Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 4 , 2017

Yom ik Yikudioshau Anch Want wa Nzamb Wez?

Yom ik Yikudioshau Anch Want wa Nzamb Wez?

“Mangand mayil ni kujiy pamwing ni yom yawonsu yikwetau nich antu ris, pakwez muntu mwawonsu ukata kusal rusot ra Nzamb ukez kapand chikupu.”—1 YOHAN 2:17.

MIMINY: 55, 24

1, 2. (a) Mutapu ik ufanikena mangand minam mayimp ni muntu muyimp ukimbinau kujip? (Tal chipich cha kwinsambishin.) (b) Mutapu ik ukwiyovau antu awonsu adia mwiur ni pansh pakusheshau ditenchik dined diyimp?

TONGIN yom yisadikina ey. Muntu muyimp nakash ukat kwendangan mu rukan pamulondwilau kudi atulam ni kutoy anch, “Muntu wafila kal ukat kwend!” Mulong wak ulondinau mwamu? Mulong ap anch muntu muyimp winou udi mwom ni umeken anch ukwet mujimbu uwamp, amurumburishin kal anch akumujip ni adi piswimp ni kumujip. Chidi kwau mudi wafil kal. *—Tal mazu ma kwinshin.

2 Mangand minam mayimp tushicha mafaniken ni muntu muyimp nakash ukimbinau kujip. Bibil ulondin anch: “Mangand mayil ni kujiy.” (1 Yohan 2:17) Yehova wakwatin kal mupak wa kushesh mangand minam piswimp ap, chawiy twij nawamp anch makujiy. Pakwez kudi chom chimwing cha usey chishalijadina chidia pakach pa nsudien ya mangand ni kumujip muntu  muyimp. Antu amwing akutwish kutong anch dirumburish dia muntu muyimp diwanyidinap ni akutwish kutadik, ni kuchingej anch kakumujipap. Pakwez, Yehova ndiy udi nzuj uwanyidina, ni mupak wend wakwatinay kal wa kushesh mangand minam udi kamu utentamina. (Kuvurik Yijil 32:4) Kujiyish kwend kukulabap. Kupwa kwa kujiyish mangand minam, antu awonsu adia mwiur ni pansh akwitiy anch dirumburish dia Yehova diading ditentamina. Kukwikal kwiswedish nakash!

3. Milong ik yinying yikudioshau pakweza Want wa Nzamb?

3 Kulond anch “mangand mayil ni kujiy” chirumburikin ik? Chirumburikin yom yiyimp yisadikina mu mwom wetu nlel. Yom yiney yawonsu yikupwa piswimp ap. Chinech chidi chikunku cha “rusangu ruwamp ra Want.” (Mateu 24:14) Mu mutu wa mulong winou, tukwisambin yom yinying yikudioshau pakweza Want wa Nzamb: antu ayimp, yitenchik yiyimp, midimu yiyimp, ni mashakamin mayimp. Payiney yawonsu tukwilej (1) mutapu ukweta yom yiney usu padi etu, (2) yom yikusalay Yehova piur pa yom yiney, ni (3) yom yikuswinkeshay pa yom yiney.

ANTU AYIMP

4. Mutapu ik ukwetau antu ayimp usu padi etu nlel?

4 Mutapu ik ukwetau antu ayimp usu padi etu nlel? Kambuy Paul walonda anch mu machuku ma kwinsudien, makez kwikal “ma mar nakash.” Kupwa wawejinaku anch: “Antu ayimp ni in [makasu] akez kuya kurutu nakash mu kuyip.” (2 Timote 3:1-5, 13) Ov, ukat kuman yom yiney? Antu avud pakach petu ayimeshin kal mar kudi antu ayimp mudi kuyitendish, katond ka ulombu wa chikit, ni kuyijip kudi antu ayimp. Amwing pakach pau kakupakishangap kwau kujindjik yom yau yiyimp yisadiningau. Akwau akat kutong mutapu wa kuyikwash antu, pakwez mu kulond win kashinsh adi antu ayimp. Mwawiy, ap anch kand kal atumeshangap mar kudi antu ayimp, pakwez adandamedin kwikal ni usu padi etu. Tukat kwov nayimp anch twatesh piur pa mutapu uyimp uyisadidinau an, antu apamina kal, nau antu akwau akad kwikal ni mutapu wa kwichidij ayinau. Antu inay ayimp akat kusal mu mutapu wa kumesh anch adi mudi annam ayidiany ap mudi ayilembil. (Jakobu 3:15) Cha musangar, Dizu dia Yehova ditwinkishin ruchingej.

5. (a) Mutapu ik uwamp uchidiau kal nich antu ayimp? (b) Yom ik yikuyishikena antu akulika kuswimp?

5 Yom ik yikusalay Yehova? Katat Yehova uyinkishin antu ayimp mutapu ufanyidina kuswimp. (Isay 55:7) Ap anch mangand minam akumajiyish kurutu oku, antu inay kand kal ayirumburisha bil. Yom ik yikuyishikena antu alikina kuswimp ni akwashina mangand minam chisu chikweza mar makash? Yehova washilamu kal anch ukuyijiyish antu ayimp awonsu pa divu. (Tang Kuseng 37:10.) Nlel, antu avud akat kujindjik yom yiyimp yisadiningau, ni yisu yivud kakuyipupangap kwau. (Job 21:7, 9) Pakwez Bibil utuvurishin anch: “Nzamb ukat kuman yaku ya antu awonsu, mes mend matadil kwawonsu kuyilay muntu ni muntu. Kwikil mididim ap [ndond yijingamina] yikutwisha kuyijindjik in kusal kuyip kudi Nzamb.” (Job 34:21, 22) Chawiy kwikil mutapu ap umwing wa kumujingam Yehova.  Ukat kuman yom yawonsu yisadinau antu ayimp. Kupwa kwa Armagedon, tukutwish kutal ndond yading yishichau antu ayimp, pakwez tukuyimanap. Akuyijiyish chikupu!—Kuseng 37:12-15.

6. Anany akushala anch antu ayimp ayijiyish, ni mulong wak riner ridi rusangu ruwamp?

6 Anany akushala anch antu ayimp ayijiyish? Yehova ushidilamu anch: “Itudishina akez kaswan ngand, akez kasangar nakash ni kuzangijal mu chisambu.” Kupwa mu kuseng ndiy winou tutangin anch: “Mwin kutentam mwawonsu ukez kaswan ngand, ukez kashakamamu chikupu.” (Kuseng 37:11, 29) Antu “itudishina” ni in “kutentam” awiy anany? In kwitudish adi antu ikepishina ilejidina kudi Yehova ni kumuziyin. Antu atentamina awiy akatina kusal yom yilondinay Nzamb anch yiwapin. Nlel mu mangand, mudi antu ayimp avud nakash kusutamu antu atentamina. Pakwez mu mangand masu, mukwikal ching antu itudishina ni atentamina, ni akukarumun divu kwikal paradis!

YITENCHIK YIYIMP

7. Mutapu ik ukweta yitenchik yiyimp usu padi etu nlel?

7 Mutapu ik ukweta yitenchik yiyimp usu padi etu nlel? Uyimp uvud usadikina mu mangand nlel kauletinap kudi antu pakwez auletil kudi yitenchik. Yitenchik ya chirelijon yikat kudimb ma miliyon ma antu. Chilakej, akat kudimban piur pa mutapu udiay Nzamb, akat kulond anch Bibil kadiap wa kuchingejin, ni akat kuyidimb antu piur pa machuku ma kurutu mulong wa divu nau antu. Mant mayimp makat kuletish njit ni makat kurish piur pa katond ka ulombu wa chikit ni kuyizengol atuzwendj nau antu akad mutapu wa kwichidij. Mant minam mikadin kal ni mapit nakash ni makwet usu mulong mamekeshin katond ap akat kumakatul milamu. Ma sosiete makweta ris makat kuyipish ndond yishichau antu, kushesh mapit matangau, ni makat kusal anch antu ataninamu, pakwez antu akemp awiy atwishina kwikal ampich. Chakin kamu, yitenchik yiyimp yawiy yidia musul wa mar majim masadikina mu mangand nlel.

8. Yom ik yilondinay Bibil yikushikena ku yitenchik yimekena anch yikwet usu padiau antu avud nlel?

8 Yom ik yikusalay Yehova? Mar makash makusambish chisu usu wa politik ukusambisha kurishikish yitenchik ya relijon wa makasu, utazukinay Bibil anch mband wa masandj ukweta dijin anch Babilon Mujim. (Kujingunik 17:1, 2, 16; 18:1-4) Yitenchik yiney ya chirelijon akuyijiyish kamu. Pakwez yom ik yikushikena kand ku yitenchik yikwau yiyimp? Bibil uyifanikeshin ni mikandu ni matung mulong yimeken mudi yikwet usu ni yikasiken. (Tang Kujingunik 6:14.) Pakwez uwejidinaku anch mant ni yitenchik yawonsu yakad kukwash Want wa Nzamb akuyijiyish. Chinech chawiy chikwikala chikunku cha nsudien ya mar makash. (Jeremiy 25:31-33) Kupwa kwa yom yiney, kukwikalap kand yitenchik yiyimp!

9. Mulong wak tukutwisha kwikal ni kashinsh anch divu disu dikwikal ditenchikinau nawamp?

9 Yom ik yikuswinkeshau pa yitenchik yiyimp? Kupwa kwa Armagedon, kukwikal kand ditenchik dikwau panap pansh? Bibil ulondin anch: ‘Etu tukat kuchingej maur masu ni mangand masu mudi mwashilayimu Nzamb. Chad mwinimwa mwawiy mukeza kwikal kutentam.’ (2 Pita 3:13) Maur ni mangand makur mawiy mant mayimp ni antu atakedinau. Kupwa kwa kumadiosh, yom  ik yikumaswinkana? “Maur masu ni mangand masu.” Maur masu marumburikin Want usu, usadinau kudi Yesu nau antu 144 000 akuyikela nend pamwing. Divu disu dirumburikin antu akuyikelau kudi Want wa Nzamb. Yesu nau antu akuyikela nend akumwimburij kamu Yehova Nzamb, udia Nzamb wakad kanvundangesh. (1 Korint 14:33) Chawiy “mangand masu” akumatenchik nawamp. Mukwikal antu awamp akulama yom nawamp. (Kuseng 45:16) Antu inay akuyitakel kudi Kristu nau antu 144 000. Tongin chisu chikupwa yitenchik yiyimp ni kuyiswinkan kudi ditenchik dimwing dikweta antu adia mu umwing ni kakutwishap kudiyipish!

MIDIMU YIYIMP

10. Midimu ik yiyimp yisadikina nakash mwi ndond ushicha, ni mutapu ik yikweta usu padi ey ni dijuku diey?

10 Mutapu ik ukweta midimu yiyimp usu padi etu nlel? Tushich mu mangand mwizwila yisal ya masandj, kuburen win kashinsh, ni chisum chipandakena chimeken nakash. Kwipuwangej kwa mangand minam kusadin yom yiney kwikal yiwamp pakwez abwambwidin kwi mbil ja Yehova ja yom yidia yiwamp ni yiyimp. (Isay 5:20) Anvaj afanyidin pakampwil kurish mulong wa kuyichidij anau ku yibachikin yiney yiyimp. Chawiy, in Kristu awonsu akin afanyidin kusal usu nakash mulong wa kuchidij urund wau wa piswimp ni Yehova mu mangand makad kulimish mbil ja Nzamb.

11. Yom ik twilejidina ku dirumburish dia Yehova mulong wa Sodom ni Gomor?

11 Yom ik yikusalay Yehova piur pa midimu yiyimp? Shinshikin yom yasalay Yehova mulong wa yom yiyimp yasadikang mu musumb wa Sodom ni Gomor. (Tang 2 Pita 2:6-8.) Lot wading muntu utentamina, ndiy ni dijuku diend amana mar nakash mulong wa yom yiyimp yasalangau antu adingau nau pamwing. Yehova wajiyisha misumb yiniya ni wapwisha yom yiyimp yasadikang mwinimwa. Pakwez ‘wateka kand chilakej’ mulong wa antu ayimp nlel. Mu mutapu wapwishay Yehova yisal yawonsu yiyimp mu chisu chinicha, mwawiy mukupwishay kand nlel pakujiyishay mangand minam.

12. Midimu ik yimwing yikwikalaku mu machuku ma kurutu pakujiyishau mangand minam?

12 Yom ik yikuswinkeshau pa midimu yiyimp? Mu mangand masu, tukukwatikan nakash ni midimu yivud yiletishina musangar. Chilakej, tukukarumun divu kwikal paradis ni tukutung yikumbu mulong wetwetu ayinetu ni mulong wa akatish netu. Tukwak kand mamiliyon ma antu akuvumbuka ni tukuyifundish piur pa Yehova ni piur pa yom yawonsu yisadiningay mulong wa antu. (Isay 65:21, 22; Midimu 24:15) Mu chisu chinicha, tukukwatikan ni midimu yikutuletina musangar ni yikumutumbisha Yehova!

MASHAKAMIN MAYIMP

13. Yibudikin ik yadiokala ku kubwambwil kwa mu Eden?

13 Mutapu ik ukweta mashakamin mayimp usu padi etu nlel? Mangand mizwil nau antu ayimp, yitenchik yiyimp, ni midimu yiyimp yitwadina ku mashakamin mayimp. Yom mudi njit, uzwendj, katond ka ulombu wa chikit, mayej, ni rufu yitumeshin etu awonsu mar nakash. Mashakamin minam masambisha mulong Satan, Adam, ni Ev amubwambwila Yehova. Chawiy, etu awonsu tumen mar mulong wa kubwambwil kwau.

14. Yom ik yikusalay Yehova mulong wa mashakamin mayimp?

 14 Yom ik yikusalay Yehova mulong wa mashakamin mayimp? Tushinshikinany yilakej yimwing. Yehova washidinamu kal kupwish njit jawonsu. (Tang Kuseng 46:8, 9.) Ukupwish mayej. (Isay 33:24) Ukupwish rufu chikupu ni chikupu. (Isay 25:8) Ukupwish uzwendj. (Kuseng 72:12-16) Yehova ukudiosh kand mikadil yikwau yiyimp yiletishina ushon mu mwom nlel. Ukudiosh kand yibachikin yiyimp ya Satan nau ayilembil end!—Efes 2:2.

Tongin bil mangand makad kwikal ni njit, mayej, ap rufu! (Tal paragraf wa 15)

15. Yom ik yimwing yikudioshau chikupu ni chikupu kupwa kwa Armagedon?

15 Tongin bil mutapu chikwikala anch twashakam mu mangand makad kwikal ni njit, mayej, ap rufu! Kukwikalap amasalay, mat, ap kuvurik kand njit. Tukwikalap kand ni kuswir kwa ma opital, adokiter, amingang, ma morgue (yikumbu ya kulamin afu), ap jinzay. Kukwikalap kand chisum, chawiy tukwikalap ni kuswir kwa ampurij, yom ya kutubabesh nich, ap pamwing tukufungap atufur ku yis yetu! Yom yiney yiyimp yawonsu yituletidina yakamish nakash akuyidiosh kamu chikupu.

16, 17. (a) Mutapu ik ukwiyovau antu akupanda ku Armagedon? Let chilakej. (b) Mutapu ik tukutwisha kwikal nich kashinsh anch tukupand kupwa kwa kushesh mangand minam makur?

16 Mwom ukwikal mutapu ik pakudioshau mashakamin mayimp? Chiswapelap kutongin. Twashakamin kal mu mashakamin mayimp mu mivu yivud chawiy tukutwishap kwijik uvud wa yakamish tumening. Chilakej, antu ashiching piswimp ni ndond yikata kwimen train, kakutwishap atesh masok nakash. Ni antu ashiching piswimp ni dishitil kakutwishap atesh madjimb nakash. Pakwez, chisu chikudioshay Yehova yom yiney yiyimp, kukwikal kwiswedish nakash!

17 Yom ik yikuswinkana yakamish yawonsu tudia nich katat? Kuseng 37:11 ulondin anch: “Akez kasangar nakash ni kuzangijal mu chisambu.” Chikasikeshin mudi ik kwijik anch yawiy yom yikatinay Yehova mulong wetwetu! Mu chisu chinech cha yakamish, sal yawonsu ukutwisha kusal mulong ushala piswimp ni Yehova ni dirijek diend. Ruchingej rey mulong wa machuku ma kurutu ridi ra usey, pa chinech tong nakash piur pa ruchingej riner, ikal nich kashinsh anch ridi rakin kudi ey, ni yilejamu antu akwau. (1 Timote 4:15, 16; 1 Pita 3:15) Mu kusal mwamu ukwikal nich kashinsh ang anch mangand minam amajiyish, ey ukupand ni ukwikal ni musangar chikupu!

^ par. 1 Paragraf winou urumburil yom yasadikang nakash mu jinkan jimwing ja mu États-Unis kwasutin kal mivu yivud.