‘Nilembil . . . chakwel awonsu ikala mu umwing, mudi muudia ey Tatuku mu uumwing ni yamam.’—YOHAN 17:20, 21.

MIMINY: 24, 99

1, 2. (a) Yom ik yitay Yesu mu malembil ma nsudiel pamwing nau atwimbuy end? (b) Mulong wak Yesu wading wiyakamishin piur pa uumwing?

YESU wading wiyakamishin piur pa uumwing mu chisu chadiay yakudia ya nsudiel nau atwimbuy end. Chisu chalembilay pamwing ni awiy, walonda anch ukatin in kwilejend ikala umwing, charumburik anch mu uumwing, mudi mudiay ndiy ni Tatukwend mu uumwing. (Tang Yohan 17:20, 21.) Anch in kwilej a Yesu ading mu uumwing, chinech chakimba kumekesh kudi antu akwau anch Yehova wamutuma Yesu pa mangand. Antu afanyina kuyijingunin in kwilej akin a Yesu kusutin kukatijan umwing ni mukwau ni rukat riner rafanyina kusal anch ikala mu uumwing nakash.—Yohan 13:34, 35.

2 Tukutwish kutesh mulong wak Yesu walonda nakash piur pa uumwing uchuku winawa. Wamana anch atwimbuy end kadingap kamu mu uumwing. Chilakej, atwimbuy atadikijana piur pa kwijik “nany wa pakach pau . . . upandakenamu kujimb,” mudi mwasalau kand pakur. (Luka 22:24-27; Marko 9:33, 34) Chisu chikwau, Jakobu ni Yohan amwita  Yesu chakwel ayinkisha jindond ja usey mu Want wa mwiur kupwa kwa Yesu.—Marko 10:35-40.

3. Yom ik yafanyina kuyikangesh in kwilej a Yesu kwikal mu uumwing ni yipul ik tukwisambina?

3 Rusot ra kwikal ni usu ni ulabu chadingap kusu chom chimwing chafanyina kuyikangesh in kwilej a Yesu kwikal mu uumwing. Antu a pa chirung cha Yesu ading aurokin mulong wa rukis ni kasolikany. In kwilej a Yesu ading afanyidin kupandakan yitongijok yiney yiyimp. Mu mutu wa mulong winou, tukwisambin yipul yiney yisatu: Yom ik yasalay Yesu piur pa kasolikany? Mutapu ik wayikwashay in kwilejend kwilej mutapu wa kuyisadin antu akwau pakad katond ap nich kutentam ni kwikal mu uumwing? Ni mutapu ik chilakej cha Yesu ni yom yafundishay yitukwashin kulam uumwing?

KASOLIKANY KAMUSADINAU NI YESU NAU IN KWILEJEND

4. Let yilakej yimekeshina kasolikany kamusadinau Yesu.

4 Ap Yesu amusadina nich kasolikany. Filip pamulejay Natanyel anch wamutan kal Mesia, Natanyel walonda anch: “Ov, ku Nazaret kukutwish kudiokal chom chiwamp?” (Yohan 1:46) Natanyel wijika pamwing ap anch Mesia wafanyina kuvadikin ku Betlehem, mudi mulondina uprofet udia mu Mike 5:2. Pamwing ap watonga anch Nazaret wadingap ul wa usey nakash mulong wa kwikal ul wa chivadik wa Mesia. Chikwau kand, kwading in Yuda ijikena amupipejang Yesu mulong wadiokala ku Galalia. (Yohan 7:52) In Yuda avud atonga anch antu a ku Galalia ading antu a mwinshin. In Yuda akwau apakisha kumusaal Yesu pamutazukau anch mwin Samaria. (Yohan 8:48) In Samaria ading antu a muchid ukwau ni relijon wau wading ushalijadin ni relijon wa in Yuda. In Yuda nau in Galalia kayilimishangap in Samaria ni kwovijanangap.—Yohan 4:9.

Mulong wa kushal mu uumwing, in kwilej a Yesu afanyina kuswimp mutapu wau wa kutong

5. Kasolikany ik kayisadinau in kwilej a Yesu?

5 Amakurump a relijon wa in Yuda kadingap kuyilimish in kwilej a Yesu. Afaris ayitazukang awiy anch ‘antu ashinginau kal.’ (Yohan 7:47-49) Afaris amumananga muntu walika kwilej shikol ya relijon wa in Yuda ni walika kulondul yishankur yau mudi muntu wa chamwamu ap wakad usey. (Midimu 4:13) Yesu nau in kwilejend ayisadina nich kasolikany mulong antu a pa chirung chinacha ading ni chibud mulong wa relijon wau maz yadingau nich ni ulombu wa chikit. Kasolikany kinak kading ni yibachikin pad in kwilej ni pa mutapu wau wa kuyiman antu akwau. Mulong wa kushal mu uumwing, in kwilej a Yesu afanyina kuswimp mutapu wau wa kutong.

6. Let yilakej yimekeshina mutapu ukutwisha kasolikany kwikal ni usu padi etu.

6 Nlel unou, mangand mawonsu mizwil bwafu nich kasolikany. Antu akutwish kutusadin nich kasolikany, ap yisu yimwing niyetu tukutwish kuyisadin antu akwau nich kasolikany. Chibol umwing wa mu Australie ulondin anch: “Rukis ram mulong wa ayindel rakula mulong nashinshikinang pa  kuburen kutentam kwayimekeshinau antu atazukinau anch Aborigènes—kwa pasak ni kwa katat.” Rukis rend rakula kand mulong wa mutapu uyimp wamusadinau kudi antu amwing. Mukadivar umwing wa mu Canada ulondin piur pa mutapu wiyovangay anch: “Natongang anch antu a mu France ading a usey nakash.” Ulondin anch mudi chibudikin, nayikisa antu alondina dizu dia Inglish.

7. Yom ik yasalay Yesu piur pa kasolikany?

7 Mudi pa chirung cha Yesu, yovil ya kasolikany nlel yidi yikash nakash ni yikasiken kuyidiosh. Yom ik yasalay Yesu piur pa yovil mudi yiney? Chakusambish, amwinend kadingap ni kasolikany. Wading chisu chawonsu wakad katond. Wayileja rusangu ruwamp ampich ni atuzwendj, Afaris nau in Samaria ap kand in kulambwish yitand nau akayitil. Cha kaad, Yesu wayifundisha in kwilejend ni wayimekeshina kusutin chilakej chenc anch kafanyidinap kuyitongin antu akwau nayimp ap kuyisadin nich kasolikany.

PANDAKAN KASOLIKANY NICH RUKAT NI KWIKEPISH

8. Mbil ik ya usey nakash yidia mufulandal wa uumwing wetu? Rumburil.

8 Yesu wafundisha mbil ya usey nakash yidia mufulandal wa uumwing wetu. Wayileja in kwilejend anch: “En awonsu udiany akadivar.” (Tang Mateu 23:8, 9.) Choviken kamu anch tudi etu awonsu akadivar mulong etu awonsu tudi an a Adam. (Midimu 17:26) Yesu warumburila anch in kwilejend adi kand akadivar nau anambaz mulong awonsu amwij Yehova mudi Tatukwau wa mwiur. (Mateu 12:50) Ni awonsu ikala mu dijuku dia Nzamb ni ikala mu uumwing kusutin rukat ni ritiy. Chawiy chasala anch atwimbuy ayitazuka in Kristu akwau anch akadivar nau anambaz nau mu mikand yatumau ku yikumangen.—Rom 1:13; 1 Pita 2:17; 1 Yohan 3:13. *—Tal mazu ma kwinshin.

9, 10. (a) Mulong wak in Yuda kadingap ni diyingishin dia kwibaz mulong wa ulombu wa chikit chau? (b) Mutapu ik wafundishay Yesu anch chiyipin kuyipipej antu akweta ulombu wa chikit chikwau? (Tal chipich cha kwisambishin.)

9 Kupwa kwa Yesu kuyilej in kwilejend anch afanyidin kuyiman antu akwau mudi akadivar ni anambaz , wakasikeshina anch afanyidin kwikal in kwikepish. (Tang Mateu 23:11, 12.) Mudi mutapu twileja kal, chisu chimwing chibud chayaurila atwimbuy. Ni pa chirung cha Yesu, antu ading ni chibud nakash mulong wa ulombu wau wa chikit. In Yuda avud atonga anch ading awamp nakash mulong ading an a Aburaham. Pakwez Yohan Mubatish wayileja anch: “Nzamb ukutwish kukarumun mayal minam kwikal antu a a majuku ma Aburaham.”—Luka 3:8.

10 Yesu wafundisha anch chidi chiyimp anch antu ibaz mulong wa ulombu wa chikit chau. Wovikesha mwamu patok chisu chamwipulau kudi mulej umwing wa yijil anch: “Ov, mukwetu win nany?” Mulong wa kwakul chipul chinech, Yesu wamuleja rusangu rumwing. Mwin Yuda umwing amubula kudi ambwambwol ni amusha mukach mwa njil. Ap anch in Yuda amwing asutina padiay ikundj winou, awiy kamukwashap. Pakwez mwin Samaria wanenganana nakash mulong wa mwin Yuda winou ni wamukwasha. Yesu wapwisha rusangu rend pamulejay mulej wa yijil anch ufanyidin kwikal mudi  mwin Samaria winou. (Luka 10:25-37) Yesu wamekesha anch mwin Samaria wafanyina kuyifundish in Yuda chirumburikina kuyikat amutej nau.

11. Mulong wak in kwilej a Yesu ading afanyidin kwikal akad katond, ni Yesu wayikwasha mutapu ik kwijik chom chinech?

11 Kurutu Yesu aya mwiur, wayileja in kwilejend kulejan rusangu ruwamp mu “Yudea mwawonsu ni Samaria, ni kusudiedila mangand.” (Midimu 1:8) Mulong wa kusal mwamu, in kwilej a Yesu afanyina kupandakan chibud chau ni kasolikany. Yesu walonda yisu yivud piur pa mikadil yiwamp yadingau nich angendj, ni chinech chayitenchika in kwilejend kulejan kudi antu a michid yawonsu. Chilakej, wamubaza mukurump umwing wa amasalay wadinga mweny wamekesha ritiy rijim. (Mateu 8:5-10) Mu ul wend wa chivadik Nazaret, Yesu warumburila mutapu wayikwashay Yehova aeny, mudi mwadiamufu wa mu Fenisiy mu ul wa Sarepita ni Naman mwin Siria wading muyej wa mak. (Luka 4:25-27) Yesu wamuleja kand mband mwin Samaria ni wasala machuku maad mu musumb wa Samaria mulong antu ading asangaredin uruu wend.—Yohan 4:21-24, 40.

IN KRISTU A KUSAMBISH AFANYINA KURISH NI KASOLIKANY

12, 13. (a) Mutapu ik wasalau atwimbuy pamumanau Yesu ukat kumufundish mband mwin Samaria? (Tal mazu ma kwinshin.) (b) Yom ik yimekeshina anch Jakobu ni Yohan kadingap kateshina kamu nawamp yom yading yikimbinay Yesu kuyifundish?

12 Chadingap chiswapela kudi atwimbuy kupandakan kasolikany kau. Ashimwoka nakash mulong Yesu wamufundisha mband wa ku Samaria. (Yohan 4:9, 27) Mulong wak? Pamwing ap mulong amakurump a relijon wa in Yuda kafanyinap kwambamb ni muntu mband mukach mwa antu, ni pakampwil kambambangap ni mband ukweta mwikadil uyimp. Atwimbuy amuleja Yesu kudia, pakwez Yesu wasangera nakash kwambamb ni mband winou ni chamekesha anch yakudia yadingap ni usey kudi ndiy. Nzamb wakata anch ndiy alejana rusangu ruwamp ni kusal yom yading yikatinay Tatukwend, mudi kumulej mband mwin Samaria, yading mudi yakudia kudi ndiy.—Yohan 4:31-34.

13 Jakobu ni Yohan kateshap dilejan dined dia usey. Chisu chasutinau in kwilej pamwing ni Yesu mu Samaria pading payilau mu weny, akimba ndond ya kulal uchuku mu ul wa Samaria. Pakwez in Samaria kakatap awiy kulal mu ul wau. Jakobu ni Yohan ajimana nakash chad amwita Yesu anch ukatishin chakwel atuma kasu ka mwiur mulong wa kushesh ul wa kabuj. Nich kutakaman, Yesu wayikanda. (Luka 9:51-56) Pamwing ap Jakobu ni Yohan kafanyinap kujiman mwamu anch yom yiney yashikena mwi ngand yau ya Galalia. Ajimana pamwing ap mulong ading ni kasolikany. Kupwa, chisu chalejanay Yohan kudi in Samaria ni antu avud amutesha, wafanyina kwov nayimp mulong wa mwikadil wamekeshay pakur.—Midimu 8:14, 25.

14. Mutapu ik wapwishau mulong wa kasolikany?

14 Chisu chikemp kupwa kwa Pentekot wa muvu wa 33, kwalanka mulong wa katond mu chikumangen. Chisu chapanangau akadivar yakudia kudi adia afu ading mu maswir, ayivuramenang adia afu alondang dizu dia Grek. (Midimu 6:1) Chinech chashikena pamwing ap mulong wa kasolikany ka dizu. Atwimbuy apwisha pakad kulab mulong winou. Atonda akadivar aswila sambwad mulong wa kwangan yakudia pakad katond.  Akadivar inay awonsu ading ni majin ma Grek, mwamu chafanyina kuyikasikesh adia afu inay arumbukinau.

15. Mutapu ik wilejay Pita kulik kwikal ni katond padi antu in awonsu? (Tal chipich cha kwisambishin.)

15 Mu muvu wa 36, in kwilej a Yesu asambisha kulejan kudi antu a michid yawonsu. Kurutu kwa yiney, kambuy Pita wasutishang chisu ching nau in Yuda. Chawiy Nzamb wovikesha patok anch in Kristu kafanyidinap kwikal ni katond, ni Pita wamuleja isalay mwin Rom Korney rusangu ruwamp. (Tang Midimu 10:28, 34, 35.) Kupwa, Pita wasutisha chisu ni wadia pamwing nau in Kristu akad kwikal in Yuda. Pakwez mu kusut kwa mivu, padingay mu musumb wa Antiosh, walika kudia nau in Kristu akad kwikal in Yuda. (Galatia 2:11-14) Paul wamupupa Pita ni Pita witiya kupup kwinoku. Mutapu ik twija mwamu? Chisu chafunday Pita mukand wend wa kusambish kudi in Kristu in Yuda ni akad kwikal in Yuda ading mu Aziy Mukemp, walonda piur pa usey wa kuyikat akadivar netu awonsu.1 Pita 1:1; 2:17.

16. Ku chom ik chayijikinau in Kristu a kusambish?

16 Chakin kamu, kusutin chilakej cha Yesu, atwimbuy ileja kuyikat ‘antu a mitapu yawonsu.’ (Yohan 12:32; 1 Timote 4:10) Ap anch chita chisu kanang, aswimpa mutapu wading uyimenau antu akwau. Chakin kamu, in Kristu a kusambish ayijikina ku rukat rau mulong wa umwing ni mukwau. Piswimp muvu wa 200, mwin kufund umwing Tertullien wafunda yom yalondau antu akwau piur pa in Kristu anch: “Akatijadin umwing ni mukwau,” ni “Adi tayad mulong wa kuyifil akwau.” Mulong in Kristu adjala ‘wuntu usu,’ ileja kuyiman antu awonsu anch isiken, mudi mutapu uyimenau kudi Nzamb.—Kolosay 3:10, 11.

17. Mutapu ik tukutwisha kudiosh yovil yawonsu ya kasolikany? Let yilakej.

17 Nlel unou, chikutwish kand kwit chisu kudi etu mulong wa kudiosh yovil yawonsu  ya kasolikany. Nambaz umwing wa mu France warisha nich mulong winou. Ulondin anch: “Yehova wanfundisha chirumburikina rukat, chirumburikina kumekesh rukat ni chirumburikina kukat antu a mitapu yawonsu. Pakwez nikat kudandamen kwilej mutapu wa kupandakan kasolikany pantaliken nau antu akwau, ni chinech chiswapelap. Chawiy nidandamedina kulembil piur pa mulong winou.” Nambaz wa mu Espagne urumburil anch yisu yimwing ukat kudandamen kurish ni yovil yiyimp piur pa tubil tukwau. Ulondin anch: “Natwishang kupandakan yovil yiney yisu yivud. Pakwez nij anch nifanyidin kudandamen kurish. Ku ukwash wa Yehova, nikwet musangar wa kwikal mu dijuku didia mu uumwing.” Etu awonsu tufanyidin kutong nakash piur pa mutapu tukata kwiyov. Ov, niyetu tukwet kuswir kwa kudiosh yovil kanang ya kasolikany?

ANCH RUKAT RAKUL, KASOLIKANY KAKAT KUPWA

18, 19. (a) Misu mayingishin tukweta ma kumwak muntu win mwawonsu? (b) Mutapu ik tukutwisha kusal mwamu?

18 Chidi chiwamp kudi etu kuvurik anch etu awonsu atutwala kulemp ni Nzamb. (Efes 2:12) Pakwez Yehova watusejisha kudi ndiy nich rukat. (Ozey 11:4; Yohan 6:44) Ni Kristu watwaka. Wasala anch chituswapela kwikal antu a mu dijuku dia Nzamb. (Tang Rom 15:7.) Ap anch tudi antu akad kuwanyin, Yesu watwitiya nich rukat, chawiy tufanyidinap ap pakemp kumudiul muntu ap umwing!

Tudi mu uumwing ni tukatijadin umwing ni mukwau mulong tukimbin “manangu madiokila mwiur (Tal paragraf wa 19)

19 Pitusejina piswimp ni disudiel dia mangand minam, antu akudandamen kwaurok nakash, kwikal ni kasolikany ni kukisijan. (Galatia 5:19-21; 2 Timote 3:13) Mulong tudi antu a Yehova, tukimbin “manangu madiokila mwiur,” chakwel matukwasha kwikal akad katond ni kukasikesh chisambu. (Jakobu 3:17, 18) Tukwet musangar wa kuta urund nau antu adiokila ngand jikwau, kwitiy mutapu wau wa kusal yom ni ap kwilej dizu diau. Anch twasal mwamu, tukusanger chisambu “mudi wit” ni kutentam “mudi mambek makata kwezang ku chikum cha karung.”—Isay 48:17, 18.

20. Yom ik yikata kushiken anch rukat raswimp mutapu wetu wa kutong ni yovil yetu?

20 Chisu chilejay nambaz wa mu Australie Bibil, yovil ya kasolikany yikash ni rukis yasambisha kupwa pakemp pakemp. Rukat raswimpa mutapu wend wa kutong ni yovil yend. Mukadivar umwing wa mu Canada ulondining Français ulondin anch wajingunina anch antu ayikisining akwau mulong kayijap kwau. Wileja anch “mikadil ya antu yimedinap pa ndond yavadikinau.” Wamwata nambaz ulondina dizu dia Inglish! Yilakej yiney yimekeshin anch rukat rikat kupandakan kasolikany. Rukat ritukasin pamwing mudi moj wakad kutwish kukatuk.—Kolosay 3:14.

^ par. 8 Kulond anch “akadivar” mukutwish kwikal kand anambaz a mu chikumangen. Paul wafunda mukand wend kudi “akadivar” a ku Rom, pakwez mwading kand nau anambaz, mulong wajimbula majin ma anambaz amwing. (Rom 16:3, 6, 12) Mu mivu yivud, Chinong cha Kalam chikat kuyitazuk in Kristu a mu chikumangen anch ‘akadivar nau anambaz.’