“Mulong twij kal nawamp yom yitenchikinay [Satan].” —2KORINT 2:11.

MIMINY: 150, 32

1. Kupwa kwa Adam ni Eve kusal chitil, yom ik yalejanay Yehova piur pa mukankuny netu?

ADAM wading wij anch nnak kakutwishap kulond. Chawiy pijikay anch nnak wambambang ni Ev, pamwing ap Adam wajingunina anch wading spiritu walonda. (Disambishil 3:1-6) Adam ni Ev kijikap anch spiritu winou wading nany. Pakwez, atonda kuya ku mutambu wa chom chakad kwijikau ni kumubwambwil Tatukwau wa rukat wa mwiur. (1 Timote 2:14) Pakad kulab, Yehova wasambisha kulejen yom yivud piur pa mukankuny winou muyimp ni washilamu anch ukumujiyish. Pakwez Yehova wababesha mu kuchingel anch, spiritu winou walonda kusutin nnak ukwikal mukankuny wa antu awonsu amukatina Nzamb.—Disambishil 3:15.

2, 3. Disu dikutwisha kwikal diyingishin diasala anch Yehova alejana yom yikemp piur pa Satan kurutu kwa Mesia kwez?

2 Yehova katulejap dijin dia pakampwil dia mwangel wamubwambwila ndiy. * (Tal mazu ma kwinshin.) Pasuta mivu 2 500 kupwa kwa wintombwij wa mu Eden pawiy palejanay chad  Yehova nany wading ntombwij winou. (Job 1:6) Wijiken anch “Satan,” charumburik anch “Mwin kubwambwil.” Ching kusu mikand yisatu ya Mifund ya Hebereu yawiy yijimbwila dijin Satan, mu 1 Jinsangu, mu Job, ni mu mukand wa Zakariy. Mulong wak alonda yom yikemp piur pa mukankuny winou kurutu kwa Mesia kwez?

3 Yehova kalejanap yom yivud mu Mifund ya Hebereu piur pa Satan ni yom yisadinay. Chawiy, chitongijok cha Mifund ya Hebereu chading cha kuyikwash antu kumujingunin ni kumulondul Mesia. (Luka 24:44; Galatia 3:24) Pashikay Mesia, Yehova wamusadina ndiy ni in kwilejend mulong wa kulejan yom yivud twija nlel piur pa Satan ni angel ibomba nend pamwing. * (Tal mazu ma kwinshin.) Chinech choviken patok, mulong Yehova ukumusadin Yesu ni azizidilau many mulong wa kumujiyish Satan nau in kumulondul.—Rom 16:20; Kujingunik 17:14; 20:10.

Ku ukwash wa Yehova, wa Yesu, ni wa angel ashinshamena tukutwish kumupandakan mukankuny netu

4. Mulong wak tufanyidinap kwov wom wa Djabul?

4 Kambuy Pita umurumburil Satan Djabul mudi “ntambu wonyina,” ni Yohan umutazukin anch “nnak” ni anch “iyazangomb.” (1 Pita 5:8; Kujingunik 12:9) Pakwez tufanyidinap kwov wom wa Djabul. Usu wend ukwet mimbu. (Tang Jakobu 4:7.) Tukwet diking dia Yehova, dia Yesu ni dia angel ashinshamena. Kusutin ukwash wau, tukutwish kurish ni mukankuny netu. Pakwez, tufanyidin kwijik yakul ku yipul yisatu ya usey nakash: Yibachikin ik yikwetay Satan? Mutapu ik usadinay Satan usu wa kuyipumbul antu? Ni yom ik yikukanganyay kusal? El twakulany ku yipul yiney ni kuman malejan tukutwisha kwilej.

YIBACHIKIN IK YIKWETAY SATAN?

5, 6. Mulong wak maguvernema ma antu makutwishap kuswimp yom yiswirikedinau antu nakash?

5 Angel avud ibomba ni Satan mu kumubwambwil Nzamb. Kurutu kwa Mabeb kwez, Satan wayoza angel amwing kuwa mu masandj nau amband. Bibil urumburil yom yiney mu mutapu wa chifanakesh palondinay anch iyazangomb wadjibulau kudiokal mwiur waturika ni chikunku chimwing cha yikunku yisatu cha atutumb. (Disambishil 6:1-4; Jud 6; Kujingunik 12:3, 4) Palikau angel inay dijuku dia Nzamb, awiy atonda ayinau kwikal ku mutambu wa Satan. Tufanyidinap kutong anch angel antombwij adi chisak chakad kurijek nawamp. Mu mangand ma mu spiritu makad kumekan, Satan watenchikin kal guvernema wend mu kwilikej Want wa Nzamb. Widishin kal amwinend want, watenchikin kal ayilembil, wayinkishin kal usu ni wayikadishin kal anyikel a mangand.—Efes 6:12.

6 Satan usadidin ditenchik diend mulong wa kuyikel maguvernema mawonsu ma antu. Tukwet kashinsh ka yom yiney, mulong wamuleja Yesu “mant mawonsu ma pa mangand,” ni kulond anch: “Am nikukwinkish ey ukash wawonsu, ni mapit ma mant  ma mangand mawonsu. Yom yiney yawonsu ayingikisha kal am, nikutwish kuyipan kudi muntu mwawonsu mudi nisotila.” (Luka 4:5, 6) Chawiy, maguvernema mavud masadin yom yiwamp mulong wa antu au ni anyikel amwing akweta kashinsh akatin kuyikwash antu. Pakwez kwikil nyikel wa chiuntu ukutwisha kuswimp yom tuswirikedina nakash.—Kuseng 146:3, 4; Kujingunik 12:12.

7. Kuwejinaku maguvernema, mutapu ik usadidinay kand Satan relijon wa makasu ni yom ya kwisak ya mangand? (Tal chipich cha kwisambishin.)

7 Satan ni ayilembil end asadidin kand relijon wa makasu ni yom ya kwisak mulong wa kudimb ap kupumbul “ngand ya kabuj,” charumburik anch antu awonsu. (Kujingunik 12:9) Satan usadidin relijon wa makasu mulong wa kupalangesh makasu piur pa Yehova ni usadin kand usu wa kujimwangesh dijin dia Nzamb. (Jeremiy 23:26, 27) Mudi yibudikin, antu amwing a kashinsh atongin anch amwifukwidil Nzamb komb ayifukwidil ayilembil. (1 Korint 10:20; 2 Korint 11:13-15) Satan usadidin kand yom ya kwisak ya mangand mulong wa kupalangesh makasu, mudi makasu malondina anch nfalang ni yom ya ku mujimbu yikutwish kuyiletin antu musangar. (Jinswir 18:11) Antu akata kwitiyij makasu minam akat kusadin mwom wau wawonsu mulong wa “mapit” pa ndond pa kumusadin Nzamb. (Mateu 6:24) Ap anch amukatinap nchik Nzamb, rukat rau mulong wa yom ya ku mujimbu rikat kwikal rijim nakash ni chinech chikat kusal anch rukat rau mulong wa Nzamb rishadika.—Mateu 13:22; 1 Yohan 2:15, 16.

Tufanyidin kutond anch tukwikal ku mutambu wa Yehova ap ku mutambu wa Satan

8, 9. (a) Malejan ik maad tukutwisha kwilejin kusutin yom yasalay Adam, Ev ni angel antombwij? (b) Mulong wak chidi chiwamp kudi etu kwijik anch Satan ndiy uyikedina mangand?

8 Kudi malejan maad ma usey tukutwisha kwilejin kusutin yom yasalay Adam, Ev ni angel antombwij. Chakusambish, twilejin anch kudi kwau ching mitambu yaad ni tufanyidin kutond mutambu umwing. Tukutwish kutond kwikal ku mutambu wa Yehova ap ku mutambu wa Satan. (Mateu 7:13) Cha kaad, twilejin anch antu akata kumulondul Satan akat kutaninamu yom yikemp nakash. Adam ni Ev ikala nich mutapu wa kutond ayinau yom yidia yiwamp ni yom yidia yiyimp. Ni angel ikala ni usu pa maguvernema ma antu. (Disambishil 3:22) Pakwez kutond mutambu wa Satan kukweting chisu chawonsu yibudikin yiyimp. Mwikiling kutaninamu kwakin!—Job 21:7-17; Galatia 6:7, 8.

9 Mulong wak chidi chiwamp kudi etu kwijik anch Satan ndiy uyikedina mangand? Chinech chitukwashin kwikal ni chitongijok chiwamp piur pa maguvernema ni chitukasikeshin kulejan rusangu ruwamp. Twij anch Yehova ukatin anch tulimisha maguvernema. (1 Pita 2:17) Ukatin anch tuziyina yijil yau anch yijil yiney yitanijadin ni yijil ya Nzamb. (Rom 13:1-4) Pakwez twij anch tufanyidinap kwiyandjik mu milong ya mangand ap kukwash chisak cha politik ap nyikel wa chiuntu. (Yohan 17:15, 16; 18:36) Mulong twij anch Satan usadin usu wa kujimwangesh dijin dia Yehova ni kuyipish kalimish kend, tusadin usu wawonsu wa kuyifundish antu  uyakin piur pa Nzamb. Tukwet musangar nakash wa kututazuk pa dijin diend ni kudisadin. Rukat mulong wa Nzamb ridi ra usey nakash kusutamu rukat mulong wa nfalang ap yom.—Isay 43:10; 1 Timote 6:6-10.

MUTAPU IK USADINAY SATAN USU WA KUYIPUMBUL ANTU AKWAU?

10-12. (a) Mutapu ik wasadinay Satan andish mulong wa kuyoz angel amwing? (b) Yom ik twilejidina ku yom yasalau angel?

10 Satan usadidin milad ya usu mulong wa kuyipumbul antu. Mulong wa kuyibachik antu kusal yom yisotinay, yisu yimwing usadidining andish mulong wa kuyoz ni yisu yikwau usadidining kwovishan wom.

11 Satan wasadina andish mulong wa kuyoz angel avud. Chimeken anch wileja chisu chilemp mulong wa kwijik yom yikutwisha kuyiwish. Angel amwing akwata kwi ndish winou ni asala masandj nau amband. An avalau ading ayitabutabu akweta chisum ni ayimesha mar antu adingau nau. (Disambishil 6:1-4) Kupwa kwa kusadin masandj mulong wa kuyoz angel inay, chimeken kand anch Satan wayikana anch akutwish kwikal ni usu mulong wa kuyikel antu awonsu. Mu kusal mwamu, Satan wapakisha kukangesh kuwanyin kwa uprofet wa Yehova piur pa ‘rubut ra mband.’ (Disambishil 3:15) Pakwez Yehova kamulikap anch atwisha kusal mwamu. Waletisha Mabeb, mayipisha kutenchik kwawonsu kwa Satan ni ayilembil.

Satan usadin usu wa kutwoz kusutin masandj, chibud ni yom ya ayilembil (Tal paragraf wa 12, 13)

12 Yom ik twilejidina ku rusangu riner? Masandj ni chibud yidi mitapu ya andish a usu adidina nakash. Angel ibomba ni Satan asala mivu yivud mwiur pamwing ni Nzamb. Ap mwamu, avud akudisha maku mayimp ni maku minam mikala ni usu nakash. Tufanyidin yisu yawonsu kuvurik anch chikalap nchik uvud wa mivu twamusadidina kal Yehova, maku mayimp makutwish kwikun mu michim yetu. (1 Korint 10:12) Chawiy tufanyidina chisu chawonsu kushinshikin yom yidia mu michim yetu ni kudiosh yitongijok yawonsu yiyimp ni chibud!—Galatia 5:26; tang Kolosay 3:5.

13. Mutapu ik ukwau wa ndish usadidinay Satan, ni mutapu ik tukutwisha kwipuk ndish winou?

13 Mutapu ukwau wa ndish usadidinay Satan udi kusot kwijik yom ya ayilembil. Nlel,  usadin usu chakwel antu akata yom ya ayilembil kusutin kusadin relijon wa makasu pamwing ni yom ya kwipuwangej. Mafilim, masengan ma video ni mitapu yikwau ya kwipuwangej yikutwish kusal anch yom ya ayilembil yikala yisangareshina. Mutapu ik tukutwisha kwipuk ndish winou? Tufanyidinap kuchingejin anch dirijek dia Nzamb ditwinkisha list wa kwipuwangej kuwamp ni kuyimp. Tufanyidin kufumb kom ketu chakwel tutwisha kukwat mipak yiwamp yimedina pa mbil ja Yehova. (Hebereu 5:14) Ni anch rukat retu mulong wa Nzamb ridi ‘rakad rubabek,’ tukutwish kukwat mipak nich manangu. (Rom 12:9) Muntu mwin rubabek ukat kulond yom yindjing kupwa wasal yom yindjing. Chawiy anch twatond mitapu ya kwipuwangej, tufanyidin kwiyipul anch: ‘Ov, nilimishin mbil ja mutapu umwing mudi jinikata kuyilej antu akwau kulimish? In kwilej am a Bibil ap antu nichirikidina mu mudimu wa kulejan akutong yom ik anch aman kwipuwangej nitondina?’ Anch twalondul mbil ja mutapu umwing mudi tuyilejina antu akwau kulondul, chikutuswapel kulik kufa ku andish a Satan.—1 Yohan 3:18.

Satan usadin usu wa kutwovish wom ku Kukangesh kwa maguvernema, yibachikin ya ambay a ku shikol ni rupompat ra mu dijuku (Tal paragraf wa 14)

14. Mutapu ik usadinay Satan usu wa kutwovish wom ni mutapu ik tukutwisha kwiman dang?

14 Satan usadin kand usu wa kutuzadish ni kutwovish wom chakwel tuburena kushinshaman kudi Yehova. Chilakej, ukutwish kubachik maguvernema mulong makangesha mudimu wetu wa kulejan. Ukutwish kuyibachik ambay netu a mudimu ap a shikol kutusip mulong tulondwil mbil ja Bibil. (1 Pita 4:4) Satan ukutwish kand kuyibachik anamakwetu a mu dijuku akad kwikal Atuman, akutwisha kusal mudi akwet chitongijok chiwamp pakwez akutwish kusal usu wa kutukangesh kuya ku yikumangan. (Mateu 10:36) Yom ik tukutwisha kusal chakwel twimana dang pantaliken ni kwovishan wom kwa Satan? Tufanyidinap kushimwok piur pa kurishikish mudi kwinoku, mulong twij anch Satan urishin njit niyetu. (Kujingunik 2:10; 12:17) Chikwau kand, tufanyidin kuvurik mulong ujim ou: Satan ulondin anch tumusadidin Yehova ching anch chiswapel ni anch tukumulik Nzamb anch yom yikal yikash. (Job 1:9-11; 2:4, 5) Kupwa tufanyidin kumwit Yehova chisu chawonsu chakwel  atwinkish usu. Vurik anch Yehova kakutwishap kutulik.—Hebereu 13:5.

YOM YIKUKANGANYAY SATAN KUSAL

15. Ov, Satan ukutwish kutushindil kusal chom chitwakad etu kukat kusal? Rumburil bil.

15 Satan kakutwishap kuyishindil antu kusal chom chakadau awiy kukat kusal. (Jakobu 1:14) antu avud mu mangand kakatap kujingunin anch adi ku mutambu wa Satan. Pakwez anch muntu wilej uyakin, ufanyidin kutond anch ukusut ku mutambu wa Yehova ap wa Satan. (Midimu 3:17; 17:30) Anch twakwat mupak wa kumuziyin Nzamb, Satan kakutwishap kuyipish kushinshaman kwetu.—Job 2:3; 27:5.

16, 17. (a) Yom ik kand yikwau yikukanganyay Satan ni ayilembil kusal? (b) Mulong wak tufanyidinap kwov wom wa kumulembil Yehova ni dizu dia piur?

16 Kudi yom yikwau yikukanganyay Satan nau ayilembil kusal. Chilakej, Bibil kalondinap anch akutwish kwijik yom yidia mu manangu ap mu michim yetu. Ching Yehova ni Yesu awiy akutwish kusal mwamu. (1 Samwel 16:7; Marko 2:8) Ov, tufanyidin kwov wam wa kulond ap kulembil ni dizu dia piur anch Djabul nau ayilembil akutesh yom tulondina ni akuyisadin mulong wa kuturishikish? Bwat! Mulong wak bwat? Tongin pa chilakej ech: Tukatap kwov wom wa kusal yom yiwamp mu mudimu wa Yehova mulong wa kulond anch Djabul ukutwish kutuman. Chilik chimwing, tufanyidinap kwov wom wa kulembil ni dizu dia piur mulong wa kwel anch Djabul ukutwish kututesh. Chikwau kand, Bibil ulejen tupamp tuvud piur pa atushalapol a Nzamb alembila ni dizu dia piur, ni kwikil ndond tutangina anch antu inay ova wom anch Djabul ukuyitesh. (1 Ant 8:22, 23; Yohan 11:41, 42; Midimu 4:23, 24) Anch twasal usu wa kulond ni kusal mudi mukatinay Nzamb anch tusal, tukutwish kwikal nich kashinsh anch Yehova kakutwishap kumulik Djabul atusala nayimp mu mutapu ap umwing.—Tang Kuseng 34:7.

17 Tufanyidin kumwijik mukankuny netu, pakwez tufanyidinap kumwov wom. Ap anch tudi antu akad kuwanyin, nich ukwash wa Yehova tukutwish kumupandakan Satan! (1 Yohan 2:14) Anch twamubwambwil, ukuchin kulemp niyetwetu. (Jakobu 4:7; 1 Pita 5:9) Nlel, chimeken anch Satan ukat kuyirishish pakampwil ansand. Mutapu ik ukutwishau kujijamen mipit ya Djabul? Tukwisambin yom yiney mu mutu wa mulong wambakedinap ou.

^ par. 2 Bibil ulejen majin ma pakampwil ma angel amwing. (Ankalansambu 13:18; Daniel 8:16; Luka 1:19; Kujingunik 12:7) Ulondin kand anch Yehova wayinkisha atutumb awonsu majin. (Kuseng 147:4) Chawiy, choviken nawamp kutong kand anch Yehova wayinkisha angel awonsu majin, kuwejinaku ni mwangel weza kwikal Satan.

^ par. 3 Dijin “Satan” didi kusu tupamp 18 mu Mifund ya Hebereu pakwez didi tupamp 30 ni kusut mu Mifund ya Grek ya win Kristu.