Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 5 , 2017

‘Ov, Ey Winkatil Am Kupandakan Inay?’

‘Ov, Ey Winkatil Am Kupandakan Inay?’

‘Simon, mwan wa Yohan, ov, ey winkatil am kupandakan inay?’ —YOHAN 21:15.

MIMINY: 32, 45

1, 2. Kupwa kwa kusutish uchuku wa kabuj mu kuta ansh, dilejan ik dilejay Pita?

IN KWILEJ a Yesu sambwad asutisha uchuku wa kabuj mu kuta ansh mu Karung wa Galaliya. Pakwez kakwatap insh ap umwing. Mu kwacha pamanch, Yesu wavumbulau wading wiminy pa chikum, uyitadin. Chawiy “ndiy wayela anch: ‘Tangany wand wen mutambu wa katatuku wa waat, chad ukukwatany ansh.’ Awiy ata wand, chad katwishap kuukak, mulong mwafa ansh avud.”—Yohan 21:1-6.

2 Yesu wayinkisha in kwilejend mukat ni insh mulong wa kudia. Kupwa wakarumuka kudiay Simon Pita ni wamwipula anch: ‘Ov, Simon, mwan wa Yohan, ey winkatil am kupandakan inay?’ Yesu wading wij anch Pita wading ukatin kuta ansh. Chikutwish kwikal anch Yesu wading umwipwil Pita ang umukatin nakash ni yom yafundishay kusutamu mutapu ukatinay mudimu wend wa kuta ansh. Pita wamwakula Yesu anch: “Mwant, ey wij kal anch am nikukatil.” (Yohan 21:15, TMK.) Kusambish pinipa, Pita wamekesha anch wova kurumburik kwa yom yading yilondinay. Wamekesha  rukat rend mulong wa Kristu mu kukwatakan nakash mu mudimu wa kulejan, ni wikala muntu wa usey nakash mu chikumangen cha win Kristu.

3. In Kristu afanyidin kubabel chom ik?

3 Yom ik tukutwisha kwilejin ku mazu mamwelau Pita kudi Yesu? Tufanyidin kubabal chakwel kangal rukat retu mulong wa Kristu riziy. Yesu wading wij anch mashakamin mu mangand minam mayimp makwikal ma mar ni tukutwish kurish ni yakamish ni milong. Mu chishimu chend cha mwin kukun mbut, Yesu walonda anch antu amwing akutwish kwitiy “dizu dia Want wa Nzamb” ni kwinsambishin akwikal ni mushiku. Pakwez mu kusut kwa chisu, “yakamish ya mwom wa pa mangand, ni ris ra mapit” rikutwish “kushesh dizu dia Nzamb” ni antu inay akutwish kushadish mushiku wau. (Mateu 13:19-22; Marko 4:19) Anch tubabelap, yakamish ya dichuku diawonsu ya mu mwom yikutwish yayipish mudimu wetu tumusadidina Yehova. Chawiy Yesu wayibabesha in kwilejend anch: “Babalany, kangal michim yen yachinchik mulong wa kwifund kudia, ap kukwachik maar, ap mulong wa yakamish ya mwom wa ngand yiney.”—Luka 21:34.

4. Yom ik yikutwisha kutukwash kwijik anch rukat retu mulong wa Kristu ridi rikash? (Tal chipich cha kwinsambishin.)

4 Mudi Pita, tukutwish kumekesh anch tumukatin Kristu mu kutek mudimu wa kulejan pa ndond ya kusambish mu mwom yetu. Mutapu ik tukutwisha kwikal ni kashinsh anch tudandamedin kusal mwamu? Tukutwish kwiyipul ayinetu anch: ‘Yom ik nikatina nakash mu mwom? Ov, musangar wam udiokil mu kumusadin Yehova anch udiokil ku midimu yikwau?’ Mulong wa kutukwash kwakul ku yipul yiney, el tushinshikinany yom yisatu ya mu mwom yikutwisha kuziyish rukat retu mulong wa Kristu. Yom yiney yidi mudimu wa ku mujimbu, kwipuwangej, ni yom ya ku mujimbu.

TEK MUDIMU WA KU MUJIMBU PA NDOND YAU

5. Chisend ik chikwetau antakel a majuku?

5 Kudiay Pita, kuta ansh chadingap kusu chom chasangerangay kusal. Wading mudimu wasalangay mulong wa kuwanyish maswir ma dijuku dined. Nlel kand, Yehova uyinkishin antakel a majuku chisend cha kuwanyish maswir ma majuku mau. (1 Timote 5:8) Afanyidin kusal usu nakash mulong wa kuwanyish chisend chinech. Pakwez, mu machuku minam ma nsudien, mudimu wa ku mujimbu ukutwish kulet yakamish nakash.

6. Mulong wak mudimu wa ku mujimbu ukutwish kuziyishan nakash?

6 Chisu chawonsu kudi antu avud akimbina mudimu pakwez kudi midimu yikemp. Mulong wa chinech, antu arishin nakash mulong wa kuman mudimu. Antu avud akat kutong anch afanyidin kusal ma saa mavud kusutamu mayitinau ku mudimu ap anch ayifutin nfalang jikemp. Ma sosiete masadin usu wa kubudish yom yiwamp yivud nau in kusal mudimu akemp kusutamu mwasalangau pakur. Chawiy in kusal mudimu akutwish kwikal ni yakamish, kuziy, ap kand kuyel. Antu avud akat kwakam anch akutwish kushadish midimu yau anch alik kusal yiyitinau kudi amakurump au a midimu.

In Kristu adi ashinshamena nakash kudi Yehova kusutamu kushinshaman kudi muntu win mwawonsu

7, 8. (a) Nany tufanyidina kushinshamen nakash? (b) Dilejan ik dia usey dilejay mukadivar wa mwi ngand ya Thaïlande piur pa mudimu wend?

 7 Mulong tudi in Kristu, tushinshamen nakash kudi Yehova kusutamu kushinshaman kudi muntu win mwawonsu, ap kudi mukurump wetu wa mudimu. (Luka 10:27) Mudimu wetu wa ku mujimbu wawiy utukwashining kuwanyish maswir metu ni kukwash mudimu wa kulejan. Pakwez anch tubabelap, yisend yetu ya ku mudimu wa ku mujimbu yikutwish kuyipish difukwil dietu. Tukutwish kwilejin ku yom yamanay mukadivar wa mwi ngand ya Thaïlande. Walonda anch: “Mudimu wam wa ku mujimbu wa kurijek ma ordinater wading uwamp nakash, pakwez wading witin kusal ma saa mavud. Mudi chibudikin, chisu chankepang mulong wa kusal yom ya mu spiritu. Namana anch pakwel anch niteka yisakin ya Want pa ndond ya kusambish, nafanyina kuswimp mudimu wam winou.” Yom ik yasalay mukadivar winou?

8 Urumburil anch, “kupwa kwa kwirijek mulong wa yom nafanyina kusal, nakwata mupak wa kusambish kulandish yom ku balibal ni nasambisha kulandish ma krem. Kwinsambishin, chankasikena kuman nfalang ni naziya. Pinatanijana nau akwetu twasalang nau mudimu pakur ansipa ni angipula anch mulong wak namana anch mudimu wa kulandish ma krem udi uwamp kusutamu kusal mudimu nich ma ordinater mwi ndond mwading chipepil chiwamp. Namulembila Yehova, namwita chakwel ankwasha kurish ni kuwanyish chitongijok cham cha kwikal ni chisu chivud mulong wa midimu ya mu spiritu. Kupwa kwa machuku, yom yasambisha kuwap. Nijika kusal krem kulondwish mutapu wading ukatinau antu ading nikwinland ni nikala ni ukaliweny wa kusal krem. Kupwa, nalandishang krem dichuku diawonsu. Nading ni nfalang jivud kusutamu chisu nading kusal ni ma ordinater. Chansangaresha nakash mulong nikwetap yakamish ni ushon mudi unading nich pinasalang mudimu ukur. Ni cha usey nakash, niyovil katat anch nidi piswimp ni Yehova.”—Tang Mateu 5:3, 6.

Ov, nimen anch mudimu wam wa ku mujimbu usangareshin nakash kusutamu mudimu wam mulong wa Nzamb?

9. Mutapu ik tukutwisha kudandamen kwikal ni chitongijok chiwamp piur pa mudimu wa ku mujimbu?

9 Yehova ukat kusangar anch twasal mudimu nakash. Mudimu ukash ukweting difut. (Jinswir 12:14) Pakwez tufanyidin kwikal ni kashinsh anch kangal mudimu wetu wa ku mujimbu wikal ni usey nakash kusutamu mudimu wetu tumusadidina Yehova. Palonday piur pa yom ya ku mujimbu, Yesu walonda anch: “Pa ndond pa yom yiney, en kimbany bil Want wa Nzamb ni yom yisotilay, chad ndiy ukukuwejinanyaku yom yiney yawonsu.” (Mateu 6:33) Pakwez mutapu ik tukutwisha kwijik anch tukwet chitongijok chiwamp piur pa mudimu wa ku mujimbu? Tukutwish kwiyipul ayinetu anch, ‘ov, nimen anch mudimu wam wa ku mujimbu uwapin ni usangareshin pakwez nimen mudimu wam mulong wa Yehova mudi wa chamwamu ap uletishina usweral?’ Kutong piur pa chipul chinech kukutwish kutukwash kwijik nawamp yom tukatina kamu chakin.

10. Dilejan ik dia usey diafundishay Yesu?

10 Yesu watufundisha yom tufanyidina kutek  pa ndond ya kusambish mu mwom wetu. Dichuku dimwing waya kuyital anambaz aad kwol kwau, Mariy ni Mart. Kapamp kamwing, Mart wasambisha kwisuk yakudia mulong wa Yesu, pakwez Mariy washakama piswimp ni Yesu ukat kutesh mafundish mend. Mart winana anch Mariy kamukwashinap kwisuk. Yesu wamwela Mart anch: “Mariy watondang kal chom chiwamp, chakad kwez kumutambul.” (Luka 10:38-42) Pinap, Yesu wafundisha dilejan dia usey. Mulong wa kwipuk kampuw kadiokila ku kuwanyish maswir metu ni mulong wa kumekesh rukat retu mulong wa Kristu tufanyidin kutond “chom chiwamp.” Chinech chirumburikin anch urund wetu ni Yehova ufanyidin kwikal kamu chom cha usey nakash mu mwom wetu.

CHITONGIJOK CHETU PIUR PA KWIPUWANGEJ NI KWISWEDISH

11. Chom ik chilondinay Bibil piur pa kwiswedish ni kwipuwangej?

11 Tukwatiken nakash mu mwom, chawiy yisu yimwing tukweting kuswir kwa kwiswedish ni kwipuwangej. Tutangin mu Bibil anch: ‘Chom chipandakena kuwap kudi muntu chidi kudia ni kuna, ni kusangar mulong wa mudimu wend ukash.’ (Mulej 2:24) Yesu wading wij anch chading cha usey kudi in kwilejend kwiswedish. Chilakej, kupwa kwa kusal mudimu nakash mu mudimu wa kulejan, Yesu wayileja anch: “El tuyany kwi ndond ya ayinetu chakwel tukiswedishaku.”—Marko 6:31, 32.

12. Mulong wak tufanyidin kubabal piur pa kwiswedish ni kwipuwangej? Let chilakej.

12 Masengan ni kwipuwangej yikutwish kutukwash kupim ap kwiswedish. Pakwez tufanyidin kubabal chakwel kangal kwisangaresh ayinetu kwikal chom cha usey nakash mu mwom wetu. Mu mivu chitot ya kusambish, antu avud ading ni chitongijok cha kulond anch: “Tudiany, tunany, mulong diamashik tukufany kwetu.” (1 Korint 15:32) Chitongijok cha mutapu winou chidiaku kand nlel. Chilakej, nsand umwing ushicha kurand kwa Europe wasambisha kukumangan ku yikumangan ya win Kristu. Pakwez wading ukatin kwipuwangej nakash, chawiy walika kukumangan pamwing nau Atuman a Yehova. Kupwa, wamana anch kushinshikin kwipuwangej nakash kwamuletinang milong yivud. Wasambisha kand kwilej Bibil, ni mu kusut kwa chisu wasambisha kulejan rusangu ruwamp. Kupwa kwa kutambul dibatish, walonda anch: “Ninanin mulong nashadisha chisu chijim nakash kurutu nijika anch kumusadin Yehova kuletin musangar nakash kusutamu kulondul kwipuwangej kwa mangand minam.”

13. (a) Let chilakej chimekeshina mulong wak kwiswedish ni kwipuwangej nakash kuwapinap. (b) Yom ik yikutwisha kutukwash kwikal ni chitongijok chiwamp piur pa kwiswedish ni kwipuwangej?

13 Kwiswedish kukutwish kutukwash kuchirish usu. Chawiy asaa inch tukutwisha kusutish mu kwiswedish? Mulong wa kutukwash kwakul, tukutwish kutong mu mutapu ou. Antu avud akatining kudia mikat ni maswit. Pakwez twij anch ang twasambish kudia yom yiney chisu chawonsu, yikuyipish mujimbu wetu. Anch tukatin kwikal ni ukash wa mujimbu uwamp, tufanyidin kudia yakudia yiwamp. Mu mutapu wawiy umwing, anch twasutish chisu nakash mu kwiswedish ni mu kwipuwangej, yikutwish kuyipish urund wetu ni Yehova. Yom ik yikutwisha kutukwash kwijik anch tukwet chitongijok chiwamp ap bwat piur pa kwipuwangej? Chom chimwing tukutwisha kusal chidi kutond rubing ni kufund uvud wa asaa tukata kusutish mu kusal yom yikwatijadina ni mudimu wa Yehova, mudi yikumangan ya win Kristu, mudimu wa kulejan, ni dilejan dia Bibil. Kupwa tukutwish kufund  kand uvud wa ma saa tusutishina pa rubing rawiy rimwing mu kwipuwangej, mudi masengan, kutal televizion ni masengan ma video. Anch twisikesh uvud wa ma saa ma yom yiney yaad, yom ik twileja kal? Ov, tukwet kuswir kwa kuswimp?—Tang Efes 5:15, 16.

14. Yom ik yikutwisha kutukwash kutond kwiswedish ni kwipuwangej kuwamp?

14 Yehova utulikin tutonda kwipuwangej, ni antakel a majuku akutwish niyau kutond kwipuwangej mulong wa majuku mau. Mu Bibil, Yehova utwinkishin mbil jimekeshina mutapu utonginingay. Mbil jinej jitukwashin kukwat mipak yiwamp. * (Tal mazu ma kwinshin.) Kwipuwangej kuwamp chidi ‘chipan cha Nzamb.’ (Mulej 3:12, 13) Chidi chakin anch antu kushalijan akatining kwipuwangej kwa mitapu kushalijan. (Galatia 6:4, 5) Pakwez, chikalap nchik kwipuwangej kwawonsu tutondina, tufanyidin kubabal. Yesu walonda anch: “Kudia mapit mey, kwawiy kand kukwikala muchim wey.” (Mateu 6:21) Rukat retu mulong wa Mwant wetu, Yesu, ritubachikin kutong, kulond, ni kusal mu mutapu umekeshina anch Want udi wa usey nakash kudi etu kusutamu chom chin chawonsu.—Filip 1:9, 10.

KURISH KWETU NI YOM YA KU MUJIMBU

15, 16. (a) Yom ya ku mujimbu yikutwish kwikal mupit kudi etu mutapu ik? (b) Chiyul ik cha manangu chapanay Yesu piur pa yom ya ku mujimbu?

15 Antu avud nlel atongin anch afanyidin kwikal ni masun ma katat, ma telefon, ma ordinater, ni yom yikwau. Akwatiken nakash ni yom ya ku mujimbu, mashakam ma mwom  mamekeshina anch yom ya ku mujimbu ni nfalang yawiy yikweta usey kusutamu chom chikwau. Mudi mwin Kristu, chom ik chidia cha usey nakash kudi ey? Iyipula anch: ‘Ov, nikat kusutish chisu chivud mulong wa kutong piur pa motak yibudikina katat ap yom yibudikina katat kusutamu chisu nikata kusutish mulong wa kurijek yikumangan? Nikwatiken nakash ni midimu ya dichuku ni dichuku ni kusutish chisu chikemp mu kulembil ni kutang Bibil?’ Anch tubabelap, rukat mulong wa yom ya ku mujimbu rikutwish kwikal ra usey nakash kusutamu rukat retu mulong wa Kristu. Tufanyidin kutong piur pa mazu ma Yesu malondina anch: “Likany ris ra mitapu yawonsu.” ( Luka 12:15) Mulong wak walonday mwamu?

Chikasiken kumwinkish Yehova yom yetu ya usey ni mu chisu chawiy chimwing twashinshikin kand pa yom ya ku mujimbu

16 Yesu walonda anch “kwikil muntu ukutwisha kuyisadil ansalejend aad nawamp.” Wawejaku anch: “Kiukutwishanyap kusadil kapamp kamwing Nzamb ni mapit ma pa mangand.” Chiswapelap kumwinkish Yehova yom yetu ya usey ni mu chisu chawiy chimwing twashinshikin kand pa yom ya ku mujimbu. Yesu warumburila anch “ukumukis umwing, chad wamukat mukwau” ap “ukumulimish umwing, chad wamudiul mukwau.” (Mateu 6:24) Mulong tudi antu akad kuwanyin, tufanyidin kudandamen kurish mulong wa “maku metu ma wuntu,” kuwejaku ni kukat yom ya ku mujimbu.—Efes 2:3.

17. (a) Mulong wak chiyikasikedin antu amwing kwikal ni chitongijok chiwamp piur pa yom ya ku mujimbu? (b) Yom ik yikutukwasha kurish nich rukat ra yom ya ku mujimbu?

17 Antu avud ashinshikidin nakash pa maku mau ni kwisangaresh, chawiy chimenau anch chikasiken kwikal ni chitongijok chiwamp piur pa yom ya ku mujimbu. (Tang 1 Korint 2:14.) Mulong katonginap nawamp, chikutwish kuyikasiken kwauril yom yidia yiwamp ni yiyimp. (Hebereu 5:11-14) Maku mau ma yom ya ku mujimbu makutwish kwikal makash nakash. Ni anch ikal ni yom yivud, akukat kand kwikal ni yivud nakash. (Mulej 5:10) Pakwez kudi chom tufanyidina kusal mulong wa kurishish kutong kwa mutapu winou. Kutang Dizu dia Nzamb pakad kujing kukutukasikesh chakwel tujijamena rukat ra yom ya ku mujimbu. (1 Pita 2:2) Yesu watongijokinang pa manangu ma Yehova, ni chinech chamukwasha kujijamen yoziu ya Djabul. (Mateu 4:8-10) Nlel kand, anch tukatin kujijamen rukat ra yom ya ku mujimbu, tufanyidin kusadin manangu ma Yehova mu mwom wetu. Chinech chikumekesh kudi Yesu anch tumukatin nakash kusutamu yom ya ku mujimbu.

Yom ik yidia ya usey nakash mu mwom wey? (Tal paragraf wa 18)

18. Ukwatin mupak wa kusal yom ik?

18 Pamwipulau Pita kudi Yesu anch, ‘ey winkatil am kupandakan inay?’ wamufundisha Pita anch kumusadin Yehova chidi chom chifanyidina kushinshikin mu mwom wend. Chidi chom chisangareshina kwijik anch dijin dia Pita dirumburikin anch “Diyal.” Mikadil yiwamp ya Pita ayifanikeshin ni diyal. (Midimu 4:5-20) Nlel, niyetu tukatin rukat retu mulong wa Kristu rikala rikash. Chawiy tukwet kashinsh anch mudimu wa ku mujimbu, kwipuwangej, ni yom ya ku mujimbu yikwet ndond yiyifanyidina mu mwom wetu. Chawiy mudi Pita, chikwikal mudi tulondin anch: “Mwant, ey wij kal anch am nikukatil.”

^ par. 14 Tal mutu wa mulong ulondina anch “Ov, Kwipuwangej Kwey Kudi Kwa Ukwash?” mu Chinong cha Kalam cha 1 Ngond wa 10, 2011, paj 11-14, paragraf wa 6-15.