“Mulong ey Nzamb kiukat kukatap kuyip; ni [muntu] muyimp kakutwishap kushakam pamwing ni yey.”​—KUS. 5:4.

MUMINY 142 Tulamany Ruchingej Retu

YIDIA MU MUTU WA MULONG WINOU *

1-3. (a) Kukwatijan ni Kuseng 5:4-6, mutapu ik wiyovilingay Yehova piur pa yom yiyimp? (b) Mulong wak tukutwish kulond anch kuyiyipish an kukwatijadinap ni “chijil cha Kristu”?

YEHOVA NZAMB ukisin mitapu yawonsu ya chisum. (Tang Kuseng 5:4-6.) Ukisin chipandikena kuyisal an nayimp kusutil yisal ya masandj​—mulong chidi chisal chijondila nakash! Mulong tudi Atuman a Yehova, tukat kumwimburij Yehova ni tukisin nakash kuyisal an nayimp kusutil yisal ya masandj ni tukatap kwitiyij chisal chinech mu chikumangen cha win Kristu.​—Rom 12:9; Heb. 12:15, 16.

2 Chisal chin chawonsu cha kuyiyipish an kusutil yisal ya masandj chikwatijadinap ni “chijil cha Kristu”! (Gal. 6:2) Mulong wak tulondina mwamu? Mudi mutapu twamanang mu mutu wa mulong wasambelang, chijil cha Kristu​—charumburik anch, yom yawonsu yafundishay Yesu kusutil mazu ni chilakej chend, chimedin pa rukat ni chikasikeshin kutentam. Mulong in Kristu akin aziyidin ku chijil chinech, akat kuyisadin an mu mutapu uwamp chakwel iyova anch adi mu diking ni anch ayikatin kamu chakin. Pakwez kumuyipish mwan kusutil yisal ya masandj, chidi chisal cha choy ni chakad kutentam chimushikijina mwan ku kwiyov anch kwikil muntu umuchidijina ni umukatina.

3 Cha ushon, chisal cha kuyiyipish an kusutil yisal ya masandj chipalangen mu mangand mawonsu, ni udi mulong ujim uyishikedina ap in Kristu akin. Mulong wak? “Antu ayimp ni in makasu” akat kuvulijan ni amwing akutwish kupakish kwandam mu chikumangen. (2 Tim. 3:13, TMK) Diyingishin dikwau didi anch, antu amwing ading kumusadin Yehova pakur ashikedin ku kusal chitil cha kusangaresh maku mau ma masandj ni kuyiyipish  an kusutil yisal ya masandj. El twisambinany mulong wak kuyiyipish an kusutil yisal ya masandj chidi chitil chijim nakash. Tukushinshikin kand yom yifanyidinau kusal amakurump anch muntu wa mu chikumangen wasal chitil chijim mudi kumuyipish mwan ni mutapu ukutwishau anvaj kuyichidij anau. *

CHITIL CHIKASH

4-5. Mulong wak kumuyipish mwan chidi chitil chikash pantaliken ni mwan winou?

4 Kuyiyipish an kusutil yisal ya masandj kukat kuyimesh antu mar mu machuku muvud. Kukat kuyovish kusansan an ayipishinau ni antu ayikatina​—mudi anamakwau a ku mujimbu ni akadivar ni anambaz nau in Kristu. Kuyipish mwan chidi chitil chikash.

5 Chitil chikash pantaliken ni mwan. Kumuyipish mwan chidi chitil chikata kuyisal antu akwau nayimp nakash ni kuyimesh mar. Mudi mutapu tukumana mu mutu wa mulong wambakedinap, mwin kumuyipish mwan ukat kumusal nayimp mu mitapu kushalijan. Ap anch mwan umuchingejidin, mwin kumuyipish mwan ukat kudiul yovil ya mwan ni kumushindil kusal yom yakad kufanyin mwan kusal. Tufanyidin kuyichidij an pantaliken ni atubaj inay, ni antu asalau kal nayimp mu mutapu winou akwet kuswir kwa kuyongoj ni kuyikwash.​—1 Tes. 5:14.

6-7. Mulong wak kumuyipish mwan chidi chitil pantaliken ni chikumangen ni pantaliken ni antakel a ngand?

6 Chitil pantaliken ni chikumangen. Anch muntu wa mu chikumangen wamuyipish mwan, ukat kupwishikish kalimish ka chikumangen. (Mat. 5:16; 1 Pita 2:12) Chidi chakad kutentam kulond anch chikumangen cha win Kristu chitiyijin kuyipish an kusutil yisal ya masandj mulong mamiliyon ma in Kristu ashinshamena ‘marishin nakash mulong wa ritiy’ chakwel mashakamin mau mamutumbishina Yehova! (Jud 3) Tukatap kwitiyij anch antu ashakama mu chikumangen anch akat kusal yom yiyimp ni alikin kukarumuk ni akat kupwishikish kalimish ka chikumangen.

7 Chitil pantaliken ni antakel a ngand. In Kristu afanyidin “kuziyil kudi in kutakel.” (Rom 13:1) Tukat kumekesh kuziyin kwetu kusutil kulimish yijil ya ngand. Anch muntu mu chikumangen wabwambwil ku chijil cha ngand, chilakej kusutil kumuyipish mwan, muntu winou wasal kal chitil pantaliken nau antakel a ngand. (Ilakej ni Midimu 25:8.) Amakurump a chikumangen kakwetap ulabu wa kumupup muntu ujipina chijil cha ngand. Pakwez kakatap kumuchidij muntu ukata kumuyipish mwan pantaliken ni dipup didiokila kudi mburamatad. (Rom 13:4) Mwin kusal chitil ukat kwangul yom yakunangay.​—Gal. 6:7.

8. Mutapu ik umeningay Yehova kusal yitil pantaliken ni antu akwau?

8 Chipandikena kuyip, chidi chitil pantaliken ni Nzamb. (Kus. 51:4) Anch muntu wasal chitil pantaliken ni muntu mukwau, wasal kal kand chitil pantaliken ni Yehova. Shinshikin chilakej chading mu Chijil chapanay Nzamb kudi in Isarel. Chijil chalonda anch muntu wading kumwiy mutej nend wading “wakad kushinshaman kudi Yehova.” (Lev. 6:2-4, NWT) Chakin kamu, anch muntu mu chikumangen wamuyipish mwan​—ukat kuyipish diking diend​—ni kusal mwamu kudi kuburen kushinshaman kudi Nzamb. Muntu wijikena mudi mwin kumwifukwil Yehova anch wamuyipish mwan wasaadikish kal dijin dia Yehova. Mulong wa diyingishin dined, tufanyidin kwijik anch kumuyipish mwan  chidi chitil chikash pantaliken ni Nzamb ni tufanyidin kuchikis.

9. Nsangu ik jimedina pa Bibil jabudishinau kudi dirijek dia Yehova mu kusut kwa mivu ni mulong wak?

9 Mu kusut kwa mivu, dirijek dia Yehova diabudishin kal nsangu jivud nakash jimedina pa Mifund piur pa mulong wa kuyiyipish an. Chilakej, mitu ya milong yidia mu Chinong cha Kalam ni Réveillez-vous ! yisambidin kal mutapu ukutwishau antu ayipishau kurish ni yovil ya ushon yikata kwikalau nich chisu chilemp, mutapu ukutwishau antu akwau kuyikwash ni kuyikasikesh ni mutapu ukutwishau anvaj kuyichidij anau. Amakurump ayifumbin kal kusutil Mifund mutapu wa kupwish chitil chitadina kumuyipish mwan kusutil yisal ya masandj. Dirijek didandamedin kutenchik mutapu ukutwishau amakurump kupwish mulong wa chitil cha kumuyipish mwan. Mulong wak? Mulong wa kwikal nich kashinsh anch mutapu wetu wa kupwish mulong winou ukwatijadin ni chijil cha Kristu.

YOM YIKATAU AMAKURUMP KUSAL ANCH MUNTU WASAL CHITIL CHIJIM

10-12. (a) Chisu chipwishinau milong yitadina yitil yikash, yom ik yifanyidinau kuvurik amakurump, ni yom ik yikatau kushinshikin nakash? (b) Kukwatijan ni Jakobu 5:14, 15, amakurump afanyidin kusal usu wa kusal yom ik?

10 Chisu chikatau amakurump kupwish mulong piur pa chitil chijim, akat kuvurik anch chijil cha Kristu chiyitin kuyisadin amikoku nich rukat ni kusal yom yidia yiwamp ni yitentamina ku mes ma Nzamb. Mudi chibudikin, afanyidin kushinshikin nakash piur pa yom yivud anch ijik anch kudi muntu kanang wasalang chitil chijim. Chitongijok cha kusambish cha amakurump chifanyidin kwikal cha kulam dijin dia Nzamb ditumbila. (Lev. 22:31, 32; Mat. 6:9) Yom yikwau yijim yikatau kushinshikin yidi kuyikwash akadivar nau anambaz a mu chikumangen kushal piswimp ni Yehova, kuyongoj ni kuyikasikesh antu arumbukidinau.

11 Chikwau kand, anch mwin kusal chitil udi muntu wa mu chikumangen, amakurump akat kusal usu wa kushinshikin anch muntu udi mwin kukarumuk ni anch chitwishikin kumukwash kuwapish urund wend ni Yehova. (Tang Jakobu 5:14, 15.) Mwin Kristu ukata kukudish maku mayimp ni kusal chitil chijim uyedin mu spiritu. Chinech chirumburikin anch kadiap kand mu urund uwamp ni Yehova. * Chawiy, amakurump adi amingang a mu spiritu. Akat kusal usu wa kumwok “muyej [muntu wasalang chitil].” Yiyul yau yimedina pa Bibil yikutwish kumukwash muntu wasalang chitil kuwapish urund wend ni Nzamb, pakwez chom chinech chikutwish kusadik anch udi chakin mwin kukarumuk.​—Mid. 3:19; 2 Kor. 2:5-10.

12 Chakin kamu, amakurump akwet chisend chijim. Akat kubangin nakash amikoku ayinkishau kulam kudi Nzamb ni akat kuyisadin nich rukat ni kutentam. (1 Pita 5:1-3) Akatin anch akadivar ni anambaz nau ijika anch chikumangen yidi ndond ya diking. Mulong wa diyingishin dined, akat kusal pakad kulab anch ijik anch kudi muntu wasalang chitil chikash mudi kumuyipish mwan kusutil yisal ya masandj. Shinshikin yipul yidia kwinsambishil kwa  paragraf wa 13,  15, ni  17 mulong wa kwijik yifanyidinau kusal.

13-14. Ov, amakurump afanyidin kuziyil ku yijil yiyitina antu kuyijikish antakel a ngand anch muntu wayijikish anch kudi mwan wayipishangau? Rumburil.

 13 Ov, amakurump afanyidin kuziyin ku yijil ya mburamatad yitina kuyijikish antakel a ngand anch muntu wamuyipish mwan kusutil yisal ya masandj? Mwaning. Mu jingand mudia yijil yiney, amakurump akat kwikasikesh kulimish yijil ya mburamatad piur pa kuyijikish anch amuyipish mwan. (Rom 13:1) Yijil yiney yipwitamijadinap ni chijil cha Nzamb. (Mid. 5:28, 29) Chawiy anch muntu kanang wayilej amakurump anch kudi mwan wayipishangau, amakurump afanyidin  kutazuk ku biro wa mutiy pakad kulab mulong wa kuyilej mutapu ukutwishau kuziyin ku yijil ya mburamatad piur pa mulong winou.

14 Amakurump akat kwambamb ni mwan wayipishangau ni anvajend pamwing ni antu akwau akweta uman anch mwan amuyipishang ni amakurump akat kuyilej antu inay anch akwet mbil ya kumwijikishamu mburamatad piur pa mulong winou. Pakwez chidi nchik anch muntu wa mu chikumangen ndiy wamuyipishang mwan ni mulong winou awijikang kal kudi antu avud? Ov, mwin Kristu wijikishang rusangu riner, ufanyidin kwifish nich anch wasaadikishang kal dijin dia Nzamb? Bwat. Muntu wayipishanang ndiy usaadikishina dijin dia Yehova.

15-16. (a) Kukwatijan ni 1 Timote 5:19, mulong wak yidi ya usey kwikal ni atuman aad kurutu amakurump asala komite wa dirumburish? (b) Yom ik yikatau amakurump kusal anch ayilej anch muntu kanang mu chikumangen wamuyipishang mwan?

 15 Kurutu amakurump asal komite wa dirumburish mu chikumangen, mulong wak afanyidin bil kwikal ni uman wa antu anch akep aad? Chidi mulong kusal mwamu kukwatijadin ni mbil ja piur ja Bibil piur pa kutentam. Anch ayilej amakurump anch muntu kanang wasalang chitil chikash, pakwez amwinend kitiyidinap, amakurump afanyidin kwikal ni uman wa antu aad kurutu kwa kusal komite wa dirumburish. (Kuv. 19:15; Mat. 18:16; tang 1 Timote 5:19.) Ov, chinech chirumburikin anch chitin kwikal ni atuman aad kurutu kwa kuyijikish antakel a ngand rusangu ra mwan wayipishangau? Bwat. Antakel a ngand kakatap kusadin mbil ja amakurump a chikumangen piur pa mulong utadina kumuyipish mwan.

16 Anch amakurump ijik anch muntu kanang mu chikumangen wamuyipishang mwan, akat kulimish yijil ya mburamatad yitina kuyijikish antakel a ngand, kupwa akat kusal usu wa kukimb uman mulong wa kwikal ni kashinsh anch chitil chasadikang. Kupwa akat kushinshikin yilondina Mifund mulong wa kuman anch chitin kusal komite wa dirumburish. Anch muntu watadik anch amudimbedin, amakurump akat kusadin uman wa antu amanang. Anch muntu walejan anch muntu wa mu chikumangen wamuyipishang mwan ni muntu mukwau niyend walejan anch wamumanang ap walond anch muntu winou wayipishinap kal kand mwan mukwau, amakurump akutwish kutek komite wa dirumburish kusutil uman winou. * Kuburen kwa kaman wa kaad kurumburikinap anch muntu walejanang rusangu riner udi mukamakasu. Ap anch kwikil uman wa antu aad umekeshina anch muntu winou wamuyipishang mwan kusutil yisal ya masandj, amakurump ij anch muntu walejanangau wasalang pamwing ap chisal chiyimp nakash chayovishang antu akwau nayimp. Amakurump akudandamen kuyongoj ni kuyikwash antu ovang nayimp. Chikwau kand, amakurump afanyidin kubabal nakash mulong wa kuchidij chikumangen chakwel kangal muntu winou wayipish kand mwan mukwau.​—Mid. 20:28.

17-18. Rumburil chisend cha komite wa dirumburish.

 17 Chisu chisend cha komite wa dirumburish? Dizu “dirumburish” dimekeshinap anch amakurump akat kurumburish mulong wa kwijik anch chitin kumupup muntu wajipang chijil cha mburamatad kudi antakel a ngand. Amakurump kakatap kupwish mulong winou ukash, akat kuulik mu makas mwa antakel a ngand. (Rom 13:2-4; Tit. 3:1) Pakwez amakurump akat kurumburish ap kushinshikin mulong wa kuman anch muntu winou ukudandamen kushal mu chikumangen.

18 Anch amakurump adi mu komite wa dirumburish, chisend chau chidi cha kupwish milong ya mu spiritu ap ya relijon. Akat kusadin Mifund chisu chirumburishinau mulong wa kuman anch muntu wayipishanang udi mwin kukarumuk ap bwat. Pakwez anch kadiap mwin kukarumuk akutwish kumwopat ni kwijikish  chikumangen anch kadiap kand Kaman wa Yehova. (1 Kor. 5:11-13) Chawiy anch udi kamu mwin kukarumuk chakin ukutwish kushal mu chikumangen. Pakwez, amakurump akumulej anch kakezap kwikal ni yisend mu chikumangen mu mivu yivud ap pamwing ap mu mwom wend wawonsu. Amakurump akutwish kuyilej anvaj adia mu chikumangen akweta an achidia akemp ku ujindj anch afanyidin kumubabel muntu winou. Amakurump payibabeshinau anvaj, afanyidin kubabal chakwel kangal ajimbul dijin dia muntu wayipishangau.

MUTAPU WA KUYICHIDIJ ANEY

Anvaj akat kuyichidij anau chakwel kangal ayiyipish kusutil yisal ya masandj payilejinau yom yifanyidinau kwijik piur pa yidi ya ruvaj. Mulong wa kusal mwamu, anvaj akat kusadin malejan matwinkishinau kudi dirijek dia Nzamb. (Tal paragraf wa 19-22)

19-22. Yom ik yifanyidinau kusal anvaj mulong wa kuyichidij anau? (Tal chipich cha pa chibur.)

19 Nany ukweta chisend cha kuyichidij an ku ubaj? Adi anvaj. * An adi chipan chidiokila kudi Nzamb, “uswan wa [Yehova].” (Kus. 127:3) Chidi chisend chen cha kuyichidij an inay. Yom ik ukutwisha kusal mulong wa kuyichidij aney pantaliken nau antu akata kuyipish an?

20 Chakusambish, ileja mulong wa kwijik chirumburikina kumuyipish mwan. Ileja mulong wa kwijik antu a mutapu ik akata kuyipish an ni milad yikatau kusadin mulong wa kuyidimb an. Shinshikin yom ap antu amekeshina ubaj kanang. (Jnsw. 22:3; 24:3) Ijik anch yisu yivud mwin kumuyipish mwan uding muntu wijay mwan nawamp ni uchingejidinay.

21 Cha kaad, ikal ni chaku cha kwambambang patok nau aney. (Kuv. 6:6, 7) Chinech chitin kwikal mwin kutesh muwamp. (Jak. 1:19) Vurik anch an akatau kuyipish akweting wom nakash wa kulond. Mwan ukutwish kov wom anch kwikil kwau muntu ukwitiya yom yikulonday ap ukutwish kwov wom mulong muntu wamuyipishang wamulejang anch ukumusal nayimp anch walejan. Anch wajingunin anch kudi chom kampand chiyimp chamushikenang mwaney, mwipula mu mutapu uwamp ni mutesha nawamp nich kushimpish muchim chisu chirumburilay.

22 Cha kasatu, yifumba aney. Yileja aney yom yifanyidinau kwijik piur pa yid ya ruvaj kukwatijan ni mivu yau. Yifundisha yom yifanyidinau kulond ni kusal anch muntu wapakish kuyikwat pa ndond yakad kuwanyin ni mu mutapu wakad kuwanyin. Sadin mafundish tutambwila mu dirijek dia Nzamb piur pa mutapu wa kuyichidij aney.—Tal mushet ulondina anch: “ Ifumba Amwiney ni Yifumba Aney.”

23. Mutapu ik tumening chisal cha kuyiyipish an kusutil yisal ya masandj, ni chipul ik tukwisambina mu mutu wa mulong wambakedinap ou?

23 Mulong tudi Atuman a Yehova tumen chisal cha kuyiyipish an anch chidi chitil chikash ni chisal cha chisum. Mulong atutakedin kudi chijil cha Kristu, Atuman a Yehova tukatap kuyichidij antu akata kuyiyipish an ku yibudikin ya yitil yau. Pakwez, yom ik tukutwisha kusal mulong wa kuyikwash antu ayipishau kusutil yisal ya masandj? Mutu wa mulong wambakedinap ou ukwakul ku chipul chinech.

MUMINY 103 Atufung Adi Yipan Kudi Antu

^ par. 5 Mutu wa mulong winou ukwisambin mutapu tukutwisha kuyichidij an chakwel kangal ayisal nayimp kusutil yisal ya masandj. Tukwilej mutapu ukutwishau amakurump kuchidij chikumangen ni mutapu ukutwishau anvaj kuchidij anau.

^ par. 3 KURUMBURIL KWA MAZU KANANG: Kumuyipish mwan kusutil yisal ya masandj kukat kusadik anch muntu mukurump wamusadin mwan mukemp mulong wa kusangaresh maku mend ma masandj. Mu chisal chinech mukutwish kwikal kumulal mwan; kumususwish chid cha ruvaj ap kumulal ku mupany; kumusengesh ku yid yend ya ruvaj; kumukwat pa mayel ap kumukwatol ku mataku ap kand kumusal mwan yisal yikwau yijondila. Chidi cha usey kwijik anch mwan anch amuyipish, amudimbang, amusalang mwamu ku usu ni kumwovish wom, kadiap kurumbuk kwa mwan kwasalang anch amuyipish. An avud akatau kuyipish adi amband, pakwez amakundj niyawiy akat kuyiyipish. Chikwau kand, antu avud akata kuyipishan ading amakundj, pakwez amband amwing niyau akat kuyiyipish an.

^ par. 11 Anch muntu wasal chitil chijim mulong wa kuziy kwend kwa mu spiritu, chinech chirumburikinap anch kakwetap chisend cha yom yiyimp yasalangay. Mwin kusal chitil ukwet chisend cha mipak yend yiyimp ni yisal yend ni ukupan kuchind kudi Yehova.—Rom 14:12.

^ par. 16 Amakurump kafanyidinap kumulej mwan ikal nau pamwing chisu chambambinau ni muntu wamuyipishang. Nvaj ap muntu mukwau wapamina kal uchingejidinau kudi mwan ukutwish kuyirumburil amakurump yom yambambangay ni mwan. Mwamu mwan kakutwishap kwiyov nayimp.

^ par. 19 Yom yiyilejinau anvaj yiyitadin kand antu awonsu akweta chisend cha kulam an.