‘Tukat kujingunin mazu mapepidilau ma uyakin ni mazu mapepidilau ma makasu.’​—1 YOH. 4:6.

MUMINY 73 Twinkisha Kujijaman

YIDIA MU MUTU WA MULONG WINOU *

Pa ndond pa kwiyandjik mu yishankur yakad kumusangaresh Nzamb, yongoja anamakwey a ku mujimbu afishang mukatish nau (Tal paragraf wa 1-2) *

1-2. (a) Mu mitapu ik mukatay Satan kupumbul antu? (b) Yom ik tukushinshikina mu mutu wa mulong winou?

SATAN, “tatuku wa makasu,” wayipumbwil kal antu kudiokal kwinsambishin kwa rusangu ra muntu. (Yoh. 8:44) Makasu mend mamwing madi piur pa mafundish piur pa rufu ni pa mwom kupwa kwa rufu. Yishankur yivud yijikena yimedin pa wom wa aspiritu a afu. Mudi chibudikin, akadivar nau anambaz netu avud akat ‘kurish nakash piur pa ritiy’ rau anch muntu wa mu dijuku didiau ap mu ul wau wafa.​—Jud 3.

2 Anch urishin ni milong ya mutapu mudi winou, yom ik yikutwisha kukukwash kushal ushinshamena mulong wij yom yifundishinay Bibil piur pa rufu? (Efes 6:11) Mutapu ik ukutwisha kumwongoj ni kumukasikesh mbay ney mwin Kristu ubachikinau chakwel iyandjik mu yishankur yikisinay Nzamb? Mutu wa mulong winou ukwisambin umutakel utwinkishinay Yehova. Chakusambish, el tushinshikinany yom yilondinay Bibil piur pa rufu.

UYAKIN PIUR PA MWIKADIL WA AFU

3. Ov, makasu ma kusambish maleta chibudikin ik?

3 Nzamb kakatap anch antu afangang. Pakwez mulong wa kushakam chikupu, Adam ni Ev afanyina kumuziyin Yehova wayinkisha mbil yiswapela kuziyin yading yilondina anch: “Dibuj dia mutond ou wa ronganyin ra kuwap ni kuyip kangal kudidia. Mulong dichuku diukeza kudidia, chakin ukez kufa.” (Dis. 2:16, 17) Kupwa Satan waleta mulong. Wamuleja Ev kusutil nnak anch: “Kiukufanyap kwen, bwat.” Cha ushon, Ev witiyija  makasu ni wadia dibuj. Kupwa, nfumwend niyend wadia dibuj. (Dis. 3:4, 6) Mu mutapu winou, chitil ni rufu yandama mu mangand.​—Rom 5:12.

4-5. Mutapu ik udandamedinay Satan kuyidimb antu?

4 Adam ni Ev afa mudi mwayilejau kudi Nzamb. Pakwez Satan kimikap kulond makasu piur pa rufu. Kupwa, wasambisha kand kudimban makasu makwau. Makasu mamwing pakach pa makasu minam madi mafundish malondina anch mujimbu ukat kufang, pakwez chikunku chimwing cha mujimbu wetu chikat kudiokal ni kuya mwi ngand ya mu spiritu. Makasu minam mayipumbwil antu avud nakash nlel unou.​—1 Tim. 4:1.

5 Mulong wak antu avud nakash apumbukin? Satan ukat kwilej yovil yetu piur pa rufu mulong wa kutudimb. Mulong atutanga chakwel tushakam chikupu, tukatiningap kufa. (Mul. 3:11) Rufu turumen mudi mukankuny.​—1 Kor. 15:26.

6-7. (a) Ov, Satan utwishin kujindjik uyakin piur pa afu? Rumburil. (b) Uyakin wa Bibil utukwashin mutapu ik kulik kwov wom wa afu?

6 Chikalap nchik mausu ma Satan, uyakin piur pa rufu ushadikinap. Chawiy, kudi antu avud nakash ija yom yifundishinay Bibil piur pa mwikadil wa afu ni ruchingej ra divumbuk ni akat kuyilejan kudi antu akwau. (Mul. 9:5, 10; Mid. 24:15) Uyakin winou ukat kutukasikesh, ni ukat kutuchidij ku wom ni kwidjidek piur pa yom yikata kushiken ku rufu. Chilakej, tukatap kwov wom wa afu ni tukwovangap wom anch yom yiyimp yikuyishiken akatish netu afila kal. Twij anch kadiap aom ni kakutwishap kumusal muntu uyimp. Chidi mudi alel mu tul tukash. (Yoh. 11:11-14) Twij kand anch afu kijap chom piur pa mutapu usutina chisu. Chawiy, pa chisu cha divumbuk, ap antu afila kal pasutil kal yitot ya mivu akuman mudi kwasut kal kachisu kakemp nakash.

7 Ov, umenap anch uyakin piur pa mwikadil wa afu udi wovikena ni uswapela kutesh? Kushalijan mud ik ni makasu ma Satan! Chikwau kand, kupwa kwa kuyipumbul antu, makasu minam makat kumufukejin kand Sakatang wetu. Mulong wa kutukwash kwov nawamp uyimp uletishinay Satan, tukushinshikin yipul yilondwilaku ey: Makasu ma Satan mamufukejidin Yehova mutapu ik? Mutapu ik makasu minam mapipejina yitiyij piur pa usey wa yakupesh ya difut ya Kristu? Mutapu ik makasu minam mawejina ushon ni mar ma antu?

 MAKASU MA SATAN MAKAT KULET UYIMP NAKASH

8. Mudi mulejenau mu Jeremiy 19:5, mutapu ik makasu ma Satan piur pa afu mamufukejidina Yehova?

8 Makasu ma Satan piur pa afu mamufukejidin Yehova. Mu makasu minam mudi mafundish malondina anch afu akat kuman mar mu kasu. Mafundish ma mutapu winou mamufukejidin Nzamb! Ov, mutapu ik? Mafundish minam mayibachikin antu kwitiyij anch Nzamb wa rukat udi mwin chisum mudi Satan. (1 Yoh. 4:8) Ey wiyovil nchik piur pa mafundish minam? Cha usey nakash, mutapu ik wiyovilay Yehova mulong wa mafundish minam? Kupwa kand, Yehova ukisin mitapu yawonsu ya chisum.​—Tang Jeremiy 19:5.

9. Mutapu ik makasu ma Satan makwatina kand yitiyij mu yakupesh ya Kristu yilejenau mu Yohan 3:16 ni 15:13?

9 Makasu ma Satan piur pa afu mapipejin yitiyij piur pa usey wa yakupesh ya difut ya Kristu. (Mat. 20:28) Makasu makwau ma Satan mawiy malondina anch antu akwet mupim wakad kufang. Anch chidi mwamu, ing muntu mwawonsu ushich chikupu. Kristu kafanyinap kupan mwom wend mudi difut mulong wetwetu chakwel tutambula mwom wa chikupu. Vurik anch yakupesh ya Kristu yimekeshin rukat ripandikena rayimekeshinau antu. (Tang Yohan 3:16; 15:13.) Tongin piur pa mutapu wiyovilay Yehova ni Yesu piur pa mafundish mapipejina chipan chinech cha usey!

10. Mutapu ik makasu ma Satan piur pa rufu mapandikeshina ushon ni mar ma antu?

10 Makasu ma Satan mapandakeshin ushon ni mar ma antu. Anvaj akweta ushon mulong wa rufu ra mwanau akutwish kuyilej anch Nzamb wasendin mwanau, pamwing ap mulong ikala mwangel mwiur. Ov, makasu minam ma Satan makepishin ushon anch maupandakeshin? Mafundish ma makasu ma karung ka misiny amasadidin mulong wa kumekesh kuyimesh mar, ni kuyosh antu alikina mafundish ma chirelijon. Kukwatijan ni buku ulondina piur pa l’Inquisition espagnole, antu amwing pakach pa antakel inay a mafundish minam ma chisum ading atongin anch ayikwashin in kubwambwil ku mafundish ma chikatolik “kwijik piur pa mutapu ukwikala mar mu karung ka misiny” chakwel ayibachika antu kukarumuk kurutu kwa kufa ni apanda ku karung ka misiny. Mu jingand jivud, antu iyoviling kwikal abachikinau kuyifukwil angakau afila kal, kuyilimish, ni kukimb ukwash kudi awiy. Antu akwau akatining kuyidutish angakau afa kal mulong wa kwipuk dipup. Cha ushon, yitiyij yimedina pa makasu ma Satan yiletiningap rongoj rakin. Pakwez, yiletishin yakamish ap wom.

MUTAPU TUKUTWISHA KUNUNG CHIKAS KU UYAKIN WA BIBIL PIUR PA AFU

11. Mutapu ik ukutwishau anamakwetu ap arund kutubachik kusal chinyim ni Dizu dia Nzamb?

11 Rukat mulong wa Nzamb ni mulong wa Dizu diend rikat kutubachik kumuziyin Yehova ap anch anamakwetu ap arund netu atubachik kwiyandjik mu yisal yakad kukwatijan ni mifund piur pa afu. Akutwish kupakish kutwovish usany pamwing ap kusutil kulond anch twadingap tuyikatina ni tuyilimishina anamakwetu afila kal. Ap kand akutwish kulond anch yisal yetu yikuyibachik antu afila kal ayisala nayimp antu adia aom. Mutapu ik tukutwisha kunung chikas ku uyakin wa Bibil? Shinshikin mutapu ukutwisha kusadin mbil ja Bibil jilondwilaku ej.

12. Yishankur ik piur pa afu yimekena kamu patok anch yikwatijadinap ni mifund?

12 Kwat amwiney mupak wa “kwaurik” ni yitiyij ni yishankur yakad kukwatijan ni mifund. (2 Kor. 6:17) Mu muchidi umwing wa mu Caraïbe, antu avud itiyijin anch kupwa kwa rufu ra muntu, “mwizwizwimb” wend ukat  kushal mulong wa kuyipup antu amumesha mar. Referans umwing ulondin anch: “Mwizwizwimb” winou ukutwish ap kulet kanvundangesh mu chisak cha antu. Mu jindond jimwing mu Afrik, muding chishankur cha kubwik pa makalash mu chikumbu cha muntu wafang ni kukarumun yipich yend kuyitadish ku rubumbu. Mulong wak? Amwing alondining anch afu kafanyidinap kwiman ayinau! Mulong tudi atushalapol a Yehova, tukatap kwitiyij yishankur ap kwiyandjik mu yisal yikasikeshina makasu minam ma Satan!​—1 Kor. 10:21, 22.

Ukutwish kwipuk milong anch wakimbijol nawamp mu Bibil ni wambamb nawamp nau anamakwey akad kwikal Atuman (Tal paragraf wa 13-14) *

13. Anch ukwetap kashinsh piur pa chishankur kanang, yom ik ufanyidina kusal mudi mulejenau mu Jakobu 1:5?

13 Anch ukwetap kashinsh piur pa chishankur ap chisal kanang, mulembila Yehova, it nich ritiy manangu mend. (Tang Jakobu 1:5.) Kupwa kimbijol mu mikand yetu chakwel umatan manangu minam. Anch chidi cha usey, yimana amakurump a chikumangen chey. Kakukukwatinap mupak, pakwez akutwish kukulej mbil ja Bibil mudi jisambidinau mu mutu wa mulong winou. Anch wasal yom yiney, ufumbin ‘usu wey wa kutong,’ ni usu winou ukukukwash “kwauril kuwap ni kuyip.”​—Heb. 5:14.

14. Mu mitapu ik tukutwisha kwipuk kuyipwakesh antu kwau?

14 ‘Salany yawonsu mulong wa uyaj wa Nzamb. Kangal wasalany yom ya kuyipwakesh nich akwen.’ (1 Kor. 10:31, 32) Patukwatina mupak anch tukwiyandjik ap bwat mu chishankur ap chisal kanang, tufanyidin kand kutongin yibudikin ya mupak wetu pa kom ka antu akwau, pakampwil ambay netu in Kristu. Chakin kamu, tukatinap kumupwakesh muntu ap umwing! (Mar. 9:42) Chikwau kand, tukatinap kuyijimesh chamwamu antu akad kwikal Atuman. Rukat rikutubachik kwambamb nau mu mutapu wa kalimish mulong wa kumutumbish Yehova. Chakin kamu, tukatinap kupwitamijan ni antu ap kuyovish usany mulong wa yitiyij yau. Vurik anch rukat rikwet usu! Anch twarimekesh mu mutapu wisikena ni wa kalimish, tukutwish pamwing ap kupukun michim ya antu atukisina.

15-16. (a) Mulong wak chidi cha manangu kuyijikishamu antu akwau yom witiyijina? Let chilakej. (b) Mazu ma Paul madia mu Rom 1:16 matutadin mutapu ik?

15 Yijikisha antu ushicha nau anch udi kaman wa Yehova. (Isay 43:10) Anch muntu wa mu dijuku diey wafa, anamakwey ni amutej ney akutwish kujiman nakash anch walik kwiyandjik mu chishankur kanang. Pakwez  mulong ukutwish kuswapal anch watakela kuyilej yitiyij yey. Francisco wa mwi ngand ya Mozambik ufundin anch: “Am ni mukajam Carolina pitwileja uyakin, twayileja anamakwetu anch etu tukwifukwilap kand afu. Mupak wetu aupaka chisu chafay yayend a Carolina. Chishankur cha kwol kwetu chiding cha kowish mujimbu wa muntu wafang kal. Kupwa mwanamakwend wa piswimp wa muntu wafang ufanyidin kulal machuku masatu pa ndond yamwowishinangau muntu wafang. Akat kutong anch kusal mwamu kukat kudutish spiritu wa muntu wafang. Dijuku dia Carolina diamutonda ndiy chakwel alal pa ndond yiniya.”

16 Mutapu ik wasalay Francisco ni mukajend? Francisco urumburil anch: “Mulong tumukatin Yehova ni tukatin kumusangaresh, twalika kwiyandjik mu chishankur chinech. Dijuku dia Carolina diajimana nakash. Atwela anch tuyilimishinap afu ni anch dijuku dikutwishap kand kwez kututal ap kutukwash. Mulong twading twayirumburila kal yitiyij yetu, twatadikijanap nau pading pajimenau. Anamakwetu amwing atulondina, alonda anch twading twayilejin kal yitiyij yetu. Mu kusut kwa chisu, ujim wa anamakwend a Carolina wapwa ni twatwisha kuchirish chisambu. Kupwa, amwing pakach pau eza kwol kwetu kutwit mikand yimedina pa Bibil.” Tukutwishap kwov usany ap pakemp wa kunung chikas ku uyakin piur pa rufu.​—Tang Rom 1:16.

YONGONJA NI YIKWASHA ANTU ANENGANENA

Arund akin ayongojining ni kuyikwash antu afishina akatish nau (Tal paragraf wa 17-19) *

17. Yom ik yikutwisha kutukwash kwikal murund muwamp kudi mbay netu mwin Kristu unenganena?

17 Anch mbay netu mwin Kristu wafish mukatish nend, tufanyidin kusal usu wa kwikal ‘murund wakin . . . , mwanamaku wavadika mulong wa kukwash mu yom yikash.’ (Jnsw. 17:17) Mutapu ik tukutwish kwikal ‘murund wakin,’ pakampwil anch mukadivar ap nambaz unenganena amubachik kwiyandjik mu yishankur yakad kukwatijan ni mifund? Shinshikin mbil jaad ja Bibil jikutwisha kutukwash kumwongoj muntu wafishang.

18. Yom ik yamubachika Yesu kudil, ni chilakej chend chitufundishin ik?

18 ‘Dilany pamwing nau antu adidila.’ (Rom 12:15) Chikutwish kutukasiken kutan mazu  ma kumulej muntu unenganena. Yisu yimwing mansoj metu makutwish kulond yivud kusutamu mazu. Pafay Lazar murunend a Yesu, Mariy, Mart, ni antu akwau adila mulong wa mwanamakwau ni murund nau winou. Pashikay Yesu kupwa kwa machuku manying, niyend “wadila” ap anch wading wij anch ukuvumbul. (Yoh. 11:17, 33-35) Mansoj ma Yesu mamekesha yovil ya Tatukwend. Mamekesha kand rukat ra Yesu mulong wa dijuku dia Lazar, ni chinech chamukasikesha kamu Mariy ni Mart. Chilik chimwing, anch akadivar aman anch tuyikatin ni tuyibangidin, akwiyov anch kadiap ayinau pakwez ayinyingumukin kudi arund ayibangidina ni ayikwashina.

19. Mu mitapu ik tukutwisha kusadin Mulej 3:7 pitumukasikeshina mbay netu mwin Kristu ukweta ushon?

19 “Kudi chisu chimwing cha kuninet, kudi chisu chikwau cha kulond.” (Mul. 3:7) Mutapu ukwau wa kumwongoj mbay netu mwin Kristu ukweta ushon udi wa kumutesh nawamp. Mulika mukadivar ney afungul muchim wend ni pikil wajiman mulong wa ‘mazu ma usup.’ (Job 6:2, 3) Mukadivar ukutwish kand kwikal mu yakamish yikwau yidiokila ku rupompat ra anamakwend akad kwikal Atuman. Chawiy lembil nend pamwing. Mwilembila ‘Ukata kwakul ku malembil’ chakwel amwinkisha usu ni amukwasha kwikal ni yitongijok yiwamp. (Kus. 65:2) Anch chitwishikin, tang nend Bibil. Ap tang mutu wa mulong umwing mu mikand yetu, chilakej mudi rusangu ra mwom rikasikeshina.

20. Yom ik tukwisambina mu mutu wa mulong ulondwilaku ou?

20 Didi dilau mud ik tukweta dia kwijik uyakin piur pa afu ni machuku ma kurutu mapandikena kuwap mayichingedina awonsu adia mu jinzay ja chivurikish! (Yoh. 5:28, 29) Chawiy, mu mazu ni mu yisal, el tunung chikas ku uyakin wa Bibil ni kuyilejau antu akwau chisu tukweta mutapu wa kusal mwamu. Mutu wa mulong ulondwilaku ukwisambin mutapu ukwau upakishinay Satan kusadin mulong wa kuyitek antu mu mididim ya mu spiritu kusutil kwambamb nau aspiritu ayimp. Tukuman mulong wak tuswirikedin kwipuk yisal ni kwipuwangej kukwatijadina ni yom ya ayilembil.

MUMINY 24 Ezany ku Mukandu wa Yehova

^ par. 5 Satan nau ayilembil end akat kuyipumbul antu nich makasu piur pa mwikadil wa afu. Makasu minam makat kuyitwal antu ku yishankur yakad kwikal mu mifund. Mutu wa mulong winou ukukukwash kushal ushinshamena kudi Yehova anch antu akwau apakish kukubachik kwiyandjik mu yishankur yiney.

^ par. 55 KURUMBURIL KWA YIPICH: Padidinay mwanamakwau wa ku mujimbu umwing mulong wa mukatish nend wafang, anamakwend a mu dijuku adia Atuman akat kumwongoj.

^ par. 57 KURUMBURIL KWA YIPICH: Kupwa kwa kukimbijol piur pa yishankur ya chidil, Kaman umwing ukat kuyirumburil nich kwitudish antu a mu dijuku diend piur pa yitiyij yend.

^ par. 59 KURUMBURIL KWA YIPICH: Amakurump a mu chikumangen cha win Kristu akat kumwongoj ni kumukwash Kaman wafishang mukatish nend.