwen.’—MATEU 5:16.

MIMINY: 77, 59

1. Diyingishin ik dia pakampwil tukweta dia kwikal ni musangar?

TUKWETING musangar nakash pa kutesh mutapu umunyikinau atushalapol a Nzamb chitokish chau! Muvu wasutina ou, antu a Yehova atakedin malejan ma Bibil 10 000 000 ni kusut. Ni mamiliyon ma antu asangaredin kwez ku Chivurikish ni kwilej piur pa difut, chipan cha rukat cha Yehova.—1 Yohan 4:9.

2, 3. (a) Chom ik chilikina kutukangesh kumunyik ‘mudi chimunyik mu mangand’? (b) Yom ik tukwisambina mu mutu wa mulong winou?

2 Pa mangand mawonsu, Atuman a Yehova alondin mazu mavud kushalijan. Pakwez chinech chitukangeshinap kumutumbish Yehova mudi dijuku didia mu uumwing. (Kujingunik 7:9) Chikalap nchik dizu tulondina ap ndond tudia, tukutwish kumunyik ‘mudi chimunyik mu mangand.’—Filip 2:15.

3 Mudimu wetu, uumwing wetu wa win Kristu ni impu yetu ya kuswapej mudimu yikat kumutumbish Yehova. Mutapu ik tukutwisha kumunyik chitokish chetu mu yom yiney yisatu?—Tang Mateu 5:14-16.

 YIKWASHA ANTU AKWAU KUMWIFUKWIL YEHOVA

4, 5. (a) Kuwejinaku mudimu wetu wa kulejan, mutapu ik tukutwisha kumunyik chitokish chetu? (b) Yibudikin ik yiwamp yikata kwikalaku anch tudi antu awamp? (Tal chipich cha kwinsambishin.)

4 Mudimu wa kulejan ni wa kwikadish in kwilej udi mutapu umwing wa usey tukata kumunyik chitokish. (Mateu 28:19, 20) Mu muvu wa 1925, mutu wa mulong “Chitokish mu Mididim,” (mu Inglish) walonda anch machuku ma nsudiel, muntu kakutwishap kwikal ushinshamena kudi Nsalejend anch kasadinap “usu wa kumunyik chitokish chend.” Kupwa walonda anch: “Ufanyidin kusal mwamu kusutil kulejan rusangu ruwamp kudi antu a pa mangand ni kwiyendish amwinend mwi njil ya chitokish.” (Chinong cha Kalam cha 1 Ngond wa 6, 1925) Kuwejinaku mudimu wetu wa kulejan, mwikadil wetu ukat kulet uyaj kudi Yehova. Antu avud akat kutuman chisu tulejena. Anch twayisipish ni kuyilangwish kwa musangar, chinech chikat kuyikwash kutong nawamp piur petu ni piur pa Nzamb twifukwidila.

Mudimu wetu wa kulejan ni yaku yetu yikat kupan uyaj kudi Yehova

5 Yesu wayileja in kwilejend anch: “Piukwandamany mu chikumbu, yilangwishany.” (Mateu 10:12) Mwi ndond mwalejenay Yesu, antu ading ni chaku cha kuyitazuk angendj mu yikumbu yau. Mu jindond jivud nlel, chaku chinech kwikil. Antu akat kwiyakamish ap kujiman anch aman ngendj wezin kwol kwau. Pakwez anch tudi in chisambu ni antu awamp, akutwish kwiyov nawamp. Anch ulejen pa ndond yidia antu avud ni ukat kusadin kachom ka kwendish kakweta ndond ya kutekin mikand, ov, wamenap kal anch ang wayisipish antu ap wayilangwish nich musangar, akat kwiyov nawamp nakash ni kwez ni kusend mikand? Akutwish chad kukat kwambamb niyey!

6. Yom ik yayikwasha ambay uruw ananapina kal kudandamen kusal mudimu wa kulejan?

6 Ambay a uruw ananapina kal adia mu Angleterre katwishinap kand kulejan ku chikumbu ni chikumbu mudi mwasalangau pakur mulong mijimbu yau yaziyin kal. Chawiy ateka tebur wa mikand pol pa chikumbu chau. Ashiching piswimp ni shikol, chawiy akat kutek mikand yikutwisha kuyisangaresh anvaj ezining mulong wa kusend anau ku shikol. Anvaj amwing akat kusend mikand yiney, mudi Les jeunes s’interrogent — Réponses pratiques, Volim 1 ni 2. Nambaz umwing chibol wezang yisu yivud kulejan ni ambay a uruw inay. Anvaj amana anch nambaz winou ukwet chisambu ni anch ambay a uruw ading akatin kamu kuyikwash antu. Nvaj umwing wasambisha kwilej Bibil.

7. Mutapu ik ukutwisha kuyikwash arefije adia mwi ngand yey?

7 Machuku masutina am, antu avud achinin mu jingand jau ni katat ashich mu jingand jindj mudi arefije. Yom ik ufanyidina kusal mulong wa kuyikwash arefije adia mwi ngand yey mulong wa kwilej piur pa Yehova? Chakusambish, ukutwish kwilej mutapu wa kulangwishan mu dizu diau. Ukusal mwamu kusutil kusadin application JW Language, ukutwish kwilej mazu makemp makutwisha kukukwash kuyimik nich ni kwambamb niyey.  Mwamu, ukutwish kuyilej mavideo ni mikand yidia mu mazu mau pa kapend ka jw.org.—Kuvurik Yijil 10:19.

8, 9. (a) Mutapu ik ukata kutukwash yikumangan yetu ya mukach mwa rubing? (b) Mutapu ik ukutwishau anvaj kuyikwash anau kuwapish yakul yau ku yikumangan?

8 Yehova utwinkin kamu yom tukweta nich kuswir mulong wa kusal nawamp mudimu wa kulejan. Chilakej, yom tukata kwilej mu Chikumangan Mudimu ni Mashakamin yitukwashin kwikal atakamena nakash mulong wa kuyichirikin antu ni kusambish malejan ma Bibil.

9 Anch angendj ez ku yikumangan yetu, akat kushimwok mulong wa yakul ya an akemp. Ukutwish kuyifundish aney mutapu wa kwakul mu mazu mau, kadiap kutang ya kutang. Antu amwing eza ku uyakin chisu chateshau mutapu wisambinau an akemp piur pa ritiy mu mutapu uswapela ni wa kashinsh.—1 Korint 14:25.

KASIKESH UUMWING

10. Mutapu ik ukutwisha difukwil dia mu dijuku kukwash majuku kwikal mu uumwing nakash?

10 Anch twasal usu nakash wa kufumb dijuku dietu kusal pamwing mu uumwing ni mu chisambu, tukat kupan uyaj kudi Yehova. Chilakej, anch udi nvaj, irijeka mulong wa kwikal ni Difukwil dia mu Dijuku rubing ni rubing urel. Majuku mavud makat kutal pamwing JW Télédiffusion, ni kupwa akat kwisambin mutapu ukutwishau kusadin yom yilejau kal. Vurik anch mutapu wa kuyitakel an akemp ushalijadin ni mutapu wa kuyitakel  an abarika kal usand. Sal yawonsu ukutwisha kusal mulong wa kumukwash muntu ni muntu mu dijuku diey kutaninamu nakash mu difukwil dia mu dijuku.—Kuseng 148:12, 13.

Chidi chiwamp kudi etu kusutish chisu pamwing nau amapal (Tal paragraf wa 11)

11-13. Mutapu ik tukutwisha kukwash chikumangen chetu kwikal mu uumwing nakash?

11 Ap anch udi nsand, ukutwish kumukwash muntu ni muntu mu chikumangen iyova anch udi wa usey. Mutapu umwing wa kusal mwamu udi wa kuta urund ni akadivar nau anambaz amapal. Yipula yom yayikwasha kudandamen kumusadin Yehova mivu yivud. Akutwish kukufundish malejan ma usey nakash. Chinech chikutwish kamu kuyikasikesh nakash awiy pamwing niyey! Ni etu awonsu, twikalap nchik nsand ap ipal, tukutwish kuyak nawamp antu ezina ku Chot chetu cha Want. Ukutwish kuyilangwish, kuyisipish, kuyikwash kutan pa kushakam ni kuyijikish kudi antu akwau. Sal iyova mudi adi kwol kwau.

12 Anch akwinkish chisend cha kutakel yikumangan mulong wa mudimu wa kulejan, ukutwish kuyikwash antu amapal kudandamen kumunyik chitokish chau. Ikal nich kashinsh anch akwet teritwar wa kulejan. Tond ansand chakwel alejan pamwing nau. Akadivar nau anambaz ananapina kal ni antu ayedodina akat kuziy yisu yivud mulong kakutwishap kand kulejan nakash mudi mwasalangau pakur. Pakwez akutwish kwiyov nawamp anch ijik anch ukat kuyibangin ni wij mashakamin mau. Chikalap nchik mivu yikwetau ap yasadinau kal mu uyakin, kuyibangin kwey kukutwish kuyikasikesh chakwel adandamena kulejan nich mushiku.—In Levi 19:32.

Ov, ukutwish kusal usu wa kuyijik nawamp akadivar a mu chikumangen chey?

13 In Isarel asangerang kumwifukwil Yehova pamwing. Nfund a kuseng wafunda anch: ‘Talany kuwap ni musangar kudi akadivar wa kushakam pamwing mu uumwing!’ (Tang Kuseng 133:1, 2.) Wafanikesha uumwing winou ni many mawamp, makata kuziyish chikit ni kuletish rupwembu ruwamp. Chilik chimwing, tukutwish kuyikasikesh akadivar nau anambaz netu kusutin kuyisanger ni kuyibangin. Chinech chikat kusal anch chikumangen chikala mu uumwing nakash. Ov, ukutwish kusal usu wa kuyijik nawamp akadivar a mu chikumangen chey?—2 Korint 6:11-13.

14. Mutapu ik ukutwisha kumunyik chitokish mwi ndond ushicha?

14 Chitokish chey chikutwish kumunyik chikalap nchik ndond udia. Kubangin kwey kukutwish kuyibachik amutej ney kukat kwilej uyakin piur pa Yehova. Iyipula anch: ‘Yom ik yitonginingau amutej nam piur pam? Chikumbu cham chidi chiwamp ni chinangin? Ov, amutej nam achimen kamu anch chiwapin? Nidi mutej nau muwamp?’ Yipula Atuman akwau akuleja mutapu yaku yiwamp ni chilakej chau chiwamp yayikwasha anamakwau a ku mujimbu, amutej nau, ambay a mudimu ni a ku shikol.—Efes 5:9.

DANDAMEN KUCHA KU MES

15. Mulong wak tufanyidin kudandamen kucha ku mes?

15 Anch tukatin anch tudandamen kumunyik chitokish nakash, tufanyidin kubabal  piur pa chirung tushicha. Tupamp tuvud Yesu wayileja in kwilejend anch: “Chishany ku mes.” (Mateu 24:42; 25:13; 26:41) Anch twatong anch “mar makash” madi kulemp nakash, tukutwishap kwikal adimukina mulong wa mutapu wawonsu ukutwisha kumekan wa kuyikwash antu akwau kwilej piur pa Yehova. (Mateu 24:21) Pa ndond pa kumunyik chitokish nakash, chitokish chetu chikuya mu kukep pakemp pakemp ni chikutwish kujim puch.

16, 17. Yom ik ukutwisha kusal mulong wa kulam impu ya kuswapej?

16 Tufanyidin kudandamen kucha ku mes nakash kusutamu pakur. Yom ya mangand yidandamedin kupandakan kuyip. Pakwez twij anch disudiel dikwez kamu pa chisu chatenchikay kal Yehova. (Mateu 24:42-44) Pituchingedina, tufanyidin kwikal ashimpishina muchim ni kutal mes pa yom ya kurutu. Tang Bibil dichuku diawonsu ni kangal kwimik kumulembil Yehova. (1 Pita 4:7) Ilejina kusutin akadivar nau anambaz amusadina kal Yehova mu mivu yivud. Chilakej, ukutwish kutang yom yayishikena mu mwom, mudi mu mutu wa mulong ulondina anch “Cramponné depuis 70 ans au pan du vêtement d’un Juif,” wabudishau mu Chinong cha Kalam cha 15 Ngond wa 4, 2012, paj wa 18-21, mu Français.

 17 Shal ukwatikena mu kumusadin Yehova. Yisadina antu akwau yom yiwamp ni sutish chisu pamwing ni akadivar nau anambaz ney. Mwamu ukwikal ni musangar ni ukuman anch chisu chikat kusut mau mau. (Efes 5:16) Atushalapol a Yehova asadina yom yivud nakash mu mivu chitot yasutina ey. Ni nlel, tukwatiken nakash kusutamu pakur. Mudimu wa Yehova uyil kurutu nakash mutapu wakad kutwish kutongin. Chitokish chetu chimunyikin kamu nakash!

Pa chisu cha kwendin kwa ukafung, tukutwish kutaninamu mu manangu ma Nzamb (Tal paragraf wa 18, 19)

18, 19. Mutapu ik ukutwishau amakurump kutukwash kumusadin Yehova nich mushiku? Let chilakej.

18 Ap anch tukat kurumbok nakash, Yehova utwitiyijin kumusadin. Mulong wa kutukwash, utwinkishin ‘yipan mudi antu,’ adia amakurump a chikumangen. (Tang Efes 4:8, 11, 12.) Chawiy chisu chikwendidinau kudi amakurump, sal usu wa kutaninamu mu chisu ukusutisha nau pamwing mulong wa kutambul manangu ni yiyul yau.

19 Chilakej, ambay a uruw amwing a mu Angleterre ading ni milong mu uruw ni ayita amakurump aad mulong wa kuyikwash. Mband wading wiyovil anch nfumwend kadingap kamu katakedila nawamp dijuku mulong wa kumusadin Yehova. Ikundj wiyova anch kadingap kamu mulej muwamp ni witiyina anch kadingap kwend kwirijekang mulong wa kusal difukwil dia mu dijuku rubing ni rubing. Amakurump ayikwasha ambay a uruw inay kutongin pa chilakej cha Yesu. Amukasikesha ikundj kwimburij mutapu Yesu wayibanginay in kwilejend. Amukasikesha mband kwikal ushimpishina muchim mulong wa nfumwend. Ayileja kand yom kanang piur pa mutapu ukutwishau ambay a uruw kusal difukwil dia mu dijuku nau anau. (Efes 5:21-29) Ikundj wasala usu nakash mulong wa kwikal ntakel muwamp wa dijuku. Amakurump amukasikesha anch kangal waziy ni adandamena kuchingejin spiritu wa Yehova. Rukat ni uwamp wamekeshau amakurump wakwasha kamu dijuku dined!

20. Yibudikin ik yikwikalaku anch wamunyik chitokish chey?

20 “Wayuk muntu mwawonsu ukat [kumwov Yehova] wom ni kwendil mu jinjil jend.” (Kuseng 128:1, TMK) Ukwikal ni musangar nakash anch wamunyik chitokish chey. Chawiy yifundisha antu akwau piur pa Nzamb, sal usu wey wawonsu mulong wa kukwash dijuku diey ni chikumangen kwikal mu uumwing ni dandamen kucha ku mes. Antu akwau akuman chilakej chey chiwamp ni akusangar kupan uyaj kudi Tatukwetu wa mwiur Yehova.—Mateu 5:16.