Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 5 , 2017

 Rusangu Ra Mwom

Kwikal Kajikamatu Kwankangeshap Kuyifundish Antu Akwau

Kwikal Kajikamatu Kwankangeshap Kuyifundish Antu Akwau

Ambatisha mu muvu wa 1941, pinading ni mivu 12. Pakwez kushik mu muvu wa 1946 nading kandikal nitesha kamu nawamp uyakin wa mu Bibil. Mulong wak chading mwamu? El nikulejany rusangu ram.

PISWIMP ni muvu wa 1910, anvajam adiokala mwi ngand ya Georgie mu musumb wa Tbilisi, ni aya mwi ngand ya Canada. Ashakama mu ka chikumbu kakemp ka ku ferm piswimp ni Pelly, Saskatchewan, kurand kwa Canada. Navadika mu muvu wa 1928, ni nading mwan wa nsudien mu an musamban. Tatukwam wafa angond musamban kurutu nivadik, ni maku wafa pinading mwanikanch. Chisu chikemp kupwa kwa yiney, yayam mband wa kusambish, Lucy, wafa ni mivu 17. Chawiy mantwam Nick watulama am nau anamakwam.

Dichuku dimwing pinasambisha kwend, antu a mu dijuku diam amana napwit lel mukil wa kabar wetu. Ova wom anch kabar ukutwish kwindjat, chawiy asambisha kutoy chakwel nilik kumukwat kabar ku mukil. Pakwez nading niyombin nyim, ni nadingap niteshina yom yading yinlejinau. Cha musangar, kabar kandjatap. Pakwez dined diawiy dichuku diajinguninau antu a mu dijuku diam anch nading kajikamatu.

Murund umwing wa antu a mu dijuku dietu walonda anch chidi chiwamp kuya ku shikol pamwing nau an akwau atujikamatu. Chawiy mantu Nick wantuma ku shikol ya atujikamatu mu Saskatoon, Saskatchewan. Shikol yiney yading kulemp nakash ni dijuku diam, ni mulong nading  kwam ni mivu yitan, nova wom. Nafanyina kwendin dijuku diam ching chisu cha konje. Kupwa, nileja dizu dia yijingidij ni nasambisha kusengan nau an akwau.

KWILEJ UYAKIN WA BIBIL

Mu muvu wa 1939, yayam mband Marion watijana ni Bill Danylchuck, ni asambisha kutulam am ni mpanyam Frances. Awiy antu akusambish a mu dijuku diam asambisha kwilej Bibil pamwing nau Atuman a Yehova. Mu chisu cha konje, asala usu wawonsu wa kwinlej yom yading yilejinau mu Bibil. Chading chitukasikedin kwambamb mulong kadingap kija dizu dia yijingidij. Pakwez ading adandamedin kuman anch nikatin chakin yom nading nilejina piur pa Yehova. Nijika anch yom yading kusalangau yading yikwatijadin ni yilondinay Bibil, chawiy nayangang nau mu mudimu wa kulejan. Chisu chikemp kupwa kwa yiney, nakata kutambul dibatish, ni mwi ngond wa 9 machuku ma ngond 5, muvu wa 1941, Bill wambatisha mwi ntuku wa chikung wading wizwishangau kal mem mavitau mu dijiy. Mem mading matalel nakash!

Nidi pamwing ni chisak cha atujikamatu ku chitentam chasadika mu Cleveland, mwi ngand ya Ohio, mu muvu wa 1946

Mu muvu wa 1946, pinachirika kwol kwetu mu konje, twakumangana ku chitentam mu Cleveland, mwi ngand ya Ohio, États-Unis d’ Amérique. Dichuku diakusambish, mpanyam wanfundinang yom yading yilondinau chakwel nitwisha kulondul program. Pakwez dichuku diakaad, nasangara nakash panijika anch kwading chisak cha atujikamatu arumburidinau mu dizu dia yijingidij ku chitentam. Chawiy natwisha kusanger program, ni chading chisangareshin nakash kutesh nawamp yifundishinay Bibil!

KUFUNDISH UYAKIN

Chisu chinicha, Njit ja Kaad ja Mangand Mawonsu japwa, ni antu ading akatin kumekesh anch ashinshamen ku jingand jau. Pakwez pinadiokala ku chitentam, nachirika ku shikol, ni nakwata mupak wa kushal ushinshamena kudi Yehova. Chawiy, nalika kwifukwil drapo, kuwang muminy wa ngand, ni kusal misambu ya machuku matumbila. Nalika kand kuya ku egliz nau arund nam a ku shikol. Amakurump a shikol kasangarap, ni asala usu wa kwinkangesh ni kwindimb makasu chakwel niswimpa yitongijok yam. Arund nam a ku shikol amana yom yading yisadikina, ni mulong wa yom yiney, nading ni mitapu yivud ya kuyilej uyakin. Pakach pa arund nam amwing a ku shikol, pading Larry Androsoff, Norman Dittrick, ni Emil Schneider, itiya uyakin ni adandamedin kumusadin Yehova.

Pinayang kutal misumb yikwau, nasalang usu wawonsu mulong wa kulejan uyakin kudi atujikamatu. Chilakej, mu musumb wa Montreal naya kwi ndond kwakumanganangau atujikamatu. Kwinikwa, nileja ni Eddie Tager, nsand umwing wading mu chisak cha ambwambol. Kushik ni pafidinay muvu wapwang ou, wading mu chikumangen chisadidina dizu dia yijingidij mu musumb wa Laval, mu Quebec. Natanijana kand ni Juan Ardanez. Mudi in Berey a pakur, wakimbijolang mulong wa kwikal ni kashinsh anch yom yilejay yading yidiokil mu Bibil. (Midimu 17:10, 11) Niyend wikala Kaman, ni wasala mudi mukurump wa chikumangen mu musumb wa Ottawa, mu Ontario, kushik ni pafilay.

Nipanin uman mu balibal kwinsambishin kwa muvu wa 1950

Mu muvu wa 1950, naya mu Vancouver. Ap anch nading nikatin kuyilej atujikamatu, nikez kavuramenap yom yinamana pinamuleja Chris Spicer mband umwing wading wakad kwikal kajikamatu mwi njil. Witiya kutambul gazet ni wakata anch nimanijan ni nfumwend, Gary. Naya kwol kwau, ni twambamba nau chisu chilemp  mu kufundijadin. Kudiokal pinipa twamanijanap umwing ni mukwau mu mivu yikemp, kushik ni chisu chimwing nakashimuka pezau kwinlangwish ku chitentam mu musumb wa Toronto, mu Ontario. Gary amubatisha dichuku dinidia. Yom yiney yanvurisha usey wa kudandamen kulejan, mulong twijap anch muntu tulejina ukez kikal Kaman.

Kupwa, nachirika kand mu Saskatoon. Kwinikwa natanijana ni mband umwing wangita anch nilej Bibil nau anend amband ampamb ading atujikamatu, Jean ni Joan Rothenberger. Ading ilejidin ku shikol ya atujikamatu kunilejina. Kupwa, ayangadim inay aad asambisha kuyilej akwau a ku shikol yom yilejangau. Chawiy, antu 5 a mu shikol yau ikala Atuman a Yehova. Umwing wading Eunice Colin. Twatanijana ni Eunice kapamp ka kusambish mu muvu wam wa nsudien ku shikol ya atujikamatu. Chisu chinicha, wangikisha chikunku cha bonbon ni wangipula anch tukutwish kwikal arund. Kupwa, wikala muntu wa usey nakash mu mwom wam. Wikala mukajam!

Nidi pamwing ni Eunice mu muvu wa 1960 ni mu muvu wa 1989

Chisu chajinguninay makwend a Eunice anch mwanend wading wilejin Bibil, wamuleja ntakel wa shikol chakwel amukangesh Eunice. Ap anch wapakisha kusal mwamu ni kumutambul yom yend ya kwilej nich, Eunice wakwata mupak wa kushal ushinshamena kudi Yehova. Pakimbay kutambul dibatish anvajend amuleja ang, “anch wikal Kaman wa Yehova, ukudiokal ku chikumbu chetu!” Chawiy pawanyishay mivu 17, Eunice wadiokala kwol kwau ni washakama mu dijuku dimwing dia Atuman. Wadandamena kwilej ni kupwa watambula dibatish. Pitwatijana mu muvu wa 1960, anvajend kezap ku musambu wa uruw. Pakwez, mu kusut kwa mivu, asambisha kutulimish nakash mulong wa yitiyij yetu ni mutapu twalilang anetu.

YEHOVA WANLAMA

Mwanam Nicholas ni mukajend, Deborah, asadidin ku Betel wa Londre

Mulong tudi anvaj atujikamatu, chading  chikasiken kuyilil an amakundj sambwad akad kwikal atujikamatu. Pakwez twading ni kashinsh anch ijik dizu dia yijingidij mwamu tukutwish kwambamb nau nawamp ni kuyifundish uyakin. Akadivar nau anambaz a mu chikumangen atukwasha nakash. Chilakej, nvaj umwing watufundila mulong wa kutulej anch mwanetu ikundj umwing walonda yom yiyimp ku Chot cha Want. Twatwisha kupwish mulong pakad kulab. Anam amakundj anying, James, Jerry, Nicholas, ni Steven, adi amakurump a yikumangen ni amusadidin Yehova nich kushishaman pamwing nau akajau ni majuku mau. Chikwau kand, Nicholas ni mukajend, Deborah, akwashin kukarumun dizu dia yijingidij ku mutiy wa Grande-Brétagne, ni Steven ni mukajend, Shannan, adi mu chisak cha in kukarumun dizu dia yijingidij ku mutiy wa États-Unis.

Anam James, Jerry, ni Steven nau akajau akwashin mudimu wa kulejan mu dizu dia yijingidij mu mitapu kushalijan

Cha ushon, ngond umwing kurutu tuwanyisha mivu 40 mu uruw wetu, Eunice wafa ni kanser. Chikalap nchik yisu yiney ya mar, ritiy rend mu divumbuk radandamena kwikal rikash. Nichingejin kurutu oku dichuku nikeza kand kumuman.

Faye ni James, Jerry ni Evelyn, Shannan ni Steven

Mwi ngond wa 2, muvu wa 2012, nawa pansh ni naturumuka mu rukum. Namana anch nikwet kuswir kwa kwinkwash,  chawiy naya kushakam kwa mwanam ikundj umwing ni mukajend. Tudi katat mu chikumangen cha Dizu dia Yijingidij cha Calgary, mwinimwa nidandamedin kusal mudi mukurump wa chikumangen. Kinak kawiy kapamp kam kakusambish kwikal mu chikumangen chisadidina dizu dia yijingidij! Chawiy mutapu ik nalamang urund wam ukash ni Yehova mu mivu yawonsu yiney nading mu chikumangen cha Inglish? Yehova wankwasha. Walama kushilamu kwend kwa kuyikwash an anshon. (Kuseng 10:14) Nipanin kujikitish kudi awonsu ipana mulong wa kwinfundin, kwilej dizu dia yijingidij, ni kwinrumburil.

Nakumangana ku shikol ya ayibol mu dizu dia yijingidij pinading ni mivu 79

Kwading chisu nakanganyang kutesh yom yalondangau ap chisu niyovang anch kwikil muntu ukutwisha kuyikwash atujikamatu. Yisu mudi yiney piniyakamishang ni kukimb kulikap, natongijokinang pa mazu mamwakulau Yesu kudi Pita anch: ‘Nsalejetu, ov, tukuya kand kudi nany? Ey yey ukweta mazu ma mwom wa chikupu.’ (Yohan 6:66-68) Mudi akadivar nau anambaz akwau avud atujikamatu asadina kal mivu yivud mu uyakin, niyam nileja kushimpish muchim. Nileja kumuchingejin Yehova ni dirijek diend, ni chinech chanletila yiyukish yivud. Katat kudi mikand yivud mu dizu diam, ni nikwet musangar wa kukumangan ku yikumangan ni ku yitentam yisadidina Dizu dia Yijingidij dia in Amérique. Chakin, nikwet musangar ni mwom uyukina mu kumusadin Yehova, Nzamb wetu mujim.