YEHOVA NZAMB ukatin anch in kumwifukwil end asangera chisambu. Ukatin anch antu end ikala mu chisambu umwing ni mukwau. Anch asal mwamu, kukat kwikal chisambu mu chikumangen cha win Kristu. Chisambu chinech chikat kupwit antu avud chakwel eza mu chikumangen.

Chilakej, ngang umwing wa mu Madagascar wamana chisambu chidia pakach pa antu a Nzamb ni walonda anch: ‘Anch nakimb kuya mu relijon kanang, winou ndiy nifanyidina kulondul.’ Mu kusut kwa chisu, walika kwifukwil ayilembil, waswimpa yom yimwing mu uruw wend ni wasambisha kumwifukwil Yehova, Nzamb wa chisambu.

Mudi ikundj winou, tunan twa antu muvu ni muvu akat kwandam mu chikumangen cha win Kristu ni akat kutan chisambu chikwetau nich kuswir. Pakwez tutangin mu Bibil anch ang mu chikumangen mudi “mukau uyimp ni muchim wa kwitong amwiney” yikutwish kuyipish urund ni kulet milong yijim. (Jakobu 3:14-16) Pakwez Bibil utwinkishin yiyul yiwamp mulong wa kwijik mutapu wa kwipuk milong yiney ni kukasikesh chisambu chetu pamwing ni akadivar nau anambaz. El tumana mutapu tukusadina yiyul yiney mu mitapu kushalijan ya mwon wetu.

MILONG NI MUTAPU WA KUYIPWISH

“Novijanangap ni mukadivar nasalang nend mudimu. Yisu yimwing twalondijana ni antu aad eza ni amana mutapu twading tutendina.”—CHRIS.

“Nambaz umwing nalejanang nend yisu yivud walika kapamp kamwing kulejan niyamam. Kupwa walika kwinlondish. Nadingap nija mulong wak.”—JANET.

“Nading nabambin nau antu asatu ku telefon. Umwing wanleja anch shal nawamp, ni am natonga anch wakatul kal telefon. Chad namuleja muntu mukwau twading twambambina nend yom yiyimp piur pend, komb wading winteshin kwend.” —MICHAEL.

“Mu chikumangen chetu, ayibol aad ading ni milong. Umwing wasambisha kumuswejen mukwau. Chad yisalijok yau yayiziyisha antu akwau.”—GARY.

Yom yiney yikutwish kumekan kwau mudi milong yikemp. Pakwez yikutwish kuyovish ushon antu akweta milong yiney ni yikutwish kuyipish chisambu cha chikumangen. Cha musangar, akadivar nau anambaz inay alondula yiyul ya Bibil ni ikala kand mu chisambu. Ov, utongin anch yiyul ik ya Bibil yayikwasha?

“Kangal wakatendany mwi njil uyilanya.” (Disambishil 45:24) Josef wayinkisha anamakwend chiyul chinech cha manangu chisu chachirikau kudiay tatukwau. Anch muntu kayikedilap yovil yend ni wilikidij kujiman swa, mwikadil winou uyimp ukupandakan kuyip. Antu akwau niyau akutwish kujiman. Chris wamana anch yisu yimwing chading chimukasikedin kwikepish ni kulondul yiyul. Waswirikena kuswimp ni wamwita mukadivar watenday nend dilikishin. Kupwa Chris wasala usu nakash wa kuyikel  mwikadil wend. Pamanay mukadivar usu wasalay Chris mulong wa kuswimp, niyend wasala usu wa kuswimp. Katat adi mu chisambu pamusadidinau Yehova pamwing.

“Kwakad chiyul kutenchik kukat kuwa.” (Jinswir 15:22) Palikay murund nend a Janet kumulondish, Janet wakwata mupak wa kusadin verse winou. Waya kwambamb ni nambaz winou. Janet wamwipula anch wamusala chom chamwovisha kuyip ap kumujimesh. Kwisambishil, awonsu aad ova bil usany. Pakwez padandamenau kwambamb kwa matul, iyova chad nawamp. Nambaz winou wajingunina anch watesha nayimp chom kanang chasadika pakur ni anch Janet kasalap kwend chom chiyimp cha kumujimesh. Wamwita Janet dilikishin, ni awonsu katat adi arund ni amusadidin Yehova pamwing.

‘Anch usotil kupan yakupesh yey pa chintamb, kwinikwa anch wavurik anch: Mwanamakwam ukwet mulong ni yamam, shang yakupesh yey pa chintamb. Yang swa, ukasala bil chisambu nend mwanamakwey.’ (Mateu 5:23, 24) Yesu wapana chiyul chinech ku mafundish mijikena ma pa Mukandu. Kupwa kwa Michael kulond yom yiyimp piur pa mukadivar mukwau, wova nayimp nakash. Wakwata mupak mulong wa kusal yawonsu mulong wa kupwish mulong winou. Chawiy waya kumutal mukadivar ni wamuleja mutapu wading unenganenay. Yom ik yasadika? Michael ulondin anch: “Mukadivar wanlikishina kamu.” Ikala kand arund.

“Kwashijanany akasikena ni aziyila, anch muntu ukwet mulong ni mukwau chifanyidin kulikishijadin umwing ni mukwau.” (Kolosay 3:12-14) Ov, uvurikin ayibol aad atenda mu mudimu wa kulejan? Mukurump umwing wayikwasha mu mutapu uwamp kwijik anch ayiziyisha antu akwau ni kayovishap musangar. Wayivurisha anch afanyidin kwikal ashimpishina muchim umwing ni mukwau ni wayikwasha kulam chisambu mu chikumangen. Itiya ni asadina chiyul chinech. Katat adi nawamp palejenau rusangu ruwamp.

Chiyul chimwing chinech chidia mu Kolosay 3:12-14, chikutwish kukukwash kwikal wikepishina, kumulikishin muntu wakurumbukinang, ni kulik kand kutongin pa mulong winou. Pakwez chikwikal nchik anch usadin usu wa kulikishin chad utwishinap? Chiyul chidia mu Mateu 18:15 chikutwish kutukwash. Ap anch Yesu wading ulondin piur pa yitil yijim, warumburila kand yom yikwau tukutwisha kusal anch tukwet mulong ni mukadivar ap ni nambaz netu. Mu mutapu uwamp ni wa kwikepish, tukutwish kuya kwambamb nend ni kusal usu wa kupwish mulong.

Mu Bibil mudi kand yiyul yikwau tukutwisha kusadin. Yivud pakach pa yiyul yiney yitin kuchingejin spiritu utumbila wa Nzamb chakwel tutwisha kumekesh ‘dibuj dia spiritu.’ Mikadil yend yawiy ey: ‘Rukat, musangar, chisambu, kushimpish muchim, kudimuk, kuwap, ritiy, kwitudish, ni kwilam.’ (Galatia 5:22, 23) Tong bil piur pa chom chinech.  Mashin makat kusal nawamp anch yikung yau akat kuyitek many. Chilik chimwing, chiswapel kupwish milong ni kwikal ni urund uwamp anch twamekesh mikadil yiney yiwamp yidiokila kudi Yehova.

ANTU KUSHALIJAN AKAT KUSAL ANCH CHIKUMANGEN CHIKALA CHISANGARESHINA

Muntu ni muntu ukwet mwikadil wend. Tukwet mikadil kushalijan ni mutapu wa kuman yom ni wa kulond ushalijadin. Chinech chikutwish kusal anch urund wetu wikala usangareshina. Pakwez wuntu wetu kushalijan ukutwish kuletish kulik kwovijan ap matend. Mukurump umwing waswila kal waleta chilakej chimekeshina mutapu ukutwisha chom chinech kushiken palonday anch: “Chikutwish kumukasiken muntu ukweta usany kwambamb pakach pa antu akata kulond nakash. Kushalijan kwinoku kukutwish kumekan anch kukwetap usey, pakwez kukutwish kulet milong yijim.” Witiyijin anch antu akweta mikadil kushalijan chiyikasikedining kwovijan umwing ni mukwau? El tumana chilakej cha atwimbuy aad. Anch twatongin piur pa Pita, tukutwish kuman anch wading muntu walondang yawonsu yading mu manangu mend. Anch twatongin piur pa Yohan, tukutwish kujingunin anch wading mukadivar mukatish watongang kurutu kwa kulond ap kusal chom kanang. Pita ni Yohan ading akwet wuntu kushalijan. Pakwez asala pamwing mulong wa kumusadin Yehova. (Midimu 8:14; Galatia 2:9) Chikutwish kand kwikal mwamu nlel unou. In Kristu akweta mikadil kushalijan akutwish kusal pamwing.

Pakwez chikwikal nchik anch muntu kanang mu chikumangen chen walond ap wasal chom cha kukwovish ujim? Chidi chiwamp kuvurik anch Kristu wafa mulong wa mukadivar winou mudi mwafay mulong weyey, ni ufanyidin kumukat mukadivar ney. (Yohan 13:34, 35; Rom 5:6-8) Chikutwishap kwikal chiwamp kukwat mupak wa kulond anch muntu  winou kakwikalap murund nam ap kumwipuk. Pakwez ufanyidin kwiyipul anch: ‘Ov, mukadivar nam wasalang chom chajipang yijil ya Yehova? Wasalang kwa kwikatin mulong wa kwingovish nayimp? Ap chidi mulong tukwet wuntu kushalijan? Ov, ukwet mikadil nifanyidina niyam kwikal nich?’

Chilakej, anch muntu ukatining kulond nakash chad ey ukulondangap kwey nakash, umenap anch chidi chiwamp kusal nend mudimu wa kulejan ni kuman yom ukutwisha kwilejin kudi ndiy? Ing anch ukwet muchim wa kupan nakash kukusutamu ey? Ukat kuman musangar udiokila ku kuyikwash amapal, ayej ap atuzwendj? Ov, ukutwish kwilejin kudiay muntu winou chakwel niyey wikala ni muchim wa kupan? Dilejan didi anch ap anch ey ni mukadivar ney ushalijadinany, ukutwish kushinshikin pa mikadil yend yikwau yidia yiwamp. Ap anch ukutwishanyap kwikal arund awamp, ukutwish kwikalany piswimp umwing ni mukwau. Chinech chikukwash kulet chisambu pakach pen ni mu chikumangen kand.

Mu mivu chitot ya kusambish, kwading anambaz aad atazukinau anch Evodiy ni Sintik. Chimeken anch ading ni wuntu kushalijan, pakwez kambuy Paul wayikasikesha anch ‘ikalany nich chitongijok chimwing mwi Nsalejetu.’ (Filip 4:2) Niyetu tukatin kumwifukwil Yehova pamwing ni akadivar nau anambaz netu ni kulet chisambu mu chikumangen.

KANGAL WALIK MILONG YIDANDAMEN

Mulong wak tufanyidin kudiosh swa yovil yiyimp tukweta piur pa antu akwau? Tukutwish kufanikesh yovil yiney ni masuk mayimp mapamina mu rupang mudia yisalamb yiwamp. Anch tudioshinap masuk minam mayimp, makwizul mu rupang rawonsu. Chilik chimwing, anch yovil yetu yiyimp piur pa antu akwau yikal yikash, chinech chikutwish kuyipish chikumangen chawonsu. Pakwez  anch twamukat Yehova ni akadivar nau anambaz netu, tukusal yawonsu tukutwisha mulong wa kuchidij chisambu mu chikumangen.

Anch twasal usu wa kusal chisambu nau antu akwau nich kwikepish, tukushimok kuman yibudikin yiwamp

Anch twasal usu wa kusal chisambu nau akwetu, tukutwish kushimwok kuman mutapu ukuwapa yom. Kaman umwing wamana yom yiney. Tesh rusangu rend: “Niyovang anch nambaz umwing wansadinang yom mudi nidi mwanikanch. Chinech chansalang nayimp kamu. Padandamena ujim wam kuya kurutu, nasambisha kumukatwokin. Natonga anch, ‘ndiy kanginkishinap kalimish kawanyidina, chawiy niyam nikumulimishap.’”

Kupwa nambaz watonga piur pa mwikadil wend amwinend. “Nasambisha kuman anch wuntu wam uwapinap, ni naziya nakash. Namana anch chifanyidin kuswimp yitongijok yam. Kupwa kwa kumulembil Yehova piur pa mulong winou, namutumina nambaz winou chipan ni namufundina mukand wa kumwit dilikishin mulong wa yisal yam yiyimp. Twabwikatijana umwing ni mukwau ni twakwata mupak wa kuvuramen mulong winou. Tukwetap kand mulong.”

Muntu mwawonsu ukwet kuswir kwa chisambu. Pakwez yovil yiyimp ap ya kwibaz yikutwish kusal anch muntu asala yom yakad kulet chisambu. Yom yiney yisadikin nakash mu mangand, pakwez Yehova uchingejin anch in kumwifukwil end asala yom yishalijadina ni ya mu mangand. Pakach pa Atuman a Yehova, pafanyidin kwikal chisambu ni uumwing. Yehova wamupepila Paul kuyifundin in Kristu anch ‘endany nawamp ku kutazuk’ watambulanya. Wayikasikesha kusal mwamu ‘nich kwikepish kwawonsu ni kwitudish, ni kushimpish muchim, ambulijanany muntu ni mukwau mu rukat; lamatinany kusankesh michim yen mu spiritu mu kwinung kwa chisambu.’ (Efes 4:1-3) ‘Kwinung kwa chisambu’ kusangaredinau antu a Yehova kudi kwa usey nakash. Chawiy el etu awonsu tusalany usu wa kukasikesh kwinung kwinoku ni kupwish milong yawonsu tukutwisha kwikal ni akadivar nau anambaz netu.