Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 5 , 2017

Yikwasha ‘Angez Adia mwi ngand yen’ Chakwel ‘Amusadin Yehova Nich Musangar’

Yikwasha ‘Angez Adia mwi ngand yen’ Chakwel ‘Amusadin Yehova Nich Musangar’

‘Yehova ukat kukwash angez.’—KUSENG 146:9.

MIMINY: 17, 25

1, 2. (a) Milong ik yikwetingau akadivar nau anambaz netu amwing? (b) Ni kukat kushiken yipul ik?

MUKADIVAR Lije ulondin anch: “Pasambisha njit ja an a ngand mu Burundi, dijuku dietu diading ku chitentam. Twamana mutapu wachinangau antu ni mutapu wadilangau. Anvajam nau anamakwam twavadika nau 11, twachina mulong wa kupandish mwom wetu ni twasenda ching masakosh ma masun. Antu amwing a mu dijuku diam achinina mu kompony wa arefije wa mu Malawi, asala weny wa makilometre 1 600. Etu twashalaku twapalangana.”

2 Mu mangand mawonsu, mudi arefije ma miliyon 65 ni kusut ashila ya ku usu yikumbu yau mulong wa kuchin njit ap kuzengol. Winou udi uvud upandakena wa arefije wakad kal kwikalangaku. * (Tal mazu ma kwinshin.) Tunan twa arefije  inay adi Atuman a Yehova. Avud akat kushadish antu akatinau ni yom yau. Milong ik yikwau yikwetingau? Mutapu ik tukutwisha kuyikwash akadivar nau anambaz netu chakwel amusadin Yehova ni kulam musangar wau chisu cha mar minam? (Kuseng 100:2) Ni mutapu ik uwamp wa kuyilej arefije akad kal kumwijik Yehova rusangu ruwamp?

MASHAKAMIN MA REFIJE

3. Mutapu ik Yesu nau in kwilejend wikalau arefije?

3 Yesu nau anvajend ikala arefije mu Idjibit kupwa kwa mwangel wa Yehova kumubabesh Josef anch Mwant Herod ukimbin kumujip Yesu. Ashakama kwinikwa kushik ni pafilay Herod. (Mateu 2:13, 14, 19-21) Kupwa kwa mivu yivud in kwilej a Yesu “[apalangana] djimu mu makunku ma ngand ya Yudeya ni ya Samaria” mulong wa kuyizengol. (Midimu 8:1) Yesu wading wij anch in kwilejend avud akez kadiokal ku yikumbu yau ku usu palonday anch: “Anch akuzengolany mu ul umwing, chinyinany mu ul ukwau.” (Mateu 10:23) Kusha chikumbu chey mulong wa diyingishin din diawonsu chiswapelingap.

4, 5. Ubaj ik umwing udingau nich arefije anch (a) achin? (b) ashich mu kompony?

4 Pachininingau arefije kwol kwau ap pashichingau mu kompony wa arefije, arishining ni ubaj kushalijan. Gad mwanchend a Lije ulondin anch: “Twasala weny mwi mbing jivud, twasutang yitot ya antu afang kal. Nading ni mivu 12. Mend mam manana ni nayileja in dijuku diam anch aya ansha kwam. Tatukwam—kakatap kwinsha mu makas ma ambwambol ading arishikishina ngand yetu—chawiy wansenda. Dichuku ni dichuku twamulembilang Yehova ni kumuchingejin, yisu yimwing twadiangang kwetu mipach yading kuns kwa njil.”—Filip 4:12, 13.

5 Antu avud a mu dijuku dia Lije asutisha mivu yivud mu kompony wa arefije wa Nations Unies. Pakwez kwinikwa niyau kwading ubaj. Lije udia katat kalam wa munyingumuku urumburil anch: “Antu avud kadingap ni mudimu. Ading akwet mboj, kuleu maar, masengan ma nfalang, kwiy, ni kusal masandj.” Mulong wa kwilam ayinau ku yibachikin yiyimp, Atuman a Yehova ading afanyidin kushal akwatikena nakash ni milong ya chikumangen. (Hebereu 6:11, 12; 10:24, 25) Asadina chisu chau ni manangu chakwel akutwish kushal akasikena mu uyakin, ni avud asambisha kusal mudimu wa uchibol. Avurika anch kurutu kwa machuku urefije wau mu kompony ukupwa mudi mwapwa chisu cha an a Isarel chadingau mwi mpay. Yiney yayikwasha kwikal ni chitongijok chiwamp.—2 Korint 4:18.

MEKESH RUKAT KUDI AREFIJE

6, 7. (a) “Rukat ra Nzamb” ritubachikin kuyisadin akadivar netu mutapu ik? (b) Let chilakej.

6 “Rukat ra Nzamb” ritubachikin kuyikat akadivar netu, pakampwil anch adi mu mar. (Tang 1 Yohan 3:17, 18.) Chilakej, padingau in Kristu akusambish a mu Yudeya mu maswir ma yakudia mulong ading mwi nzal, chikumangen chirijeka mulong wa kuyikwash. (Midimu 11:28, 29) Kambuy Paul ni Pita ayikasikesha in Kristu chakwel ikal in kwakijan amwing ni akwau. (Rom 12:13; 1 Pita 4:9) Mulong in Kristu ayikasikeshin  kumekesh ranaken kudi akadivar nau ayiling kutal jindond jikwau, tufanyidin kumekesh kamu ranaken mulong wa akadivar netu adia mu ubaj ap azengodinau mulong wa ritiy rau! * (Tal mazu ma kwinshin.)—Tang Jinswir 3:27.

7 Machuku masutina am, tunan twa Atuman a Yehova ashil yikumbu yau ku usu mulong wa njit ni kuzengol kwasadikina kwi ngangel kwa ngand ya Ukraine. Cha ushon, amwing pakach pau ayijipa. Pakwez akadivar avud achina, ayaka kudi akadivar nau anambaz ku yikumbu yau ku mal mamwing ma ngand ya Ukraine ni mu Russie. Mu jingand jinej jaad, akadivar alika kwiyandjik mu milong ya politik, ‘alika kwikal mu umwing ni mangand,’ ni adandamena kulejan nich mushiku “rusangu ruwamp ra dizu.”—Yohan 15:19; Midimu 8:4, TMK.

YIKWASHA AREFIJE CHAKWEL AKASIKESHA RITIY RAU

8, 9. (a) Milong ik yikutwishau kwikal nich arefije mwi ngand ya wingendj? (b) Mulong wak tufanyidin kushimpish muchim pituyikwashina?

8 Arefije amwing ashich cha ku usu kwi ndond yikwau ya ngand yau. Pakwez, akwau akutwish kuya mwi ngand ya wingendj yakad kwijikau nawamp. Chidi chakin anch amakurump a ngand akutwish kuyinkish arefije yakudia yimwing ni masun ni ndond ya kushakam, pakwez akudandamen kwikal ni milong yikwau. Chilakej, yakudia yikutwish kushalijan ni yakudia yidilingau kwol kwau. Arefije amwing adiokila mu jingand muding marungil akutwish kukangany kwijik mutapu wa kudjal mulong wa mashik. Akwau akutwish kwikal ni kuswir kwa kwilej mutapu wa kusadin ma aparey ma katat kapamp kau ka kusambish.

9 Amakurump a mu jingand jimwing akweting program wa kuyikwash arefije mulong wa kurijek mashakamin mau mwi ngand ya wingendj. Pakwez yisu yivud kupwa kwa angond akemp akat kuyilej anch awanyisha maswir mau ayinau. Chinech chikutwish kuyikasiken. Tongin yom yivud yiswirikedinau kwilej kapamp kamwing: dizu disu, yaku yisu, ni yijil yisu piur pa kufutin yom (mudi yikumbu, kasu, mem) ni kulambul yitad, kwilej shikol, ni kuyilil an! Ukutwish kushimpish muchim ni kuyikwash nich kalimish akadivar nau anambaz netu akweta milong mudi yiney?—Filip 2:3, 4.

10. Mutapu ik tukutwisha kukasikesh ritiy ra arefije anch ashik mwi ngand yetu? (Tal chipich cha kwisambishin.)

10 Yisu yimwing amakurump a ngand akat kusal anch chiyikasiken akadivar netu adia arefije kwikal mu umwing ni chikumangen cha ndond yidiau. Yitenchik ya anyikel ya mangand yikat kukimb kwimik kuyikwash akadivar netu. Akutwish kulond anch kakuyinkap mbil ya kushakam mwi ngand anch alik kwitiy mudimu ukusala anch akangany kukumangan. Mulong oviling wom ni amening anch kakuyikwashap, amwing akat kwitiy kusal midimu yiney. Chawiy chifanyidin kusal swa swa mulong wa kuya kuyital arefije chisu chikushikau. Akwet kuswir kwa kutuman anch tuyitongidin. Kwipan ni ukwash mudi winou kukutwish kwakasikesh ritiy rau.—Jinswir 12:25; 17:17.

 YIKWASHA NICH YOM KANANG

11. (a) Arefije akweting cha kusambish kuswir kwa yom ik? (b) Mutapu ik ukutwishau arefije kumekesh kujikitish?

11 Chakusambish, tufanyidin kuyinkish akadivar netu yakudia, yidjal, ap yom yikwau ya usey. * (Tal mazu ma kwinshin.) Ap tuyipan tukemp tukemp mudi kravat mulong wa mukadivar, yikutwish kumekesh anch tuyitongidin nakash. Chakin kamu, arefije kafanyidinap kwit yom yivud nakash pakwez afanyidin kumekesh kujikitish mulong wa yom yiyisadidinau kudi antu akwau. Chinech chikutwish kuyisangaresh akadivar apanina. Chidi cha usey anch kurutu kwa machuku arefije akusal usu wa kuwanyish maswir mau ayinau. Kusal mwamu kukuyikwash kulam kalimish kau ni kwikal ni urund uwamp nau akadivar nau. (2 Tesalonik 3:7-10) Pakwez, arefije akwet kuswir kwa ukwash wetu.

Mutapu ik tukutwisha kuyikwash akadivar nau anambaz netu adia arefije? (Tal paragraf wa 11-13)

12, 13. (a) Mutapu ik tukutwisha kupan ukwash wa yom kanang kudi arefije? (b) Let chilakej.

12 Chidiap anch ching tukwet nfalang jivud chadi twayikwash arefije. Yikwetau nich kuswir nakash chidi chisu chetu ni rukat retu. Chilakej, ukutwish kuyilej mutapu wa kwendangan ap kwi ndond kukutwishau kuland yom yiwamp ni ya usey ukemp. Ukutwish kand kuyilej mutapu wa kwikal nich mashiny ma kuchim nich ap mashiny ma kukatul nich masuku chakwel ayisadin  mulong wa kwikal nich ka rufalang. Chidia cha usey nakash kudi kuyikwash chakwel ikal mu chikumangen chau chisu. Anch chiswapel, yikwashang chakwel ashikang ku yikumangan. Ufanyidin kand kuyirumburil mutapu uwamp wa kulejan kudi antu a mu teritwar, ni sal nau mudimu wa kulejan pamwing.

13 Pashikau ansand anying mu chikumangen chimwing, amakurump a chikumangen ayikwasha mu mitapu kushalijan. Ayifundisha kwendish motak, kufund ku mashiny, ni mutapu wa kukimb mudimu. Ayileja kand mutapu wa kusadin chisu chau mulong wa kutek mudimu wa Yehova pa ndond ya kusambish. (Galatia 6:10) Mu kusut kwa machuku, awonsu anying ikala ayibol. Mulong wa ukwash wa amakurump ni usu wau ayinau wa kusal yom yivud mu mudimu wa Yehova, aya kurutu mudi in Kristu ni kikalap a ku mutambu wa mangand ma Satan.

14. (a) Yoziu ik yifanyidinau arefije kujijamen? (b) Let chilakej.

14 Mudi in Kristu awonsu, arefije akwet kuswir kwa kujijamen yoziu ni yibachikin ya kutek yom ya ku mujimbu kurutu pa ndond pa kutek urund wau ni Yehova. * (Tal mazu ma kwinshin.) Lije, twambambinang kwiur oku, ni anamakwend amakundj nau amband avurikin malejan ma usey piur pa ritiy mayifundishau kudi tatukwau chisu chading chichininau. Alondin anch: “Wadjibula yom yakad usey twading tusendina. Kupwa, watuleja mu sakosh mwakad chom ni walonda nich masip anch: ‘Umenany? Yiney yawiy yawonsu ukwetanya nich kuswir!’”—Tang 1 Timote 6:8.

TONGIN MASWIR MAJIM MA AREFIJE

15, 16. (a) Mutapu ik tukutwisha kukasikesh ritiy ra akadivar netu? (b) Mutapu ik tukutwisha kuyikwash chakwel iyova nawamp?

15 Arefije akwet kuswir kwa yom yivud kulik kwau ching yakudia ni masun. Aswirikedin kwiyov akwashinau ni kuyikasikesh kusutin Bibil. (Mateu 4:4) Amakurump akutwish kuyikwash kukimb mikand ya mu dizu diau ni kuyikwash kumanijan nau akadivar alondina dizu diau. Chinech chidi cha usey nakash mulong arefije avud ashil kal ku usu yom yading yijidinau kal. Ashil kal majuku mau, antu ading ijikijadinau nau, ni chikumangen chau. Akwet kuswir kwa kuman rukat ni ranaken ra Yehova pakach pa akadivar nau in Kristu. Anch kasadinap mwamu, arefije akutwish kukimb ukwash kudi antu akwau a ngand yau akad kumusadin Yehova. (1 Korint 15:33) Anch twasal iyova anch adi niyau a mu chikumangen, tusadin pamwing ni Yehova mulong wa kuyichidij ‘angez adia mwi ngand yetu.’—Kuseng 146:9.

16 Yesu ni dijuku diend kafanyinap kuchirik kwol kwau mu chisu chading chichidiau kutakel antu ading ayizengodina. Mulong wa mayingishin mudi minam, nlel arefije kakutwishap kuchirik kwol kwau. Pakwez akwau akutwish kukat kuchirik kwol kwau. Lije ulondin anch anvaj avud amana mutapu wading uyisadishinau anamakwau masandj ya ku usu ni kuyijip mwi ngand yau, chawiy kakatap kuchirik nau anau mwinimwa. Mulong wa kuyikwash akadivar netu, tufanyidin ‘kongojijan, kukatijan mudi akadivar ni michim ya riy ni  yitudishina.’ (1 Pita 3:8) Kuzengol kukat kusal anch arefije amwing alik kwibomb nau antu akwau, ni akutwish kwov usany wa kulond piur pa mar mau pakampwil anch anau adiap. Iyipula anch: ‘anch naman mar ma mutapu winou nikukat anch ansadin mutapu ik?’—Mateu 7:12.

PITUYILEJINA AREFIJE AKAD KWIKAL ATUMAN

17. Mudimu wetu wa kulejan uyikwashining arefije mutapu ik?

17 Nlel arefije avud adiokil mu jingand mukangeshinau mudimu wetu wa kulejan. Kujikitish mulong wa Atuman akweta mushiku, mulong tunan twa arefije ateshin “dizu dia Want wa Nzamb” kapamp ka kusambish. (Mateu 13:19, 23) Antu avud akweta “yisend yikasikena” akat kutan ukwash ni kukasikesh ku yikumangan ni akat kulond pakad kulab anch: “Nzamb udi ni yenen!”—Mateu 11:28-30; 1 Korint 14:25.

18, 19. Mutapu ik tukutwisha kwikal ni manangu pituyilejina arefije rusangu ruwamp?

18 Tufanyidin kwikal ni manangu ni “kubabal” pituyilejina arefije rusangu ruwamp. (Mateu 10:16; Jinswir 22:3) Tesh ni kushimpish muchim piwambambina nau arefije, pakwez kangal kwambamb nau milong ya politik. Tufanyidin kulondul wintakel udiokila ku biro wa mutiy ni wa amakurump a ngand tudia mulong kangal twitek ayinetu ap antu akwau mu ubaj. Mulong arefije adiokil mu marelijon kushalijan ni akwet yaku yishalijangena, tufanyidin kwilej piur pau ni kulimish yovil ni yitongijok yau. Chilakej, antu a mu jingand yimwing akweting yitongijok yikash piur pa mutapu ufanyidinau amband kudjal. Chawiy pituyilejina rusangu ruwamp, chidi chiwamp kudjal mu mutapu wa kulik kuyipwakesh.

19 Tukatin kuyikwash antu amena mar ap antu akad kumusadin Yehova. Anch twasal mwamu twimburijin mwin Samariy wa mu chishimu cha Yesu. (Luka 10:33-37) Mutapu uwamp wa kuyikwash antu udi wa kuyifundish rusangu ruwamp. Mukurump umwing wakwasha kal arefije avud walonda anch chidi cha usey kuyilej pakad kulab anch tudi Atuman a Yehova. Tufanyidin kuyijikish anch cha kusambish twezin mulong wa kuyikwash kwijik ruchingej ruwamp ripaninay Bibil kulik kwau ching kuyikwash ni yom ya ku mujimbu.

YIBUDIKIN YISANGARESHINA

20, 21. (a) Uwamp ik udiokiling ku kuyimekeshin arefije rukat rakin? (b) Yom ik tukwileja mu mutu wa mulong ulondwilaku ou?

20 Anch twamekesh rukat rakin kudi “angez adia mwi ngand yetu,” chikat kulet yibudikin yiwamp. Pafay nfumwend, nambaz umwing utazukinau anch Alganesh wachina mu Érythrée pamwing nau anend musamban. Asala weny mu machuku chinan mwi mpay. Kupwa kwa weny winou uziyishena, ashika mu Soudan. Ulondin anch: “Kwinikwa akadivar atukwata mudi anamakwau a piswimp, atwinka yakudia, yidjal, ni ndond ya kulal ni transpor. Anany akwau akutwisha kuyak angendj mu yikumbu yau mulong kwau amwifukwidin Nzamb umwing? Ching kwau Atuman a Yehova!”—Tang Yohan 13:35.

21 Chidi nchik piur pa an ezining nau anvajau? Mu mutu wa mulong ulondwilaku, tukwilej mutapu tukutwisha etu awonsu kukwash majuku minam chakwel mamusadin Yehova nich musangar.

^ par. 2 Mu mutu wa mulong winou, dizu “arefije” dilondin piur pa antu ashiling yikumbu yau ku usu mulong wa njit, kuzengol, ap mar ma chitangil. Pamwing ap akutwish kudiokal ku usu mulong wa kushakam ngand yikwau ap kushakam ku ul ukwau wa ngand yau. UNHCR (Haut Commissariat des Nations unies pour les Réfugiés) ulondin anch mu mangand mawonsu, muntu 1 pa antu 113 ushil chikumbu chend ku usu.

^ par. 6 Tal mutu wa mulong ulondina anch ‘Vurikany Kuyak Angendj’ mu Chinong cha Kalam cha Ngond wa 10, 2016, paj wa 8-12.

^ par. 11 Anch chiswapel, kupwa kwa arefije kushik, amakurump afanyidin kulondul wintakel udia mu buku Atenchikinau Chakwel Kusal Rusot ra Yehova shapitre wa 8, paragraf wa 30. Mulong wa kwipul chikumangen cha ngand ya refije, amakurump akutwish kufundin mutiy wau mu kusadin jw.org. Mu chisu chinech akutwish kwipul yipul piur pa chikumangen cha refije ni mutapu waday usadinay mu mudimu wa kulejan mulong wa kwijik mwikadil wend wa mu spiritu.

^ par. 14 Tal mitu ya milong yilondina anch ‘Kwikil Muntu Ukutwisha Kuyisadil Ansalejend Aad’ ni ‘Ikal Ujijamena—Yehova Ndiy Nkwash Wey!’ mu Chinong cha Kalam cha 1 Ngond wa 4, 2014, paj wa 17-26.