Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 6 , 2017

Tek Muchim Wey ku Mapit ma mu Spiritu

Tek Muchim Wey ku Mapit ma mu Spiritu

“Mulong kudia mapit mey, kwawiy kand kukwikala muchim wey.” —LUKA 12:34.

MIMINY: 16, 9

1, 2. (a) Mapit ik ma usey masatu madiokila kudi Yehova? (b) Yom ik tukwileja mu mutu wa mulong winou?

YEHOVA udi mpich mujim nakash mu mangand mawonsu. Yom yawonsu yidi yendendiy. (1 Jinsangu 29:11, 12) Pakwez Yehova ukat kupan kudi awonsu. Kujikitish mud ik tukweta mulong watwinkisha niyetu mapit ma mu spiritu! Ov, mapit minam mapit ik? Pakach pa mapit minam padi (1) Want wa Nzamb, (2) mudimu wetu wa kulejan ni (3) uyakin wa usey udia mu Dizu diend. Pakwez anch tubabelap, mu kusut kwa chisu tukutwish kuvuramen usey ukweta mapit minam. Tufanyidin kudandamen kuvurik ayinetu usey umakweta ni kumakat nakash, mulong Yesu walonda anch: “Kudia mapit mey, kwawiy kand kukwikala muchim wey.”—Luka 12:34.

2 El tushinshikinany mutapu tukutwisha kudandamen kulam rukat rikash ni kujikitish mulong wa Want, mudimu wa kulejan ni mulong wa uyakin. Pitusadina mwamu, tongijokin mutapu ukutwisha kukat nakash mapit minam ma mu spiritu.

 WANT WA NZAMB UDI MUDI USANG WA USEY NAKASH

3. Yom ik yasalay muntu wa mu rusangu ra Yesu mulong wa kuland usang umwing wa usey? (Tal chipich cha kwisambishin.)

3 Tang Mateu 13:45, 46. Yesu walonda rusangu ra muntu walandang ni kulandish usang. Dichuku dimwing, watana usang ukweta usey nakash kusutamu usang wawonsu wadingay kuman. Muntu waswirikena nakash usang winou, chawiy walandisha yom yawonsu yadingay nich mulong wa kuuland. Ukutwish kutongin usey wadinga nich usang winou kudi ndiy?

Anch twakat Want nakash mudi mwakatay muntu usang wa usey nakash, tukusha yom yawonsu mulong wa Want

4. Yom ik tufanyidina kusal mulong wa Want?

4 Yom ik tukutwisha kwilejin ku chilakej cha Yesu? Uyakin wa Want wa Nzamb udi mudi usang wa usey nakash. Anch twakat Want nakash mudi mwakatay muntu winou usang wa usey, tukusha yom yawonsu mulong wa kwikal ni kushal an a Want. (Tang Marko 10:28-30.) El tumanany mutapu mwasalau antu aad mwamu.

5. Yom ik yakimbay Zakeus kusal mulong wa Want?

5 Zakeus wading mwin kulambwish yitad. Wikala mpich mulong wayitambulang antu nfalang. (Luka 19:1-9) Pakwez dichuku dimwing, Zakeus watesha diskur dia Yesu piur pa Want. Wakata nakash yom yateshay ni wakimba kuswimp kapamp kamwing. Walonda anch: “Mwant, teshany! Am nikez kupan chikunku cha dipit diam kudi atuzwendj. Chad kand, anch namudimba muntu, nikez kumuchirishin yom yend tupamp tunying.” Zakeus wachirisha nfalang jayitambulay antu ni walika kand kwikal ni ris ra nfalang.

6. Kuswimp ik kwasalay mband umwing, ni mulong wak wasalay mwamu?

6 Chisu chateshay mband umwing piur pa Want mivu ya kwinyim ey, wading wiyandjikin kal mu milong ya utun wa amband. Wading kand ukat kutakel ditenchik dikata kurish mulong utun udandamen. Pakwez pilejay Bibil ni kwijik usey ukweta Want wa Nzamb, wamana anch ufanyidin kuswimp nakash mu mwom wend. (1 Korint 6:9, 10) Mulong wa rukat rend mulong wa Yehova, wadiokala mu ditenchik dined ni walika kamu kusal yom ya utun. Watambula dibatish mu muvu wa 2009, ni muvu walondulaku, wikala chibol wa rawonsu. Wasala kuswimp kwinoku kujim mulong rukat rend mulong wa Yehova rading rikash kusutamu maswir mend mawonsu mayimp madingay nich.—Marko 12:29, 30.

7. Mutapu ik tukutwisha kudandamen kulam rukat rikash mulong wa Want wa Nzamb?

7 Mulong wa kwikal an a Want wa Nzamb, avud pakach petu aswimpa kamu nakash mu mwom yau. (Rom 12:2) Pakwez kurish kwetu kudandamedin. Tufanyidinap kulik anch rukat retu mulong wa Want ariziyisha kudi chom chin chawonsu, mudi kukat yom ya kumujimbu ap maku mayimp ma masandj. (Jinswir 4:23; Mateu 5:27-29) Mulong wa kutukwash tulama rukat rikash mulong wa  Want wa Nzamb, Yehova watwinka dipit dikwau dia usey.

MUDIMU WETU WA KULEJAN UPANDISHIN MWOM

8. (a) Mulong wak kambuy Paul warumburila anch mudimu wetu wa kulejan udi mudi ‘chipau cha usey ukash mu jimpas ja kam’? (b) Mutapu ik wamekeshay Paul anch ukatin mudimu wa kulejan?

8 Yesu watwinkisha chisend cha kufundish ni kulejan rusangu ruwamp piur pa Want wa Nzamb. (Mateu 28:19, 20) Kambuy Paul warumburila anch mudimu wa kulejan udi mudi chipau cha usey ukash mu jimpas ja kam ap nsab ya kam. (2 Korint 4:7; 1 Timote 1:12) Mulong tudi antu akad kuwanyin, tudi mudi nsab ja kam. Pakwez uruu tulejena udi mudi mapit ma usey mulong ukutuletin etu mwom wa chikupu ni kudi antu atuteshina. Chawiy chalonday Paul anch: ‘Am nikat kusal yom yiney yawonsu mulong wa rusangu ruwamp chakwel nisala nau akwetu pamwing.’ (1 Korint 9:23) Paul wasala mudimu nakash mulong wa kuyifundish antu akwau piur pa Want wa Nzamb. (Tang Rom 1:14, 15; 2 Timote 4:2.) Rukat mulong wa rusangu ruwamp ramukwasha kudandamen kulejan ap anch amuzengola nakash. (1 Tesalonik 2:2) Mutapu ik tukutwisha kwimburij rukat ra Paul mulong wa mudimu wa kulejan?

Uruu tulejena udi mudi mapit ma usey mulong ukat kutuletin etu mwom wa chikupu ni kudi antu atuteshina

9. Mitapu ik yimwing tukutwisha kumekesh anch tukatin mudimu wa kulejan?

9 Mutapu umwing wamekeshay Paul anch ukatin mudimu wa kulejan wading wa kusadin mitapu kushalijan mulong wa kwambamb ni antu. Mudi Paul nau in Kristu a kusambish, twipanin mu kulejan rusangu ruwamp kudi antu ku chikumbu ni chikumbu, mu jindond jidia antu avud ni kwawonsu tukutwisha kuyitan. (Midimu 5:42; 20:20) Tukimbining mitapu kushalijan mulong wa kuyilej antu avud anch chiswapel. Anch tukwet chisu, tukutwish kusal mudi chibol nkwash ap chibol wa rawonsu. Ap tukutwish kwilej dizu dikwau, kushemunikin mu teritwar wa ngand yetu ap kand kuya mwi ngand yikwau.—Midimu 16:9, 10.

10. Kutaninamu ik kwamanay Irene pasalay mudimu nakash mulong wa kulejan rusangu ruwamp?

10 Irene, nambaz mujich udia mu États-Unis, wakata kulejan rusangu ruwamp kudi antu alondina dizu dia in Russe. Chawiy mu muvu wa 1993, waya mu chisak cha chikumangen chasadinang dizu dia in Russe mu musumb wa New York. Pa chisu chinicha, chisak chading nau in kulejan 20. Kupwa kwa mivu 20, Irene walonda anch: “Nalondangap kamu dizu dia in Russe nawamp.” Pakwez, Yehova wamukwasha pamwing nau in kulejan akwau mulong wa kuyilej antu mu dizu dinidia. Mudi chibudikin, nlel mu musumb wa New York mudi yikumangen musamban yisadidina dizu dia in Russe. Irene wileja Bibil nau antu avud ni 15 atambula dibatish. Amwing pakach pau asadin ku Betel, adi ayibol ni adi amakurump a yikumangen. Irene ulondin anch: “Anch natongin piur pa yom yikwau nafanyina kusal, nikutwishap kutongin anch yafanyina kwinletin musangar nakash mudi  unikweta nlel.” Irene ukwatin nich usey nakash mudimu wend wa kulejan!

Ov, ukwatining mudimu wey wa kulejan nich usey ni ukat kwitekin chisu mu program wey wa pa rubing mulong wa mudimu winou? (Tal paragraf wa 11, 12)

11. Yom ik tukata kutaninamu anch twadandamen kulejan chikalap nchik kuzengol?

11 Anch tukwatin nich usey mudimu wa kulejan, tukwikal mudi kambuy Paul ni tukudandamen kulejan ap anch atuzengol. (Midimu 14:19-22) Chilakej, kudiosh mu muvu wa 1930 djat ni mu muvu wa 1944, akadivar netu ading mu États-Unis ayizengola nakash. Pakwez adandamena kulejan. Papakijau antakel kuyikangesh kusal mudimu wa kulejan, akadivar netu aya ku tribinal ni ayinga nich milong yivud. Mu muvu wa 1943, Mukadivar Knorr walonda piur pa kuwin kwawinau ku Tribinal Mujim (Cour Suprême) wa mu États-Unis. Walonda anch kwafanyinap kwikal mulong ap umwing wa kupwish ku Tribinal anch akadivar kadandamenap kulejan. Walonda kand anch mulong akadivar a pa mangand mawonsu adandamena kulejan, amekesha anch rupompat rayikangeshap kuya kurutu. Akadivar akwau a mu jingand jikwau niyau awina milong ya mutapu winou. Mwaning, rukat retu mulong wa mudimu wa kulejan rikutwishap kusal anch kuzengol kutukangesha kulejan.

12. Mipak ik ukwatina kusal?

12 Anch twakwat mudimu wetu wa kulejan nich usey, tukutwishap kutongin ching piur pa uvud wa asaa tukufunda mu rapor wetu. Tukusal yom yawonsu tukutwisha mulong wa kupan ‘uman wa rusangu ruwamp.’ (Midimu 20:24; 2 Timote 4:5) Pakwez yom ik tukuyifundisha antu akwau? Tushinshikinany dipit dikwau dia usey didiokila kudi Nzamb.

UYAKIN WA USEY TWILEJININGA

13, 14. Chisu ‘chipau cha mapit’ chalonday Yesu chidia mu Mateu 13:52, ni mutapu ik tukata kuchizwish?

13 Dipit dia kasatu diatwinkishay Yehova udi uyakin wawonsu tukata kwilej. Yehova udi Musul wa uyakin. (2 Samwel 7:28; Kuseng 31:5) Mulong udi Tatuku mwin kupan,  ukatining kwangan uyakin winou niyetwetu. Kushik ni katat, twilejin kal yom yiney yivud kusutin kutang Dizu diend ni mikand yetu, kukumangan ku yitentam ni ku yikumangan ya pa rubing. Patukumangejina uyakin uvud, tukwikal ni chom chatazukay Yesu anch “chipau cha mapit” cha uyakin wa “yom yikur ni yom yisu.” (Tang Mateu 13:52.) Yehova ukutukwash kwizwish ‘chipau chetu cha mapit’ anch twakimbijol uyakin mudi mukatau kukimb mapit ma usey majingamina. (Tang Jinswir 2:4-7.) Ov, mutapu ik tukutwisha kusal mwamu?

14 Tufanyidin kwilej Bibil ni mikand yetu chisu chawonsu ni kusal kukimbijol. Chinech chikutukwash kujingunin uyakin ‘usu’, utwakad kwijik. (Joshua 1:8, 9; Kuseng 1:2, 3) Nimero wa kusambish wa Chinong cha Kalam wabudishau mwi ngond wa sambwad muvu wa 1879, wafanikesha uyakin ni chisalamb chijingamina mukach mwa masuk. Mulong wa kuman chisalamb mudi chinech, muntu ufanyidin kuchikimb nawamp. Ni anch wachiman, kakusangerap kwend anch mulong waman kal chimwing. Ukudandamen kukimb chakwel amana yisalamb yikwau kand. Chilik chimwing, tufanyidinap kusanger uyakin umwing kusu tukutana. Tufanyidin kwikal nich mushiku wa kudandamen kukimb uyakin uvud.

15. Mulong wak tukutwish kulond anch uyakin umwing udi ‘ukur,’ ni uyakin ik ukukwata nich usey nakash?

15 Pitwasambisha kwilej Bibil, twileja uyakin umwing uwamp nakash. Tukutwish kuutazuk anch udi uyakin ‘ukur’ mulong wawiy twileja pa kusambish. Uyakin ik umwing udia pakach pa uyakin winou? Kwisambishin, twileja anch Yehova udi Sakatang wetu ni anch ukwet chitongijok mulong wa antu. Twileja kand anch Nzamb wamutuma Mwanend panap pansh mulong wa kupan mwom wend mudi difut chakwel tutwisha kukolik ku chitil ni ku rufu. Ni twileja kand anch Want wa Nzamb ukupwish mar mawonsu ni tukushakam chikupu pa divu mu chisambu ni mu musangar.—Yohan 3:16; Kujingunik 4:11; 21:3, 4.

16. Yom ik tufanyidina kusal anch kudi kwovikesh kanang mu kutesh kwetu kwa uyakin wa Bibil?

16 Yisu yimwing, kutesh kwetu kwa uprofet wa Bibil ap kwa maverse ma Bibil akat kukwovikesh nawamp. Anch chinech chashiken, chidi cha usey kwitekin chisu cha kwilej yom yiney yisu ni kuyitongijokin. (Midimu 17:11; 1 Timote 4:15) Tukwetap ching kuswir kwa kwijik kushalijan kudia pakach pa yom yiney yikur ni yisu, pakwez tufanyidin kand kubabal nakash mulong wa kwijik nawamp mutapu urumburilau yom yiney yisu. Kwilej mudi kwinoku kwa mushiku kukutukwash chakwel uyakin winou usu wikala pamwing ni uyakin ukwau wa Bibil twija. Ov, mulong wak chidi cha usey kudi etu kusal usu mudi winou?

17, 18. Mutapu ik ukutwishay spiritu utumbila kutukwash?

17 Yesu wafundisha anch spiritu wa Nzamb ukutwish kutukwash kuvurik yom twileja pakur. (Yohan 14:25, 26) Mutapu ik ukutwishay kutukwash chisu tulejena rusangu ruwamp? Tal yom yamanay mukadivar utazukinau anch Peter. Mu muvu wa 1970, wading ni mivu 19 ni wading wasambish kal chad kusal ku Betel wa Grande-Bretagne. Peter wading ulejen ku chikumbu ni chikumbu ni wamutana ikundj umwing wa mawedj ukweta mivu pakach pa 40 ap 60. Wamwipula ikundj winou anch ukutwish kusanger kutesh Bibil.  Ikundj winou wading rabi wa in Yuda, ni wova nayimp nakash pa kuman anch nsand amufundisha Bibil. Mulong wa kumupim Peter, rabi wamwipula anch: “Ey nsand ey, buku wa Daniel amufunda mu dizu ik?” Peter wamwakula anch: “Chikunku cha buku winou achifunda mu dizu dia Aram.” Peter uvurikin anch: “Rabi washimwoka pa kuman anch nading nij chakul—pakwez am nashimwokap! Mutapu ik nijika chakul? Pinachirika ku chikumbu nakimba mu magazet makur ma Chinong cha Kalam ni Réveillez-vous! ni natana mutu wa mulong urumburila anch buku wa Daniel amufunda mu dizu dia Aram.” (Daniel 2:4) Mwawiy, spiritu utumbila ukutwish kutukwash kuvurik jinsangu twatanga ni twateka mu chipau chetu cha mapit pakur.—Luka 12:11, 12; 21:13-15.

18 Anch twakat uyakin twileja kudi Yehova ni anch twajikitish, tukukimb anch tuwejinaku uyakin ukwau mu chipau chetu cha mapit. Anch twadandamen kusal mwamu, tukwikal irijekina mulong wa kufundish antu akwau.

LAM NAWAMP MAPIT MEY

19. Ov, mulong wak tufanyidin kulam nawamp mapit metu ma mu spiritu?

19 Mu mutu wa mulong winou, twilej kal anch chidi cha usey kukwat nich usey mapit metu ma mu spiritu. Pakwez tufanyidin kubabal nakash chakwel kangal Satan ni mangand mend maziyisha rukat retu mulong wa mapit minam. Anch tubabelap, tukwikal ni kampuw ku yom mudi kwikal ni mudimu utufutinau nfalang jivud, kutongin mashakamin mawamp ap kwibaz mulong wa yom ya kumujimbu tukweta. Kambuy Yohan utuvurishin anch mangand minam ni yom yidiamu yikujiy piswimp ap. (1 Yohan 2:15-17) Chawiy tufanyidina kudandamen kujikitish mulong wa mapit metu ma mu spiritu ni kumalam nawamp.

20. Yom ik ufanyidina kusal mulong wa kulam nawamp mapit mey ma mu spiritu?

20 Sal usu wa kulik chom chin chawonsu chikutwisha kuziyish rukat rey mulong wa Want wa Nzamb. Dandamen kulejan nich mushiku ni kangal washadish rukat rey mulong wa mudimu wa kulejan. Dandamen kukimb uyakin wa Bibil. Anch wasal mwamu, ukwitekin ‘mapit mey mwiur. Mwinimwa makutwishap kushadik, mulong ij kakutwishap kumiy, ap amakej kakutwishap kumashesh. Mulong kudia mapit mey, kwawiy kand kukwikala muchim wey.’—Luka 12:33, 34.