Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 6 , 2017

Tukwashany Ukaleng wa Yehova!

Tukwashany Ukaleng wa Yehova!

“ A! [YEHOVA], Nzamb wetu! Ey yey uwanyidina kutambul uyaj, ni katumb, ni ukash. Mulong yey watanga yom yawonsu, ni yom yawonsu yidiaku yishich mulong wa rusot rey.”—KUJINGUNIK 4:11.

MIMINY: 2, 49

1, 2. Chom ik chifanyidinay muntu ni muntu kwikal nich kashinsh? (Tal chipich cha kwinsambishin.)

MUDI mutwisambinang mu mutu wa mulong wapwang ou, Djabul ulondin anch Yehova kawanyidinap kuyiyikel antu. Ulondin anch Yehova kakatap kuyikel nawamp ni anch antu akwikal ni musangar anch itakel ayinau. Ov, Satan ulondin yakin? Tongin bil anch antu iyikedin ayinau ni ashich chikupu. Akwikal ni musangar kusutamu anch ayiyikedin kudi Nzamb? Ov, ey ukwikal ni musangar anch ukutwish kushakam chikupu ni anch kakutakedinap kamu kudi Nzamb?

2 Kwikil muntu ukutwisha kwakul yipul yiney pa ndond yey. Muntu ni muntu pakach petu ufanyidin kutongin nawamp piur pa yipul yiney. Kupwa chikutwish kumekan kamu patok anch mutapu wa kuyikel wa Yehova udi uwamp ni uwanyidin kumukwash ni muchim wetu wawonsu. Tukutwish kwikal nich kashinsh ka chom chinech mulong wa yom tutangina mu Bibil. El  katat tushinshikinany yom yilondinay Bibil piur pa mbil yikwetay Yehova ya kuyikel mangand mawonsu.

YEHOVA UKWET MBIL YA KUYIKEL

3. Mulong wak Yehova ndiy ukweta mbil ya kwikal Mukaleng?

3 Yehova ndiy udia Mukaleng wa mangand mawonsu mulong udi Nzamb wa Dikand diawonsu ni Sakatang. (1 Jinsangu 29:11; Midimu 4:24) Mu chishimushimu cha mwiur, ant 144000 akuyikelay nend Kristu alonda anch: “A! [Yehova], Nzamb wetu! Ey yey uwanyidina kutambul uyaj, ni katumb, ni ukash. Mulong yey watanga yom yawonsu, ni yom yawonsu yidiaku yishich mulong wa rusot rey.” (Kujingunik 4:11) Yehova wantanga yom yawonsu, chawiy ndiy ukweta mbil ya kuyikel muntu mwawonsu, ikala pansh ap mwiur.

4. Mulong wak want ipau utwinkishinap mbil ya kumubwambwil Nzamb?

4 Satan katangap chom ap chimwing. Chawiy kakwetap mbil ap yimwing ya kuyikel mangand. Satan ni antu a kusambish aburena kalimish chisu chabwambwilau ukaleng wa Yehova. (Jeremiy 10:23) Ov, want ipau wau wayinkisha mbil ya kulik winyikel wa Yehova? Bwat. Want ipau ukat kumwinkish muntu mbil ya kutond ni kukwat mipak pakwez ukatap kumwinkish muntu mbil ya kumubwambwil Sakatang Yehova. Chakin kamu, kumubwambwil Nzamb kudi kusadin nayimp want ipau. Mulong tudi antu, tukwet kuswir kwa winyikel ni ukwash wa Yehova.

Chijil chawonsu, mbil yawonsu ni mipak yawonsu yidiokila kudiay Yehova yiding yitentamina ni yiwamp

5. Mulong wak mipak ya Nzamb yiding ching yitentamina?

5 Tongin kand piur pa diyingishin dikwau disadina anch Yehova ikala ni mbil ya kuyikel. Ndiy ukat kusadin ulabu wend mu mutapu utentamina. Utulejin anch: ‘Am nidi Yehova, Muntu ukata kumekesh rukat rishinshamena, kutentam ni kurumburish pa divu, ni mulong wa yom yiney nikat kusangar.’ (Jeremiy 9:24) Yehova kakwetap kuswir kwa yijil ya antu mulong yimukwasha kukwat mipak piur pa yom yidia yiwamp. Pakwez, ndiy ukat kutek mbil mulong wa yom yidia yiwamp. Ni mulong mbil yiney yimedin pa kutentam kwend kuwanyidina, chawiy Yehova ukat kuyinkish antu yijil. Nfund a kuseng walonda anch: ‘Kutentam ni kurumburish madi manguj ma nkwas yey.’ Chawiy chijil chawonsu, mbil yawonsu ni mipak yawonsu yidiokila kudiay Yehova yiding yitentamina. (Kuseng 89:14; 119:128) Satan walonda anch Yehova kadiap Nyikel muwamp. Chawiy Satan kakutwishap kulet kutentam pa mangand.

6. Diyingishin ik disadina anch Yehova ikala ni mbil ya kuyikel?

6 Diyingishin dikwau dimekeshina anch Yehova ndiy ukweta mbil ya kuyikel didi anch ndiy ukweta ronganyin ni manangu ma kuyikel mangand. Tumen chom chinech mu mutapu wamwinkishay Mwanend usu wa kwok mayej makadau adokter kutwish kwok. (Mateu 4:23, 24; Marko 5:25-29) Ap  anch yom yiney yimeken kwikal yilay kudi etu, yidiap kwau yilay kudi Yehova. Wij nawamp mutapu ukata kusal mujimbu ni ukutwish kwok ulim wawonsu ukutwisha kwikal ku mujimbu. Ukutwish kand kulangwish afu ni kukangesh mar ma chitangil mawonsu makutwisha kushiken.

7. Mutapu ik ukwetay Yehova manangu kusutamu muntu mwawonsu udia mu mangand ma Satan?

7 Mangand mayikedilay Satan makutwishap kulet chisambu, chikala mukach mwa ngand yimwing ap mu jingand jivud. Ching kwend Yehova ndiy ukweta manangu ma kulet chisambu mu mangand mawonsu. (Isay 2:3, 4; 54:13) Tukat kwiyov mudi mwiyovay kambuy Paul chisu chalonday anch: “Ndiy ukwet manangu nakash ni ronganyin kupandakan! Ov, nany ukutwisha kwijik mutapu ukat kukatulay Nzamb milong? Ap nany ukutwisha kujingunin mutapu ukat kusalay yom?”—Rom 11:33.

WINYIKEL WA YEHOVA UDI UWAMP

8. Mutapu ik ukata kwiyov piur pa mutapu wa kuyikel wa Yehova?

8 Mudi twamana kal, Bibil umekeshin patok anch Yehova ndiy ukweta mbil ya kuyikel. Ulejen kand mulong wak ndiy udia Nyikel muwamp. Diyingishin dikwau didi anch ukat kuyikel kwa rukat. Tukat kwiyov anch tudi piswimp nend anch twatong mutapu udiay mwin “ranaken ni mwin riy, wakad kwovang ujim swa, wizwila sens nich rukat ni uyakin.” (Kubudik 34:6) Nzamb ukat kutukwat nich usey ni kalimish. Ukat kutulam nawamp nakash kusutamu mutapu tukutwisha kwilam ayinetu. Djabul ulondin anch Yehova ukat kuyijindjikin atushalapol end yom yiwamp, pakwez minam madi makasu. Nzamb wamupana Mwanend mukatish mulong twikala ni ruchingej ra kushakam chikupu.—Tang Kuseng 84:11; Rom 8:32.

Yehova ukat kutulam nawamp nakash kusutamu mutapu tukutwisha kwilam ayinetu

9. Mutapu ik twija anch Nzamb ukat kumubangin muntu ni muntu panrend?

9 Yehova uyikatin antu end awonsu. Pakwez ukat kumubangin kand muntu ni muntu panrend. Tong piur pa yom yasadika pasak. Piswimp ni mivu yitot yisatu, Yehova wasadina anzwij mulong wa kutakel muchid wend ni kuyinkish usu mulong wa kuwin akankuny au. Pa chisu chinicha, Yehova wadandamena kumubangin muntu ni muntu panrend. Pakach pa antu inay pading mband umwing utazukinau anch Rut. Kadingap mwin Isarel ni washa yom yivud mulong wa kwikal mwin kumwifukwil Yehova. Nzamb wamufuta pa kumwinkish ikundj ni mwan. Pakwez kusutamu yom yiney, mwan wa Rut wikala mu mulong wa dijuku dishikijina kudi Mesia. Yehova wasala kand anch rusangu ra Rut arifunda mu Bibil mu buku ukweta dijin diend. Utongin anch Rut ukwiyov nchik chisu chikuvumbukay ni kwijik yom yiney yawonsu?—Rut 4:13; Mateu 1:5, 16.

10. Mulong wak tukutwish kulond anch winyikel wa Yehova uyipinap?

10 Winyikel wa Yehova uyipinap. Pakwez, antu amuziyidina akwet want ipau ni musangar. (2 Korint 3:17) David walonda piur  pa Yehova anch: “Kalimish ni katumb yidi kurutu kwend, ukash ni musangar yizwil kushichay.” (1 Jinsangu 16:7, 27) Nfund a kuseng Etan wafunda anch: ‘Ayuk kwau antu ija dizu dia mpuny yey, A Yehova, awiy akata kwendil mu kutok kukata kudiokal mwis mwey. Akat kusangar mu dijin diey machuku mawonsu, akat kwitumbish mulong wa kutentam kwey.’—Kuseng 89:15, 16.

11. Mutapu ik tukutwisha kwikal nich kashinsh anch ukaleng wa Yehova udi uwamp?

11 Anch twatongijokin piur pa uwamp wa Yehova, tukwikal nich kashinsh anch winyikel wend udi uwamp. Tukwiyov mudi mwiyovay nfund a kuseng pamulejay Nzamb anch: “Kushakam dichuku dimwing mu dibur diey, kuwapil kupandakan kushakam machuku kanan kwindjing!” (Kuseng 84:11) Yehova watusala ni watutanga, chawiy wij kamu nawamp yom yikutwisha kutusangaresh. Utwinkishin kwa kwikatin yom yivud nakash kusutamu yitukweta nich kuswir. Yom yawonsu yitwitinay Yehova kusal yidi mulong wa uwamp wetu. Ap anch twipan, tukwikal ching ni musangar anch twamuziyin Yehova.—Tang Isay 48:17.

12. Diyingishin ik dia pa dishin ditukweta mulong wa kukwash ukaleng wa Yehova?

12 Twilejin mu Bibil anch kupwa kwa Mivu Kanan ya Winyikel wa Kristu antu amwing akubwambwil ukaleng wa Yehova. (Kujingunik 20:7, 8) Yom ik yikuyishikija kusal mwamu? Mu chisu chinicha, Djabul ukusal usu chakwel antu asala yom yiyimp. Mwawiy mukatay kusal. Ukusal usu wa kuyilej antu itiyija anch akutwish kushakam chikupu pakad kumuziyin Yehova. Minam madi makasu. Pakwez tufanyidin kwiyipul ayinetu anch: ‘Ov, nifanyidin kwitiyij makasu mudi minam?’ Anch tumukatin kamu Yehova ni tukwet kashinsh anch udi muwamp ni anch ukwet mbil ya kuyikel mangand mawonsu, makasu mudi minam makuturumbageshap bwat. Tukukat ching kushakam mu ukaleng wa Yehova, mukuyikelay nich rukat.

TUKWASHANY NICH KUSHINSHAMAN UKALENG WA NZAMB

13. Mutapu ik tukata kukwash ukaleng wa Nzamb anch twamwimburij?

13 Mudi mutapu twamana kal, Yehova ndiy ukweta mbil ya kuyikel ni mutapu wend wa kuyikel udi uwamp. Tufanyidin kamu kukwash ukaleng wend. Tukukwash ukaleng winou anch twikal ashinshamena kudi Yehova ni anch twamwimburij. Anch twasal usu wa kusal yom yikatinay Yehova, tumekeshin anch tukatin ni tukwashin mutapu wend wa kuyikel.—Tang Efes 5:1, 2.

14. Mutapu ik ukutwishau amakurump a chikumangen ni antakel a majuku kumwimburij Yehova?

14 Twilejin mu Bibil anch Yehova ukat kusadin usu wend chisu chawonsu mu mutapu wa rukat. Antakel a majuku ni amakurump akatina ukaleng wa Yehova akumwimburij Yehova ni kakusadinap wintakel wau mu mutapu uyimp ap wa kusop nayimp. Kambuy Paul wasala usu nakash wa kumwimburij Nzamb ni Mwanend. (1 Korint 11:1) Kayovishap antu akwau usany ap kuyishindil mulong asala yom yiwamp. Pakwez, wayikasikesha nich ranaken chakwel asala yom yiwamp. (Rom 12:1; Efes 4:1; Filimon 8-10) Mu kusal mwamu, Paul wamwimburija Yehova. Anch twayisadil akwetu yom nich rukat, tukwashin ukaleng wa Yehova.

15. Mutapu ik tukata kukwash winyikel wa Yehova anch twayilimish antu atutakedila?

15 Tukat kukwash kand winyikel wa Yehova  anch twayilimish ni twovijan nawamp nau antu atekinay kal mulong wa kututakel. Ap anch tuteshinap nawamp ap kwitiy mipak yikwatinau, tukudandamen kuyikwash. Chinech chishalijadin ni mutapu usadikina yom mu mangand, pakwez etu yawiy tusadining anch twamwitiy Yehova mudi Nyikel wetu. (Efes 5:22, 23; 6:1-3; Hebereu 13:17) Ni mwamu tukwet musangar, mulong Nzamb ukatin yom yiwamp kudi etu.

16. Mutapu ik umekeshina mipak tukata kukwat anch tukwashin ukaleng wa Nzamb?

16 Tukutwish kand kukwash ukaleng wa Nzamb kusutin mipak tukata kukwat. Yehova katwinkishinap mbil kampand mulong wa mashakamin min mawonsu ma mwom. Pakwez, utulejin mutapu utonginingay. Chinech chikutwish kutukwash kwijik nawamp yom tufanyidina kusal. Chilakej, Yehova kayinkishinap in Kristu list wa masun mafanyindinau kudjal ap bwat. Pakwez, utulejin anch tufanyidin kwikal isikena ni ilimishina mudi Atuman end. (1 Timote 2:9, 10) Ukatin anch tutongin pa usu ukweta mipak yetu piur pa antu akwau. (1 Korint 10:31-33) Anch twakwat mipak yimedina pa kutong kwa Yehova, tumekeshin anch tukatin ni tukwashin mutapu wend wa kuyikel.

Kwash ukaleng wa Yehova mu mipak ukwatina ni mu midimu ya dijuku (Tal paragraf wa 16-18)

17, 18. Mutapu ik ukutwishau ambay a uruw kumekesh anch akwashin ukaleng wa Yehova?

17 Shinshikin mutapu umwing ukutwishau ambay a uruw in Kristu kukwash ukaleng  wa Yehova. Ambay a uruw kakutwishap kuchingejin anch yom yitonginau yawiy yikusadika. Akutwish pamwing ap kwikal ni milong yikash. Anch chidi mwamu, akutwish kutaninamu anch atongin pa mutapu wayisadinay Yehova in Isarel a pasak. Yehova warumburila anch udi mudi muntu ikundj kudi antu end. (Isay 54:5; 62:4) Muchid winou wamurumbukina yisu yivud Yehova. Urund wau wading mudi uruw udia mu milong yikash. Pakwez Yehova kamulikap swa Isarel. Chawiy, wayilikishina tupamp ni tupamp ni walama kushilamu kwend kudi awiy.—Tang Kuseng 106:43-45.

18 Ambay a uruw amukatina Yehova akusal usu wa kumwimburij. Ap anch akwet milong mu uruw wau, akat kukimb mu Bibil mulong wa kupwish milong yau. Ij anch Yehova ukwatin nich usey machip ma uruw ni ukatin anch ikundj ni mband ‘alamata’ kudi umwing ni mukwau. Masandj diawiy kusu diyingishin dia Mifund dikutwisha kujip uruw ni kusal anch mwin Kristu atana ap achika kand. (Mateu 19:5, 6, 9) Anch in Kristu asal yawonsu yikutwishau mulong wa kutwal uruw wau kurutu, akumekesh kamu anch akwashin ukaleng wa Yehova.

19. Yom ik tufanyidina kusal anch twarumbuk?

19 Etu awonsu tudi antu akad kuwanyin, ni yisu yimwing tusadining yom yakad kumusangaresh Yehova. Ndiy wij mwamu, chawiy chaletay difut dia Kristu. Komb anch twarumbuk, tufanyidin kumwit Yehova chakwel atulikishin. (1 Yohan 2:1, 2) Pa ndond pa kwov kwau nayimp mulong wa kurumbuk kwetu, tufanyidin kusal usu wa kwilejin ku kurumbuk kwetu. Tukatin kushal piswimp ni Yehova, ukutulikishina ni ukutukwasha tukasikana ni tudandamena kumusadin.—Kuseng 103:3.

20. Mulong wak tufanyidin kukwash ukaleng wa Yehova nlel?

20 Mwi ngand yisu, muntu mwawonsu akumutakel kudi Yehova ni ukwilej njil jend jitentamina. (Isay 11:9) Pakwez ap katat tukutwish kwilej yom yivud piur pa mutapu utonginay ni ukimbinay anch tupwisha milong. Piswimp ap, kwikil muntu kand ukutadika piur pa mbil ya Nzamb ya kuyikel. Chawiy tusalany yom yawonsu tukutwisha kusal mulong wa kukwash ukaleng wa Yehova kusutil kumuziyin, kumusadin nich kushinshaman ni kusal usu wa kumwimburij mu yom yawonsu tusadina.