Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 5 , 2017

Kangal Walik Rukat Rey Rikep

Kangal Walik Rukat Rey Rikep

“[Uyimp ukez] kavulijan, chad rukat ra antu avud rukez kukep.”—MATEU 24:12.

MIMINY: 23, 24

1, 2. (a) Mazu ma Yesu madia mu Mateu 24:12 mayitadin chakusambish anany? (b) Mutapu ik umekeshina mukand wa Midimu anch in Kristu avud akusambish alama rukat rau rikash? (Tal chipich cha kwinsambishin.)

PADINGAY Yesu pa divu, warumburila mutapu ukujinguninau antu yijingidij ya “disudiel dia mangand.” Pakach pa yom yikwau, walonda anch: “Rukat ra antu avud rukez kukep.” (Mateu 24:3, 12) In Yuda a mu mivu chitot yakusambish alonda anch adi antu a Nzamb pakwez alika rukat rau mulong wa Nzamb rikep.

2 Pakwez, in Kristu avud a mu chirung chinicha ading ni yitongijok kushalijan. Alejanang nich mushiku ‘rusangu ruwamp piur pa Kristu’ ni amekesha rukat mulong wa Nzamb, mulong wa akadivar nau mu ritiy, ni kudi antu akwau ading akad kal kwijik uyakin. In Kristu inay alama rukat rau rikash mulong wa Nzamb. (Midimu 2:44-47; 5:42) Cha ushon, kwading in Kristu akusambish amwing, rukat rau rakepa. Mutapu ik twija mwamu?

3. Yom ik yasala pamwing ap anch rukat ra in Kristu amwing rikepa?

3 Yesu wayileja in Kristu akusambish ading mu Efes anch: “Ey  washil kal rukat rey ruwading nich pakusambish.” (Kujingunik 2:4, TMK.) Chikutwish kwikal anch in Kristu a ku Efes ikala ni chibachikin cha antu ading ayinyingumukina ading akatina kwisangaresh ayinau. (Efes 2:2, 3) Efes wading musumb ukweta mapit ni antu ading akatin kwikal ni nfalang ni yom ya usey kusutamu yom yikwau yawonsu. Antu avud mu Efes ading kand akamasandj ni kalimishangap yijil ya Nzamb. Ipanang nakash mu kwisangaresh ayinau pa ndond pa kumekesh rukat mulong wa Nzamb ni antu akwau.

4. (a) Mutapu ik uyila kukep rukat mu machuku metu? (b) Mu mitapu ik yisatu tufanyidina kulam rukat retu rikash?

4 Mazu ma Yesu piur pa kukep kwa rukat matutadin kand niyetwetu nlel. Antu nlel ashadishin rukat mulong wa Nzamb pakemp pakemp. Pa ndond pa kumuchingel Nzamb apwish milong ya mangand, mamiliyon ma antu makat kuchingejin yitenchik ya an a antu. Rukat rau ridandamedin kukep. Ni rukat ra atushalapol a Yehova rikutwish kukep mudi muyasadika mu chikumangen cha ku Efes wa pakur. Chawiy el twisambinany mitapu yisatu tufanyidina kulam rukat retu rikash: (1) rukat mulong wa Yehova, (2) rukat mulong wa uyakin wa Bibil, ni (3) rukat mulong wa akadivar netu.

RUKAT MULONG WA YEHOVA

5. Mulong wak tufanyidin kumukat Nzamb?

5 Nany tufanyidina kukat nakash? Yesu walonda anch: ‘‘Mukata Yehova Nzamb wey nich muchim wey wawonsu, ni mupim wey wawonsu, ni manangu mey mawonsu.’ Chinech chawiy chijil chipandakena kujimb ni chakusambish.’ (Mateu 22:37, 38) Rukat retu mulong wa Yehova ritukwashin kuziyin ku yijil yend, kujijaman ni kukis yom yiyimp. (Tang Kuseng 97:10.) Pakwez Satan ni mangand mend asadin usu wa kutuziyish ni kuyipish rukat retu mulong wa Nzamb.

6. Yom ik yikata kushiken anch antu ashadish rukat rau mulong wa Nzamb?

6 Mangand makwet chitongijok chiyimp piur pa rukat. Pa ndond pa kumukat Nzamb, antu avud adi “in kwikat ayinau.” (2 Timote 3:2) Imedin nakash pa ‘maku ma mujimbu wa mbij, maku ma mes, ni kwibaz kwa yom yikwetau ni kwa yom yisadilau.’ (1 Yohan 2:16) Kambuy Paul watubabesha piur pa yom yikutwisha kushiken anch twakat kwisangaresh ayinetu chakusambish. Walonda anch: ‘Kutek manangu ku yom ya ku mujimbu chirumburikin rufu.’ Mulong wak? Mulong antu akata kusal mwamu akat kwikal akankuny a Nzamb. (Rom 8:6, 7) Antu akata kusutish chisu mu mwom wau mulong wa kukimb nfalang ni kusangaresh maku mau ma masandj, akat kushiken ku yom yiyimp nakash.—1 Korint 6:18; 1 Timote 6:9, 10.

7. Yitongijok ik ya ubaj yikutwisha kwikal ni usu padiau in Kristu nlel?

7 Antu akata kutadik kwikalaku kwa Nzamb (athées), akata kwidjidjek mulong wa kwikalaku kwa Nzamb (agnostiques), ni antu itiyijina dikarumuk asadin usu wa kuyilej antu akwau chakwel alika kumukat Nzamb ap kwitiyij anch udiaku. Akat kusal chimekan mudi anch ching muntu udia chisup ap wakad kwilej ndiy witiyijina anch kuding Sakatang. Chikwau kand, antu akwet kalimish nakash mulong wa in siyans kusutamu kwikal ni kalimish mulong wa Sakatang. (Rom 1:25) Ap mwin Kristu ukutwish kwikal ni chibachikin cha yitongijok yiney. Urund wetu ni Yehova ukutwish kuziy, ni rukat retu rikukep.—Hebereu 3:12.

8. (a) Yom ik yikutwisha kuyiziyish antu a Yehova? (b) Kuseng 136 ukutwish kutukasikesh mutapu ik?

 8 Mulong tudi mu mangand mayimp ma Satan, kudi mayingishin mavud masadina anch tuziy yisu yimwing. (1 Yohan 5:19) Anch twilikidij ayinetu tukuziy, ritiy retu rikuziy, ni rukat retu mulong wa Nzamb rikukep. Chilakej, tukutwish kurish ni milong yivud mulong wa upal, mulong wa mayej, ap mulong wa kuburen nfalang. Ap tukutwish kwov ushon mulong tutwishinap kusal chom kanang mudi twakatang. Tukutwish kuziy anch yom yimwing mu mwom wetu yisadikinap mudi twada tuchingejina. Yikalap nchik milong turishina nich, tufanyidinap kwiyov anch Yehova watulikin kal. Tongijokin piur pa mazu makasikeshina madia mu Kuseng 136:23 malondina anch: “Ndiy watuvurika mu machuku metu mayimp mulong rukat rend rudimukina rushiching chikupu.” Tukutwish kwikal ni kashinsh anch Yehova uteshining “dizu dia kwilemb” kwetu ni ukwakul ku malembil minam.—Kuseng 116:1; 136:24-26.

9. Yom ik yamwinkisha Paul usu wa kudandamen kulam rukat rend rikash mulong wa Nzamb?

9 Kambuy Paul wading kashalapol wa Nzamb watonga nakash piur pa mutapu wading umukwashinau kudi Yehova, ni chinech chamukwasha kushal ukasikena. Wafunda anch: “[Yehova], ndiy mwin kwinkwash, kinikez kwovap wom. Ov, muntu ukwinsal chom ik?” (Hebereu 13:6) Ruchingej ra Paul mudiay Yehova ramukwasha kurish ni milong mu mwom wend. Padingay Paul ni milong yikash, kashadishap ruchingej rend mudiay Yehova. Ap padingay mu rukan, wayikwasha anamakwend in Kristu mu kufund mikand yikasikeshina ku yikumangen. (Efes 4:1; Filip 1:7; Filimon 1) Chikalap nchik milong yarishay nich Paul, ndiy walama rukat rend rikash mulong wa Yehova. Wamuchingejina “Nzamb ukata kupan kwongoj kwawonsu, ndiy ukata kutwongoj mu mar metu mawonsu.” (2 Korint 1:3, 4) Mutapu ik tukutwisha kumwimburij Paul?

Mekesh rukat mulong wa Yehova (Tal paragraf wa 10)

10. Mutapu ik tukutwisha kulam rukat retu rikash mulong wa Yehova?

 10 Paul warumburila mutapu umwing tukutwisha kulam rukat retu rikash mulong wa Nzamb pafunday anch: “Lembilany kwakad kulik.” Kupwa wafunda kand anch: ‘Dandamenany mu malembil.’ (1 Tesalonik 5:17; Rom 12:12) Mulong wak malembil matusejishin piswimp ni Nzamb? Patulembiling, twambambining ni Yehova. Chinech chikat kusal anch chituswapel kwikal mu urund uwamp ni ndiy. (Kuseng 86:3) Anch twamulej Tatukwetu wa mwiur piur pa yitongijok ni yovil yetu yikurikina, tukat kusej piswimp ni ndiy. (Kuseng 65:2) Chikwau kand, rukat retu mulong wa Yehova rikat kuya kurutu pitumening mutapu wakwilay ku malembil metu. Tukwet kashinsh anch “[Yehova] udi piswimp kudi awonsu akata kumutazuk ndiy.” (Kuseng 145:18) Ruchingej retu mu rukat ra Yehova ni ukwash wend yikutukwash kurish ni milong yin yawonsu tukweta katat ni mu machuku ma kurutu.

RUKAT MULONG WA UYAKIN WA BIBIL

11, 12. Mutapu ik tukutwisha kukudish rukat retu mulong wa uyakin wa Bibil?

11 Mulong tudi in Kristu, tukatin uyakin. Mu Dizu dia Nzamb mwawiy tutanina uyakin. Yesu wamuleja Tatukwend anch: “Dizu diey diawiy uyakin.” (Yohan 17:17) Chakwel tukata uyakin wa Bibil, tufanyidin kwijik yidia mu Bibil. (Kolosay 1:10) Pakwez kudi yom yivud tufanyidina kusal. Shinshikin mutapu utukwashinay nfund a Kuseng 119 kwijik yom tufanyidina kusal. (Tang Kuseng 119:97-100.) Dichuku diakabuj, tufanyidin kutongijokin nakash pa yom tutangina yidia mu Bibil. Pitutongijokina pa mutapu tukata kutaninamu anch twasadin uyakin wa Bibil mu mwom yetu, tukukat kamu uyakin nakash.

12 Nfund a kuseng walonda kand anch: “Mazu mey matadil mu kan mwam, chakin kamu matadil kupandakan woch.” (Kuseng 119:103) Mikand yimedina pa Bibil yirijekinau kudi dirijek dia Nzamb yidi mudi yakudia yiwamp. Anch tudil yakudia yitukatining, tukwikal ni chisu cha kuyisanger. Mu mutapu wawiy umwing, tufanyidin kwitekin chisu cha kwilej. Chawiy tukusanger chakin ‘mazu mawamp’ ma uyakin, ni chikutuswapel kuvurik yom tutangina ni kuyisadin mulong wa kuyikwash antu akwau.—Mulej 12:10.

13. Yom ik yamukwasha Jeremiy chakwel akat mazu ma Nzamb? Mutapu ik uyakin winou wikala nich usu padiay ndiy?

13 Muprofet Jeremiy wakata mazu ma Nzamb. Walonda anch: “Ey wanleja, chad am natesha mazu mey mawonsu. Yehova Nzamb Mwin Dikand, am nidi iwey, chawiy mazu mey makat kwizwish muchim wam nich musangar ni kuzangijal.” (Jeremiy 15:16) Jeremiy watongijokina nakash pa mazu mawamp ma Nzamb, ni wamakata. Wasangera kwikal utuminau kudi Yehova ni kulejan uruu wend. Anch twakat uyakin wa Bibil, tukwijik chisend cha pakampwil tukweta cha kwikal Atuman a Yehova ni cha kulejan rusangu ruwamp piur pa Want mu machuku minam ma nsudien.

Mekesh rukat mulongwa uyakin wa Bibil (Tal paragraf wa 14)

14. Yom ik yikwau tukutwisha kusal mulong wa kukudish rukat retu mulong wa uyakin wa Bibil?

14 Yom ik yikwau yikutwisha kutukwash kwikal ni rukat rikurikina mulong wa uyakin wa Bibil? Tufanyidin kukumangan ku yikumangan yawonsu, mulong kwinikwa atufundishining kudi Yehova. Dilejan dia Bibil kusutin Chinong cha Kalam rubing rawonsu uding mutapu wa pa dishin usadidiningau mulong wa kutufundish. Anch tukatin kutaninamu nakash mu chikumangan chinech, tufanyidin  kwirijek kurutu kwa chisu. Chilakej, tufanyidin kutang verse win mwawonsu wa mu Bibil ujimbwilau. Nlel unou, antu avud akutwish kutambul Chinong cha Kalam kusutin telefon ap ordinater mulong udiaku mu mazu mavud pa kapend ka jw.org ni pa application JW Library. Yom ya elekitronik yikat kutukwash kutan swa maverse malejenau. Pakwez tukatining kwilej mitu ya milong yawonsu, pitutangining mifund ya Bibil nich mushiku ni pitukata kuyitongijokin nakash, rukat retu mulong wa uyakin wa Bibil rikat kukul.—Tang Kuseng 1:2.

RUKAT MULONG WA AKADIVAR NETU

15, 16. (a) Kukwatijan ni Yohan 13:34, 35, chijil ik chatwinkishay Yesu? (b) Rukat retu mulong wa Nzamb rikwatijadin mutapu ik ni rukat retu mulong wa akadivar netu?

15 Uchuku wend wa nsudien panap pansh, Yesu wayileja in Kwilejend anch: “Katat nakulejany kal chijil chisu anch: ‘Katijanany muntu ni mukwau. Chifanyidin en kukatijanany muntu ni mukwau mudi am chinakukatanya en. Anch niyen wakatijanany mwamu, chawiy antu awonsu akez kwijik anch, en udiany in kwilejam.’”—Yohan 13:34, 35.

16 Kuyikat akadivar nau anambaz netu kukwatijadin ni rukat retu mulong wa Yehova. Anch tumukatinap Nzamb, tukutwishap kuyikat akadivar netu. Ni anch tuyikatinap akadivar netu, tukutwishap kumukat Nzamb. Kambuy Yohan wafunda ang: “Anch Muntu kamukatilap mwanamakwend umenay ku mes, kakutwishap kumukat Nzamb wakad kumekan ku mes.” (1 Yohan 4:20) Rukat retu mulong wa Yehova nau akadivar rikwatijadin kand ni rukat retu mulong wa Bibil. Mulong wak? Mulong anch twakat yom twilejina mu Bibil, tukukat kuziyil ku yijil tutanina mu Bibil mulong wa kumukat Nzamb nau akadivar netu.—1 Pita 1:22; 1 Yohan 4:21.

Mekesh rukat mulong wa akadivar nau anambaz (Tal paragraf wa 17)

17. Mu mitapu ik yimwing tukutwisha kumekesh rukat?

17 Tang 1 Tesalonik 4:9, 10. Mitapu ik yimwing tukutwisha kusadin mulong wa kumekesh rukat kudi antu a mu chikumangen  chetu? Mukadivar ap nambaz wananapina kal ukutwish kwikal ni kuswir kwa kumutwal ku yikumangan ni kumuchirish ku chikumbu. Mwadia mufu ukutwish kwikal ni kuswir kwa kumurijekin chom kampand mu chikumbu chend. (Jakobu 1:27) Akadivar nau anambaz aziyina, adia mu yakamish, ap arishina ni milong yikwau akwet kuswir kwa kuyibangin, kuyikasikesh ni kuyongoj. (Jinswir 12:25; Kolosay 4:11) Tumekeshining anch tuyikatin ‘anamakwetu mu ritiy’ kusutin yom tulondining ni tusadining.—Galatia 6:10.

18. Yom ik yikutukwasha kupwish kulik kovijan nau akadivar netu?

18 Bibil walonda anch mu “machuku ma kwisudiel” kwa mangand minam mayimp, antu akez kwikal in kwikat ayinau ni in kukat nfalang ni yom ya ku mujimbu. (2 Timote 3:1, 2) Mudi in Kristu, tufanyidin kusal usu nakash wa kudandamen kukudish rukat retu mudiay Yehova, mu Dizu diend ni kukatijan umwing ni mukwau. Mulong tudi antu akad kuwanyin, yisu yimwing tukutwish kulik kovijan nau akadivar netu. Pakwez mulong tukatijadin umwing ni mukwau, tufanyidin kusal usu wa kupwish milong yin yawonsu mu mutapu uwamp ni pakad kulab. (Efes 4:32; Kolosay 3:14) Kangal amboku tulikany rukat retu rikep! Pakwez, el tudandamenany kwikal ni rukat rijim mulong wa Yehova, Dizu diend, ni mulong wa akadivar netu.