“Anch Mwan a Nzamb wakukwolany en, ukez kwikalany ant ipen chakin.”—YOHAN 8:36.

MIMINY: 54, 36

1, 2. (a) Yom ik yisadinau antu mulong wa kwikal ni want ipau? (b) Yibudikin ik yikata kwikalaku?

NLEL unou, antu a mu jindond kushalijan pa mangand akat kwisamb piur pa antu kwikal isikena ni kwikal ni want ipau. Amwing akatin kukwolik mu kuyisadin yom pakad kutentam, katond ni uzwendj. Akwau akat kwit mulong wa kukwolik chakwel alondang yom yikatinau kulond, kutond yom yikatinau kutond ni kushakam mu mutapu ukatinau kushakam. Antu a ndond yin yawonsu akatin kwikal ni want ipau.

2 Mulong wa kwikal ni want ipau winou, antu akat kulik kusal yom yiyilejinau kudi antakel ni akat kutombuk. Ov, akat kwikal ni yom yikatinau kwikal nich? Bwat. Yisu yivud, yibudikin yikat kwikal yiyimp ni antu akat kufa. Mazu ma Mwant Salomon madia mu Mulej 8:9 madi kamu makin: ‘Muntu ukat kumuyikel mukwau mulong wa kumumesh mar.’

3. Yom ik tukutwisha kusal mulong wa kwikal kamu nich musangar?

3 Bibil utulejin yom tufanyidina kamu kusal mulong wa kwikal ni musangar. Mwin kwilej Jakobu walonda anch: “Muntu  mwawonsu ukata kwonganyin yijil yiwanyidina yikata kupan want ipau. Chad anch wadandamen kusal mwamu . . . [akez] kumuyukish ku yom yawonsu yikez kusalay.” (Jakobu 1:25) Yijil yiwanyidina yidiokil kudi Yehova, ni wij yom yiwamp tukweta nich kuswir mulong wa kwikal ni musangar ni kuzangijal. Yehova wamwinkisha Adam Ni Ev want ipau wakin ni yom yin yawonsu yadingau nich kuswir mulong wa kwikal ni musangar.

CHISU CHADINGAU ANTU NI WANT IPAU WAKIN

4. Adam ni Ev ading ni want ipau wa mutapu ik? (Tal chipich cha kwisambishin.)

4 Anch twatang shapitre wa 1 ni 2 wa Disambishil, tukat kwilej anch Adam ni Ev ading ni want ipau umwing uwamp ulatinau antu avud nlel kwikal nich. Ading akwet yom yin yawonsu yading yikwetau nich kuswir, kadingap ni wom wa chom chin chawonsu ni kwikil muntu wayisadina nich kuburen kutentam. Kadingap kwiyakamish piur pa yakudia, mudimu, mayej ap rufu. (Disambishil 1:27-29; 2:8, 9, 15) Pakwez, ov, want ipau wau wading wakad mimbu? El tumanany.

5. Chikalap nchik yom yitonginau, antu afanyidin kusal yom ik mulong wa kwikal ni want ipau?

5 Antu avud atongining anch kwikal ni want ipau kudi kusal yom yin yawonsu yikatinau pakad kwiyakamish piur pa yibudikin yikwikalaku. Buku umwing (World Book Encyclopedia) ulondin anch want ipau “udi ukaliweny wa kukwat mipak ni kuyiwanyish.” Pakwez, buku winou ulondin kand anch antu akat kwikal ni want ipau anch guvernema kayitekidinap mimbu mu mutapu wakad kutentam, wakad usey, ni wakad kwisikan. Chinech chirumburikin anch mimbu yidi ya usey chakwel antu awonsu ikal ni want ipau. Pakwez nany ukweta mbil ya kutond anch mwimbu kanang utentamin, udi wa usey ni wisikena?

6. (a) Mulong wak ching kwend Yehova ndiy ukweta want ipau wakad mimbu? (b) Antu akutwish kwikal ni want ipau wa mutapu ik ni mulong wak?

6 Chidi cha usey kudi etu kuvurik anch ching kwend Yehova ndiy ukweta want ipau wakad mimbu. Mulong wak? Mulong ndiy watanga yom yawonsu ni udi Mwant wa dikand wa pa mangand mawonsu. (1 Timote 1:17; Kujingunik 4:11) Mwant David wasadina mazu mamwing mawamp nakash mulong wa kurumburil ndond yikwetay Yehova. (Tang 1 Jinsangu 29:11, 12.) Pakwez, yitang yin yawonsu yidia mwiur ap pansh yikwet want ipau ukweta mimbu. Yehova ukatin twijika anch ching kusu ndiy ukweta mbil ya kutond mimbu yitentamina, ya usey ni yisikena. Kudiosh kwisambishin, Yehova wateka mimbu mulong wa yitang yend.

7. Yom ik yimwing tukata kusal yikata kutuletin musangar?

7 Ap anch Adam ni Ev ading ni want ipau nakash, pakwez wading ni mimbu. Mimbu yiney yading yiwamp mulong wa awiy. Chilakej, mulong wa kudandamen kwikal ni mwom, ading afanyidin kupim, kudia ni kulal. Chinech chirumburikin anch kadingap ni want ipau? Bwat. Pakwez, Yehova wading nich kashinsh anch kusal yom yiney kwafanyina kuyiletin musangar ni kuzangijal. (Kuseng 104:14, 15; Mulej 3:12, 13) Etu awonsu tukat kusanger kupim rinkind muwamp, kudia yakudia tukatina ni kwikal ni chisu chiwamp cha kwiswedish. Tukatap kwiyov mudi tudi mu rukan chisu tusadina yom mudi yiney. Adam ni Ev afanyina niyau kwiyov mwamu.

8. Mbil ik yimwing yovikena yamwinkishau Adam ni Ev kudi Nzamb ni mulong wak?

8 Yehova wamwinkisha Adam ni Ev mbil  yimwing yovikena nawamp. Wayileja kuval an, kwizwish divu ni kudilam. (Disambishil 1:28) Ov, mbil yiney yayikangesha kwikal ni want ipau? Bwat kamu! Mbil yiney yafanyina kuyikwash kukarumun divu diakabuj kwikal paradis, ni kusal anch yikala ndond yikutwishau kushakam chikupu pamwing ni anau awanyidina. Chinech chawiy chading chitongijok cha Nzamb. (Isay 45:18) Nlel unou, antu kakatap kumubwambwil Nzamb anch atond kwatan ni kuval an. Pakwez antu akat kwatan ni kuval an ap anch kusal mwamu kukat kuyiletin milong yimwing. (1 Korint 7:36-38) Mulong wak? Mulong akat kuchingejin kwikal ni musangar. (Kuseng 127:3) Anch Adam ni Ev amuziyina Yehova, ing afanyina kusanger uruw wau ni dijuku diau chikupu.

WANT IPAU WAKIN WASHADIKA MUTAPU IK?

9. Mulong wak mbil ya Nzamb yidia mu Disambishil 2:17 yidi yitentamina, ya usey ni yisikena?

9 Yehova wamwinkisha Adam ni Ev mbil yikwau ni wayileja yom yikuyishikena anch abwambwil. Wayileja anch: “Pakwez dibuj dia mutond ou wa ronganyin ra kuwap ni kuyip kangal kudidia. Mulong dichuku diukeza kudidia, chakin ukez kufa.” (Disambishil 2:17) Ov, mbil yiney yading yakad kutentam, yakad usey ni yakad kwisikan? Yasala anch Adam ni Ev alika kwikal ni want ipau? Bwat kamu. Mulong in kwilej avud a Bibil akweta manangu atongin anch mbil yiney yading ya manangu nakash ni yading yoviken. Umwing wa pakach pau ulondin anch mbil yiney yitufundishin anch “ching Nzamb ndiy wija yom yidia yiwamp . . . mulong wa antu ni ching Nzamb ndiy wija yom yakad kwikal yiwamp . . . mulong wa awiy. Mulong wa kusanger ‘yom yiwamp,’ antu afanyidin kumuchingejin Nzamb ni kumuziyin. Anch abwambwil, kakutwishap kutond ayinau yom yidia yiwamp . . . ni yakad kwikal yiwamp.” Chinech chidi chom chikasikena nakash kusal kudi an a antu ayinau.

Kutond kwa Adam ni Ev kwashikija ku yom yiyimp! (Tal paragraf wa 9-12)

10. Mulong wak mbil ya kusal yom yishalijadin ni mbil ya kukwat mipak piur pa yom yidia yiwamp ni yiyimp?

Ching Yehova ndiy wading ni mbil ya kukwat mipak piur pa yom yidia yiwamp ni yiyimp

10 Antu amwing akutwish kutong anch Yehova kamwinkishap Adam want ipau wa kusal yom yikatinay. Pakwez kijap kwau anch mbil ya kusal yom yikatinay muntu kusal yishalijadin ni kwikal ni mbil ya kukwat mipak piur pa yom yidia yiwamp ni yiyimp. Adam ni Ev ading ni want ipau wa kutond anch akumuziyil Nzamb ap bwat. Pakwez ching Yehova ndiy wading ni mbil ya kukwat mipak piur pa yom yidia yiwamp ni yiyimp. “Mutond . . . wa ronganyin ra kuwap ni kuyip” wading uman kudi Adam ni Ev mulong wa chom chinech. (Disambishil 2:9) Yisu yivud twijingap yibudikin yikwikalaku mulong wa mipak tukwatina ni tukutwishap kwijik anch yibudikin yikwikal yiwamp. Chawiy tumena antu avud akat kukwat mipak ni manangu mawamp, pakwez yibudikin ya mipak yiney yikat kwikal ya mar, kusansan ni yiletishina ushon. (Jinswir 14:12) Mwaning, antu akwet mimbu mu yom yikutwishau kusal. Pamwinkishau Adam ni Ev mbil ya kulik kudia dibuj, Yehova wayifundisha anch afanyidin  kumuziyin ndiy mulong wa kwikal ni want ipau wakin. Adam ni Ev akwata mupak wa kusal yom ik?

11, 12. Mulong wak mupak wakwatay Adam ni Ev washikija ku yom yiyimp? Let chilakej.

11 Cha ushon, Adam ni Ev atonda kumubwambwil Yehova. Ev watonda kumutesh Satan chisu chashilayamu anch: “Mes men makuburik, niyen ukez kwikalany mudi Nzamb, in kwijik kuwap ni kuyip.” (Disambishil 3:5) Ov, Adam ni Ev atonda njil yitwadina kwikal ni want ipau nakash, mudi mwalonday Satan? Bwat, yasadikap mwamu. Pakwez, ajingunina anch kulik winyikel wa Yehova kwayishikija ku yom yiyimp. (Disambishil 3:16-19) Mulong wak? Mulong Yehova kayinkishap antu want ipau wa kukwat mipak piur pa yom yidia yiwamp ni yiyimp.—Tang Jinswir 20:24; Jeremiy 10:23.

12 Chinech chidi kand chilik chimwing ni mwin kwendish avion. Mulong wa kushik kwi ndond kuyilay nawamp, ufanyidin kulondul njil yiwamp, kusadin yom ya kwend nich mwiur ni ya kwambamb nich mu kwovijan pamwing ni antu atadina mutapu utumbukinay ni ushirikinay avion. Pakwez anch mwin kwendish avion kalondwilap yijil yiney ni ukat kuya kwend kwawonsu kukatinay kuya, chinech chikutwish kutwal ku yom yiyimp. Mudi mwin kwendish avion winou, Adam ni Ev akata kusal yom mu mutapu wau ayinau. Alika winyikel wa Nzamb. Yibudikin ik yikalaku? Yom yivud yiyimp nakash! Mupak wau waleta chitil ni rufu kudi ayinau ni kudi anau awonsu. (Rom 5:12) Adam ni Ev kikalap ni want ipau nakash mu kusal usu wa kukwat mipak ayinau mulong wa yom yidia yiwamp ni yiyimp. Chinyim ni chinech,  ashadisha want ipau wakin wayinkishau kudi Yehova.

MUTAPU WA KWIKAL NI WANT IPAU WAKIN

13, 14. Mutapu ik tukutwisha kwikal ni want ipau wakin?

13 Antu amwing atongining anch chidi chiwamp kwikal ni want ipau wakad mimbu. Pakwez chidi kamu chakin? Ap anch kwikal ni want ipau kukwet yiyukish yivud, ukutwish kutongin mutapu wakimba kwikal mangand anch kwikil kwau mimbu? Buku umwing (World Book Encyclopedia) ulondin anch yijil yidia mu sosiete utenchikinau nawamp yikasikening mulong yifanyidin kuchidij ni mu chisu chawiy chimwing kutek mimbu ku want ipau wa antu. Chinech chiswapelingap. Mulong wa diyingishin dined, tumen yijil yivud ni a avoka ni anzuj avud asadina usu wa kuyirumburil ni kuyisadin.

14 Yesu Kristu warumburila mutapu tukutwisha kwikal ni want ipau wakin. Walonda anch: “Anch en waziyilany malejan mam, en udiany in kwilejam chakin. Ukez kwijikany uyakin, chad uyakin ukez kukukwolany.” (Yohan 8:31, 32) Chawiy mulong wa kwikal ni want ipau wakin, tufanyidin kusal yom yaad. Chakusambish, tufanyidin kwitiy uyakin wafundishay Yesu. Cha kaad, tufanyidin kwikal in kwilejend. Kusal yom yiney kukutwinkish want ipau wakin. Pakwez atukwola mu usuk wa yik? Yesu walonda anch: “Muntu mwawonsu ukata kusal chitil udi muswik wa chitil.” Walonda kand anch: “Anch Mwan a Nzamb wakukwolany en, ukez kwikalany ant ipen chakin.”—Yohan 8:34, 36.

15. Mulong wak want ipau wakanay Yesu usadin anch twikala ‘ant ipetu chakin’?

 15 Want ipau wakanay Yesu kudi in kwilejend udi uwamp kusutamu want ipau ukimbinau antu avud nlel. Palonday Yesu anch, “anch Mwan a Nzamb wakukwolany en, ukez kwikalany ant ipen chakin,” wading wisambin piur pa kudiokal mu usuk wa chitil, usuk umwing uyimp wayimeshina kal an a antu mar nakash. Mu mutapu ik tudia mu usuk wa chitil? Chitil chikat kutuletin yom yiyimp nakash. Chikutwish kand kutukangesh kusal yom twija anch yidi yiwamp ap kusal usu nakash. Yibudikin yikat kwikal yisansena, ya ushon, ya mar ni kupwa chikat kulet rufu. (Rom 6:23) Kambuy Paul wova mutapu chading chisansena kwikal mu usuk wa chitil. (Tang Rom 7:21-25.) Ching kamu anch chitil achidiosh rawonsu chad lel twikal ni want ipau wakin wadingay nich Adam ni Ev.

16. Mutapu ik tukutwisha kwikal ant ipetu chakin?

16 Mazu malonday Yesu anch “anch en waziyilany malejan mam” mamekeshin anch ang tukimbin anch Yesu atukwola kamu chakin, tufanyidin kusal yom kanang. Yom ik? Mulong tudi in Kristu ipanina kal, twitunin kal ayinetu ni twatondin kal kwitiy mimbu yatekay Yesu mulong wa in kwilejend. (Mateu 16:24) Mudi mwakanay Yesu, tukwikal kamu antu akwodinau machuku ma kurutu am, chisu tukutambula yiyukish yawonsu ya yakupesh ya difut.

17. (a) Mutapu ik tukutwisha kwikal kamu ni musangar? (b) Yom ik tukwileja mu mutu wa mulong ulondwilaku ou?

17 Mulong wa kwikal kamu ni musangar, tufanyidin kuziyin ku malejan ma Yesu mudi in kwilejend. Anch twasal mwamu, tukudiokal kamu mu usuk wa chitil ni rufu. (Tang Rom 8:1, 2, 20, 21.) Mutu wa mulong ulondwilaku ou, tukwilej mutapu tukutwisha kusadin kwa manangu want ipau tukweta katat. Mwamu tukumushiman chikupu Yehova, Nzamb wa want ipau wakin.