Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 5 , 2017

Yikwasha an a ‘Angez Adia mwi Ngand yen’

Yikwasha an a ‘Angez Adia mwi Ngand yen’

“Kwikil chom chikwau chinsangarishina mudi pinateshina anch anam adandamedin [kwendil] mu uyakin.”—3 YOHAN 4.

MIMINY: 41, 11

1, 2. (a) Milong ik yivud yikwetingau an achidia angendj mwi ngand ya wingendj? (b) Yipul ik yikwisambinau mu mutu wa mulong winou?

JOSHUA ulondin anch: “Kudiosh ku wanikanch, nalondang dizu dia anvajam ading mwi ngand ya wingendj ku chikumbu ni mu chikumangen. Pakwez pinasambisha shikol, nasambisha kukat kulond dizu dia ngand yiniya. Mu mivu yikemp, nasambisha kulond dizu dia ngand yiniya. Nateshangap yikumangan, ni niyovangap mudi nading nij yaku ya anvajam.” Yom yamanay Joshua yisadikining nakash.

2 Nlel, antu 240 000 000 ni kusut kashichingap mwi ngand yau ya chivadik. Anch udi nvaj udia mwi ngand ya wingendj, mutapu ik ukutwisha kuyinkish aney mutapu uwamp wa kwilej kumukat Yehova ni ‘kudandamen kwendil mu uyakin’? (3 Yohan 4) Ni mutapu ik ukutwishau antu akwau kuyikwash?

ANVAJ IKALANY CHILAKEJ CHIWAMP

3, 4. (a) Mutapu ik ukutwishau anvaj kwikal chilakej chiwamp kudi anau? (b) Anvaj kafanyidinap kuchingej yom ik kudi anau?

3 Anvaj, chilakej chen chidi cha usey nakash ang ukatinany  anch anen ikal mu urund ni Yehova ni ashakam chikupu. Anch anen akumanany ukat ‘kukimbany bil Want wa Nzamb,’ akwilej kumuchingejin Yehova mulong wa maswir mau ma dichuku ni dichuku. (Mateu 6:33, 34) Tekany mudimu umusadidinanya Yehova pa ndond yakusambish pa ndond pa kukimb yom yivud ya ku mujimbu. Ikalany ni mashakamin misikena ni salany usu wa kwipuk mabaz. Kimbany “mapit mwiur,” mamukatishina Yehova pa ndond pa kukimb nfalang ap “katumb kadiokila kudi antu.”—Tang Marko 10:21, 22; Yohan 12:43.

4 Kangal kukwatikan nakash mu mutapu wa kukangany chisu cha kusutish nau anen. Elany ijik anch ukat kwibazany mulong wawawiy chisu chikwatinau mupak wa kumutek Yehova pa ndond yakusambish pa ndond pa kukimb katumb ap nfalang mulong wa ayinau ap mulong wenen. Likany chitongijok chiyimp cha kulond anch an afanyidin kuyinkish anvaj yom ya usey nakash. Vurikany anch, “an kawiyip akuyipitishang anvaj, ching anvaj awiy akata kuyipitish an.”—2 Korint 12:14, TMK.

ANVAJ, SALANY USU WA KUWIN MILONG YA DIZU

5. Mulong wak anvaj afanyidin kwambamb nau anau yisu yivud piur pa Yehova?

5 Mudi mwasambelau kulond, antu ‘a mazu ma michid yawonsu’ ezin mu dirijek dia Yehova. (Zakariy 8:23) Anch anen kateshinap nawamp dizu ulondiningana, chikutwish kukukasikenany kuyifundish uyakin. An awiy in kwilejen a Bibil a usey nakash ufanyidinanya kwikal nich, ni ‘kumwijik’ Yehova kudi awiy chirumburikin mwom wau wa chikupu. (Yohan 17:3) Pakwel anch mwanen ijika mafundish ma Yehova, ufanyidinany “kumisambangany” chisu chawonsu.—Tang Kuvurik Yijil 6:6, 7.

An awiy in kwilejen a Bibil a usey nakash ufanyidinanya kwikal nich

6. Mutapu ik ukutwishau anen kutaninamu mu kwilej dizu dien? (Tal chipich cha kwinsambishin.)

6 Anen akutwish kwilej pamwing ap dizu dia ngand yidiau ku shikol ap kudi antu akwau. Pakwez akwilej dizu dien anch wambambiningan nau chisu chawonsu. Anch anen ij kulond dizu dien, chikuyiswapel kwambamb niyen ni kukulejany mutapu wiyovilau. Pakwez kudi kand kutaninamu kukwau. Anch anen asambish kulond mazu mavud, akuwapish mutapu wau wa kutong ni chikuyikwash kutesh nawamp yitongijok ya antu akwau. Chikuyinkish kand mutapu wa kusal yivud mu mudimu wa kulejan. Carolina udia mwi ngand ya wingendj nau anvajend ulondin anch: “Kwikal mu chikumangen chisadidina dizu dia wingendj chading chisangareshina, ni chading chiwamp kukwash kwi ndond kudia maswir nakash.”

7. Yom ik ukutwisha kusal anch dizu diletin mulong mu dijuku dien?

7 Pilejinau an a angendj yaku ni dizu dia ngand yidiau, amwing pakach pau akutwish kushadish musangar ap kushadish ukaliweny wau wa kwambamb mu dizu dia anvajau. Anvaj, anch yom yiney yayishiken anen, ukutwish kwilejany chakusambish dizu dimwing pakach pa mazu malondinau ndond ushichanya? Chikutwish kukuswapelany kuyilil  anen mudi in Kristu anch uteshinany mambamb mau, kwipuwangej kwau, mutapu wilejinau ku shikol ni anch ukutwishany kwambamb kapamp kamwing nau alejau. Chidi chakin anch kwilej dizu disu kwitining chisu, usu ni kwikepish. Pakwez kukweting usey. Chilakej, anch mwanen wikal kajikamatu, ukutwishanyap kusal usu wa kwilej dizu dia yijingidij chakwel wambambangana nend? Anch mwan ulondining dizu dikwau nawamp chifanyidin niyend kumusadin mudi an akwau, kimwauyap? *—Tal mazu ma kwinshin.

8. Mutapu ik ukutwishanya kuyikwash anen anch kalondinap dizu dia ngand udianya?

8 Chikutwish kwikal chikash kudi anvaj amwing angendj kulond nawamp dizu disu dilondinau anau. Chinech chikutwish kusal anch chiyikasiken anau kutesh “Mikand Yitumbila.” (2 Timote 3:15) Anch mwamu chidia kudi en, ukutwish kudandamenany kuyikwash anen kumwijik ni kumukat Yehova. Mukurump umwing dijin diend Shan ulondin anch: “Twateshangap nawamp dizu dia makwetu wading mujich ni chinech chasala anch tukangany kulond nawamp dizu dined. Pakwez chisu twamanang ukat kwilej, kulembil, ni kusal usu wa kutakel dilejan dia mu dijuku rubing rawonsu, twamana anch kumwijik Yehova chading chom cha usey nakash.”

9. Mutapu ik ukutwishau anvaj kukwash anau akatina kwilej mu mazu maad?

9 An amwing ukutwish kwikal ni kuswir kwa kwilej piur pa Yehova mu mazu maad. Mulong wak? Mulong akutwish kulond dizu dimwing ku shikol ni dizu dikwau ku chikumbu. Mulong wa diyingishin dined, anvaj amwing akat kusadin mikand, maband kaset, ni ma video mu mazu maad. Chidi chakin, anvaj angendj afanyidin kusal usu mulong wa kuyikwash anau chakwel aseja piswimp ni Yehova.

UFANYIDINANY KWIKAL MU CHIKUMANGEN CHISADIDINA DIZU IK?

10. (a) Nany ufanyidina kukwat mupak wa kwijik chikumangen chisadidina dizu ufanyidina kwikal? (b) Yom ik yifanyidinau antakel a dijuku kusal kurutu kwa kukwat mupak?

10 Anch ‘angez adia mwi ngand’ ashich kulemp nau Atuman akwau alondining dizu diau, afanyidin kubombakan ni chikumangen chisadidina dizu dia ndond yidiau. (Kuseng 146:9) Pakwez anch kudi chikumangen chidia piswimp chisadidina dizu diau dia chivadik, ntakel wa dijuku ufanyidin kukwat mupak piur pa chikumangen chisadidina dizu dikusala anch in mu dijuku ataninamu. Kurutu kwa kukwat mupak, ufanyidin kutong nakash ni kulembil piur pa mulong winou. Ufanyidin kand kwambamb ni mukajend nau anend. (1 Korint 11:3) Yom ik yikushinshikinay? Mbil ik ja mu Bibil jikutwisha kumukwash kukwat mupak wa manangu?

Ntakel wa dijuku ufanyidin kukwat mupak piur pa chikumangen chisadidina dizu dikusala anch in mu dijuku ataninamu

11, 12. (a) Mutapu ik ukweta dizu usu mulong wa mwan kutaninamu ku yikumangan? (b) Mulong wak an amwing kakatiningap kwilej dizu dia anvajau?

 11 Anvaj afanyidin kushinshikin yom yiswirikedinau nakash anau. Mulong wa kutesh nawamp uyakin wa mu Bibil, an akwet kuswir kwa yom yivud nakash kulik kwau ching mafundish ma Bibil matambwilingau mu masaa makemp ku yikumangan rubing ni rubing. Pakwez shinshikin chom ech: Ku yikumangan kusadidinau dizu diteshinau nawamp, an akutwish kutaninamu anch aya kwau ku yikumangan yiney, pamwing ap akutwish kwilej yom yivud kusutamu anvajau. Chinech chikutwishap kwikal mwamu anch an kateshinap dizu nawamp. (Tang 1 Korint 14:9, 11.) Ni kadiap anch ching dizu dia chivadik dia mwan diawiy dikutwisha kwikal ni usu piur pa mutapu wend wa kutong ni wa kwiyov. Chawiy, an amwing akutwish kwilej kwakul, kusal yakumenaku, ni madiskur mu dizu dia anvajau, pakwez kakutwishap kulond yitongijok ni kulond kamu nawamp ni chirungul.

12 Chikwau kand, mazu mavud makwet yibachikin mu muchim wa mwan. Chinech chawiy chamushikena Joshua wisambinangau kwiur oku. Mpanyend Esther ulondin anch: “Kudi an akemp, dizu dia anvajau, yaku, ni relijon yisadin chom chimwing.” Anch an iyovil anch kijap yaku ya anvajau, akutwish kulik kusanger kwilej dizu ni relijon wa anvajau. Yom ik yikutwishau kusal anvaj angendj?

13, 14. (a) Mulong wak dijuku dimwing diading mwi ngand ya wingendj diashemunika diaya mu chikumangen chasadinang dizu dia ngand yadingau? (b) Mutapu ik walamau anvaj urund wau ukash pamwing ni Yehova?

13 Anvaj in Kristu akat kutek maswir ma anau pa ndond yakusambish kusutamu yom yikatinau awiy. (1 Korint 10:24) Samuel tatukwend wa Joshua ni Esther ulondin anch: “Am ni mukajam twayishinshikinang anetu chakwel tuman dizu dikutwisha kusal anch uyakin uyishik ku michim ni twalembilang mulong wa kwikal ni manangu. Chakul twatana chadingap mutapu twading tukimbina. Pakwez chisu twamana anch anetu kataninangapamu nakash ku yikumangan yasadikanga mu dizu dietu, twakwata mupak wa kuya mu chikumangen chading kusadinang dizu dia mwi ngand yiniya. Etu awonsu twayangang ku yikumangan ni mu mudimu wa kulejan pakad kujing. Twayitazukang kand arund netu a mwi ngand yiniya kudia netu ni kusutish netu chisu pamwing. Yawonsu yiney yayikwasha anetu kuyijik akadivar ni kumwijik Yehova, kadiap ching mudi Nzamb wau pakwez mudi kand Tatukwau ni Murund nau. Twamana anch yom yiney yading ya usey nakash kulik anch ching ijik dizu dietu nawamp.”

14 Samuel uwejidinaku anch: “Mulong wa kulam mwikadil wetu wa mu spiritu ukash, mukajam niyamam twayangang kand ku yikumangan yasadikang mu dizu dietu. Twading ni yom yivud ya kusal mu mwom ni twading kuziy. Pakwez tumujikitishin Yehova mulong uyukishin usu wetu ni kwipan kwetu. Anetu asatu amusadidin Yehova mu mudimu wa chisu chawonsu.”

YOM YIKUTWISHAU ANSAND KUSAL

15. Mulong wak nambaz Kristina wiyova anch ukutwish kusal nawamp mu chikumangen chisadidina dizu dia ngand yiniya?

15 Anch an apam, akwijik anch akutwish kumusadin Yehova nawamp mu chikumangen  chisadidina dizu diteshinau nawamp. Anch chidi mwamu, anvajau kafanyidinap kwiyov anch anau ayiduwil. Kristina uvurikin anch: “Nading nij yom yimwing mu dizu dia anvajam, pakwez yom yalondangau ku yikumangan yading yinkasikedin. Pinading ni mivu 12, nakumangana ku chitentam chasadika mu dizu dia ku shikol yam. Kawiy kapamp kakusambish nova anch winou wawiy uyakin! Kuswimp kukwau kwikalaku pinasambisha kulembil mu dizu dia ku shikol yam. Natwishang kumulej Yehova yom yidiokila mu muchim wam!” (Midimu 2:11, 41) Pawanyishay mivu 18, Kristina wisambina mulong winou nau anvajend ni wakwata mupak wa kuya mu chikumangen chasadinang dizu dia mwi ngand yiniya. Ulondin anch: “Kwilej piur pa Yehova mu dizu dia ku shikol yam kwambachika kuya kurutu.” Mu kusut kwa machuku Kristina wikala chibol wa rawonsu ni ukwet musangar nakash.

16. Mulong wak Nadia ukwet musangar wa kwikal mu chikumangen cha dizu dia wingendj?

16 Ansand, ov, utonginany anch ukutwish kwikalany antu a mu chikumangen chisadidina dizu dia ngand udianya? Anch mwawiy, iyipulany anch mulong wak. Ov, chidi mulong kushemunikin mu chikumangen chinicha kukutwish kukukwash chakwel useja piswimp ni Yehova? (Jakobu 4:8) Ap chidi mulong ukatinap anch anvajey amana yom yawonsu usadina ap mulong ukatinap kwey kuya kurutu? Nadia usadidina katat ku Betel ulondin anch: “Patwikala ansand, am nau anamakwam twakimba kuya mu chikumangen chasadinang dizu dia mwi ngand yiniya.” Pakwez anvajend amana anch kushemunik mudi kwinoku kwadingap kuwamp mulong wa urund wa anau ni Yehova. “Katat tukwet musangar mulong anvajetu asala usu wa kutufundish dizu diau ni kutulam mu chikumangen chasadinang dizu dia wingendj. Chinech chawapisha mashakamin metu ni kutwinkish mitapu ya kuyikwash antu akwau chakwel amwijik Yehova.”

MUTAPU UKUTWISHAU ANTU AKWAU KUKWASH

17. (a) Anany inkishau kudi Yehova chisend cha kulil an? (b) Mutapu ik ukutwishau kuyikwash anvaj kufundish anau uyakin?

17 Yehova wayinkisha anvaj chisend cha kuyifundish anau uyakin. Kayinkishap angak ap antu akwau chisend chinech. (Tang Jinswir 1:8; 31:10, 27, 28.) Pakwez anvaj akad kwijik dizu dia ngand yidiau akutwish kuswiriken ukwash mulong wa kuyishik anau ku michim. Anch anvaj it ukwash, chirumburikinap anch achinin chisend cha kulil anau. Pakwez winou ukutwish kwikal mutapu wa kuyilil anau “mu kuyikand ni malejan ma [Yehova].” (Efes 6:4) Chilakej, anvaj akutwish kuyit amakurump a chikumangen yiyul piur pa kutakel difukwil dia mu dijuku ni kuyikwash kukimb arund awamp mulong wa anau.

An nau anvaj akutaninamu anch abombakan pamwing mu chikumangen (Tal paragraf wa 18, 19)

18, 19. (a) Mutapu ik ukutwishau in Kristu akwau kuyikwash ansand? (b) Anvaj afanyidin kudandamen kusal ik?

18 Mulong wa kuyikwash anau, anvaj akutwish kutazuk majuku makwau chisu ni chisu chakwel asalang nau difukwil dia mu dijuku. Chikwau kand, ansand avud akat kwilejin kudi in Kristu akwau payilingau nau mu mudimu wa kulejan ni pasadiningau nau yom yikwau. (Jinswir 27:17) Shan, twambambinang kwinsambishin ulondin anch: “Nivurikin nawamp akadivar ezang kwinsend  mulong wa kuya nau kwipuwangej. Pankwashangau kurijek yikunku ya kusal ku yikumangan, nilejang kamu yom yivud. Ni nasangerang masengan twasalang mu chisak.”

19 Chakin kamu, antu atondinau kudi anvaj mulong wa kuyikwash anau afanyidin chisu chawonsu kuyikasikesh an chakwel ayilimish anvajau. Akutwish kusal mwamu mu kulond nawamp piur pa anvaj ni kangal atambul chisend cha anvaj cha kulil anau. Chikwau kand, antu akwashina afanyidin kwipuk mwikadil wawonsu ukutwisha kumekan mudi uyimp pol ap mukach mwa chikumangen. (1 Pita 2:12) Ap anch anvaj akutwish kwit ukwash kudi antu akwau, pakwez chidi chisend chau cha kuyifundish anau uyakin. Afanyidin kushinshikin ukwash upaninau kudi in Kristu akwau.

20. Mutapu ik ukutwishau anvaj kuyikwash anau chakwel ikala atushalapol ashinshamena a Yehova?

20 Anvaj, mulembilany Yehova mulong wa ukwash, ni salany yawonsu ukutwishanya. (Tang 2 Jinsangu 15:7.) Tekany urund wa mwanen ni Yehova pa ndond yakusambish kusutamu maswir men. Salany yawonsu ukutwishanya kusal mulong wa kwikal ni kashinsh anch dizu dia Nzamb dishikin ku muchim wa mwanen. Kangal watongany anch mwanen kakutwishap kwikal kashalapol wa Yehova. Anch anen alondul Dizu dia Nzamb ni chilakej chen chiwamp, ukwiyovany mudi mwiyovay kambuy Yohan piur pa anend mu ritiy palonday anch: “Kwikil chom chikwau chinsangarishina mudi pinateshina anch anam adandamedin [kwendil] mu uyakin.”—3 Yohan 4.

^ par. 7 Tal mutu wa mulong ulondina anch “Vous pouvez apprendre une langue étrangère!” mu Réveillez-vous! wa ngond wa 3, 2007, paj 10-12.