Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 5 , 2017

Musangar Udiokila ku Kwikal ni Mwom Uswapela

Musangar Udiokila ku Kwikal ni Mwom Uswapela

DANIEL NI MIRIAM atijana mwi ngond wa 9, muvu wa 2000 ni ading ni mwom uwamp mu musumb wa Barcelone, mwi ngand ya Espagne. Daniel urumburil anch: “Midimu yetu yatukwashang kudia mu ma restoran mawamp, kusal ma weny mwi ngand jikwau, ni kudjal masun ma nfalang jivud. Twipanang kand chisu chawonsu mu mudimu wa kulejan.” Pakwez kwashikena chom kanang.

Ku chitentam chasadika mu muvu wa 2006, Daniel watesha chipul chipulau mu diskur diasalau anch: “Ov, tukutwish kusal yawonsu tukutwisha kusal chakwel tuyikwasha ‘antu akimbilau kujip’ chakwel amana njil yitwadina ku mwom wa chikupu?” (Jinswir 24:11) Diskur dined diarumburila anch tukwet chisend cha kulejan uruu wa Bibil mulong uruw winou wawiy ukupandisha antu. (Midimu 20:26, 27) Daniel uvurikin anch, “niyova anch Yehova wading winlejin am.” Diskur dialejana kand anch tukwikal nich musangar anch twasal yom yivud mu mudimu wa Yehova. Daniel wijika anch yom yiney yading yakin mulong wamumana Miriam wading ukwet musangar nakash mulong wading wasambisha kal kusal mudimu wa uchibol.

Diskur dined diamushika Daniel nakash, chawiy wakwata mupak anch chawiy chinech chisu chifanyidina kuswimp nakash mu mwom wend. Wasambisha kusutish ma saa makemp mu mudimu wend wa ku mujimbu ni wasambisha kusal mudimu wa uchibol, ni watonga piur pa musangar ukutwishau kwikal nich anch ndiy ni Miriam asadin kwi ndond kudia maswir nakash ma in kulejan a Want.

MAR KWINSAMBISHIN—KUPWA RUSANGU RA MUSANGAR

Mwi Ngond wa 5, 2007, Daniel ni Miriam asha midimu yau ni ashemunika aya mu Panama, ngand yasambelau kuya kutal. Teritwar wau wading ukwet matung mavud nakash mu Bocas del Toro Archipelago pa Karung wa Caraïbes. Antu avud ashiching pinipa adi a Guaymis. Daniel ni Miriam atonga anch akutwish kushakam mu Panama angond piswimp chinan kukwatijan ni nfalang jadingau nich.

Asala weny pa matung kusutin waat ni nking. Adandamedin kuvurik kapamp ka kusambish kendishau jinking mu makilometre piswimp 30 ni kukaninik mikandu chisu chadinga chirungul nakash. Daniel waziya ni wakimba kukangany kwendish. Chikwau kand, majuku ma in Guaymis matanijanangau nau mayakang nawamp, pakampwil kupwa kwa kwilej kulond yom yimwing mu dizu dia ngand yiniya. Kupwa ikala nau in kwilej a Bibil 23.

Yom ik yasadika papwishau nfalang jau jawonsu? Daniel ulondin anch: “Ni mansoj ku mes metu, twasambisha kutong piur pa kuchirik mu Espagne. Twikala ni ushon mulong wa kusha in kwilej etu a Bibil.” Pakwez kupwa kwa ngond umwing, atambula rusangu ra musangar. Miriam ulondin anch: “Atutazuka kusal mudi ayibol a pakampwil. Musangar mudi ik wa kudandamen mu mudimu wetu!”

MUSANGAR WAU UJIM

Mulong wa kuswimp kusadikina mu dirijek, Daniel ni Miriam ayimikin kusal mudi ayibol a pakampwil mu muvu wa 2015. Yom ik yisadinau chadi katat? Achingejidin kushilamu kudia mu Kuseng 37:5 kulondina anch: “Pan njil yey kudi Yehova, ukungamena mwi Ndiy, ni Ndiy ukez kachisal.” Amen mudimu ufanyidina kusal chakwel awanyisha maswir mau mudi ayibol a rawonsu, nlel asadidin mu chikumangen cha Veraguas, mwi ngand ya Panama.

Daniel ulondin anch: “Kurutu kwa kudiokal mwi ngand ya Espagne, twadingap nich kashinsh anch tukutwish kwikal ni mwom uswapela. Nlel tusadin mudimu, ni tuburedinap chom ap chimwing cha usey.” Musangar ik ujim ukwetau? Alondin anch: “Kuyikwash antu ikepishina kwilej piur pa Yehova udi musangar upandakena kujimb!”