‘Mbut jawila pa divu diwamp awiy antu akata . . . kusong mabuj nich kujijaman.’—LUKA 8:15.

MIMINY: 68, 72

1, 2. (a) Mulong wak tudi akasikeshinau kusutil akadivar nau anambaz adandamedina kulejan mu teritwar ulikinau antu avud kutesh? (Tal chipich cha kwisambishin.) (b) Yom ik yalonday Yesu piur pa kulejan mu “ul wa chivadik”? (Tal mazu ma kwinshin.)

SERGIO NI OLINDA adi ambay a uruw adia ayibol mu États-Unis. Awonsu aad akwet mivu 80 ni kusut. Machuku ma kwinyim am, mend mayiswejin nakash ni chasadin anch chiyikasikena kwend. Pakwez, mudi mwasadinau kal mu mivu yivud, akat kuya pa ndond ya antu avud mu musumb wau pa saa ya sambwad pamanch. Akat kwiman piswimp ni ndond yikata kwimen motak ni kupan mikand yetu kudi antu akata kusut. Antu avud akat kuyidiul, pakwez Sergio ni Olinda iminying pa ndond yau ni kuyisipish antu akata kuyital. Chisu cha urel, akat kuchirik pakemp pakemp ku chikumbu chau. Anch kwacha kand, pa saa ya sambwad, akat kuya kand pa ndond ya kwimen motak. Akat kudandamen kulejan pamanch machuku musamban pa  rubing, ni asadining mwamu mu muvu wa kabuj.

2 Mudi Sergio ni Olinda, kudi akadivar nau anambaz avud ashinshamena alejena kal mu teritwar wa kwol kwau mu mivu yivud, ap anch antu avud alikin kuyitesh. Pamwing ap niyey ulejen mu teritwar wa mutapu mudi winou. Anch chidi mwamu, tukujikitishin nakash, mulong ujijamen ni udandamedin kulejan ap anch chikasiken. * (Tal mazu ma kwinshin.) Chilakej chey chiyikasikeshin akadivar nau anambaz avud, ap asadina kal mivu mu mudimu winou. Tal yom yalondau kudi atulam a minyingumuku amwing anch: “Anch nisadin pamwing ni akadivar nau anambaz mudi inay ashinshamena mu mudimu wa kulejan, nikat kwikal ukasikeshinau kusutin yilakej yau.” “Kushinshaman kwau kukat kwinkasikesh kudandamen ni kwikal utakamena mu mudimu wam.” “Yilakej yau yikat kusangaresh nakash muchim wam.”

3. Yipul ik yisatu tukushinshikina ni mulong wak?

3 Mu mutu wa mulong winou tukwakul ku yipul yisatu ey: Mulong wak tukutwish yisu yimwing kuziy? Chom ik chirumburikina kusong mabuj? Yom ik yikutukwasha kudandamen kusong mabuj nich kujijaman? Kwijik yakul ku yipul yiney kukutukasikesh kudandamen kusal mudimu wa kulejan watwinkishau kusal kudi Yesu.

MULONG WAK TUKUTWISH KUZIY?

4. (a) Mutapu ik wiyovay Paul palikau kumutesh kudi in Yuda avud? (b) Mulong wak Paul wiyova mwamu?

4 Ov, waziyinap kal mulong antu adia mu teritwar wey kakatinap kwau kutesh uruu piur pa Want? Anch mwawiy, ukutwish kwijik mutapu wovay kambuy Paul. Wasala piswimp mivu 30 mu kulejan ni kuyikwash antu avud kwikal in Kristu. (Midimu 14:21; 2 Korint 3:2, 3) Pakwez, katwishap kuyikwash in Yuda kwikal in Kristu. Chinyim ni chinech, in Yuda avud alika kumutesh Paul ni amwing amuzengola. (Midimu 14:19; 17:1, 4, 5, 13) Mutapu ik wiyovay Paul piur pa yom yiney? Walonda anch: “Am nikwet ushon nakash ni runeng rakad kupwang mu muchim wam.” (Rom 9:1-3) Mulong wak wiyova mwamu? Mulong wading ukatin kamu mudimu wa kulejan ni wading uyikatin antu. Paul wading uyibangidin in Yuda ni wova ushon nakash palikau ranaken ra Nzamb.

5. (a) Yom ik yitubachikina kulejan? (b) Mulong wak yisu yimwing tukutwish kuziy?

5 Mudi Paul, niyetu tuyilejin antu mulong tuyibangidin ni tukatin kuyikwash. (Mateu 22:39; 1 Korint 11:1) Twij kusutin yom yikata kutushiken ayinetu anch kumusadin Yehova udi mutapu uwamp wa mashakamin. Ni tukatin kuyikwash antu akwau kuman mutapu ukuwapa mwom wau anch asal mwamu! Chawiy tukata kudandamen kuyikasikesh kwilej uyakin piur pa Yehova ni piur pa chitongijok chend mulong wa antu. Chidi mudi tuyitwadidin chipan chiwamp ni kuyilembijek anch: ‘Tambulany amboku chipan chinech.’ Chawiy anch alik chipan chinech, chikutwish kusal anch twiyova ‘runeng mu muchim wetu’ mudi mwiyovay Paul. Tukat kwov runeng riner, chidiap anch mulong tukwetap ritiy, pakwez mulong tuyikatin chakin antu. Komb ap anch tukutwish kuziy yisu yimwing, tukat kudandamen kulejan. Tukutwish kutong mudi Elena, wasadina kal mudi chibol mu mivu 25 ni kusut, ulondin anch: “Nimen anch mudimu wa kulejan ukasiken. Pakwez, kwikil mudimu ukwau uwamp nikutwisha kusal kusutamu winou.”

 CHOM IK CHIRUMBURIKINA KUSONG MABUJ?

6. Chipul ik tukwakula katat?

6 Mulong wak tukutwish kwikal nich kashinsh anch tukutwish kwikal ni yibudikin yiwamp chikalap nchik ndond tulejena? Mulong wa kwakul ku chipul chinech cha usey nakash, el tushinshikinany yishimu yaad yalonday Yesu piur pa usey wa “kusong mabuj.” (Mateu 13:23) Chishimu cha kusambish chidi cha mutond wa mabuj ma nviny.

7. (a) Mu chishimu cha Yesu, nany ufanakeshinau ni “nfachingand,” “mutond wa mabuj ma nviny,” ni “mitiy”? (b) Chipul ik tufanyidina kwakul?

7 Tang Yohan 15:1-5, 8. Mu chishimu chinech, Yesu warumburila anch Yehova ndiy “nfachingand,” Yesu amwinend ndiy “mutond wa mabuj ma nviny,” ni in kwilejend awiy “mitiy.” * (Tal mazu ma kwinshin.) Kupwa Yesu wayileja atwimbuy end anch: “Anch en [wadandamenany kusong] mabuj mavud, akumutumbish Tatukwam, mwamu ukwikalany in kwilejam chakin.” Chawiy, chom ik chirumburikina kusong mabuj? Mu chishimu chinech, Yesu kalondap kamu chirumburikina mabuj minam, pakwez walonda yom yitukwashina kutan chakul ku chipul chinech.

8. (a) Mu chishimu cha Yesu, mulong wak “kusong mabuj” kurumburikinap kwikadish in kwilej asu? (b) Chom ik chidia chakin mulong wa yom yawonsu yitwitinay Yehova kusal?

8 Yesu walonda piur pa Tatukwend anch: “Ndiy ukat kukatul mitiy yamam yawonsu yakad kusong mabuj.” Mu kulond kukwau, tukutwish kwikal atushalapol a Yehova ching anch twasong mabuj. (Mateu 13:23; 21:43) Chawiy mu chishimu chinech, kusong mabuj kurumburikinap kwikadish in kwilej asu. (Mateu 28:19) Anch chading mwamu, ing Atuman awonsu ashinshamena akad kal kumukwashap muntu kwikal mwin kwilej wa Yesu akutwish kwikal mudi mitiy yakad kusong mabuj. Pakwez chinech chikutwishap kwikal chakin! Mulong wak? Mulong tukutwishap kuyishindil antu chakwel ikala in kwilej. Yehova udi mwin rukat. Kakutwishap kutwit kusal chom chitukasikedina kusal. Utwitin kusal yom tukutwisha kusal.—Kuvurik Yijil 30:11-14.

9. (a) Mutapu ik tukata kusong mabuj? (b) Chishimu ik tukwisambina katat?

9 Komb, chom ik lel chirumburikina kusong mabuj? Chikutwish kwikal chom tukutwisha etu awonsu kusal. Mudimu ik wapanay Yehova kudi atushalapol end awonsu? Udi mudimu wa kulejan rusangu ruwamp ra Want wa Nzamb. * (Tal mazu ma kwinshin.) (Mateu 24:14) Chishimu cha Yesu piur pa mwin kukus mbut chovikeshin nawamp mulong winou. El twisambinany katat chishimu chinech.

10. (a) Yom ik yifanikeshina mbut ni divu mu chishimu cha Yesu? (b) Yom ik yikata kusong ku mitiy ya tidiku?

10 Tang Luka 8:5-8, 11-15. Mu chishimu cha mwin kukus mbut, Yesu warumburila anch mbut didi “dizu dia Nzamb,” ap uruu piur pa Want wa Nzamb. Divu didi muchim wa muntu. Mbut jawila pa divu diwamp jaminya, jasapurika ni jikala mutond. Kupwa mutond ‘wasonga mabuj 100 ni kusut.’ Anch mutond winou wading ritiy ra tidiku, ing  wafanyina kubudish mabuj ma mutapu ik? Ov, wafanyina kubudish tumitiy tukemp twa tidiku? Bwat, wafanyina kubudish mabuj, ni anch amakun, mafanyina kupam ni kwikal mitond ya tidiku. Mu chishimu chinech, dibuj dimwing diasonga mabuj 100. Yom ik yitufundishina chishimu chinech piur pa mudimu wetu wa kulejan?

Mutapu ik tukata ‘kusong mabuj nich kujijaman’? (Tal paragraf wa 11)

11. (a) Yom ik yitufundishina chishimu cha mwin kukus mbut piur pa mudimu wetu? (b) Mutapu ik tukata kusong mbut jisu?

11 Chisu chatufundishau piur pa Want wa Nzamb kudi anvaj etu in Kristu ap Atuman akwau, chading mudi akuna rubut mu divu diwamp. Ova musangar nakash pamanau anch twitiyijin uruu. Rubut riner radandamena kukul kushik ni chisu rawanyina kusong mabuj. Mudi muding ritiy ra tidiku twajimbulang kwisambishil oku, rikatap kusong mitiy yisu, pakwez rubut risu, niyetu tukatap kwikadish in kwilej asu, pakwez rubut risu. * (Tal mazu ma kwinshin.) Mutapu ik tukata kusal mwamu? Chisu chawonsu tukata kuyilej antu akwau piur pa Want wa Nzamb, chidi mudi tukat kuvudish ni kukus mbut jakunau mu muchim wetu. (Luka 6:45; 8:1) Chawiy, pitudandamedina kulejan uruu piur pa Want wa Nzamb, tukat ‘kusong mabuj nich kujijaman.’

12. (a) Yom ik twilejidina kusutil yishimu ya Yesu piur pa mutond wa mabuj ma nviny ni mwin kukus mbut? (b) Mutapu ik wiyovila piur pa malejan madia mu yishimu yiney?

12 Yom ik twilejidina kusutil yishimu ya Yesu piur pa mutond wa mabuj ma nviny ni mwin kukus mbut? Twilej kal anch “kusong mabuj” kwimedinap pa mutapu uteshinau antu uruu wetu. Kwimedin pa kudandamen kusal mudimu wa kulejan. Paul walonda chom chimwing chifanikena ni chinech parumburilay anch: “[Akez] kumufut muntu ni muntu mudi mudia mudimu wend.” (1 Korint 3:8) Yehova ukez kutufut mulong wa mudimu wetu, kadiap mulong wa yibudikin ya mudimu wetu. Matilda, wasadina kal mudi chibol mu mivu 20 ulondin anch: “Chikat kwinletin musangar pa kwijik anch Yehova ukat kutufut mulong wa usu wetu.”

MUTAPU IK TUKUTWISHA KUJIJAMAN MU KUSONG MABUJ?

13, 14. Kukwatijan ni Rom 10:1, 2, yom ik yasala anch Paul adandamena kulejan?

13 Yom ik yikutukwasha ‘kusong mabuj nich kujijaman’? El tushinshikinany nawamp  chilakej cha Paul. Twij anch Paul waziya mulong in Yuda alika kutesh uruu piur pa Want. Pakwez, Paul kalikap kuyilej. Warumburila mutapu wiyovay piur pa in Yuda inay palonday anch: “Rusot ruwamp ra muchim wam ni kulembil kwam kudi Nzamb mulong wa awiy yidi mulong wa dipandish diau. Mulong nikat kuyilej uman anch akwet mushiku mulong wa Nzamb, pakwez kadiap kukwatijan ni ronganyin rakin.” (Rom 10:1, 2, NWT) Chawiy mulong wak Paul wadandamen kulejan?

14 Chakusambish, Paul walonda anch ‘rusot ra muchim wend’ ramubachika kuyilej in Yuda. Chakin wakata anch apanda. (Rom 11:13, 14) Cha kaad, ‘walembila kudi Nzamb mulong wa awiy.’ Paul wamwita Yehova mulong wa kuyikwash in Yuda kwitiy uruu piur pa Want. Cha kasatu, Paul walonda anch: “Akwet mushiku mulong wa Nzamb.” Paul wamana yom yiwamp yidia mu antu inay ni rusot rau ra kumusadin Yehova. Wading wij anch in Yuda inay akweta mushiku akutwish kwikal in kwilej a Yesu akweta mushiku, mudi ndiy amwinend.

15. Mutapu ik tukutwisha kumwimburij Paul? Let yilakej.

15 Mutapu ik tukutwisha kumwimburij Paul? Chakusambish, tufanyidin kuyikimb antu awonsu adia ‘mu mwikadil ufanyidina kutambul mwom wa chikupu.’ Cha kaad, tumwitin Yehova chakwel ayikwasha antu adia in kashinsh kutesh chisu tuyilejina. (Midimu  13:48; 16:14) Mwawiy mwasalay Silvana, wasadina kal mivu 30 ni kusut mu mudimu wa uchibol. Ulondin anch: “Kurutu kwa kuya kukokal ku chikumbu mu teritwar wam, nikat kumulembil Yehova mulong wa kumwit anginkish chitongijok chiwamp.” Tukat kulembil kand anch angel atukwash kutan antu akatina kutesh. (Mateu 10:11-13; Kujingunik 14:6) Robert, wasadina kal mivu 30 ni kusut mudi chibol, ulondin anch: “Chisangareshin nakash kusal mudimu pamwing nau angel ija mutapu udia mashakamin ma in chikumbu.” Cha kasatu, tukat kusal usu wa kuman yom yiwamp yidia mu antu ni rusot rau ra kumusadin Yehova. Carl, udia mukurump wa chikumangen wabatishau kal kwasutin kal mivu 50, ulondin anch: “Nikat kukimb kachisal kawonsu kakemp kamekeshina kashinsh kakwetay muntu, mudi kusip, kutal kuwamp ap chipul chiwamp.” Anch twasal yom yiney, tukutwish ‘kusong mabuj nich kujijaman,’ mudi mwasalay Paul.

‘KANGAL WALIK CHIKAS CHEY CHISWEDISHA’

16, 17. (a) Dilejan ik tukutwisha kwilejin mu mukand wa Mulej 11:6? (b) Mudimu wetu wa kulejan ukwet usu mutapu ik padi antu atutadila?

16 Tufanyidinap kuvuramen usu ukweta mudimu wetu wa kulejan padi antu, ap anch chimeken anch kwikil muntu ututeshina. (Tang Mulej 11:6.) Antu akat kututalang. Akat kuman anch tudjadil nawamp ni tukwet kalimish ni aswapela kuta nau urund. Chinech chikutwish kuyisangaresh, ni chisu chimwing, ap antu atongang yom yiyimp piur petu akutwish kusambish kutong yom yiwamp piur petu. Sergio ni Olinda amana anch yom yiney yidi yakin.

17 Sergio ulondin anch: “Mulong wa mayej, twimika kuya pa ndond yading antu avud mu chisu kanang. Patwachirika, in kusut mwi njil atwipulang anch: ‘Wadingany kwisu? Twakumenanyap kand.’” Olinda walonda nich masip anch: “Ashofer atupepinang moy ni amwing atutoyinang pading pendishinau anch, ‘Mudimu uwamp!’ Atwitang kand mikand yetu.” Sergio ni Olinda ashimwoka pamanau ikundj weza ku ka chom kau kakweta ndond ya kutekin mikand wayinkish mubombu wa yisalamb ni kuyijikitish mulong wa mudimu wau usadinau.

18. Mulong wak ukwatin mupak wa ‘kusong mabuj nich kujijaman’?

18 Piudandamedina kulik anch kangal ‘chikas chey chiswedisha’ mu kuyilej antu akwau piur pa Want wa Nzamb, ukwet chisend chijim cha usey nakash cha kupan “uman kudi antu a michid yawonsu.” (Mateu 24:14) Cha usey nakash, ukwikal ni musangar ujim nakash mulong wij anch umusangareshin Yehova. Ndiy uyikatin antu awonsu akata ‘kusong mabuj nich kujijaman’!

^ par. 2 Yesu niyend walonda anch kulejan mu “ul wa chivadik” chading chikasiken nakash. Yom yiney ayifundin mu mikand yawonsu yinying yisambidina piur pa mudimu wend.—Mateu 13:57; Marko 6:4; Luka 4:24; Yohan 4:44.

^ par. 7 Mu chishimu chinech, ap anch mitiy yifanikeshin in Kristu akuya mwiur, chishimu chinech chikwet malejan mulong wa atushalapol awonsu a Nzamb.

^ par. 9 Kulond anch “kusong mabuj” akutwish kand kukufanakesh ni kukudish ‘dibuj dia spiritu.’ Pakwez, mutu wa mulong winou ni ukwau ulondwilaku yikwisambin piur pa ‘mabuj ma ku milamu yetu,’ ap kulejan piur pa Want wa Nzamb.—Galatia 5:22, 23; Hebereu 13:15.

^ par. 11 Yisu yikwau, Yesu wasadina yilakej ya kukus ni kwangul mulong wa kufanikesh mudimu wa kwikadish in kwilej.—Mateu 9:37; Yohan 4:35-38.